MATEWUS 11

1Hay li ma Yesu vul hagata tam sa hatayna valamu sa doogo yam ma'na vulla, nam kal goy ɗawni pa, kay hata, kay kus yoboyna kaw hay hoyok-ziyna visiya.

SUMUN TUN CAW TEL LOPNA VI YESU

Jobta vi Yohana ma Baptisma tam Yesu

Luk 7:18-33

2May hay li ma Yohana ma Baptisma ka hay daŋgayna, nam hum labara kay lopna vi Kristu. Nam cuk sa hatayna valamu kay tuɗ di tam Kristu ala: 3Naŋu mi nam ma min ma'a lebo numa'a ma cub sa mara su? 4Yesu hot dita disiya: Tuɗgiya, digi Yohana kay sle ma nigi humumna, ma nigi wumna kaw: 5Sa dukina muɗi wi'e, sa dirlayna muɗi poya, sa moy-kuturuna yeray goyo, sa gidiŋŋa muɗi huma, sa mitina fokay kulo'o; labara ma firina ka kusis tam sa hawna. 6Sle'ta ka kay sa ma nan muɗ kiram bisɗi.#11:6 Hay Grekŋa di ala «sle'ta ka kay sa ma puk gaa kuɗan naɗi».

7Hay li ma sa hatayna vi Yohana kalawa, Yesu tun caw law goy kay Yohana tam sumun ala: Nigi kal goy hay fulda kayni kay ɗuwum mi mige? Cerewna ma geɗ kuɗ simeɗna su? 8Nigi kal goy kayni kay ɗuw mige? Kay ɗuw sa ma cuki hiɗi sligara ma ŋaan su? May nisi sa cuk sligar ma ŋaana ka vo hay ziyna vi muliyana. 9Nigi kal goy kayni kay ɗuw sa ma jobta-Lawna su? Awa, nan fi digi ala nam suw sa ma jobta-Lawna. 10Nam kayni mi ma ɗot di kalam ala:

Humaŋu nan gi sa ma sunda vanu vok iraŋu,

Nam ma par hagata goy vokaŋu.#11:10 Fi kayni hay Mal 3:1.

11Nan digi gasita: Jar nisi sa boyn vuɗsin kaf sa ma ŋol suw Yohana ma Baptisma bay fok kulo tuwa, may sa ma goora hay mulda-wuralawna suwum namu. 12Hay liyna vi Yohana ma Baptisma pa ta-ta wulini, mulda-wuralawna muɗi dono'o, nisi sa cuk haya'na kirit hiɗi dono'o. 13Kay sa jobta-Lawna kaf hiɗi gatta kaw di goy kay sle ma vokayna ta-ta tam Yohana; 14La nigi min vi kayni, namu mi Eliyas ma min ma'a. 15Sa ma humam ka'a kay huma, nam ma huma.

16Jaf-sum nisin kayni nan ma ŋrasi hiɗi gige? Nan ma ŋrasi hiɗi gurosgurayna sa lak hay lumuna siwel tam nuroysin ala:

17Numa'a buw difna, may nigi min pir nulɗi,

Numa gi nul ma yorta, may nigi min yor tuwgiɗi.

18May hay li ma Yohana ma'a, nam tiɗi, ciɗi kaw, may nisi di'e: fuliyan ka kalamu. 19Wulini goora vi sana maawa, nam ti'e ci'e, may nisi di'e: Ɗuwgi sa ma haramna ma ci vinna tige, boniyomna si sa tar vun-lumuna hiɗi sa sulukŋa. May yalda muɗawa goy ɗigere kuɗ lopna valamu.

Yesu ka law tam sumuna

Luk 10:13-16

20Hay na'ta Yesu tun caw law dono ŋolo tam hoyok-ziy ma nam li ŋol ɗekka valam hayna, kay sum sa hayamna min hamɗi. 21Joot kagu Korasin, joot kagu Betsayda, kay lop ŋulo ma gaŋeraŋ ma nan lum haygin lakŋi, lali nan lum liy hay Tirus hiɗi Sidon, nisi hamay ɓa-ɓa, lak dawni hay sligar bolla hiɗi butuwna kaw. 22May nan digiya: Hay buura vi kitat ɗawni, nigi ma fi joot suw Tirus hiɗi Tirus hiɗi Sidon. 23Nak Kapernawum, nak ma wul kulo'o ta-ta dukalawna su? Yag ma hot gaa'a ta-ta hay liyna vi sa mitina, kay lop ma gaŋeraŋa ma li hayagŋa lum liy hay Sodoma ni, ta-ta vaydi kaw Sodoma bay ɓulaka. 24May nan digiya: Hay buura vi kitata nigi ma fi joot suw Sodoma.

Labara ma firina ɗeki goy kir gurosgurayna

Luk 10:21-22

25Hay na'ta Yesu sli ditiya di'e: Nan gaŋ deɓe bunu, mul ma wuralawna ma nagatna kaw, kay naŋ ŋay slen kayni kir sa yalla hiɗi sa hum caw yoboyna, may naŋ vulum goy haraŋi kir gurona. 26Awa bunu, kay a li nala kayni may goy hay varta vaŋ pa.

27Slen kaf vulanti ay mi buni pa, sa ma wi goora mayɗi, wum mi bumna kepe; sa ma wi bumna mayɗi, wum mi goora kepe, hiɗi nam ma goora min vulum goy haraŋi kiramu.

28Nigiyay tanu, nigi kaf sa makaya, hiɗi nigi sa jak ma nekŋa tuni kigina, nan min vulgi tun-suku. 29Sligi jukŋa van kigiya, vigi hatta vanu, kay nanu mi sa ma ŋali, dikan ŋal klasi kaw, nala nigi ma fi tun-sukka kay ciwta vigiya. 30Kay jukŋa van kayni golɓoto, jakŋa vanu hefteŋe kaw.

Currently Selected:

MATEWUS 11: Massana

Highlight

Copy