Romanos 6

Mana huchallikuqña kananchikmanta

1Chaynaqa, ¿imanisuntaq? ¿Aswanraqchu huchallikusun Diospa kuyakuynin aswan ñoqanchikpi kananpaq? 2¡Manapunim! Huchapaq wañuruchkaspañaqa ¿imaynataq huchapiraqqa kawsasun? 3¿Manachum yachankichik Cristo Jesuswan bautizasqa kaqkunaqa wañukuyninpi bautizasqa kasqanchikta? 4#Col 2.12.Chay bautismontakamam Cristowan kuska pampasqa kanchik, chaywanmi wañunchik wiñay kawsakuypaqña kawsarimunanchikpaq, imaynam Dios Tayta hatu-hatun atiyninwan Cristota kawsarichimusqanta hina.

5Sichum wañukuyninpi Cristoman hukllawakuspanchikqa, kawsarimuyninpipas paymantaqmi hukllawakusun. 6Kaytapas yachanchikmi: Ñawpaq vidanchikqa Cristowan kuskam chakatasqa karqa, huchallikuq sonqonchik tuñichisqa kananpaq, chaynapi hucha manaña munaychakuwananchikpaq. 7Pipas huchapaq wañuruspaqa huchamantam libreña rikurirun. 8Cristowan kuska wañukuspaqa paywan kuskataqmi kawsakusun. 9Yachanchiktaqmi kaytapas: Cristo kawsariramuspanqa manañam huktawanqa wañunmanñachu, wañuyqa manañam paypiqa munaychakunmanñachu. 10Cristoqa huk kutillatam huchanchikkunamanta wañurqa, kawsariramuspanñataqmi Diosllapaqña kawsachkan. 11Chaynaqa, qamkunapas huchapaq wañusqaña kasqaykichiktayá hapikuychik, ichaqa Señorninchik Cristo Jesuswan hukllaña kasqaykichikraykum Diosllapaqña kawsankichik.

12Chaynaqa, amayá wañuruqlla cuerpoykichikpi hucha munaychakunantaqa saqeychikchu, nitaq mana allin munayninkunatapas kasuychikchu. 13Amataqyá mana allinta ruwananpaqqa cuerpoykichiktapas huchamanqa qoychikchu, aswanyá qamkunaqa wañusqamanta kawsarimuq hinaña cuerpoykichikta Diosman qoychik, chaynapi paypa munasqantaña ruwananpaq. 14¡Amayá huchaqa qamkunapiqa munaychakuchunchu! Qamkunaqa manañam leyman hinañachu kawsachkankichik, aswanqa Diospa kuyakuyninman hinañam.

Servipakuqwan rikchanachiymanta

15¿Hinaptinqa imatataq ruwasun? ¿Leyman hina manaña kawsaspa Diospa kuyakuyninman hinaña kawsasqanchikraykuchu, aswanraq huchallikusun? ¡Manapunim! 16Qamkunaqa yachankichikmi, sichum pipas huk patronta kasunanpaq hinaspa esclavon kananpaq entregakun, hinaspaqa chay kasukusqan patronpa esclavonmi rikurirun. Chayqa kaynam: Pipas huchata kasuspaqa wañuymanmi rinqa, Diosta kasukuspam ichaqa allin ñanpi kawsakunqa. 17¡Ichaqa Diosmanyá gracias kachun! Ñawpaqtaqa huchapa esclavonmi karqankichik, kunanmi ichaqa yachachikuykuna chaskisqaykichikta tukuy sonqomanta kasukuchkankichik. 18Chaynapim huchapa munaychakuyninmanta librasqaña kaspaykichik, imatapas allinta ruwaspa Diospa serviqninkunaña rikurirunkichik. 19Runa hinallam rimani, pisi iñiyniyuqllaraq kasqaykichikrayku. Imaynam ñawpaqta qanrakuspa mana allinllapi purinaykichikpaq cuerpoykichikta qorqankichik, chaynayá kunanpas cuerpoykichikta qoychik allintaña ruwaspa Diosllapaqña kawsanaykichikpaq.

20Qamkunapi hucha munaychakuptinqa, allinkuna ruwaymantapas librem karqankichik. 21¿Huchapa munaychakusqanpi kawsaspaqa ima allintataq hurqokurqankichik? Aswanqa wañuyman apakuq kaqkunallatam. Chaykunamantam kunanqa penqakunkichik. 22Huchamanta librakuruspam ichaqa Diospa sirvientenña rikurirunkichik, chayqa allinnikichikpaqmi hinaspa chuya kawsakuymi tukupayninñataqmi wiñay kawsayman apakun. 23Huchapa pagonqa wañuymi, Diospa qowasqanchikmi ichaqa Señorninchik Jesucristowan kuska wiñaypaq kawsakuy.

Currently Selected:

Romanos 6: RCHQ2

Highlight

Copy