Hechos 6
6
Diaconopaq qanchis runakunata akllasqankumanta
1Chay punchawkunapim Cristoman iñikuqkuna aswan-aswan mirarqaku. Chaymi griego rimaq iñiqkuna hebreo rimaq iñiqkunamanta quejakurqaku:
Sapa punchaw mikuyta aypuspankum ñoqaykumanta kaq viudakunata mana allintachu atiendenku, nispanku.
2Chaymi chunka iskayniyuq apostolkuna llapallan iñiqkunata huñuruspanku nirqaku:
Sichum Diospa palabran yachachiyta saqeruspa mikuyta serviyniykuqa manam allinchu kanman. 3Chaynaqa, wawqe-panillaykuna, qamkunamantayá Chuya Espiritupa huntasqan allin yachayniyuq hinaspa allin kawsakuyniyuq qanchis runakunata akllaychik, chaynapi paykunaña mikuyta aypunankupaq. 4Ñoqaykuñataqmi Dios mañakuytawan palabran yachachiyta ñawpaqman apasaqku, nispanku.
5Chaymi llapa huñunasqakuna “allinmi” nispanku Estebanta akllarqaku. Payqa Chuya Espiritupa huntasqan hinaspa llumpay iñiyniyuq runam karqa. Akllarqakutaqmi Felipeta, Procorota, Nicanorta, Timonta, Parmenasta hinaspa Nicolastapas. Nicolasqa karqa judiokunapa religionninman tikrakuq Antioquía llaqtayuqmi. 6Paykunatam apostolkunaman pusamurqaku, apostolkunañataqmi paykunapa hawanman makinkuta churaykuspanku Diosta mañakurqaku.
7Diospa palabranta willakuptinkum Jerusalén llaqtapi llapa iñiqkuna aswan-aswan mirarqaku. Judiokunamanta kaq sacerdotekunapas achkallañam Jesusman iñikurqaku.
Estebanta presocharusqankumanta
8Estebanmi Diospa ancha bendecisqan kaspa chaynataq Diospa atiyninwan huntarisqa kaspan llapa runakunapa chawpinpi milagrokunata ruwaq. 9Jerusalenpim karqa “Esclavo kasqankumanta librasqakuna” nispa sutichasqanku sinagoga. Chaypim huñunakuqku Cirenemanta, Alejandriamanta, Ciliciamanta hinaspa Asiamanta kaq judiokuna. Paykunam Estebanwan atipanakuyta qallaykurqaku. 10Ichaqa manam Estebanta upallachiyta atirqakuchu allin yachaywan hinaspa Chuya Espiritupa yanapakuyninwan rimasqanrayku. 11Chaymi huk runakunaman pagarurqaku Estebanmanta llullakuspanku: “Ñoqaykum kay runata uyarirqaniku Moisespa hinaspa Diospa contranpi mana allinkuna rimaqta”, nispa rimanankupaq. 12Chaynapim llapa runakunatawan judiokunapa kamachiqninkunata hinaspa Diospa leynin yachachiqkunata Estebanpa contranpi hatarirachirqaku. Chaymi qonqayta pawaykuspanku Estebanta hapiruspa corteman aparqaku. 13Chay pusasqanku llulla runakunam Estebanpa contranpi kaynata nirqaku:
Kay runam mana upallaspa Diospaq sapaqchasqa wasimantawan Diospa leyninmanta mana allinkunata riman. 14Paymi nirqa: “Nazaretmanta kaq Jesusmi templota tuñichispan Moisespa kamachiwasqanchik costumbrenchikkunata tikranqa”, nispan.
15Hinaptinmi chay cortepi llapallan tiyaqkuna Estebanpa uyanta qawarispanku angelpa uyanta hina rikururqaku.
Currently Selected:
Hechos 6: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
