Santiago 2

Ama pimanpas sayapakunamanta

1Kuyasqay wawqe-panillaykuna, atiyniyuq Señorninchik Jesucristopi iñiq kaspaykichikqa amayá pimanpas sayapakuychikchu. 2Ichapas huñunakusqaykichikman yaykuramunman qori anilloyuq hinaspa sumaqllaña pachayuq runa, yaykuramunmantaq pasaypaq mawka pachayuq wakcha runapas, 3hinaptinñataq qamkuna chay sumaqllaña pachayuq runata allinllataña chaskispa niwaqchik: “Hamuy, kay allin sitiopi tiyaykuy” nispaykichik hinaspa wakcha runatañataq niwaqchik: “Qamqa chayllapi sayay otaq kay pampallapi tiyakuy” nispaykichikqa, 4¿manachum hukllanman sayapakuchkankichik? Chaynaqa, mana allin tanteaq juez hinañam rikurirunkichik.

5Kuyasqay wawqe-panillaykuna, uyariykuwaychikyá, kay pachapi wakchakunataqa Diosninchikmi akllarqa iñiyninkupi apu kanankupaq hinaspa kuyaqninkunaman prometesqan Diospa munaychakusqanta chaskinankupaq. 6Qamkunaqa wakchakunatam usuchirqankichik. ¿Manachum apukunaqa munasqankuta ruwasunkichik hinaspa tribunalkunamanpas aysasunkichik? 7¿Manachum paykunaqa Cristopa sumaq sutin rimasqaykichikmanta imaymanata rimanku?

8 # Lv 19.18. Cheqaptapunipas sichum Qellqapa nisqanman hina: “Kuyankim runamasikita kikikita hina” nisqan cheqap leyta kasukuspaqa allintam ruwachkankichik. 9Pimanpas sayapakuspam ichaqa huchallikuchkankichik, Diospa leyninta mana kasuspam huchayuq kachkankichik. 10Pipas llapallan leyta kasukuchkaspa huknin kamachikuyllapipas pantaruspaqa, llapallan leymantañam huchayuq rikurirun. 11#Ex 20.14; Dt 5.18.#Ex 20.13; Dt 5.17.Kikin Diosmi nirqa: “Amam waqllikunkichu” nispa, nirqataqmi: “Amam wañuchinkichu” nispapas. Pipas mana hukwan waqllikuchkaspa runamasinta wañurachispaqa llapallan leyta mana kasukuqñam rikurirun. 12Librawaqninchik leypa nisqanman hinam Cristo juzgawasunchik, chaynaqa allintayá rimaychik hinaspa ruwaychikpas. 13Pipas runamasin mana llakipayaqtaqa juicio punchawpim paytapas Cristo mana llakipayanqachu, runamasin llakipayaqtam ichaqa llakipayanqa.

Iñiymantawan ruwaymanta

14Wawqe-panillaykuna, pipas iñiyniyuqmi kani nichkaspan, ichaqa manataq allin kaqkunataqa ruwanmanchu hinaptinqa ¿imapaqtaq chay iñiyninqa valenman? ¿Yaqachum chay iñisqallan salvarunman? 15Sichum wawqe otaq huk panipas mana pachayuqña kanman, ichaqa manataq chay punchawpi mikunanpaqpas imanpas kanmanchu, 16hinaptinñataq hukkaqnikichik ninman: “Hawkalla rispayki mikumuy hinaspa qonikamuy” nispa. Ichaqa imapas necesitasqanta mana qoykuptinqa ¿imapaq serviqtaq chay nisqanqa kanman? 17Chaynataqmi pipapas iñiyninqa, sichum ruwaynin mana kaptinqa, wañusqam kachkan.

18Ichapas hukkaqnin ninman: “Qamqa iñiyniyuqmi kanki, ñoqañataqmi allinkuna ruwaq kani” nispa. ¿Imaynatataq qawachiwankiman iñiynikita allinkunata mana ruwaspaykiqa? Ñoqam ichaqa iñiyniyta qawachisqayki imapas allin ruwasqaywan. 19Qanmi creenki chullalla Dios kasqanta, allinmi chayqa. Aswanqa demoniokunapas creenmi hinaspam manchakuymanta katkatatanku. 20¡Mana yuyayniyuq runa! Kaytayá yachay, iñiyqa wañusqam kachkan allin kaqkunata mana ruwasqaqa. 21#Gn 22.1-14.Ñawpaq taytanchik Abrahamtapas allinkunata ruwasqanraykum Diosqa mana huchayuqpaqña chaskirqa. Paymi churin Isaacta Diosman ofrecerqa altarpa hawanpi. 22Qawaychikyá, Abrahamqa iñiynintam ruwayninwan qawachikurqa, hinaptinmi iñiyninqa aswan allin qawasqa karqa ruwayninkunawan. 23#Gn 15.6.#2 Cr 20.7; Is 41.8.Chaynatam Qellqapa kayna nisqan cumplikurqa: “Abrahamqa Diosman iñisqanraykum mana huchayuqpaqña chaskisqa karqa” nispa. Chaynapim Abrahamqa Diospa amigon nispa sutichasqa karqa.

24Chaynaqa, qawasqaykichikpi hinapas runaqa manam iñiyniyuq kasqallanwanchu mana huchayuqpaqña Diospa chaskisqanqa kachkan, aswanqa allinkuna ruwasqankunapiwanmi. 25#Jos 2.1-21.Chaynataqmi Rahab sutiyuq chuchumika warmipas llaqtan wateqaq runakunata pakaykurqa, hinaspam ayqekunankupaq yanapaykurqa, chaynapim allin ruwasqanwan mana huchayuqpaqña chaskisqa karqa. 26Cuerponchikpas mana espirituwanqa wañusqam kachkan, chaynam iñiyninchikpas wañusqa kachkan allin kaqkunata mana ruwaptinchikqa.

Currently Selected:

Santiago 2: RCHQ2

Highlight

Copy