MATEWUS 9

Yesu yer sa ma hurɓulin goyo

Mark 2:1-12; Luk 5:17-26

1Yesu jik kulo hay lumna, dol goloŋ hay niy-lumna, ta-ta nam co hay hoyok-ziyna valamu. 2Nisi bur sa ma hurɓulin hay raŋgawna, maram talamu. Hay li ma Yesu wi vida visiya, nam di sa ma hurɓulina, goora vanu, vaŋ dikaŋ ɗeŋe, sulukŋa vaŋ cukawa goyo. 3Hay li ma sa wi-ɗota wi kayni, nisi di'e: San zawni ka ŋul Lawna. 4Hay li ma Yesu wi varta visiya, nam di'e: Nigi var joo'o hay dikgiya kay mige? 5Bay lop kayn mi ma di ala sulukŋa vaŋ cukawa goyon lebo, ma di ala fokaŋ kulo'o, slaŋ va ma buura vaŋu tuɗaŋun su? 6May kay a nigi ma wi ala goora vi sana gaŋeraŋa valam ka gaa kay nagata kay cuk sulukŋa vi sumuna. Nam di tam sa ma hurɓulina: Fokaŋ kulo'o, slaŋ va ma buura vaŋu, hotaŋ vo vaŋu. 7Nam fokay kulo'o, kalay vo hay ziyna valamu. 8May hay li ma sumuna wi kayni, nisi li nari, nisi subur Lawna ma vul donota ki kayn nala mi sumuna.

Yita vi Matewus, lawta vi laata

Mark 2:13-22; Luk 5:27-39

9Hay li ma Yesu raw vokom gine neeɗa rawna, nam wi san kep yum Matewus, nam musi gaa hay liyna vi sa tar vun-lumuna. Nam dumu: Tapaŋay kuɗanu. Nam fok kulo'o, tap kuɗumu may. 10Van li nala, hay li ma Yesu mus ti vo hay ziyna, sa tar vun-lumuna ŋolo ma'a, lak ti hiɗi namu hiɗi sa hatayna valamu. 11Hay li ma sa Farisena wi kayni, nisi di tam sa hatayna: Bum-yalla vigiya ti fun hiɗi sa sulukŋa hiɗi sa tar vun-lumun kaw kayni kay mige? 12May hay li ma Yesu hum kayni, nam di'e: Sum sa bay-moyna may gar doktorɗi, may gar doktor kayni si sa moyn tisina. 13Tuɗgi gargi caw dit kayni: Nan mina' ti slugota, may mi ɗifinnaɗi. Kay nan ma kayni kay yi sa ɗigeraɗi, may sa sulukŋa.

14Kay na'ta sa hatayna vi Yohana ma talamu dumu: numa'a hiɗi sa Farisena luma laat ŋolo, may sa hatayna vaŋu li laatɗi kayn kay mige? 15Yesu disiya: Ɓosiyom juf cat-goota as yora hay li ma nam ka jarsi damna su? May buura ma ma'a hay li ma juf cat-goota ma vumis goy jarsi pa, hay na'ta nisi ma li laata.

16Sa fi duɓ sligar ma wulina vun sligar ma busaynɗi, kay la naɗi sligar ma busayn ɗawni ma jet ma wulin goy kuɗumu. 17Sa fi sel vin ma wulina hay tiliy ma busaynɗi, kay la naɗi tiliyn ɗawn ma haw goyo, vin ma ɦok goyo, tiliyn ma ɓulak goyo kaw, vin ma wulina selem hay tiliy ma wulina, nala nam ma' pet fi ɓulakɗi.

Dayta-kulota vi goora vi Jayrus, yerta-goyta vi cat ta li busat doogo yam ma' hiɗi moyna

Mark 5:21-43; Luk 8:40-56

18Hay li ma nam ka di yoboyn kayni tisiya, sa ma ŋol hay sinagogayna kep ma talamu, girif gaa vokomu di'e: Goota vanu mit wulini wulini, may naŋ naŋaya, tunaŋ ɓaŋ ka' tage, kay na' ma muɗ iriya. 19Yesu fok kulo'o tap kuɗumu, hiɗi sa hatayna valamu kaw.

20Ɗuw ma kayni, cat kep ta moy ma kus busuwn goyna liy ta' busat doogo yam ma', na' co kulo bugolom goboyo, na' jo vun-sligara valamu. 21Kay na' var kalaf haya' ala, la nan jom mi sligara valam ɦawa kaw, nan ma yer goyo. 22May nam muɗ iram bugolomu, hay li ma nam wa'a, nam di ta'a: Goota, vag dikag ɗeŋe, vida vag suɗagawa, wulini wulini cata muɗi goy ŋaa'a.

23Hay li ma Yesu co vo vi sa ma ŋolla hay sinagogayna, nam wi sa buw difna hiɗi sa dakayna law gijum-gijum'. Nam di tisiya: 24Nigi vigi tuwgi goyo, kay goot-cata tay mitiɗi, may na'a kalay sene. Nisi cen kuɗum ŋolo. 25Hay li ma nam digiɗ sa tokayna goy digiɗna, nam kal kalafi va' ɓa' kulo'o, goota fokay kulo'o may. 26Labara kayni meray goyo hay nagat na'ta kaf.

Yer-goyta vi sa dukin ma' hiɗi sa ma ful kalamna kepe

27Hay li ma Yesu ka raw vokomu, sa dukin ma' tuɗ kuɗumu, nisi siwela di'e: laŋ slugota kuma'a lige, naŋ goora vi David.

28Hay li ma nam co kalafi hay ziyna, sa dukina ma talamu. Yesu disiya: Nigi viy ala nan as kay li kayni su? Nisi dumu: Awa, Bum-Sumuna. 29Wulini nam tun ɓalam hay irsiya di'e: Van ma li tigiya kuɗ vida vigiya. 30Irsi mali goyo. Yesu lawsi dono'o ala nisi ma li ŋali kay hin sa wi kaynɗi. 31May nisi kalay goyo, jok labara valam goyo hay naga na'ta kaf.

32Hay li ma nisi kal ka kal goyo, nisi mar talamu sa ma gidiŋŋa ma ful kalamna. 33Hay li ma ful ma joona kal goyo hay sa ma gidiŋŋa kalla, nam tun caw lawa, sumun muɗ ɦuyum', nisi di'e: Sa bay wi va ki kayn nala hay Israyel jewe. 34May sa Farisena di'e: Nam digiɗ fuliyan ma joona goyo hiɗi mulla vi fuliyan kaw.

YESU KA ƁAK TAM SA HATAYN SA DOOGO YAM MA'NA

Vilekka vi sa hatayna

Mark 3:6-19; Luk 6:12-16; 10:2

35Yesu ŋuy hay hoyok-ziyn ŋulona hiɗi hoyok-ziyna gurayna pet kaw, hat sumuna hay sinagogayna visiya, kus labara ma firina vi mulda, sa moyna hiɗi sa maŋayn kaf nam muɗsi goy ŋaa'a. 36May hay li ma nam wi sumuna, nisi muɗ kiram haw ŋolo, kay nisi makaya, sutaysi toy ŋolo ki fok-dimina ma bay ŋomda nala. 37Nam di tam sa hatayna valamu: Feɗna ka ŋolo, may sa li lopna ka kiɗaya. 38Kay na'ta nigi ma siɗaw bum-feɗna kay nam ma cuk sa li lopna hay feɗna valamu.

Currently Selected:

MATEWUS 9: Massana

Highlight

Copy