Romanos 9
9
Diospa akllasqankunamanta
1Cristopi iñisqayraykum cheqap kaqta rimani, manam llullakunichu. Chuya Espiritupa yanapasqanmi concienciaypas niwan, rimasqayqa cheqap kasqanta. 2Llumpa-llumpay llakisqam kachkani, sonqoypas tukuy tiempom nanasqa kachkan, 3Cristomantapas rakikuruymanmi ñakasqa kanaypaq, sichum chay ruwasqaywan judiomasiykuna salvakunanku kaptinqa. 4Paykunaqa Diospa churichakuykusqan Israelpa mirayninkunam. Diosmi hatu-hatun sumaq kayninta paykunaman qawachirqa, hinaspam pactota ruwarqa, leytawan promesankunata qospanmi imaynam yupaychanankupaq yachachirqa. 5Paykunaqa ñawpa taytanchikkunapa mirayninmi, paykunapa mirayninmantam Cristopas runa kayninpi nacemurqa, Cristoqa Tukuy imapa hawanpi munaychakuq Diosmi. ¡Wiña-wiñaypaq yupaychasqayá kachun! Amén.
6Amayá piensaychikchu Diospa promesankuna mana cumplikusqantaqa, Israelmanta miramuqkunapas manam lliwchu israelitakuna, 7#Gn 21.12.nitaqmi Abrahampa llapallan mirayninkunachu cheqap churinkunaqa, chaymi Dios nirqa:
“Isaacllamantam qampa miraynikikunaqa kanqa”, nispa.
8Chaynaqa, manam imananchu pipa miraynin kaypas Diospa churin kanapaqqa. Aswanqa Diospa promesanman hina naceqkunallam Abrahampa cheqap mirayninkuna hinaqa kanku. 9#Gn 18.10.Abrahammanmi kaynata Dios prometerqa:
Wataman kunan hinatam kutimusaq, hinaptinmi warmiki Sarapas wawayuqña kanqa, nispa.
10Manam chayllachu karqa, Rebecapas huk taytallapatam mellizota wiksayakurqa, paymi karqa ñawpaq taytanchik Isaac. 11Chaymi paykuna manaraqpas nacechkaptinku chaynataq allintapas otaq mana allintapas manaraq ruwachkaptinku, 12#Gn 25.23.Rebecata Dios nirqa:
“Punta nacemuqmi sullkanta servinqa”, nispa.
13 #
Mal 1.2-3. Chuya Qellqapim kaynata nin:
“Jacobtam kuyarqani Esautañataqmi cheqnirqani”, nispa.
14¿Imanisuntaq kaykunamanta? ¿Diosqa mana allintachum ruwachkan? ¡Manapunim! 15#Ex 33.19.Moisesmanpas kaynatam nirqa: “Pim llakipayasqaytam llakipayasaq pim kuyasqaytam kuyapayasaq”, nispa.
16Chaynaqa, Diosqa kuyasqanman hinam pitapas akllan, manam runapa munasqanman otaq kallpanchakusqaman hinachu. 17#Ex 9.16.Qellqapipas Diosmi rey Faraonta kaynata nirqa:
Qamtaqa hatarichirqayki qamnintakama atiyniyta runakunaman qawachinaypaqmi, chaynapi lliw kay pachapi sutiy willakusqa kananpaq, nispa.
18Chaynam Diosqa munarispaqa pitapas kuyapayarin. Chaynataqmi munarispaqa pipa sonqontapas rumiyachin.
19Chayna kaptinqa niwankichá:
Tukuy ima ruwasqanchikkuna Diospa munasqallan kaptinqa ¿imanasqataq huchasapapaq hapiwanchik? nispa.
20 #
Is 45.9. Ichaqa yaw runa ¿pitaq qamqa kanki Dioswan churanakunaykipaqqa? Yaqachum mitumanta ruwasqa manka ruwaqninta ninman:
¿Imanasqataq kaynata ruwaruwanki? nispa.
21Manka ruwaqqa imam munasqantam mitumantaqa ruwan. Munarispaqa kuyayllapaq allin qawasqa mankatam ruwan, chay mitullamantataqmi mana allinpaq qawasqa mankatapas ruwan.
22Diosmi piñakuyninta hinaspa atiyninta qawachiyta munarqa. Chaywanpas ñutupanapaq manka hina castigopaqña kachkaptinpas pacienciaykuspam aguantarqa. 23Chaynataqmi kuyayllapaq mankamanta hina ñoqanchikmantapas kuyapayarikurqa llumpay hatun atiyninta qawachikunanpaq. Ñawpaqmantapunim preparawachkanchik payman rikchakuqña sumaq kancharichkaq kananchikpaq. 24Chaynatam Dios qayaykuwarqanchik, wakiqninchikta judiokunamanta wakiqninchiktañataq mana judío kaqkunamanta. 25#Os 2.23.Profeta Oseaspas kaynatam qellqarqa:
“Mana llaqtay kaqkunatam
llaqtayñam kankichik”, nisaq.
“Mana kuyasqaykunatam
kuyasqaykunañam kankichik”, nisaq.
26 #
Os 1.10. “Qamkunaqa manam llaqtaychu kankichik nisusqaykichik sitiopim:
Qamkunaqa kawsaq Diospa churinñam kankichik” nispa nisunkichik.
27Israelpa mirayninmantam profeta Isaías nirqa:
Lamar qochapi aqo hinaña kachkaspapas
Israelpa mirayninkunaqa wakillanmi salvakunqa.
28 #
Is 10.22-23. Señorqa chayllam rimasqanta
kay pachapi llapallan kaqkunawan cumplinqa, nispa.
29 #
Is 1.9. Ñawpaqtaraqmi Isaías nirqa:
“Sichum Tukuy Atiyniyuq Señor Dios,
mirayninchikta mana puchuykachiptinqa,
Sodoma llaqta hinachá kachwan karqa,
Gomorra llaqta hinachá kachwan karqa”.
Judiokunapa mana kasukusqanmanta
30¿Imanisuntaq? Mana judío kaqkunapas Diosta mana ñawpaqta maskachkaspankupas, iñisqankuraykum Diospa pampachasqanña rikurirunku. 31Judiokunañataqmi kamachikuyman hina pampachakuyta maskarqaku, ichaqa manam tarirqakuchu. 32¿Imanasqataq manaqa tarirqakuchu? Diosman mana iñisqankuraykum chaynataq ruwayllankuwan maskasqankuraykum. Chaynapim mitkana rumipi mitkakururqaku. 33#Is 28.16.Chuya Qellqapim kaynata nin:
“Sión moqopim mitkana rumita churani,
Sión moqopim urmachikuq hatun rumita churani,
pipas paypi iñiqqa manam hukmanyanqachu”, nispa.
Currently Selected:
Romanos 9: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
