1 MULIYANA 18

Eliyas ka vok Akab. Sa jobta vi Baal

1Buur kalay ŋolo, hay busata ɦidita, Ma-Vatɗin ka di yoboyn tam Eliyas ala: Tuɗaŋu, vulaŋ tuwaŋ kir Akab, kay nan min hin niyn si gaa kay nagata. 2Eliyas kaliya, nam co vok Akab. Hay na'ta kayni mayt ka li ŋolo hay Samariya.

3Akab gi sunda kay yi Abdiyas ma ŋolla vi ziyna valam aya. Abdiyas kayni nam li nar kuɗ Ma-Vatɗin ŋolo; 4hay li ma Yesabel vat sa jobta vi Ma-Vatɗin goy kayni, Abdiyas yaw sa jobta kis, nam kaasi irsi goy dok-vasl dok-vasl, ŋaysi jar zul-hiɗiyna, nam ka vulsi funa, vulsi niyna kaw. 5Akab di tam Abdiyas: Tuɗaŋ ŋuyaŋ nagat kaf, ɗuwaŋ kaara hiɗi liyn ma niyn riŋ goyna kaf; naŋ as fi hatna klasige, kay kulumayna vaya hiɗi kulumay-kurona ma hin iriya, kay nay ma ŋat farayna vay goy kafɗi klasige. 6Nisi ɓuraw nagat jarsiya kay ŋuya'a; Akab sli hagata valam kay tuwamu, Abdiyas sli hagata valam kay tuwamu may.

7Hay li ma Abdiyas ka tuɗ hay hagata, Eliyas tupa digamu. Hay li ma Abdiyas wumu, nam dab vokom gaa'a, ka di ala zawni mi naŋ mulanna Eliyas su? 8Nam hot dit ala mi nanu, tuɗaŋu, daŋ tam mulaŋŋa ala Eliyas zaway goyni. 9Abdiyas di'e: Nan lum mi suluk mige a naŋ vulan hay ɓam Akab kay can goy ɗawni? 10Hay sem ma Ma-Vatɗina Lawna vaŋu! Nagat tara'a lebo mulda ta mulanna bay cuk sum haya' kay garaŋ tayɗi; may hay li ma sum sa hay nagatna daawa ala naŋ may tanɗi, nam halaf sum sa hay nagat na'ta ta faŋ haya'ɗita. 11Wulin kayn naŋ min ala nan ma tuɗ di tam mulanna ala Eliyas zaway goyni ɗawn hiɗi yal mige? 12Wulin kayni la nan hinaŋ ɗawni, Ŋusta vi Ma-Vatɗin ma kalaŋ hay liyn marige kla; nan ma tuɗ di Akab, la nam faŋɗi, nam ɗawn ma can goyo. May nan li nar kuɗ Ma-Vatɗina hay joriyota van pa. 13Slen ma nan lumu hay li ma Yesabel ci sa jobta vi Ma-Vatɗina naŋ may humumɗi su? Sum sa jobta vi Ma-Vatɗin kis nan ŋaysi goyo, kaasi irsi goy dok-vasl dok-vasl kay ŋaysi hay zul hiɗiyna, nan ka vulsi tina, vulsi cina kaw. 14Wulin kayni naŋ ka di ala: Nan ma tuɗ tam mulanna dum ala Eliyas zaway goyni. Nam ɗawn ma can goyo! 15May Eliyas di'e: Hay semda vi Ma-Vatɗin ma nan ka sunumna, vaydi kayni nan ma co vok Akab.

16Abdiyas kalay vok Akab, nam dum labar namna. Ki kayn nala Akab kalay ŋaf ir Eliyas. 17Hay li ma ir Akab tun kay Eliyas kayn nam dumu: Zawni mi naŋ ma mar hiwirta jar sum sa Israyel kayn su? 18Eliyas dumu: Nan may mar hiwirta jar sum sa Israyel noŋɗi, mar hiwirta kayni mi naŋu hiɗi jafna vi buŋu, kay naŋ noy vun-ma-gatna vi Ma-Vatɗinawa goyo, naŋ kalay goy kuɗ Baal. 19Wulin kayni tokaŋ sum sa Israyel kaf katanu, kulo kay hiɗiyta vi Karmel, tapay hiɗi sa jobta vi Baal sa kis-fiɗi hiɗi diram dok-vaslna, hiɗi sa jobta vi Astarte sa kis-fiɗina, sa ka ti fun kay tablena vi Yesabella.

20Akab cuk sumun kat gurona vi Israyel kafe, nam tok sa jobta kulo kay hiɗiyta vi Karmel. 21Nala Eliyas co tam sumun kaf, nam ka disi ala: Nigi ma lak hay gal ma' ma' nala ta-ta lancitige? La Ma-Vatɗin mi Lawna, vigi kuɗumu, la Lawna vigi mi Baal, vigi kuɗumu may. Sumun min hotom ditɗi. 22Eliyas di tam Sumun ala: Hini sa ma jobta vi Ma-Vatɗina kayn mi nan kepe, sa jobta vi Baal kis-fiɗi hiɗi diram dok-vasl. 23Nigi ma vulma luway takalin ma', hinsi vi put ma kepna, kaam iram goy ne' ne', hinsi lakam kulo kay guna, may ŋal ku kuɗumɗi; nan kaw, nan min kot put hena, nan ma burum kulo kay guna, nan as ŋal ku kuɗumɗi lay. 24Bugol kayni, yigi sem Lawna vigiya, nan kaw, nan ma yi sem Ma-Vatɗina. Lawn ma min hot dit hiɗi kut ɗawni, ma li mi Lawn ma gasina, ki kayn nala sumun kaf ka hot dit ala: Kayn ŋaa'a.

25Eliyas di tam sa jobta vi Baal: Vigi put takali ma ir vigina, ŋatgit jewe, kay nigi si sa ŋol suwna, yigi sem lawna vigiya; may tungi ku kuɗumɗi. 26Nisi vi put ma vulum ir misina, nisi kotomu, nisi tun caw yi sem Baal, tun caw hay graw culumta pa ta-ta hay falayta. Nisi ka di ala: Baal, humma humge, may del sa mayɗi lay, hot dit tayɗi lay. Nisi ka pir kulo vok giwin-ma-ɗifinna ma nisi kotomna. 27Hay li ma fatta zumalawa, Eliyas tun caw pansiya, nam ka di ala: Siwelgi hiɗi delgi kulo ŋolo, kay nam mi lawi, nam ka varis kay va'a, lebo nam ka hiɗi lopo, lebo nam kalay rogoyo; li ŋalɗi fum kalay sene, nam ma zliy kulo'o. 28Nisi ka siwel hiɗi delsi kulo ŋol lo, ta-ta kuɗ data visiya, nisi har tuwsi goyo hiɗi kew-gaferaŋa hiɗi kawayna, ta-ta busuwn jaŋ goy tisiya. 29Hay li ma falay calakka vatawa, nisi tun caw di yoboyn jobta ta-ta co hay liyn ma li vulda. May nisi may hum del saɗi, hot-dit tayɗi, sa ma jak humam tisi mayɗi kaw.

30Wulini Eliyas di tam sumun kaf ala: Nigiyay goboy tanu. Sumun kaf co goboy talamu. Giwin-ma-ɗifinna vi Ma-Vatɗina ma ay ɦoy gaana Eliyas hot jakam kulo'o. 31Nam yaw hiɗiyn doogo yam ma' kuɗ ŋaɓta vi jafna vi gurona vi Yakub, ma Ma-Vatɗin di talam ala «Semda vaŋu ma ya' Israyel»,#18:31 Ct 32:28. 32hiɗi hiɗiy namna nam in giwin-ma-ɗifinna kep hay semda vi Ma-Vatɗina, nam jugoɗ zul goy galamu, zul namna tasata ŋaɓ wan ma jafna ma' as hobomu. 33Nam jak gun kulo'o, ka putn goy ne' ne', burum kulo kay guna. 34Bugolda nam di'e: Hobgi genda fiɗi hiɗi niyna, ɦokgit kulo kay put ma ka ŋalla hiɗi guna. Nam di'e: Ligit sem mara kep lo. Nam di'e: Ligit sem ma ma'na, nisi lum sem ma ma'na lo. Lo nam di'e: Ligit sem ma ɦidina lo, nisi lum sem ma ɦidina lo. 35Niyn ka jaŋ goy tam giwin-ma-ɗifinna, nisi hob zulla hiɗi niyn kaw.

36Hay li ma liyn asawa kay mar vulda, Eliyas ma jobta ɦur kulo'o, nam di'e: Ma-Vatɗina, Lawna vi Abraham, Lawna vi Isaak, Lawna vi Israyel, hin sumun vaydi wi ala naŋu mi Lawna vi Israyel, hinsi wi ala nan mi sa jobta vaŋu, slen ma nan lum kafn kayni hiɗi yoboyna vaŋu. 37Naŋ human humge, Ma-Vatɗina, naŋ humanu, kay sumun tani ma wi ala hotsi diksi ay taŋu mi naŋ Ma-Vatɗina Lawna visiya.

38Ki kayn nala kuta vi Ma-Vatɗin nigay gaa'a, na' ŋal ɗifinna goyo ŋal guna, ŋal hiɗiyna hiɗi nagana, niy ma hay zulla kaw na' cum kulo kafe. 39Hay li ma sumun kaf wi kayni, nisi dab voksi gaa'a di'e: Ma-Vatɗin mi Lawna! Ma-Vatɗin mi Lawna! 40Eliyas di tisiya: Yawgi sa jobta vi Baal, hin kep kuɗsi kaw pir goy noŋɗi. Nala nisi yawsiya, Eliyas jiksi gaa hay niyn-ma-riŋŋa vi Kison, nam ŋatsi goyo.

Niyn co si'e

41Bugol kayni Eliyas di tam Akab: Tuɗaŋu, taŋu caŋu kaw; kay suwan ka li'e kay ɗek kay niy-ma-sina. 42Akab kalay ti'e, ci'e kaw. May Eliyas jik kulo kay yam hiɗiyta vi Karmel; nam her yalam gaa kay nagata, tun vokom tam ŋulofomu. 43Nam di tam sa ma sunda valamu: Jikaŋ kulo'o, ɗuwaŋ hay galla vi niy-lum ma ŋolla. Sa ma sunda valam jik kulo'o, nam ɗuwa, di tam Eliyas ala va mayɗi. Eliyas dum ala jikaŋ kulo'o sem siɗiya. 44Hay sem ma siɗiyan kayni, nam ka di ala: ɗuwgi ɗugul ma gooro ka kalay kulo'o hay galla vi niy-lum ma ŋolla pa, nam ki way-ɓam san nala. Eliyas di'e: Jikaŋ kulo'o, daŋ tam Akab ala: Tunaŋ jukŋ kel luwayna, jikaŋ gaa'a, kay niy-ma-sina ma telaŋ tanɗi. 45Ir neeɗa ɦawa kayni, dukalawn muɗ wura'a kay ɗugulla, simeɗn tun caw biwa, niyn si dono ŋolo. Akab ɓe kulo kay kekena valamu, kalay hay Yisreel. 46Ma-Vatɗina ay hiɗi Eliyas, nam jun furamu, jaŋ vok Akab ta-ta kulo vun Yisreel.

Currently Selected:

1 MULIYANA 18: Massana

Highlight

Copy