Popular Bible Verses from Romanos 6

Share

Huchapa pagonqa wañuymi, Diospa qowasqanchikmi ichaqa Señorninchik Jesucristowan kuska wiñaypaq kawsakuy.

¡Amayá huchaqa qamkunapiqa munaychakuchunchu! Qamkunaqa manañam leyman hinañachu kawsachkankichik, aswanqa Diospa kuyakuyninman hinañam.

Chay bautismontakamam Cristowan kuska pampasqa kanchik, chaywanmi wañunchik wiñay kawsakuypaqña kawsarimunanchikpaq, imaynam Dios Tayta hatu-hatun atiyninwan Cristota kawsarichimusqanta hina.

Amataqyá mana allinta ruwananpaqqa cuerpoykichiktapas huchamanqa qoychikchu, aswanyá qamkunaqa wañusqamanta kawsarimuq hinaña cuerpoykichikta Diosman qoychik, chaynapi paypa munasqantaña ruwananpaq.

Kaytapas yachanchikmi: Ñawpaq vidanchikqa Cristowan kuskam chakatasqa karqa, huchallikuq sonqonchik tuñichisqa kananpaq, chaynapi hucha manaña munaychakuwananchikpaq.

Chaynaqa, qamkunapas huchapaq wañusqaña kasqaykichiktayá hapikuychik, ichaqa Señorninchik Cristo Jesuswan hukllaña kasqaykichikraykum Diosllapaqña kawsankichik.

Chaynaqa, ¿imanisuntaq? ¿Aswanraqchu huchallikusun Diospa kuyakuynin aswan ñoqanchikpi kananpaq? ¡Manapunim! Huchapaq wañuruchkaspañaqa ¿imaynataq huchapiraqqa kawsasun?

Qamkunaqa yachankichikmi, sichum pipas huk patronta kasunanpaq hinaspa esclavon kananpaq entregakun, hinaspaqa chay kasukusqan patronpa esclavonmi rikurirun. Chayqa kaynam: Pipas huchata kasuspaqa wañuymanmi rinqa, Diosta kasukuspam ichaqa allin ñanpi kawsakunqa.

¡Ichaqa Diosmanyá gracias kachun! Ñawpaqtaqa huchapa esclavonmi karqankichik, kunanmi ichaqa yachachikuykuna chaskisqaykichikta tukuy sonqomanta kasukuchkankichik. Chaynapim huchapa munaychakuyninmanta librasqaña kaspaykichik, imatapas allinta ruwaspa Diospa serviqninkunaña rikurirunkichik.