1 Timoteo 4
4
Iñiyninku qepanchakuqkunamanta
1Cheqaptam Chuya Espirituqa willawanchik tukupay punchawkunapiqa wakinkunam iñiyninkuta qepanchakunqaku hinaspa engañakuq espiritutaña kasukuspanku, demoniokunapa yachachikuyninkunataña chaskispanku, 2iskay uya llulla runakunatañam uyarinqaku, chay runakunapaqa concienciankupas qarayasqañam kachkan. 3Chayna runakunam harkakunqaku:
Ama casarakuychikchu, kay-wak mikuytaqa ama mikuychikchu, nispanku.
Diosmi lliw mikuykunataqa unancharqa payman agradecekuspa mikunanchikpaq, chaymi iñiqkunaqa cheqap kaqta yachasqanchikrayku imatapas mikuchwanchik. 4Diospa tukuy ima unanchasqanqa allinmi, chaymi ima mikuytapas mana wischupakunanchikchu, chaytaqa Diosman agradecekuspam chaskikunanchik. 5Diospa palabranwan hinaspa Diosta mañakusqanchikraykum chay mikuykunaqa chuyanchasqaña.
Jesucristopa allin serviqninmanta
6Sichum kaykunata wawqe-paninchikkunaman yachachispaykiqa, Jesucristopa allin serviqnin hinaspa iñisqanchik palabrakunapi allin yachayniyuqmi kanki, chay yachasqaykitam allinta qatichkanki. 7Amayá mana pasaq cuentokunataqa uyariychikchu, aswanqa Diospa munasqanpaq kaqkunataña ruway. 8Cuerponchikwan ejercicio ruwayqa asllatam yanapawanchik, Diospa munasqan kaqkuna ruwaymi ichaqa lliwpi allinpaq yanapawanchik, kayqa kunan kawsaypipas hinaspa hamuq kawsaypipas allinninchikpaqmi. 9Kay palabraqa cheqapmi, chaymi lliw runakuna chaskinanku. 10Chayraykum ñakaristinpas llamkanchik wiñay kawsaq Diosninchikpi hapipakuspa. Payqa llapa runapa salvaqninmi, ichaqa tukuymanta llalliqtaqa haykam iñiqkunatam salvan.
11Kaykunata kamachispa yachachiy. 12Jovenraq kasqaykiraykuqa ama piwanpas despreciachikuychu, aswanqa iñiqkunapa ejemployá kay: Rimaynikipi, allin kawsaynikipi, kuyakuynikipi, iñiynikipi chaynataq chuya sonqo kaynikipipas. 13Chayamunaykama iñiqkunapa qayllanpi Chuya Qellqanta leey, chaynata yachachispayki wawqe-paninchikkunata kallpanchay. 14Qampi kaq Diospa atiynintaqa amayá qonqaruychu, kaytaqa profeciaman hina iglesiapi ancianokuna makinkuta hawaykiman churaykuspanku mañakuptinkum chaskirqanki.
15Kaykunataqa yuyaywanyá ruway hinaspa allinta takyay, chaynapi imaynam aswan-aswan ñawpaqman risqaykita qawanankupaq. 16Kikikitayá cuidakuy hinaspa imam yachachisqaykimantapas. Chaypitaqyá takyay, chaynata ruwaspam kikikipas salvakunki chaynataq uyarisuqnikikunatapas salvanki.
Currently Selected:
1 Timoteo 4: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
