2 Timoteo 3
3
Tukupay tiempopi imaynam runakuna kananmanta
1Kaytapas yachaytaqyá tukupay punchawkunapiqa sasallaña tiempokunam hamunqa. 2Runakunam kanqaku kikillanpaq munaqkuna, qollqella kuyaqkuna, hatun tukuqkuna, Dios insultaqkuna, mama-taytanku mana kasukuqkuna, mana reqsikuqkuna, huchallapi purikuqkuna, 3mana kuyakuqkuna, mana pampachakuy munaqkuna, runakunapa contranpi rimaqkuna, mana controlakuqkuna, mana llakipayakuqkuna, allin kaqta cheqnikuqkuna, 4runamasin traicionaqkuna, loco hina ruwaqkuna, añañankakuna hinaspa Diosta maskananku kachkaptinpas aychankupa munasqallan maskaqkuna, 5yanqallam Diosta serviq tukunqaku, paykunaqa ruwayninkuwanmi cheqap kaqpa atiyninta wischupakunqaku.
Chayna runakunawanqa ama hukllawakuychu. 6Chayna runakunaqa wasin-wasin purispam huchasapa warmikunata engañanku, chay warmikunaqa tukuy rikchaq munapayaykunapa intusqanmi kachkanku. 7Paykunaqa musoq yachachikuykunata yachayta munaspapas cheqap yachachikuytaqa manam entiendenkuchu. 8#Ex 7.11.Imaynam Janeswan Jambrespas Moisespa contranpi karqaku, chaynam kay runakunapas cheqap yachachikuykunapa contranpi kachkanku. Mana allin yuyaymanayniyuq kaspankum Jesucristoman mana iñisqankurayku Diospa mana chaskisqan kachkanku. 9Paykunaqa manam imapipas puntamanqa rinqakuchu, lliwmi mana yuyayniyuq kasqankuta yacharunqaku, chaynam pasakurqa Moisespa contranpi hatariq Janeswan Jambreswanpas.
Tukuykunanpaq Pablopa kunasqanmanta
10Qanmi ichaqa yachachisqayman hapipakuspayki qatiwarqanki, imaynam kawsasqayta, imam munasqayta, iñiyniyta, pacienciakuq kasqayta, kuyakuq kasqayta, upallalla ñakarisqayta, 11#Hch 13.14-52.#Hch 14.1-7.#Hch 14.8-20.qatikachasqa kasqayta hinaspa ñakarisqayta. Yachankitaqmi Antioquía llaqtapi, Iconio llaqtapi hinaspa Listra llaqtapi runakunapa qatikachasqan kaspay ñakarisqaytapas, aswanqa Señormi tukuy chaykunamanta libraykuwarqa. 12Cheqaptaqa Cristo Jesuspa munasqanman hina kawsayta munaqqa qatikachasqam kanqa. 13Mana allin runakuna hinaspa engañakuq runakunam ichaqa aswan-aswanraq mana allinman chayanqaku, pantachispankum paykunapas pantachisqa kanqaku.
14Qamyá ichaqa qaqa hina sayaspa yachasqaykikunata umaykipi waqaychay, qamqa yachankim pikunam yachachisusqaykitapas. 15Qamqa warma kasqaykimantaraqmi Chuya Qellqapi yachachikuykunata yacharqanki, chaykunaqa yachaytam qosunki Cristo Jesuspi iñispa salvakunaykipaq. 16Chuya Qellqaqa llapallanmi Diospa yuyay qosqanman hina qellqasqa, allinmi yachachinapaq, pantaypi kasqanta qawachinapaq, pantaypi puriqta allin ñanman kutichinapaq chaynataq allin kawsakuyta yachachinapaq. 17Chaynapi Diospa runankunaqa yachayniyuq kaspa tukuy allinkunata ruwanankupaq.
Currently Selected:
2 Timoteo 3: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012