Hechos 11
11
Jerusalenpi kaq iñiqkunaman Pedropa willasqanmanta
1Judeapi kaq iñiqkunam apostolkunapiwan yacharurqaku mana judío kaq runakunapas Diospa palabran chaskisqankuta. 2Jerusalenman Pedro kutiramuptinñataqmi iñiq judiokuna paywan atipanakuspanku 3nirqaku:
¿Imanasqataq qamqa mana judío runakunapaman rirqanki, hinaspa paykunawan mikumurqanki? nispanku.
4Chaymi Pedro qallariyninmanta imaynam pasakusqanta willakuspan nirqa:
5Jope llaqtapim Diosta mañakuchkarqani, chaymi visionta rikurqani hanaq pachamanta tawan puntanmanta warkusqa hatun sabanasta ñoqapa kasqaykama uraykamuqta. 6Chayta qawaykuspaymi rikurqani tawa chakiyuq animalkunata, purun animalkunata, qasqonpa puriq animalkunata hinaspa alton pawaq urpikunata.
7Chaymantam kayna nimuwaqta uyarirqani: “Pedro hatariy, wañuchiy hinaspa mikuy” niqta. 8Chaymi ñoqañataq nirqani: “Señor manapunim mikuymanchu, ñoqaqa haykapipas manam mikurqanichu mana mikuna kaqkunataqa”, nispay.
9Chaymi hanaq pachamanta huktawan rimapayamuwarqa: “Diospa chuyanchasqantaqa amayá millakuypaqmi niychu”, nispa.
10Chaynallam kimsakama pasakurqa, hinaptinmi chaykunaqa hanaq pachaman kaqlla hoqarikururqa. 11Chay ratollapim kimsa runakuna chayaramurqa chay samapakusqay wasiman, Cesarea llaqtaman pusawanankupaq.
12Chaymi Chuya Espíritu kamachiwarqa: “Paykunawan riy ama iskayrayaspayki”, nispa. Ñoqawantaqmi rirqaku kay soqta iñiqmasinchikkunapas, lliwmi chay runapa wasinman yaykurqaniku. 13Chay runam willawarqaku wasinpi huk ángel rikuriykuspan kayna nisqanta: “Kunanyá runakunata Jope llaqtaman kachay Pedrowan sutichasqa Simonta pusamunankupaq. 14Paymi nisunki imaynam qampas hinaspa aylluykikunapas salvasqa kanaykichikmanta”, nispa.
15Paykunata rimapayachkaptiyraqmi ñoqanchikman imaynam ñawpaqta hamusqanpi hina Chuya Espíritu paykunaman uraykamurqa. 16#Hch 1.5.Chaymi yuyarirurqani Señorninchik Jesucristopa nisqanta, paymi nirqa: “Cheqaptam Juanqa yakuwan bautizarqa, qamkunañataqmi Chuya Espirituwan bautizasqa kankichik”, nispa.
17Chaynaqa, Señor Jesucristopi iñiqkunaman ñoqanchikman hina Espiritunta Dios qochkaptinqa ¿pitaq ñoqaqa karqani Diosta harkakunaypaqqa? nispa.
18Chaynata Jerusalenpi kaq iñiqkuna uyariruspankum manaña Pedropa contranpichu karqaku, hinaspam Diosta yupaycharqaku:
Chaynaqa, mana judío runakunamanpas Diosmi wanakuytaña qoykun wiñay kawsanankupaq, nispanku.
Antioquía llaqtapi iñiqkunamanta
19 #
Hch 8.1-4. Estebanta wañurachispankum wakin iñiqkunatapas ñakarichinankupaq qatikacharqaku, chaymi Fenicia, Chipre hinaspa Antioquía lawkunaman wakiqnin ayqekurqaku. Chaykunapim judío runakunallaman Jesucristomanta willakurqaku.
20Ichaqa Chipre lawmantawan Cirene llaqtamantam wakin iñiqkuna Antioquía llaqtaman chayarurqaku, paykunam mana judío kaq runakunaman Señor Jesusmanta allin noticiata willakurqaku. 21Diospa atiyninmi paykunata yanaparqa, chaymi achka runakuna Jesucristoman iñikurqaku.
22Jerusalén llaqtapi iñiqkunam kaykunata yacharuspanku, Antioquía llaqtaman Bernabeyta kacharqaku. 23Chayaruspanmi chay llaqtapi iñiqkunapaq Diospa kuyakuyninta qawaykuspan llumpayta kusikurqa, hinaspanmi paykunata kallpancharqa qaqa hina sayaspanku tukuy sonqowan Señorta qatinankupaq.
24Bernabeyqa karqa allin runam, Chuya Espiritupa huntasqanmi, hinaspa allin iñiyniyuqmi. Chaynapim achka runakuna Señorman iñikurqaku. 25Chaymantam Bernabé pasarqa Tarso llaqtaman Saulota maskamunanpaq, tariruspanñataqmi Antioquiaman pusarqa. 26Chaypim Antoquía iglesiapi huk watapuni karqaku achka iñiqkunata yachachistin. Antioquía llaqtapim Jesucristoman iñiqkunata “cristianokuna” nispa sutichayta qallaykurqaku.
27Chay punchawkunapim profetakuna Jerusalenmanta Antioquiaman rirqaku. 28#Hch 21.10.Paykunamantam hukninku Agabo sutiyuq sayarispan, Chuya Espiritupa yanapakuyninwan nirqa:
Tukuy kay pachapim hatun yarqay kanqa, nispa.
Chaymi cheqaptapuni pasakurqa emperador Claudiopa tiemponpi. 29Hinaptinmi Antioquía llaqtapi iñiqkuna rimanakurqaku Judea lawpi iñiqkunaman atisqankuman hina yanapakuyta apachinankupaq.
30Chaynapim Judea lawpi iñiqkunapa kamachiqninkunaman yanapakuyninkuta Bernabeywan hinaspa Saulowan apachirqaku.
Currently Selected:
Hechos 11: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
