1 Timoteo 3
3
Iñiqkuna nanachikuqkunamanta
1Cheqapmi kayqa: “Iñiqkuna nanachikuyta pipas munaspanqa, allin llamkaytam munachkan”. 2Iñiqkunamanta nanachikuqqa kanan: Mana pipapas anyananmi, huk warmiyuqllam, imamantapas controlakuqmi, allin yuyaywan imapas ruwaqmi, allichakuyninpas kanan allinmi, visitakuna allin chaskiykuqmi, allin yachachikuqmi, 3upyakuykunapi mana purikuqmi, peleollapi mana purikuqmi, pacienciakuqmi, mana atipanakuqmi, qollqellaman mana qokuruqmi. 4Chayna runaqa wasinpi kaqkunatam allinta kamachinan, churinkunatam allinta yachachinan kasukuq hinaspa respetakuq kanankupaq. 5Wasinpipuni kamachikuyta mana atichkaspaqa ¿imaynataq Diospa iglesiantaqa nanachikunman? 6Chayllaraq iñikuq runaqa manam iñiqkunamanta nanachikuqqa kanmanchu, yanqañataqmi hatun tukuruspan diablo hina castigasqa kanman. 7#Tit 1.6-9.Iñiqkuna nanachikuqtaqa mana iñiqkunapas lliwmi respetananku. Mana chayqa paymanta mana allinta rimaptinkum paypas diablopa pantachikuyninman urmaykunman.
Diaconokunamanta
8Diaconokunapas kananku allin respetana runakunam, mana yanqakuna rimaqkunam, tomaykunapi mana purikuqkunam hinaspa mana yanqamanta qollqe ganay munaqkunam. 9Paykunaqa creesqanchik cheqap kaqpim hapipakunanku, hinaspam chuya concienciayuq kawsananku. 10Puntataqa allin otaq mana allin kawsasqantayá pruebaychik, sichum allin kasqanta qawaykuspaykichikqa diácono kananpaqyá churaychik. 11Warmikunapas kachunku, allin respetanapaq hina, ama cuento qepichu, imamantapas allin yuyaywan kawsakuq hinaspa tukuy imapas ruwayman churaq. 12Diaconokunaqa huk warmiyuqllam kananku, paykunaqa wasinpi kaqkunatawan chaynataq churinkunatapas allintam kamachinanku. 13Diaconokuna allinta llamkaspankuqa runakunapa allinpaq qawasqanmi kanqaku, chaynapim aswan confianzawanraq willakunqaku Jesucristoman imaynam iñikusqankumanta.
Imaynam Diosman iñikusqanchikmanta
14Kay cartatam qellqamuchkayki, ichaqa chayllam qam watukaykamuyta munachkani, 15sichum unaramuptiyqa yachaytaqyá imaynam Diospi iñiqkunapa qayllanpi allin kawsayta. Paykunaqa kawsaq Diospa wasin hinam kachkanku, wasipa pilarnin hina kaspankum cheqap kaqta takyachichkanku. 16Mayna hatunmi Diosman iñinanchikpaq pakasqa kaqkuna qawachiwasqanchikqa:
“Diosmi runayarurqa,
Espíritu yanapaptinmi acusaqninkunata vencerqa,
payqa angelkunapa qawasqanmi karqa,
llapallan nacionkunapim willakusqa karqa,
kay pachapi kaqkunapa iñisqanmi karqa,
hanaq pachapipas chaskisqam karqa”.
Currently Selected:
1 Timoteo 3: RCHQ2
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012