Hechos 10
10
Corneliopa iñikusqanmanta
1Cesarea llaqtapim Cornelio yacharqa. Paymi karqa Italiano sutiyuq tropakunapa capitannin. 2Cornelioqa wasinpi llapallan kaqkunapiwanmi Diosta kasukuspa serviqku, wakcha judiokunatapas achka qollqewanmi yanapaq, hinaspanmi Diosta tukuy tiempo mañakuq. 3Huk punchawmi yaqa kimsa hora tardeykuyta visionpi rikururqa, Diospa angelnin paypa kasqanman yaykuspa:
¡Cornelio! nisqanta.
4Chaymi Cornelioqa angelta rikuykuspan llumpay mancharisqallaña tapurqa:
¿Imata Señor? nispa.
Hinaptinmi chay ángel nirqa:
Mañakusqaykitawan wakchakuna yanapasqaykitam Dios chaskiykun. 5Kunanyá runakunata Jope llaqtaman kachay Pedrowan sutichasqa Simonta pusamunankupaq. 6Paymi samapakuchkan lamar qochapa patanpi yachaq suela ruwaq Simonpa wasinpi, nispa.
7Chay rimapayaqnin ángel lloqsiruptillanmi, Cornelio qayarqa iskay serviqninkunatawan huk soldadonta. Chay soldadoqa karqa Dios yupaychaq, hinaspa Corneliopa confianzanmi. 8Paykunatam chay angelpa lliw nisqanta willaspan Jope llaqtaman kacharqa.
9Paqarinnintin punchaw, Corneliopa runankuna Jope llaqtaman yaqaña chayachkaptinkum, Pedroñataq yaqa chawpi punchawta wasipa altonman qespirqa Diosta chaypi mañakunanpaq. 10Llumpayta yarqarachikuspanmi mikuyta munarqa. Ichaqa mikuyta yanupunankukamam visionta rikururqa. 11Paymi hanaq pacha kicharikuykuptin rikurqa tawan puntanmanta warkusqa uraykamuchkaq sabanasta. 12Chay sabanaspim kasqa tawa chakiyuq animalkuna, qasqonpa puriq urukuna hinaspa alton pawaq urpikuna. 13Hinaptinmi Pedro uyarirurqa:
Pedro hatariy, wañuchispayki kaykunata mikuy, nimuqta.
14Pedroñataqmi nirqa:
Manapunim mikuymanchu Señor. ¡Ñoqaqa manam haykapipas mana mikuna kaqkunataqa mikurqanichu! nispa.
15Chaymi huktawan nimurqa:
Diospa chuyanchasqantaqa amayá “millakuypaqmi” niychu.
16Chaynallam kimsa kutikama pasakurqa, chaymantam chay sabanasqa hanaq pachaman hoqarisqa karqa. 17“Ima ninantaq kayqa” nispa Pedro piensachkaptinmi, Corneliopa kachamusqankunam tapukachakustin, Simonpa samapakusqan wasipa punkuman chayarurqaku. 18Hinaspam hatunmanta qaparispa tapukurqaku:
¿Kaypichu Pedrowan sutichasqa Simón samapakuchkan? nispanku.
19Pedroñataqmi chay visión rikusqanmanta hinalla yuyaymanachkarqa, hinachkaptinmi Chuya Espíritu payta nirqa:
Qawariy, kimsa runakunam maskasuchkanki. 20Utqayman uraykuspayki ama iskayrayaspa paykunawan riy, ñoqam paykunataqa kachamurqani, nispa.
21Chaymi Corneliopa runankunaman uraykuspan Pedro nirqa:
Ñoqam kani maskasqaykichikqa. ¿Imamantaq hamurqankichik? nispa.
22Hinaptinmi paykunañataq nirqaku:
Ñoqaykutaqa Capitán Corneliom kachamuwanku. Payqa Diosta manchakuq justo runam, paytaqa llapa judiokunapas allin runapaqmi reqsinku. Diospa angelninmi payta kamachirqa wasinman qayachisuspayki qampa nisqaykikunata uyarinanpaq, nispanku.
23Hinaptinmi Pedroñataq chay wasiman paykunata yaykuykachispan samachirqa, hinaspanmi paqarinnintin punchaw paykunawan pasarqa, Jope llaqtapi yachaq wakin iñiqkunapas riysirqakum.
24Lloqsisqankumanta paqarinnintinmi Cesarea llaqtaman chayarurqaku. Cornelioñataqmi ayllunkunapiwan kuyasqan amistadninkunapiwan huñunakuruspanku Pedrota suyachkasqaku. 25Corneliopa wasinman Pedro chayaruptinmi Cornelioñataq, chaskiqnin lloqsimuspan Pedropa ñawpaqninpi qonqorakuykurqaku hatunchanankupaq. 26Ichaqa Pedrom sayarichispan kaynata nirqa:
¡Sayariy! Ñoqapas qam hina runallam kani, nispan.
27Pedroñataqmi Corneliowan rimastin yaykuspan, achkallaña huñunasqa runakunata wasi ukupi tariykurqa.
28Chaymi paykunata Pedro nirqa:
Qamkunaqa yachankichikmi judiokunaqa mana judío kaqkunawanqa manam hukllawakuymankuchu, manataqmi wasinmanpas yaykuymankuchu leyniyku harkawasqankurayku. Ichaqa Diosmi qawaykachiwan amaña pitapas “kayqa millakuypaqmi otaq huchasapa runam” nispa ninaypaq.
29Chayraykum qayarachimuwaptikichik mana iskayrayaspay chaypunilla pasamurqani. Chaynaqa, yachaykuytam munani ¿imapaqtaq qayachimuwarqankichik? nispa.
30Chaymi Cornelioñataq nirqa:
Tawa punchaw qepatam, kunan hina yaqa kimsa hora tardeykuyta kay wasiypi Diosta mañakuchkaptiy, suma-sumaq kancharichkaq pachayuq runa rikuriykuwarqa. 31Hinaspam niwarqa: “Cornelio, mañakusqaykikunatawan wakchakuna yanapasqaykitam Dios chaskiykun.
32Kunanyá runakunata Jope llaqtaman kachay, Pedrowan sutichasqa Simonta pusamunankupaq. Paymi samapakuchkan lamar qochapa patanpi yachaq suela ruwaq Simonpa wasinpi”, nispa.
33Hinaptinmi chaypunilla kachamurqani maskamusunaykipaq. Allinpaqmi hamurunkiqa. Kunanmi Diospa qayllanpi lliwchayku huñunasqa kachkaniku, Señorpa tukuy kamachimususqaykitam uyariyta munaniku, nispa.
Corneliopa wasinman Pedropa risqanmanta
34 #
Dt 10.17. Pedroñataqmi kaynata nirqa:
Kunanmi chayraq yachaykuni, Diospa qayllanpiqa hina chaynakamallam kasqanchikta, 35payqa may nacionmanta kaptinpas chaskinmi kasukuspa allin ruwaq runakunataqa. 36Diosmi Israelpa mirayninkunaman allin noticiata willachirqa, Jesucristontakama Dioswan allinyanakunankupaq; Jesucristoqa llapallanchikpa Señorninchikmi.
37Qamkunaqa yachankichikmi, bautizasqa kanankupaq Juanpa yachachisqanmanta qepaman, Galilea lawmanta qallaykuspa lliw Judea lawkunapipas imam pasakusqantaqa, 38hinaspa imaynam Nazaretmanta kaq Jesucristota Chuya Espiritupa atiyninwan Dios huntaykusqantaqa; paymi purirqa allinkunata ruwastin chaynataq Satanaspa ñakarichisqan runakunata sanoyachistin, tukuy chaykunataqa ruwarqa paywan Dios kasqanraykum.
39Judea lawpi hinaspa Jerusalén llaqtapi Jesucristopa ima ruwasqanmantaqa ñoqaykum testigo kaniku. Paytam cruzpi chakataruspanku wañurachirqaku. 40Ichaqa Diosmi payta kimsa punchaw wañusqanmanta kawsarichispan, ñoqaykuman rikuriykachiwarqaku.
41Manam llapallan runakunamanchu rikurirqaqa, aswanqa ñoqallaykumanmi, Jesusmanta willakunaykupaq ñawpaqmantaraq Diospa akllasqan kasqaykurayku. Kawsariramuptinmi Jesuswan kuska mikurqaniku hinaspa tomarqaniku. 42Paymi kamachiwarqaku llapa runakunaman paymanta willakunaykupaq, Jesucristotam Dios churarun wañuqkunatapas hinaspa kawsaqkunatapas juzgananpaq.
43Llapa profetakunapas Jesusmantam kaynata nirqaku: “Payman llapallan iñiqtaqa Diosmi huchanmanta pampachanqa”, nispanku.
Mana judío kaqkunapas Chuya Espirituta chaskisqankumanta
44Chaynata Pedro rimachkaptinraqmi lliw uyariqninkunaman Chuya Espíritu huntaykurqa. 45Hinaptinmi Pedrowan hamuq iñiq judiokuna llumpayta admirakurqaku, mana judío kachkaptinkupas Chuya Espiritupa atiynin huntaykusqanmanta.
46Paykunatam uyarirqaku mana yachasqanku rimaykunapi rimaqta, hinaspa Dios yupaychaqta. 47Hinaptinmi Pedro nirqa:
Ñoqanchik hina paykunapas Chuya Espirituta chaskichkaptinkuqa ¿yaqachum pipas harkakunman bautizasqa kanankuta? nispa.
48Chaymi Pedro kamachirqa Jesucristopa sutinpi bautizakunankupaq. Chaymantam Pedrota ruegarqaku iskay-kimsa punchawllapas paykunawan qeparinanpaq.
Currently Selected:
Hechos 10: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
