Hechos 24

Felixpa ñawpaqninpi Pablopa rimarikusqanmanta

1Pichqa punchawmantam Sumo sacerdote Ananías chayaramurqa Tértulo sutiyuq abogadontin hinaspa wakin kamachikuqkunapiwan. Hinaspam Pablota acusanankupaq prefecto Felixman anchuykurqaku. 2Chaymi Pablota pusaykaramuptinku abogado Tértulo acusaspan kaynata nirqa:

Gobernador Félix, gracias qanman kachun, qamraykum hawkayaypi kachkaniku, yachaywan kamachikuptikim nacionniykupi tukuy imakunapas ruwasqa karqa. 3Ancha reqsisqa gobernador Félix, llaqtaykupi tukuy chaykuna ruwasqaykimantam llapallayku ancha-anchata agradecekuykiku. 4Ichaqa manam tiempoyki pierdechiyta munanikuchu, chayraykum ruegakuyki asllapi uyariykuwanaykikupaq. 5Kay Pabloqa peste onqoy hinam. Tukuy hinastinpim judiokunata rakinamuchkan, payqa nazareno partidopa cabecillanmi. 6Temploykutapas millakuypaqtam ruwayta munarqa, chayraykum hapirurqaniku #24.6 Kay parteqa ñawpaq manuscritokunapiqa manam kanchu.[leyniykuman hina juzganaykupaq. 7Ichaqa comandante Lisiasmi hamuruspan maqapawaspanku Pablota qechuruwarqaku. 8Hinaspam kamachiwarqaku qayllaykipiña Pablota acusanaykupaq]. Chaynaqa, kikikiyá tapuykuy acusasqaykuqa cheqap kasqanta yachaykunaykipaq, nispa.

9Chaynata Tértulo rimaruptinmi chaypi kaq judiokunapas nirqaku:

Arí, tukuy kaykunaqa cheqappunim, nispanku.

10Chaymi gobernador Felixqa Pablota señascharqa rimarikunanpaq. Hinaptinmi Pabloqa kaynata nirqa:

Qanmi kay nacionpi unay wataña juez kachkanki, chaymi ñawpaqnikipi imam kaqta kunan rimarikusaq. 11Yaqa chunka iskayniyuq punchawllaraqmi Diosta yupaychanaypaq Jerusalén llaqtaman chayarqani. Chaymanta yachaykuyta munaspaykiqa tapukachakuykuyá. 12Ñoqaqa manam templopipas, sinagogapipas hinaspa callekunapipas piwanpas atipanakurqanichu, nitaqmi chaqwatapas hatarichirqanichu. Manataqmi chayna ruwachkaqtachu ñoqataqa tariwarqaku. 13Acusawasqankumantaqa manam paykunaqa pruebasunkimanchu. 14Ichaqa manam negakunichu, ñawpaq taytaykunapa Diosnintam yupaychani musoq yachachikuyman hina, chaytam paykuna ninku: “Rakinachiq partidom” nispanku. Ñoqaqa creenim Moisespa hinaspa profetakunapa lliw qellqasqanta. 15Ñoqapas paykuna hinam Diospi suyachkani allin runakunatawan mana allin runakunata hamuq punchawpi Dios kawsarichimunanta. 16Chayraykum Diospa qayllanpipas hinaspa runakunapa qayllanpipas concienciaypa mana acusasqan kawsakuyta munani.

17Unay watakunamantañam nacionniyman kutirqani wakcha judiokuna yanapanaypaq qollqeta apaspay chaynataq Diosmanpas ofrendaykunata qonaypaq. 18#Hch 21.17-28.Chayta ruwachkaptiymi Asia lawmanta hamuq judiokuna, templopi rikuruwarqaku. Chay ratopiqa costumbreykuman hinam chuyanchakuspay kachkarqani, ichaqa manam chaqwata ruwaspaychu nitaq achka runakunawanchu. 19Sichum contraypi imapas kaptinqa Asia lawmanta hamuq judiokunachiki kayman hamuspa acusawanmanku. 20Mana chayqa kaypi kaqkunayá rimarichunku, cortepi juzgawaspanku ima mana allintam ñoqapi tarisqankuta. 21#Hch 23.6.Paykunapa qayllanpi kachkaspayqa kayllatam rimarurqani: “Wañuqkunata Dios kawsarichinanmanta yachachisqayraykum juzgawachkankichik”, nispay.

22Pablopa nisqanta gobernador Félix uyariykuspanmi Jesucristomanta yachachikuyta allinta yachasqanrayku nirqa:

Soldadokunapa kamachiqnin Lisias hamuptinñam kay asuntomanta allinta yachasaq, nispa. 23Hinaspanmi capitanninta kamachirqa:

Pablota ama kacharispa cuidaychik, ichaqa amam harkakunkichikchu pipas watukamuspan yanapanantaqa, nispan.

24Punchawkuna pasaruptinmi, gobernador Felixqa judío castamanta warmin Drusilapiwan palacionman rispan, Pablota qayachimurqa Jesucristoman iñikuymanta willananpaq. 25Ichaqa runapa allin ruwananmanta, controlakuy yachaq kanamanta hinaspa llapallan runakunaqa Diospa juzgasqan kananmanta Pablo rimaruptinmi, gobernador Félix mancharikuspan nirqa:

Pasakuyña, tiempoy kaptinñam qayachimusqayki, nispan.

26Kachaykunanpaq qollqe qonanta munaspanmi achka kutita qayachimuq paywan parlananpaq. 27Iskay wata pasaruptinmi, gobernador kayninmanta Félix lloqsikurqa, hinaptinmi paypa rantinpi Porcio Festoña yaykurqa. Felixmi judiokunawan kuyachikuyta munaspan Pablota hina presollata saqerurqa.

Currently Selected:

Hechos 24: RCHQ2

Highlight

Copy