Zacarías 7
7
Diospa millakusqan ayunomanta
1Rey Darío tawa wataña munaychakuchkaptinmi, Quisleu sutiyuq isqon kaq killapa tawa kaq punchawninpi, profeta Zacariasta Tayta Dios rimapayarqa. 2Chay punchawpim Bet-el llaqtapi yachaqkuna, Sarezertawan Regem-melecta runankunatawan kacharqaku, Tayta Diospa yanapakuyninta mañakamunankupaq, 3hinaspa Tukuy Atiyniyuq Tayta Diospa templonpi kaq sacerdotekunata chaynataq profetakunata kaynata tapumunankupaq:
¿Hinaraqchu pichqa kaq killapi waqasaqku hinaspa ayunasaqku imaynam watan-watan ruwasqaykuman hina? nispanku.
4Chaymi Tukuy Atiyniyuq Tayta Dios niwarqa:
5Kay nacionpi llapallan runakunata hinaspa sacerdotekunata kaynata nimuy: Kay qanchis chunka watantin, pichqa kaq killapi chaynataq qanchis kaq killapi waqaspa ayunaspaykichik ¿ñoqapaqchu ayunarqankichik? 6Mikuspaykichikpas upyaspaykichikpas ¿Manachum kikillaykichikpaq mikurqankichik hinaspa upyarqankichik? 7¿Manachum Tayta Diosqa ñawpaqmantaraq profetankunawan hina kaynata rimarirqa? Chaynataqa rimarirqa Jerusalén llaqtapi yachaqkuna hawkalla hinaspa achkallaña kawsakuchkaptinkum, hina chaynallam kawsakuchkarqaku muyuriqnin llaqtakunapi yachaqkunapas chaynataq Neguev lawpi yachaqkunapas hinaspa waqtakunapi yachaqkunapas, nispa.
Mana kasukuq kasqankurayku preso risqankumanta
8Tayta Dios rimapayaptinmi Zacarías kaynata nirqa. 9Tukuy Atiyniyuq Tayta Diosmi kaynata nin: Qamkunaqa cheqap kaqwan juzgaspayá runamasikichikwanqa llakipayanakuspa chaynataq kuyapayanakuspa kawsaychik. 10Amayá viudakunatapas, mana tayta-mamayuqkunatapas, huklaw llaqtayuqkunatapas hinaspa wakchakunatapas ñakarichiychikchu. Amataqyá runamasikichikpa contranpiqa mana allin ruwaytapas piensaychikchu, nispa. 11Qamkunam ichaqa uyariyta mana munarqankichikchu, aswanraqmi mana kasukuspaykichik mana uyariqpas tukurqankichikchu. 12Sonqoykichikta pasaypaqta rumiyarachispam, Espiritunpa yanapakuyninwan ñawpaq profetankunatakama Tukuy Atiyniyuq Tayta Dios rimapayasusqaykichik yachachikuyninkunata chaynataq kamachikuyninkunatapas mana kasukurqankichikchu. Chayraykum Tukuy Atiyniyuq Tayta Dios llumpayta piñakururqa. 13Chaynaqa, Tukuy Atiyniyuq Tayta Diosmi kaynata nin:
Imaynam paykuna qayakuyniyta mana kasukurqakuchu, chaynam ñoqapas mañakuyninkuta mana uyarirqanichu. 14Aswanraqmi sinchi wayra hina mana reqsisqanku nacionkunaman cheqerachirqani, chaynapim nacionninkupas mana pipapas purinan chunniqmanña tikrakururqa. Sumaqllaña naciontam paykuna llakikuypaq chunniqman tikrarurqaku, nispa.
Currently Selected:
Zacarías 7: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
