Hechos 5

Ananiaswan Safirapa huchallikusqankumanta

1Ananías sutiyuq runam warmin Safirapiwan chakrankuta rantikururqaku. 2Hinaspam warminwan tanteanakuruspanku wakin qollqeta rakikuykuspanku wakiqninta apostolkunaman aparqaku. 3Hinaptinmi Pedro nirqa:

Ananías ¿imanasqamá Satanasqa sonqoykita munaychakurun, chaynapi chakra rantikusqayki qollqeta rakikuykuspayki Chuya Espirituta llullakunaykipaqqa? 4¿Manachum chakraykiqa qampa karqa? Ña rantikuruptikiqa ¿manachum makillaykipi chay qollqeqa karqa? Manam runakunatachu llullakurunkiqa, aswanqa Diostam, nispa.

5Kayta uyariruspanmi Ananías pampaman wichiykuspa wañururqa. Chaymi llapallan uyariqkuna anchallataña mancharikururqaku. 6Cuerpontañataqmi wankuykuspanku pampamunankupaq jovenkuna aparqaku.

7Yaqa kimsa hora pasaruptinmi Ananiaspa warmin Safirapas chayaramurqa, payqa manam kay pasakusqanmantaqa imatapas yacharqachu. 8Chaymi Pedro tapurqa:

¿Chay precio nisqaykichikpichum chakraykichikta rantikurqankichik? nispa.

Hinaptinmi Safira nirqa:

Arí, chay preciopim, nispa.

9Pedroñataqmi nirqa:

¿Imanasqamá tanteanakururqankichik Señorpa Espiritunta pruebanaykichikpaqqa? Waqaya qosayki pampamuq runakuna kutimuchkankuña, kunanñataqmi qamtapas apasunki, nispa.

10Chayta niykuptillanmi Safiraqa Pedropa ñawpaqninman wichiykuspan wañururqa. Chaymi jovenkuna yaykuspanku wañusqataña tariykurqaku, hinaspam aparqaku qosanpa waqtanpi pampamunankupaq. 11Chaymi llapa iñiqkunawan chayta yachaqkuna llumpayta mancharikurqaku.

Milagrokuna ruwasqankumanta

12Llapa iñiqkunam huk sonqolla huñunakuqku templopi kaq Salomonpa portalninpi, apostolkunam Diospa atiyninwan admirakuypaq milagrokunata runakunapi ruwaqku. 13Wakin runa paykunaman asuykuyta manchakuptinpas runakunapa allin respetasqanmi karqaku. 14Sapa punchawmi qaripas warmipas Señor Jesucristoman iñikurqaku, chaymi iñiqkuna aswan-aswan mirarqaku. 15Onqoqkunatam camakunapi chaynataq chakanakunapi callekunaman hurqomuqku: “Ichapas kayninta Pedro pasaspan llantuyllanwanpas sanoyarachinman” nispanku. 16Chaynallataqmi Jerusalenpa muyuriqninpi llaqtakunamantapas achkaq runakuna hamuspanku apamurqaku onqoqninkuta hinaspa demoniopa ñakarichisqan runakunatapas, hinaptinmi llapallanku sanoyarqaku.

Pedrotawan Juanta presocharusqankumanta

17Sumo sacerdotem hinaspa saduceokunapa qatiqninkunam llumpayta envidiakurqaku. 18Hinaspam apostolkunata hapiruspanku carcelman wichqarurqaku. 19Ichaqa chay tutam Señorpa angelnin hamuspan punkuta kicharurqa. Paykunata hurqoruspanmi nirqa:

20Temploman rispaykichik runakunaman willamuychik, musoq vidamanta tukuy kay yachachikuykunata, nispa.

21Chaymi achikyaruptillan temploman rispanku yachachirqaku.

Sumo sacerdoteñataqmi paywan kaqkunapiwan, cortepi kaqkunapiwan huñunakunankupaq qayachirqaku Israel castakunapi lliw kamachikuqkunata. Hinaspam apostolkunata carcelmanta hurqomunankupaq kacharqaku. 22Guardiakunam carcelman chayaruspanku apostolkunataqa manaña tarimurqakuchu chaymi kutirispanku willakurqaku:

23Carceltam hina wichqasqata tariramuniku, punkupi guardiakunapas hinallam cuidachkanku, kichaykuptiykuñataqmi ukupiqa manaña pipas kasqañachu, nispanku.

24Templopi nanachikuq guardiakunapa kamachiqninwan, sacerdotekunapa kamachiqninkunam chayta uyariruspanku tapunakurqaku:

¿Imaraqchá pasakunqapas? nispanku.

25Chayllamanmi huk runa hamuspan nirqa:

Chay carcelpi wichqasqaykichik runakunaqa templopiñam yachachichkanku, nispa.

26Hinaptinmi guardiakuna kamachiqninkupiwan rispanku, runakuna rumiwan choqaparunankumanta manchakuspanku mana imanaspalla pusamurqaku. 27Chay autoridadkunapa kasqanman pusaramuptinkum sacerdotekunapa kamachiqnin nirqa:

28 # Mt 27.25. Ñoqaykuqa chunkay-chunkaytam kamachirqaykikuña chay Jesusmantaqa amaña yachachinaykichikpaq. Ichaqa Jerusalenpi lliw runakunaman yachachispaykichikmi, Jesuspa wañusqanmanta ñoqaykuta tumpawankiku.

29Hinaptinmi Pedrowan wakin apostolkuna nirqaku:

Runakunamanta puntataqa Diostam kasukunayku. 30Qamkunam Jesusta chakataruspaykichik wañurachirqankichik, ichaqa ñawpaq taytaykichikkunapa Diosninmi kawsarirachimurqa. 31Paytam hatunchaspan alleq lawninman Dios churarqa, chaynapi munaychakuq hinaspa salvaqninchik kananpaq chaynataq Israelpa mirayninkuna huchankumanta wanakuspa pampachasqa kanankupaq. 32Kaykunamantaqa ñoqaykum testigo kaniku, testigotaqmi kasukuqninkunaman Diospa qosqan Chuya Espiritupas.

33Chaymi kamachikuqkuna kaykunata uyariruspanku llumpayta piñakururqaku, hinaspam wañurachinankupaq rimanakurqaku. 34Hina chay kamachikuqkunawanmi huk fariseo Gamaliel sutiyuq kachkarqa. Paymi karqa Diospa leyninmanta yachachikuq. Paytam llapa runakuna llumpayta respetaqku. Paymi sayarispan kamachirqa apostolkuna hawaman lloqsiykunankupaq, 35hinaspam llapa kamachikuqkunata nirqa:

Israelpa mirayninkuna, kay runakunawan imam ruwanaykichiktaqa allinta tanteaychik. 36Ñawpaq punchawkunapim Teudas hatarirurqa allin hatun reqsisqapaq hapikuspan. Paytam qatirqaku yaqa tawa pachak runakuna ichaqa wañurachiptinkum qatiqninkunapas lliw cheqerurqaku, chaynapim yanqapaq karqa. 37Chaynallataqmi Galilea lawmanta kaq Judaspas censo punchawkunapi llapa runakunata hatarirachirqa, ichaqa paytapas wañurachirqakum, hinaptinmi qatiqninkunapas tukuy hinastinman cheqerurqaku. 38Chaymi nikichik, ama imanaychikchu kay runakunataqa, paykunataqa hawkallatayá saqeykuychik. Sichum yachachisqanku otaq imam ruwasqanku runakunallamanta kaspanqa chinkarunqam. 39Diosmanta kaptinmi ichaqa imayna chinkarachiytapas mana atiwaqchikchu. Chaynaqa, cuidakuychikyá, yanqañataq Diospa contranpi peleachkawaqchik, nispa.

40Chaymi lliwchanku paypa nisqanta kasuspanku apostolkunata qayaykuspa azoterqaku, hinaspam Jesuspa sutinmanta amaña rimanankupaq kamachispalla kachaykurqaku. 41Chaymi apostolkuna llumpay kusisqallaña juzgaqninkunapa qayllanmanta lloqsirqaku, Jesucristorayku ñakarinankupaq Diospa akllasqa kasqankumanta. 42Mana samaykuspankum templopipas, wasikunapipas sapa punchaw, Jesucristomanta willakuspa yachachiqku.

Currently Selected:

Hechos 5: RCHQ2

Highlight

Copy