1 Timoteo 5
5
Iñiqkunawan imaynam kawsanamanta
1Amayá mayor señorkunataqa qaqchaychu, aswanqa taytaykita hinayá rimapayay, jovenkunatañataq wawqekikunata hina. 2Mayor señorakunataqa amayá qaqchaychu, aswanqa kuyakuywanyá mamaykita hina rimapayaykuy, sipaskunatapas panikikunata hinayá respetowan rimapayay.
3Mana piniyuq viudakunatapas yanapaykuyá. 4Sichum huk viudapa kanman wawan otaq willkanpas, hinaspaqa paykunayá puntata wasinpi kaqkunapaq allin ruwayta yachachunku, tayta-mamanmanyá uywasqanmanta kuyakuywan kutichichun. Chayna ruwayqa Diosninchikpa allin qawasqanmi kanqa. 5Sapallan qeparuq cheqap mana piniyuq viudaqa Diosmanmi hapipakun, payqa tuta punchawmi mana qonqaspa Diosta mañakun. 6Mana allinkunapi puriq viudam ichaqa wañusqa hinaña kachkan. 7Tukuy kaykunatayá yachachiy chaynapi imamantapas ama qaqchachikunankupaq. 8Sichum pipas ayllunkunata hinaspa tukuymanta llalliqtaqa wasinpi yachaqkunata mana mantienespanqa iñisqantapas qepanchakurunñam, Diosman mana iñiq runakunamantapas aswanraqmi payqa rikurirun.
9Listaman churaspaqa soqta chunka masnin watayuq viudakunallatayá churay, paykunaqa kanan qosan wañukuptin mana yapakuqkunallam. 10Payqa wawankuna allin uywasqanwanmi, visitakuna allin chaskisqanwanmi, iñiqmasinkunapa #5.10 Chaki mayllaymanta nispaqa nichkan uchuychakuywan iñiqmasinkunata serviymantawan wasinpi samaykachiymanta. (Jn 13.5)chakin mayllaykusqanwanmi, ñakariqkunata yanapasqanwanmi hinaspa tukuy imapas allinkuna ruwasqanwanyá reqsichikuchun.
11Kallpanpiraq kaq viudakunataqa amaraq listamanqa churaychu. Paykunaqa Jesucristoman prometekusqankuta qonqaruspankum huktawan casarakuyta munanmanku, 12hinaspam prometekusqankuta mana cumplispanku huchallikunmanku. 13Mana imapas ruwananku kaptinmi wasin-wasin purinmanku, cuento qepi rikuriruspankum yanqakunaman chapukunmanku mana rimanakunata rimaspa. 14Chaymi ñoqaqa munayman kallpanpiraq kaq viudakunaqa huktawan casarakuspanku wawayuq kanankuta, wasinkupi ocupakunankuta, chaynapi enemigowan ama kamichikunankupaq. 15Wakin viudakunaqa Cristomanta karunchakuruspankum satanastaña qatichkanku.
16Sichum Jesucristoman iñikuq warmipa otaq qaripa ayllunmanta viudayaruqkuna kaptinqa, paymi chay viudakunataqa yanapanan, chaynapi iglesiata ama gastoman churananpaq, chayna kaptinqa cheqap mana piniyuq viudakunallatam iñiqkunaqa yanapanqaku.
17Haykam iñiqkuna ukupi llamkaq ancianokunaqa allin respetasqa hinaspa allin pagasqa kachunku, tukuymanta llalliqtaqa willakuqkunawan hinaspa yachachikuqkuna. 18#Dt 25.4.#Mt 10.10; Lc 10.7.Chuya Qellqapim kaynata nin:
Erapi trillachkaq torotaqa amam senqapankichikchu, nispa.
Huklawpipas nichkantaqmi
Llamkaqqa pagontam chaskinan, nispa.
19 #
Dt 17.6; 19.15. Huk ancianota, pipas imamantapas tumpaspaqa iskay otaq kimsa testigota pusamuchun, sichum mana pusamuptinqa ama chaskiychu. 20Ñataq-ñataq huchapi puriqkunataqa llapallankupa qayllanpiyá qaqchay, chaynapi hukkunapas manchakunankupaq. 21Dios Taytanchikpa, Señor Jesucristopa hinaspa akllasqan angelkunapa qayllanpim kamachiki kay yachachisqaykunata cumplinaykipaq, amam imatapas ruwankichu pimanpas sayapakuspaqa. 22Manaraq sumaqta reqsiykuchkaspaykiqa amayá chayllaqa pimanpas makikitaqa churaychu kamachikuq kananpaqqa, chaynapi paykunapa huchanwan ama qachachakunaykipaq. Qamqa chuya sonqollayá kawsay.
23Wiksa nanaynikiraykuyá hinaspa sapa kuti onqosqaykiraykuyá ama yakullatañachu tomay, aswanqa as vinotawanyá tomay.
24Wakin runakunapa huchanqa manaraq juzgasqa kachkaptinmi sutilla qawachikun, wakinkunapam ichaqa chaymantaña yachakun. 25Chaynallataqmi runapa allinkuna ruwasqankunapas sutilla qawachikun, mana allinkuna ruwasqakunapas manataqmi pakasqachu kanqa.
Currently Selected:
1 Timoteo 5: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012