Zacarías 6
6
Guerrapaq tawa carretakunata rikusqanmanta
1Huktawan qawarispaymi visionpi rikururqani, broncemanta iskay orqokunapa chawpinmanta guerrapaq tawa carretakuna lloqsimuchkaqta. 2#Ap 6.4.#Ap 6.5.Punta kaq carretatam chutasqa puka caballokuna, iskay kaq carretatam yana caballokuna, 3#Ap 6.2.kimsa kaq carretatam yuraq caballokuna, tawa kaq carretatañataqmi moro caballokuna.
4Hinaptinmi chay rimapayawaqniy angelta tapurqani:
Señorlláy ¿imataq kayqa? nispay.
5 #
Ap 7.1. Chay angelñataqmi niwarqa:
Kay carretakunaqa hanaq pachapi tawa wayrakunam, paykunam kay pachapi munaychakuq Tayta Diospa qayllanman yaykusqankumanta lloqsichkanku. 6Yana caballokunapa chutasqan carretam norte lawpi nacionman richkan, yuraq caballokunapa chutasqanmi intipa seqaykunan lawpi nacionman richkan, moro caballokunapa chutasqanñataqmi sur lawpi nacionman richkan, nispa.
7Chay kallpasapa caballokuna tukuy kay pachaman kallpanankupaq hikutakuptinkum, paykunata chay ángel kamachirqa:
Tukuy kay pachaman riychik, nispa.
Hinaptinmi chay caballokuna kay pachaman pasarqaku.
8Chaymantam qayaykuwaspan chay angelqa niwarqa:
Qaway Zacarías, wak norte lawman lloqsiqkunam, Diospa piñakuyninta chay nacionpi taniykachinku, nispa.
Josueyta coronachisqankumanta
9Tayta Diosmi kaynata niwarqa:
10Babiloniapi preso kamusqankumanta kutimuq Heldaiman, Tobiasman hinaspa Jedaiasman riy hinaspa qori-qollqenkuta mañakamuy. Hina chay punchawllapitaq Sofoniaspa churin Josiaspa wasinmanpas riy. 11Chay qori-qollqe huñusqaykiwanmi coronakunata ruwanki, hinaspam Josadacpa churin sumo sacerdote Josueyta hukninwan coronachinki. 12#Jer 23.5; 33.15; Zac 3.8.Hinaspam Josueyta ninki, Tukuy Atiyniyuq Tayta Diosmi kaynata nin: Kaymi chay “Ikllirimuq” nispa sutichasqa runa, paymi sapinmanta ikllimuspan Tayta Diospa templonta musoqmanta hatarichinqa. 13Tayta Diospa templonta musoqmanta hatarirachispanmi Rey kanqa, hatunchasqa kaspam trononmanta kamachikunqa, sacerdotepas trononpa waqtanpim tiyanqa, hinaspam iskayninku hawkalla kawsakunqaku, nispa. 14Chay coronakunam, Tayta Diospa templonpi señal hina churasqa kanqa, Helemta, Tobiasta, Jedaiasta hinaspa Sofoniaspa churin Josiasta yuyarinankupaq.
15Karu llaqtakunapi kaqkuna hamuspam Tayta Diospa templonta huktawan hatarichiypi yanapakunqaku. Chaynapim yachankichik Tukuy Atiyniyuq Tayta Dios qamkunaman kachamuwasqanta. Kaykunaqa pasakunqa Tayta Diospa nisqanta uyarispa kasukuptikichikmi.
Currently Selected:
Zacarías 6: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
