Romanos 7

Casada warmiwan rikchanachiymanta

1Wawqe-panillaykuna, leytaqa allintam yachankichik, huk runaqa kawsanankamallam leytaqa kasukun. 2Huk casada warmipas leyman hinaqa qosan kawsanankamallam payman sujetasqa. Qosan wañukuptinmi ichaqa chay leymanta libreña rikurirun. 3Sichum qosan kawsachkaptinraq hukwan tupakuruspanqa waqllikuy huchamanmi wichiykun. Qosan wañuruptinmi ichaqa, casada kasqan leymanta libreña rikurirun, hukwan yapakuspapas manañam waqllikunñachu.

4Wawqe-panillaykuna, chaynam qamkunapas Cristoman hukllawakuspaykichikqa leypaqa wañurunkichikña, wañusqanmanta kawsarimuq Jesucristowan hukllaña kanaykichikpaq, chaynapi Diosllataña servinanchikpaq. 5Aychapa munasqanman hina kawsaptinchikqa leypas mana allinkuna ruwaymanmi tanqawarqanchik, chaynapim wañuypaq kaqkunallata ruwachiwarqanchik. 6Kunanmi ichaqa munaychakuwaqninchik leypaqqa wañurunchikña, chaynapim libreña kachkanchik, Espiritupa qowasqanchik musoq kawsakuypiña Diosta servinanchikpaq, manam ñawpaq qellqasqa leyman hinañachu.

Munaychakuwaqninchik huchamanta

7 # Ex 20.17; Dt 5.21. Hinaptinqa, ¿imanisuntaq? ¿Leyqa huchachum? ¡Manapunim! Mana ley kaptinqa manachá yachaymanchu karqa imam huchallikuy kasqantapas. Manachá yachaymanchu karqa runapa kaqnin munapayayqa hucha kasqanta: “Amam munapayankichu” nispa ley mana niptinqa. 8Hucham kamachikuykunapi hapikuykuspan, millakuypaq munapayaykunata ñoqapi hatarirachin. Ley mana kaptinqa huchapas manam kanchu. 9Ñawpaqtaqa manam leyman hinachu kawsarqani. Ley rikuriramuptinmi ichaqa hucha kawsarirurqa, ñoqañataqmi wañururqani. 10Chaynapim kawsayman pusawaqniy kamachikuyqa wañuyman aparuwan. 11Hucham kamachikuyman hapikuykuspan engañaruwan hinaspam wañuyman aparuwan.

12Chaywanpas Diospa qosqan leyqa chuyam. Kamachikuykunapas chuyam, mana pantayniyuq hinaspa allinpunim. 13Hinaptinqa, ¿chayna allin kamachikuychum wañuyman aparuwan? ¡Manapunim! Huchallikuymi hucha kasqanta qawachikunanpaq allin kaqman hapikuykuspan wañuyman aparuwan, hinaptinmi imam hucha kasqanta yacharuni. Chaynapim kamachikuykunaqa yachachiwanchik huchallikuyqa llumpay mana allin kasqanta.

14Yachasqanchikpi hinapas leyqa Diosmantam hamun. Ñoqam ichaqa aychalla kani huchaman rantikusqa. 15#Gl 5.17.Manam ima ruwasqaytapas yachakunichu, munasqay kaqtaqa manam ruwanichu, aswanqa mana munasqay kaqtaraqmi ruwani. 16Chaynaqa, mana munasqay kaqta ruwaspaymi nini: “Leyqa allinmi” nispay. 17Chaynaqa, manam ñoqañachu mana allintaqa ruwani, aswanqa ñoqapi kaq hucham. 18Ñoqaqa yachakunim, ñoqapiqa manam ima allin kaqpas kanchu, aswanqa mana allin kaqkunallam; maynatam munani allin kaqkuna ruwayta, ichaqa manam atinichu. 19Allin kaq ruway munasqaytaqa manam ruwanichu, aswanqa mana ruway munasqay kaqtaraqmi ruwani. 20Chaynaqa, sichum mana munasqay kaqta ruwaspayqa, manañam ñoqachu ruwani, aswanqa ñoqapi kaq hucham.

21Chaynaqa, allin kaqkuna ruwayta munaspaypas mana allinllatam ñoqapi tarini. 22Sonqoypiqa Diospa leyninpim kusikuni; 23chaywanpas cuerpoypiqa huk kamachikuymi kachkan, chay kamachikuymi yuyaymanayniypi kaq kamachikuypa contranpi kachkan, hinaspanmi aychaypi kaq huchapa kamachikuyninman presota apawan.

24¡Imallapiraq rikukuni! ¿Pitaq aychaypi kaq wañuypa munaychakuyninmanta libraykuwanqa? 25Ichaqa Diosman gracias kachun Señorninchik Jesucristomanta. Yuyaymanayniywanqa Diospa leynintam kasukuni, aychaywanñataqmi huchapa kamachikuyninta kasukuni.

Currently Selected:

Romanos 7: RCHQ2

Highlight

Copy