Hechos 8

Iñiqkunata Saulo ñakarichisqanmanta

1Saulom allinpaq hapirqa Esteban wañuchisqankuta. Hina chay punchawllapim Jerusalenpi iñiqkunata ñakarichinankupaq qatikachayta qallaykurqaku. Chaymi llapa iñiqkuna Judea lawman hinaspa Samaria lawman cheqerurqaku, apostolkunallañam qeparurqaku. 2Hinaptinmi allin sonqoyuq runakuna Estebanta pamparurqaku, hinaspam paymanta llumpayta waqarqaku. 3#Hch 22.4-5; 26.9-11.Sauloñataqmi iñiqkunata chinkachinanpaq wasin-wasin qatikachaspan qaritapas warmitapas carcelman aparqa.

Samaria llaqtapi willakusqankumanta

4Ichaqa Jerusalenmanta cheqeqkunam, mayman rispankupas Jesucristomanta allin noticiata willakuqku. 5Chaynapim Felipepas Samaria llaqtaman rirqa, hinaspam Jesucristomanta willakurqa. 6Chaymi llapa runakuna huñunakuspanku Felipepa nisqanta huk sonqolla uyarirqaku, rikurqakutaqmi milagrokuna ruwasqantapas. 7Demoniopa huntasqan runakunatapas achkaqtam sanoyachirqa, runakunamantam chay demoniokuna qaparistin lloqsiqku. Suchukunawan wistukunapas sanoyarqakum. 8Chayraykum chay llaqtapi runakunaqa llumpay kusisqa karqaku.

9Samaria llaqtapim karqa Simón sutiyuq layqa, paymi layqakuq runa karqa hinaspam chay llaqtapi runakunata engañaq: “Ñoqaqa ancha yachayniyuq runam kani”, nispa. 10Paytam taksapas hatunpas kasukuqku, hinaspam paymanta niqku:

“Kay runapiqa Diospa hatun atiyninmi kachkan”, nispanku.

11Paytam kasukuqku, layqakuyninwan unayña paykunata engañasqanrayku. 12Ichaqa Diospa munaychakuyninmanta hinaspa runakunata salvaq Jesucristopa sutinmanta Felipepa rimasqanta uyarispa iñikuspankum qaripas warmipas bautizachikurqaku. 13Chaymi Simonpas Jesucristoman iñikuspan bautizachikurqa, hinaspam Felipewanña purirqa. Diospa atiyninwan milagrokunata Felipe ruwasqanta qawaspanñataqmi admirakurqa.

14Samaria llaqtapi runakuna Diospa palabran chaskisqankuta yacharuspankum, Jerusalenpi apostolkuna Pedrotawan Juanta kacharqaku. 15Paykunam Samaria llaqtaman chayaruspanku, Samariapi iñiqkuna Chuya Espirituta chaskinankupaq Diosta mañakurqaku. 16Paykunaqa Jesuspa sutillanpiraq bautizasqa kasqankuraykum Chuya Espirituqa mana mayqanmanpas hamurqaraqchu. 17Chaymi iñiqkunaman Pedrowan Juan makinkuta churaykuptinku Chuya Espirituta chaskirqaku.

18Simonñataqmi iñiqkunaman apostolkuna makinkuta churaptin paykunaman Chuya Espíritu hamusqanta qawaykuspan, apostolkunaman qollqeta qawachispan 19nirqa:

Ñoqamanpas chay atiyta qoykuwaychik, chaynapi pimanpas makiyta churaykuptiy Chuya Espirituta chaskinankupaq, nispa.

20Pedroñataqmi nirqa:

¡Qollqekiwan kuskayá infiernoman ripuy, qamqa Diospa atiynintam qollqewan rantiyta piensarqanki! 21#Sal 78.37.Kay chaskinaykipaqa manam partekipas nitaq suertekipas kanchu, sonqoykipas Diospa qayllanpiqa millakuypaqmi kachkan. 22Mana allin ruwaynikikunamantayá wanakuy, hinaspayá Diosta mañakuy, icharaqpas sonqoykipi chay mana allin piensasqaykita pampachasunkiman. 23Yachanim qamqa envidiosollaña kasqaykita hinaspa mana allin ruwaykunapa watasqan kasqaykita, nispa.

24Hinaptinmi Simonñataq nirqa:

Señortayá mañapullawaychik, chaynapi chay nisqaykichikkuna ama chayaramuwananpaq, nispa.

25Pedrowan Juanñataqmi Diospa palabranta willakuruspanku Jerusalenman kutirqaku, Samaria law llaqtakunapi Cristomanta allin noticiata willakustin.

Etiopía nacionniyuq runapa iñikusqanmanta

26Chaymantam Felipeta Diospa angelnin kaynata kamachirqa:

Sur lawman riy, Jerusalenmanta Gaza llaqtaman riq ñanninta, nispa.

Chay ñanqa chunniqnintam pasachkan. 27Felipeñataqmi rispan ñanpi tuparurqa Etiopía nacionniyuq eunucowan. Payqa karqa Etiopía nacionpi Candace sutiyuq reinapa qollqen waqaychaqmi. Paymi Diosta yupaychananpaq Jerusalenta rirqa. 28Hinaspam caballopa aysasqan carretanpi llaqtanman kutikuchkarqa profeta Isaiaspa qellqasqan librota leestin. 29Chaymi Felipeta Chuya Espíritu nirqa:

Rispayki wak carretaman asuykuy, nispa.

30Felipeñataqmi kallpaylla asuykuspan Isaiaspa qellqasqan libro leesqanta uyarirurqa, chaymi tapurqa:

¿Entiendechkankichu chay leesqaykipa imam nisqanta? nispa.

31Chay Etiopía runañataqmi nirqa:

¿Imaynataq entiendesaq mana pipas yachachiwachkaptinqa? nispan.

Chaymi Felipeta ruegarqa seqaspan waqtanpi tiyananpaq.

32Chay Qellqa leesqanqa kaynatam nirqa:

“Nakanapaq carnerota hinam wañuchinankuman aparqaku,

millwan rutuchikuq oveja hinam ñakarichiqninkunapa qayllanpi simillanta wichqaykurqa,

manam imatapas rimarirqachu.

33 # Is 53.7-8. Yanqamanta cargochaspam sentenciarqaku,

chaywanpas miraynintaqa ¿pitaq yupayta atinman?

kay pachamantam kawsayninta chinkarachirqaku”, nispa.

34Hinaptinmi Felipeta chay eunuco tapurqa:

Niykuway ¿pimantataq profeta kaypi rimachkan, kikinmantachu icha hukmantachu? nispa.

35Chaymi Felipeqa leesqankumanta qallaykuspan Jesusmanta allin noticiata willarqa. 36Yakupa kasqanman chayaruptinkum chay eunuco nirqa:

Kayqaya kaypi yaku kachkan ¿imataq harkawanman bautizakurunayta? nispa.

37 # 8.37 Kay textoqa ñawpaq manuscritokunapiqa manam kanchu. [Chaymi Felipeñataq nirqa:

Tukuy sonqoykiwan iñiptikiqa allinmi, nispa.

Hinaptinmi chay eunucoñataq nirqa:

Creenim Jesucristoqa Diospa Churin kasqanta], nispa.

38Chaynata niruspanmi carretata sayachinanpaq kamachirqa. Chaymi yakuman iskayninku uraykurqaku, hinaptinmi Felipeñataq bautizarqa. 39Yakumanta lloqsiramuptinkuñataqmi Felipeta Señorpa Espiritun huklawman aparurqa. Hinaptinmi chay eunucoqa manaña Felipeta rikurqachu, ichaqa kusisqallañam ripukurqa. 40Felipeñataqmi Azoto sutiyuq llaqtapiña rikurirurqa, hinaspanmi Jesusmanta allin noticiata willakustin llaqtan-llaqtan rirqa, Cesarea llaqtaman chayanankama.

Currently Selected:

Hechos 8: RCHQ2

Highlight

Copy