Hechos 25

Gobernador Festopa ñawpaqninpi Pablo rimarikusqanmanta

1Gobernador Festo Cesarea llaqtaman chayaramuspanmi, kimsa punchawllamanta Jerusalén llaqtaman rirqa. 2Chaypim sacerdotekunapa kamachiqninkunawan ancha reqsisqa judiokuna, Pablota acusaspanku 3mañakurqaku:

Ama hina kaspaykiyá kay Jerusalén llaqtaman Pablota pusarachimuy, nispanku.

Chaynataqa mañakurqaku Pablota pusamuchkaptinku ñanpi wañurachinankupaqmi. 4Ichaqa Festom paykunata nirqa:

Pabloqa Cesarea llaqtapim preso kachkan, chayllam wakman risaq. 5Chaynaqa, qamkunamantayá llapa kamachikuqkuna ñoqawan Cesareaman richunku, hinaspayá imapas mana allin ruwaq kaptinqa acusamuchunku, nispa.

6Yaqa chunka punchaw Jerusalén llaqtapi karuspanmi, gobernador Festoqa Cesarea llaqtaman kutikurqa. Chaymi paqarinnintin punchawlla juzgananpi tiyaykuspan Pablota pusachimurqa. 7Pablo hamuruptinmi, Jerusalén llaqtamanta riq judiokuna asuykurqaku, hinaspam tukuy imamanta acusarqaku, ichaqa manam mayqanmantapas cheqap kasqantaqa qawachiyta atirqakuchu. 8Hinaptinmi rimarikuspan Pablo nirqa:

Ñoqaqa manam judiokunapa leyninpa contrapipas, templopa contranpipas nitaq Cesarpa contranpipas huchallikurqanichu, nispa.

9Ichaqa gobernador Festom judiokunawan allinpi kayta munaspan Pablota tapurqa:

¿Munankichum Jerusalenman riyta wakpiña juzgamunaypaq? nispa.

10Pabloñataqmi nirqa:

Cesarpa tribunalninpim kachkani juzgasqa kanaypaq. Yachasqaykipi hinapas judiokunapa contranpiqa manam ima mana allintapas ruwarqanichu. 11Sichum wañunaypaq hina ima mana allintapas ruwaptiyqa wañuchiwaychikyá. Sichum acusawasqanku mana cheqap kaptinqa, manam pipas judiokunamanqa entregawanmanchu. Chaynaqa, kikin emperador Cesarña juzgawananpaqmi mañakuni, nispa.

12Festoñataqmi consejeronkunawan rimanakuspan Pablota nirqa:

Emperador Cesarña juzgasunaykipaqmi mañakurunki, chaynaqa paymanmi rinki, nispa.

Pablota rey Agripaman pusasqankumanta

13Chay punchawkunapim rey Agripa warmin Berenicepiwan Cesarea llaqtaman rirqa, prefecto Festota watukuq. 14Chaypi achka punchawkuna qepaptinmi, rey Agripaman Pablomanta willaspa gobernador Festo nirqa:

Kaypim gobernador Felixpa saqesqan preso kachkan. 15Jerusalenpi kachkaptiymi sacerdotekunapa kamachiqninkunawan judiokunapa ancianonkuna mañawarqaku juzgaspay condenanaypaq. 16Chaymi nirqani: “Romapa leyninman hinaqa manam pitapas wañuchinmankuchu, imamantam acusasqankumanta llapa acusaqninkunapa qayllanpi manaraq rimarikuchkaptinqa”, nispay. 17Chaynapim acusaqninkuna hamuruptin, paqarinnintin punchawlla juzganaypi tiyaykuspay Pablota pusachimurqani. 18Ñoqaqa nirqani ima mana allinkunatachá ruwarqa nispaymi, ichaqa acusaqninkunam presentakamuspanku, mana ima huchantapas hurqoyta atirqakuchu. 19Religionnillanmantawan Jesús sutiyuq runapa wañusqallanmantam paypa contranpi tukuy imata rimarqaku. Paymantam Pablo nirqa: “Payqa kawsachkanmi”, nispa. 20Chay asuntomanta mana ima ruwaytapas atispaymi Pablota tapurqani: “¿Munankichu Jerusalén llaqtapiña qam juzgamunayta?” nispay. 21Pablom ichaqa mañakururqa kikin emperador Cesarña juzgananpaq, chaymi kamachirqani payman pusachinaykama hinalla preso kananpaq.

22Hinaptinmi rey Agripañataq Festota nirqa:

Ñoqapas munaymanmi chay runa uyariykuytaqa, nispa.

Festoñataqmi nirqa:

Paqarinpunim uyariykunki, nispa.

23Paqarinnintinñataqmi rey Agripawan warmin Berenice sumaqta allichapakuruspanku corteman rirqaku. Soldadokunapa kamachiqninwan chay llaqtapi ancha reqsisqa runakunam riysirqaku. Festoñataqmi Pablota pusanankupaq kamachikurqa. 24Chaymi Festo nirqa:

Rey Agripa hinaspa kaypi ñoqaykuwan huñunasqa runakuna, kaypim kay runata qawachkanchik. Paymantam llapa judiokuna Jerusalén llaqtapipas chaynataq kay llaqtapipas contranpi quejakuwaspanku, “wañuchunpuni” nispanku qayaykachakurqaku. 25Ñoqapa qawasqayman hinaqa, payqa manachusmi imatapas ruwarqachu wañunanpaq hinaqa. Aswanqa kikinmi mañakurqa emperador Cesarña juzgananpaq. Chaymi paymanña pusachisaq. 26Ichaqa kay runapa contranpi emperador Cesarman mana imapas qellqanaypaq kaptinmi qamkunaman pusachimuni; tukuymanta llalliqtaqa qampa qayllaykiman ancha reqsisqa rey Agripa, chaynapi sumaqta tapusqaykichikman hina imam kaqta qellqanaypaq. 27Manachusmi allinchu kanman imatapas contranpi mana qellqanaypaq kachkaptin preso apachiyniyqa, nispa.

Currently Selected:

Hechos 25: RCHQ2

Highlight

Copy