2 Timoteo 2
2
Soldado hina kanamanta
1Churilláy Timoteo, Cristo Jesuspa kuyakuyninwan kallpanchakuy. 2Achka runakunapa qayllanpi uyariwasqaykita, iñiyninpi allin takyaq runakunaman yachachiy, chaynapi paykunapas hukkunaman yachachinankupaq.
3Qamqa Jesucristopa allin soldadon hinayá ñakariy. 4Serviciopi kaq Soldadoqa manam sapaq ruwaymanqa chapukunchu, aswanqa kamachiqnintam kasukun. 5Kallpaqpas premiota chaskinanpaqqa reglamentonman hinam kallpanan. 6Chakrapi llamkaqpas puntataqa tarpunanraqmi cosechananpaqqa. 7Kay nisqaykunapiyá yuyaymanay, hinaptinqa Señormi lliwta yachachisunki.
8Rey Davidpa mirayninmanta kaq Jesucristota yuyariy, paymi kay allin noticia willakusqayman hina wañusqamanta kawsarimurqa, 9chayraykum ñakariykunata aguantani, runa wañuchiqta hinam cadenaruwanku, Diospa palabranmi ichaqa mana cadenasqachu kachkan. 10Chaymi akllasqankunata kuyasqayrayku tukuyta ñakarispay aguantachkani, chaynapi paykunapas Cristo Jesusnintakama salvakuspanku wiñay kawsayta haypanankupaq.
11Kay palabraqa cheqapmi:
Sichum paywan wañukusun, paywantaqmi kawsakusunpas,
12 #
Mt 10.33; Lc 12.9. ñakarispaqa paywanmi munaychakusun,
payta negaptinchikqa, paypas negaruwasuntaqmi,
13sichum payta qepanchakurusun,
paymi ichaqa mana qepanchakuwasunchu,
payqa imam nisqantapas manam negakunmanchu.
Diospaq allin llamkaqmanta
14Kay nisqaykunata yuyarichiy, ima rimaypipas Diospa qayllanpi ama atipanakunankupaq, chay ruwayninkuqa manam valenchu, aswanqa uyariqkunatam tuñichin. 15Kallpanchakuyá Diospa chaskisqan kanaykipaq, allin llamkaq hinayá mana imamantapas penqakuspa Diospa cheqap palabranta allinta yachachiy. 16Mana respetowan yanqapas-yanqa rimaqkunataqa ama uyariychu, chayna rimaqkunaqa aswan-aswanmi Diosmanta karunchakunku. 17Chayna runakunapa yachachikuyninqa ismupakuy onqoy hinaraqmi mirarun, chay yachachiqkunaqa Himeneowan Filetom. 18Paykunam cheqapmanta pantarunku: “Wañuqkunaqa ñam kawsarirunkuña” nispanku. Chaynapim wakin iñiqkunatapas pantachichkanku. 19Diosmi ichaqa sellachkaq hina mana kuyuriq cimientota churarqa, chaypim kaynata nichkan:
Señorqa paypa kaqkunataqa reqsinmi, chaynaqa Señorpa sutin qayakuqkunaqa mana allin ruwaykunamanta rakikuchunku, nispa.
20Hatun wasipiqa imakunapas manam qorimanta qollqellamantachu kachkan, kachkantaqmi kullumanta hinaspa allpamantapas. Wakinmi allin kaqkunapi servikunanpaq, wakinñataq sapa punchaw qachachanapaq. 21Chaynam ñoqanchikpas mana allin kaqkunamanta sapaqchakuspanchikqa Señorninchikpa instrumenton kasunchik. Diosllapaqña sapaqchakuspam chaylla kasunchik paypa munasqanta imatapas allinta ruwananchikpaq.
22Joven kaypa munapayayninkunamanta ayqekuspa allin kaqkunata maskay, allin ruwayta, iñiyta, kuyakuyta hinaspa hawkayayta, haykam chuya sonqonkumanta Señorninchikta qayakuqkunawan kuska. 23Runakunapa yanqa atipanakusqanmanqa ama chapukuychu, yachasqaykipi hinapas chaykunaqa peleollatam hatarichin. 24Señor serviqqa manam peleollapichu purinan, aswanqa llapallanwanmi allinlla kanan, payqa chaylla allin yachachikuqmi hinaspa mana piñakuqmi, 25mana kasukuqkunatapas llampu sonqollawanmi corregiykunan, icharaqpas wanakunanpaq Dios tiempota qoykunman, chaynapi cheqap kaqta reqsinankupaq, 26chaynapi pantaypi kasqankuta reqsikuspanku diablopa presochasqanmanta lluptinankupaq. Paykunaqa diablopa watasqanmi kachkanku paypa munayninta ruwanankupaq.
Currently Selected:
2 Timoteo 2: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012