Romanos 8

Chuya Espirituman hina kawsananchikmanta

1Chaynaqa, haykam Cristo Jesuswan hukllaña kaqkunapaqqa manañam ima condenacionpas kanñachu. Paykunaqa manañam aychaman hinañachu kawsanku, aswanqa Espirituman hinañam. 2Jesucristontakama kawsay qokuq Espiritupa leyninmi, wañuymantawan huchapa kamachikuyninmanta libraykuwan. 3Runa débil kasqanraykum leypa mana ruway atisqanta Dios ruwarun: Diosmi sapallan churinta huchasapa runaman rikchakuqta kachamurqa huchapa rantinpi wañunanpaq, chaynapi huchata paypa aychanpi puchukachinanpaq. 4Chaynataqa ruwarqa leypa nisqanta cumplinanchikpaqmi, chaynapi manaña aychanchikman hinañachu, aswanqa Espirituman hinaña kawsanapaq.

5Aychaman hina kawsaqkunaqa aychaman hinallam imatapas yuyaymananku, Espirituman hina kawsaqkunam ichaqa Espiritupa kaqkunapiña yuyaymananku. 6Aychapa munasqanman hina kawsayqa wañuymi, Espiritupa munasqanman hina kawsaymi ichaqa kawsaytawan hawkayayta qowanchik. 7Aychaman hina kawsaqkunaqa Diospa enemigonkunam, paykunaqa manam Diospa leynin kasukuyta munankuchu, nitaqmi ruwaytapas atinkuchu. 8Aychaman hina kawsaqkunaqa manam Diospaq hinachu.

9Qamkunam ichaqa mana aychaman hinañachu kawsankichik, aswanqa Espirituman hinañam, qamkunapi Diospa Espiritun kasqanrayku. Sichum runapi Cristopa Espiritun mana kaptinqa manam Cristopachu. 10Sichum Cristo qamkunapiña kaptinqa, aychaykichikqa hucharaykum wañusqaña kachkan, espirituykichikmi ichaqa kawsachkan, Diospuni mana huchayuqtaña ruwasusqaykichikrayku. 11Sichum Jesucristota wañusqanmanta kawsarichimuqpa Espiritun qamkunapi kaptinqa, Jesucristota wañusqanmanta kawsarichimuqmi wañuq cuerpoykichiktapas qamkunapi kaq Espirituntakama kawsarichimunqa.

12Chaynaqa, wawqe-panillaykuna, manam aychatachu debekunchik aychaman hina kawsanapaqqa. 13Aychaman hinalla kawsaspaykichikqa wañunkichikmi; Chuya Espirituman hina aychapa ruwayninkunata wañuchispam ichaqa kawsankichik.

14Diospa Espiritunpa pusasqankunaqa llapallankum Diospa churinkuna. 15Qamkunaqa manam esclavo kanaykichikpaq espiritutachu chaskirqankichik huktawan manchakuypi kanaykichikpaqqa, aswanqa Diospa churinña kanaykichikpaq Espiritutam chaskirqankichik, chayraykum Diostapas: #8.15 “Abba Padre” ninanqa arameo rimaypi “papito” ninanmi.“Abba Padre” nispa ninchik. 16Kikin Espiritum willan espiritunchikman Diospa churinña kasqanchikta. 17#Gl 4.5-7.Churinña kaptinchikqa paypa tukuy iman kaqkunapas ñoqanchikpañam, chaynapim Jesucristowan kuska herenciata chaskisun. Cristo hina ñakarispaqa paywan kuskataqmi hatunchasqa kasunchik.

18Yachasqayman hinaqa, kunan tiempo ñakarisqanchikqa, manam imallapipas rikchakunchu hamuq punchawkunapi kancharichkaq kawsayta kikin Diospa qowananchikwanqa. 19Tukuy ima unanchasqa kaqkunam sinchi munakuywan suyachkanku churinkunaña kasqanchikta Dios reqsichinanta.

20Lliw unanchasqakunapas mana valeqñam rikurirurqa, chaynaqa karqa manam kikillanmantachu, Diosmi chaynapaq munarqa confianzawan suyanankupaq. 21Lliw imapas unanchasqakunaqa tukuruqllam, ichaqa suyachkanmi Dios librananta. Churinkunata Dios hatunchaspan libraptinmi tukuy imapas paykunawan kuska librakunqa.

22Yachasqanchikpi hinam Diospa tukuy ima unanchasqankunaqa kunankama ñakarichkan, yaqa wachakuywan ñakarichkaq warmi hina. 23Ichaqa manam payllachu, ñoqanchikpas Chuya Espirituta chaskichkaspapas chaynatam ñakarichkanchik. Sonqonchikpi waqaspam suyachkanchik Diospa churichakuykuwananchik punchawta, chay punchawpim cuerponchikta libraykunqa.

24Chay suyasqanchikwanmi salvasqa kanchik. Confiakuspaqa suyachkanchik mana rikusqanchik kaqta chaskinanchikpaqmi. Chaynaqa, ¿imapaqmá suyachwan makinchikpiña suyasqanchik kachkaptinqa? 25Suyasqanchikta manaraq qawachkaspaqa pacienciakuspam confianzawan suyananchik.

26Pisi kallpayuq kaptinchikmi Chuya Espíritu yanapawanchik. Manam imayna mañakuytapas yachanchikchu, ichaqa Chuya Espiritum Diosta mañapuwanchik runapa mana rimay atisqan rimaykunawan. 27Llapa runakunapa sonqon reqsiq Diosmi yachan Chuya Espiritupa imam nisqanta. Payqa Diospa munasqanman hinam llapallan iñiqkunapaq mañapun.

Manam pipas Diosmantaqa rakiwachwanchu

28Ñoqanchikqa yachanchikmi, Dios kuyaqkunataqa tukuy imapas allinninpaqmi yanapan, chaykunaqa yanapan haykam munasqanman hina qayasqankunatam. 29Diosqa ñawpaqmantaraq reqsisqankunatam Churinman rikchakuqña kanankupaq akllaykurqa, chaynapi Churin Cristoqa llapallanchikpa piwi wawqenchik kananpaq. 30Ñawpaqmantaraq akllasqankunatam qayaykun, qayasqankunatañataqmi mana huchayuqtaña ruwaykun; mana huchayuqtaña ruwasqankunatañataqmi hatunchaykun.

31Chaynaqa, ¿imatawanraqtaq nichwanchik? Sichum Dios ñoqanchikwan kaptinqa ¿pitaq ñoqanchikpa contranchikpi kanman? 32Sichum Diosqa kikinpa Churintapunipas rantinchikpi wañunanpaq qowachkaspanchikqa ¿manachum Churintawan kuskata tukuy imatapas mana imallapaq qowasunchik?

33Diosmi mana huchayuqtaña ruwawaqninchikqa, hinaptinqa ¿pitaq Diospa akllasqankunata acusanman? 34¿Pitaq condenawachwanchik? Cristom wañuspan kawsarimurqa, hinaspam Diospa alleq lawninpi kaspan ñoqanchikpaq mañakuchkan.

35¿Pitaq Cristopa kuyakuyninmanta rakiwachwan? ¿Sasachakuychu, llakikuychu, qatikachasqa kaychu, yarqaychu, wakchayaychu, wañuypa patanpiña kaychu, icha wañuychu? 36#Sal 44.22.Chuya Qellqapim kaynata nin:

“Qamraykum sapa punchaw wañuypa patanpi kachkaniku,

nakanapaq ovejakunata hinam qawawanku”, nispa.

37Astawanqa tukuy kaykunatam vencenchik kuyawaqninchik Señorninchik Jesucristontakama. 38Chayraykum yachakuni, wañuypas, kawsaypas, angelkunapas, mayna atiyniyuqkunapas, maynaña munaychakuqkunapas, kunan kaqpas, hamuq kaqpas, 39altopi kaqpas, uku-ukupi kaqpas, nitaq ima unanchasqa kaqkunapas, Señorninchik Jesucristontakama Diospa kuyakuynin qowasqanchikmantaqa manam imapas rakiwasunchu.

Currently Selected:

Romanos 8: RCHQ2

Highlight

Copy