Hechos 9

Saulopa iñikusqanmanta

(Hch 22.6-16; 26.12-18)

1Sauloñataqmi Jesucristoman iñiqkunata wañuchinanpaq amenazaspan sumo sacerdoteman rirqa, 2hinaspam cartakunata mañakurqa Damasco lawpi kaq sinagogakunapi kamachikuqkunapaq, chaynapi Jesucristopi iñiqkunata tarispanqa warmitapas qaritapas presota Jerusalenman apamunanpaq. 3Damasco llaqtaman hichpaykuchkaptinmi, cielomanta huk llipyay qonqayllamanta uraykamuspa payta kanchaykurqa. 4Chaymi Sauloñataq pampaman wichiykuspan kayna niq rimayta uyarirqa:

¡Saulo, Saulo! ¿Imanasqataq qatikachawanki? niqta.

5Chaymi Saulo tapurqa:

¿Pitaq kanki Señor? nispa.

Hinaptinmi nimurqa:

Ñoqaqa qatikachawasqayki Jesusmi kani. 6Hatarispayki Damasco llaqtaman yaykuy, chaypim imam ruwanaykitapas nisunki, nispa.

7Saulowan riqkunam chay rimariyta uyarirqaku, ichaqa manam pitapas rikurqakuchu. Chaymi mancharisqallaña rikurirurqaku. 8Sauloñataqmi pampamanta hatarispan ñawsayarusqanrayku manaña imatapas rikurqachu. Chaymi makinmanta aysaspanku Damascoman pusaykurqaku. 9Chaypim kimsa punchaw karqa mana rikukuq, manataqmi imatapas mikurqachu nitaq tomarqachu.

10Damasco llaqtapim Jesucristopi iñiq Ananías yacharqa. Paymanmi Señor rikuriykuspan nirqa:

Ananías, nispa.

Chaymi payñataq nirqa:

¿Imata Señor? nispa.

11Señorñataqmi nirqa:

Hatarispayki Derecha sutiyuq calleman riy, hinaspayki Judaspa wasinpi maskamuy, Tarso llaqtayuq Saulota. Paymi Diosta mañakuchkan, 12hinaspam visionpi rikurqa Ananías sutiyuq runata, yaykuspan paypa hawanman makin churaykuqta, chaynapi musoqmanta qawarikunanpaq, nispa.

13Ananiasñataqmi nirqa:

Señorlláy, achkaq runakunam willawarqaku chay runamantaqa, payqa Jerusalén llaqtapim qanman iñiqkunata ñakarichirqa. 14Kunanñataqmi sumo sacerdotemanta autorizacionta mañakaykamuspan hamurun qampa sutikipi iñiqkunata presochananpaq, nispa.

15Señorñataqmi nirqa:

Riypuni, chay runaqa serviwananpaq akllakusqaymi, paymi ñoqamanta willakamunqa huklaw nacionkunapi runakunaman, reykunaman hinaspa Israelpa mirayninkunaman. 16Ñoqam payman qawachisaq ñoqarayku imaynam llumpay ñakarinanta.

17Chaymi Ananías pasarqa Saulopa kasqan wasiman, hinaspam yaykuruspan Saulopa hawanman makinta churaykuspan nirqa:

Wawqey Saulo, chay hamusqayki ñanpi rikurisuqniki Señor Jesusmi kachamuwarqa qamta qawarichinaypaq, hinaspa Chuya Espiritupa huntasqan kanaykipaq, nispa.

18Hinaptinmi chaypunilla paypa ñawinmanta escama hina wichiruptin qawarikururqa. Chaymi Saulo hatarispan bautizachikurqa. 19Mikuruspanmi chaywan kallpanchakururqa, hinaspanmi Damasco llaqtapi iñiqkunawan chay punchawkuna qeparqa.

Damasco llaqtapi Saulo willakusqanmanta

20Chaykunapa qepantam Jesucristomanta sinagogakunapi willakuspan nirqa:

Jesucristoqa Diospa Churinmi, nispa.

21Lliw uyariqkunañataqmi admirakuspanku kaynata ninakurqaku:

¿Manachum kay runaqa Jerusalén llaqtapi purirqa Jesucristopa sutinpi iñiqkunata qatikachastin? ¿Manachum kaymanpas hamurqa iñiqkunata presocharuspan sacerdotekunapa kamachiqninkunaman apananpaq? nispanku.

22Saulom ichaqa aswan-aswan kallpanchakuspan Jesusqa cheqaptapuni Cristo kasqanta willakurqa, chaynapim Damascopi yachaq judiokunatapas iskayrayarachirqa.

Saulopa lluptikusqanmanta

23Achka punchawkuna pasaruptinmi Saulota wañuchinankupaq judiokuna rimanakururqaku. 24Saulom ichaqa chayta yachakururqa. Chaymi wañurachinankupaq tuta punchaw chay llaqtapa punkunkunapi suyaqku. 25#2 Co 11.32-33.Aswanqa iñiqkunam Saulota tutallan hatun canastapi uraykarachirqaku, chay llaqtapa perqantakama.

Jerusalén llaqtapi Saulo tarikusqanmanta

26Sauloñataqmi Jerusalenman chayaruspan iñiqkunawan huñunakuyta munarqa, ichaqa paykunam manchakurqaku Jesucristoman iñisqanta mana creespanku. 27Ichaqa Bernabeymi Saulota apostolkunaman pusarqa, hinaspam willarqa Jesucristota ñanpi Saulo rikurusqanmanta, hinaspa imaynam Señorpa rimapayasqanmanta, chaynataq Damasco llaqtapi mana manchakuspa Jesucristomanta willakusqanmantapas. 28Chaymi Sauloqa Jerusalenpiña apostolkunawan puriq. 29Mana manchakuspanmi Señorpa sutinpi rimaq, atipanakuqtaqmi griego rimaq judiokunawanpas, ichaqa paykunam wañurachiypi rirqaku. 30Jesucristoman iñiqkunañataqmi chayta yacharuspanku, Saulota Cesareaman pusaruspanku Tarso llaqtaman aviarurqaku.

31Chaymi tukuy Judea lawpi, Galilea lawpi hinaspa Samaria lawpi iñiqkuna hawkaña karqaku. Iñiyninkupim wiñaqku hinaspam Señorta manchakuspanku kawsaqku, Chuya Espiritupa kallpanchasqan kaspankum aswan-aswan miraqku.

Eneaspa sanoyasqanmanta

32Apóstol Pedrom llapa iñiqkunata watukuspan Lida llaqtapi iñiqkunaman chayarurqa. 33Chaypim tarirurqa Eneas sutiyuq runata, paymi suchuyaruspan pusaq wataña camapi kachkarqa. 34Hinaptinmi Pedro nirqa:

Eneas, Jesucristom sanoyarachisunki, hatarispayki camaykita hoqariy, nispa.

Chaymi Eneasqa chaylla hatarirurqa. 35Lida llaqtapi hinaspa Sarón llaqtapi lliw yachaqkunam payta rikururqaku, hinaspankum Señor Jesucristoman iñikurqaku.

Dorcaspa kawsarirusqanmanta

36Jope llaqtapim yacharqa Jesucristopi iñikuq Tabita sutiyuq warmi, paypa sutinmi griego rimaypi karqa Dorcas. Paymi allinkunata ruwaspan wakchakunata yanapaq. 37Paymi chay punchawkunapi onqoruspan wañukurqa, chaymi cuerponta bañaruspanku wasipa altosninpi chutaykurqaku. 38Lida llaqtaqa Jope llaqtamanta hichpallam karqa, chaymi iñiqkuna chaypi Pedro kasqanta yacharuspanku iskay runakunawan qayachimurqaku:

Kunanpuni Jope llaqtaman hamuy, nispanku.

39Chaynata Pedroman willaykuptinkum paykunawan pasarqa. Chayaruptinmi Pedrota wañuqpa kasqan cuartoman pusaykurqaku, chaymi llapa viudakuna Pedroman asuykuspanku waqastin Dorcaspa ruwasqan pachakunata qawachirqaku.

40Pedroñataqmi chaypi kaqkunata lloqsirachispan, qonqorakuspan Diosta mañakurqa, hinaspam chay wañusqa warmita qawarispan nirqa:

Tabita, hatariy, nispa.

Chaymi Tabita qawarikururqa, hinaspanmi Pedrota rikuruspan tiyarirurqa. 41Pedroñataqmi makinmanta hapiykuspan sayarichirqa, hinaspam iñiqkunatawan viudakunata qayaykuspan kawsachkaqtaña paykunaman qawaykachirqa. 42Chaytam Jope llaqtapi llapa runakuna yacharurqaku, hinaspam Señorman achkallaña iñikurqaku. 43Pedroqa achka punchawmi chay llaqtapi, suela ruwaq Simonpa wasinpi qeparqa.

Currently Selected:

Hechos 9: RCHQ2

Highlight

Copy