Santiago 3

Imaynam rimanamanta

1Wawqe-panillaykuna, amayá qamkuna ukupiqa llumpay yachachikuqkunallañaqa kaychikchu, yachasqaykichikpi hinapas yachachikuqkunaqa aswan juzgasqam kasunchik. 2Llapallanchikmi imaymanapi pantanchik, sichum rimasqanwan pipas mana huchallikuspanqa mana pantaq runañam kachkan, chayna kaspaqa tukuy cuerpontapas controlanmanmi. 3Kasuwananchikpaqmi caballopa siminman frenota churanchik, chaywanmi lliw cuerponta sujetanchik. 4Qawariychikyá barcokunatapas, maynaña hatun kaptinpas hinaspa sinchi wayrapa apasqa kaptinpas, chullalla runam taksa timonwan munasqan lawman apan. 5Chaynam cuerponchikpiqa qallunchikpas taksalla, aswanqa imakunatañapas rimarunmanmi. Huk ninapa chispallanmi maynaña montetapas kañarunman. 6Qallunchikpas chay nina hinam, tukuy mana allinkunata rimaspan llapallan cuerponchiktaña huchallichiwanchik. Infiernopa ratachisqan nina hinam tukuy kawsayninchikta huchallichin. 7Runaqa mansarunmanmi ima purun animalkunatapas, alton pawaq animalkunatapas, maqta urukunatapas chaynataq lamar qochapi kaqkunatapas. 8Qallutam ichaqa mana pipas controlayta atinmanchu. Qalluqa mana allinmi, pipapas mana controlay atinanmi, chayqa kachkan wañuchikuq venenowan huntasqam. 9#Gn 1.26.Qallunchikwanmi Dios Taytanchikta qapaqchanchik, hina qallunchikwantaqmi kikinman rikchakuq Diospa unanchasqan runatapas ñakanchik. 10Hina simillanchikmantam lloqsimun bendicionpas chaynataq ñakaypas. Wawqe-panillaykuna, chayqa manam chaynachu kanan. 11¿Yaqachum huk pukyullamanta miski yakuwan qatqe yaku lloqsimunman? 12Wawqe-panillaykuna, ¿yaqachum higos sachaqa rurunman aceitunasta otaq uvasñataq higosta? Chaynataqmi huk pukyullamantaqa miski yakuwan puchqo yakuqa mana lloqsimunmanchu.

Maymantam cheqap yachayqa kasqanmanta

13Qamkuna ukupi yachayniyuq hinaspa allin entiendeq runa kaspaqa allin kawsakuyninwan hinaspa llampu sonqo kayninwanyá yachayniyuq kasqanta reqsichikuchun. 14Sichum qamkunapi envidianakuykuna kaptinqa hinaspa kikillaykichikpaq imatapas munaspaqa, amayá hatun tukuychikchu yachayniyuq kasqaykichikmantaqa, chaynata ruwaspaqa cheqap kaqpa contranpim llullakuchkankichik. 15Chayna yachayqa manam Diosmantachu hamun, aswanqa kay pachallamantam, runapa tanteollanmantam hinaspa kikin diablomantam. 16Maypim envidianakuykunapa hinaspa kikillanpaq imapas munaykunapa kasqanpiqa, kachkanraqmi chaqwanakuykuna hinaspa tukuy mana allin ruwaykuna. 17Hanaq pachamanta hamuq yachayqa chuyam. Chay yachaywan kaq runakunaqa hawka kawsakuqkunam, allin ruwaqkunam, llampu sonqokunam, allin yuyaywan kawsaqkunam, kuyakuqkunam, tukuy imapi allin kaqta ruwaqkunam, mana pimanpas sayapakuqkunam hinaspa mana iskay uyakunam. 18Hawkayay maskaqkunaqa, hawkayaypim tarpuchkanku allin kawsakuypa ruruyninta cosechanankupaq.

Currently Selected:

Santiago 3: RCHQ2

Highlight

Copy