1 MULIYANA 19

Eliyas kulo kay hiɗiyta vi Horeb

1Akab mar labara ma Eliyas lumna tam Yesabel kafe, ir nanige nam ci sa jobta goyo hiɗi kew-gaferaŋa. 2Yesabel gi sunda tam Eliyas ala: Jifini hay fatta ki kayn nala, la nan caŋ goyo ki naŋ ci sa jobta kayn naɗi, lawayn ma lan joo'o hiɗi diksi noŋ kafe. 3Hay li ma Eliyas wi lawt ki kayn nala, nam fokay kulo'o kaliya, kay suɗ irita valamu. Nam co hay Ber-Seba vi Yuda, nam hin sa ma sunda valam haya. 4Nam kay tuwam kalay goy hay fulda, nam busa tuɗ he', ɗawni nam mus gaa kuɗ gu-malanjana, nam job mitta, nam di'e: Wulin kayn asawa yo, Ma-Vatɗina, slaŋ ciwta vanu, kay nan may ŋaa'a suw sumiyanɗi. 5Nam bur gaa kuɗ gu-malanjana cab bur sene. Ɗuw na kayni, sunda-wuralawn jomu, ka dum ala: Fokaŋ kulo'o, taŋu. 6Nam ɗuw na kayni hambul ma cufum hay hiɗiy ma giy kuna ka tuni kulo kalam ta', genda niyna ka ta kaw. Nam ti'e ci'e, bugolda hot bur gaa'a may. 7Sunda-wuralawna vi Ma-Vatɗina co talamu hay sem ma ma'na, jomu ka dum ala: Fokaŋ kulo'o, taŋu, kay hagat ta vokaŋga ka gine'e. 8Nam fokay kulo'o, ti'e ci'e kaw; hiɗi donota ta nam fa' kuɗ tin namna, nam tuɗ ir buur dok-fiɗi ta-ta co tam hiɗiyta vi Lawna, hay Horeb.

9Hay ɗawni, nam kal hay zul hiɗiyna, nam cap bur tos'. Bugol kayni Ma-Vatɗina ka di yoboyn talam ala naŋ lum tan kayn mi mige Eliyas? 10Nam hot dita: Nan ka li ciwerta ŋolo kay Ma-Vatɗina vi vok-ma-duura; kay gurona vi Israyel yisi jok bonota vaŋawa goyo, giwin-ma-ɗifinna vaŋu nisi ɦoomawa gaa'a, sa jobta vaŋu nisi cisiyawa goyo hiɗi kew-gaferaŋa, hini wulin kayn mi nan kepe, nisi ka gar a can goyo kaw. 11Ma-Vatɗin di'e: Kalaŋay goyo, colaŋ goy kay hiɗiyna vok ir Ma-Vatɗina. Ɗuw na kayni, Ma-Vatɗin jika. Vok Ma-Vatɗin kayni, simeɗn ma ŋolo ma dono'o biwa, nam jet hiɗiyn goyo, munum goyo kaw, bugol simeɗn kayni, wiira vi nagat li'e: Ma-Vatɗin may jar nagat ma wiiraɗi. 12Bugol wiira vi nagat kayni, kuta, Ma-Vatɗin may hay kutɗi, bugol kut kayni, mi suwana ma lim-limna, ma ir hefteŋe kaw. 13Hay li ma Eliyas hum kayni, nam kusuɓ iram hiɗi sligara, nam kalay goyo, col goy vun zul hiɗiyna. Ɗuw na kayni, del mara ka di talam ala: Naŋ lum tan kayn mi mige Eliyas? 14Nam hot dita: Nan ka li ciwerta ŋolo kay Ma-Vatɗina Lawna vi vok-ma-duura, kay gurona vi Israyel, noy bonota vaŋawa goyo, giwin-ma-ɗifinna vaŋu nisi ɦoomawa gaa'a, sa jobta vaŋu nisi cisiyawa goyo hiɗi kew-gaferaŋa; hini iri mi nan kepe, nisi gar a yaw irita van goyo lo. 15Ma-Vatɗin dumu: Tuɗaŋu, slaŋ hagata vaŋu hay fulda ta-ta hay Damas, hay li ma naŋ coowa ɗawni, naŋ ma ɦok mul kay Hazayel kay tunum mul kay siriya. 16Naŋ ma hok mul kay Yehu goora vi Nimsi kay tunum mul kay sa Israyella kaw, naŋ ma ɦok mul kay Elise, goora vi Safat, ma hay Abel-Meholana, kay nam ma vurna mi ma jobta hay baŋalaŋu. 17Ki kayn nala, la sa hulotawa goy vun kew-gaferaŋa vi Hasayele ni, Yehu ma calam goyo, la sa hulotawa goy vun kew-gaferaŋa vi Yehu ni, Elise ma calam goyo may. 18May nan ma hin sumun birim siɗiya hay Israyel, nisi kaf sa bay girif gaa vok Baal, sa bay coɗ vun Baal tuwa.

Elise fi yita kay vurna hay Baŋal Eliyas

19Eliyas fokis ɗawn pa, nam fi Elise goora vi Safat, fum zum zaw. Luway ma zumna ka vokom jub-jub' doogo yam ma', nam kay tuwam ka kuɗ luway ma doogo yam ma'na. Eliyas co talamu, nam wat sligara valam kelemu. 20Elise hin luwayna valamu, jaŋ kuɗ Eliyas, ka dum ala: Hinan tuɗ gi deɓ mi bunu hiɗi sunu, bugolda nan ma tapis kuɗaŋu. Eliyas hotom dita: Tuɗaŋu, bugolda hotaŋiya: Kay naŋ ma var kay va ma nan lum taŋu. 21Hay li ma nam kal goy gine hiɗi Eliyas kalla, nam yaw luway ma' lum ɗifini, nam zalam sliwam hiɗi gu ma juni kuɗumna, nam vul tin mi sumuna. Bugol kayni nam fok kulo'o tap kuɗ Eliyas, tun caw sunumu.

Currently Selected:

1 MULIYANA 19: Massana

Highlight

Copy