1 Timoteo 6
6
1Esclavokunapas respetowan patronninkuta allinpaq hapichunku, chaynapi Diospa sutinmanta hinaspa yachachisqanchikmanta ama hukmanta rimanankupaq. 2Sichum esclavokunapa patronnin iñiqmasin kaptinqa amayá iñiqmasin kasqanraykuqa mana kaqpaqqa hapichunchu. Aswanqa chay patronnin iñiqmasin hinaspa kuyay wawqen kasqanraykuyá allinta servichun. Kaykunatayá yachachiy hinaspa kamachiy.
Imawanmi kusikunanchikmanta
3Sichum pipas yachachinqa hukniraq yachachikuyta, manataq Señorninchik Jesucristopa yachachikuyninman hinachu nitaq cheqap yachachikuyman hinachu 4chayqa, hatun tukuqmi, mana imapas yachaqmi, muspaypi hina rimakuspa atipanakuqmi, chayna atipanakuykunamantam mirarun envidianakuykuna, piñanakuykuna, kaminakuykuna hinaspa hukman piensaykuna, 5millay pensamientoyuq runakunapa atipanakuyninkuna, cheqap kaq mana yachaykuna, Diosta servispayqa apuyarusaqmi niykuna. #6.5 Kay parteqa ñawpaq manuscritokunapiqa manam kanchu.[Chaykunamanta karunchakuy] 6Dios serviyqa qori-qollqe tariruy hinam, sichum imapas kapuqninwan contentakuptinqa. 7Nacespanchikqa kay pachamanqa manam imatapas apamurqanchikchu, chaynataqmi wañukuspanchikpas imatapas mana apasunchu. 8Pachanchikpas mikunanchikpas kaptinqa, chaywanyá contentakusun. 9Apuyaylla munaqkunaqa tentachikuspam trampaman hina mana valeq kaqkunallaman wichiykunku, chaykunaqa apakun llakillamanmi hinaspa wañuyllamanmi. 10Qollqella kuyayqa tukuy mana allin ruwaykunapa qallariyninmi. Achkaqmi qollqeta kuyaruspanku Diosman iñisqankumantapas karunchakurunku, hinaspam sasachakuykunapiwan ñakariykunapi tarikunku.
Iñiqkunaqa soldado hina kasqanchikmanta
11Qanmi ichaqa Diospa runan kanki, chaynaqa chay llapa mana allin ruwaykunamanta ayqekuy hinaspa imatapas allinta ruway, Diosllapaqña kawsaspa, iñiypi, kuyakuypi, pacienciakuspa hinaspa llampu sonqolla kaspa. 12Allin peleachkaq hinayá iñisqaykipi kallpanchakuy wiñay kawsayta haypanaykipaq. Chaypaqmi Dios qayasurqanki, iñisqaykimantapas willakurqankiñam achka testigokunapa qayllanpi. 13#Jn 18.37.Qamtam kamachimuyki llapallan kawsachiq Diospa hinaspa Poncio Pilatopa ñawpaqninpi cheqap kaqmanta willakuq Jesucristopa qayllanpi. 14Kay kamachikuyta ama qachachaspa mana pantaspa kasukuy, Señorninchik Jesucristo kutimunankama. 15Paytam tiempo chayamuptin Dios rikurichimunqa. Payllam Tukuy Atiyniyuq Diosqa, kamachikuqqa, reykunapa Reyninqa hinaspa señorkunapa Señorninqa. 16Payllam mana wañuqqa, mana asuykuy atina kanchariq achkiypim kawsakun, manam pipas rikurqachu nitaqmi rikuyta atinmanchu. Payllam llumpay atiyniyuqqa, chaynaqa wiña-wiñaypaqyá yupaychasqa kachun. Amén.
17Llapa apukunata kamachiy ama hatun tukunankupaq nitaq tukuruqlla kapuqninkupipas hapipakunankupaq, paykunaqa kawsaq Diosllaman hapipakuchunku, payllam chaninninpi llapa imakunatapas kusikunanchikpaq qowaqninchikqa. 18Allin kaqkuna ruwanankupaq kamachiy, allinkuna ruwayninyá apu kayninkuqa kachun, kuyakuywan imallankupas qokuykuqyá kachunku. 19Chaynapim hamuq tiempopaq llapa imankunapas taqesqa hina kanqa, hinaspam cheqap wiñay kawsayta haypanqaku.
Cartapa tukuyninmanta
20Timoteo, imam yachasqaykikunatayá sonqoykipi takyachiy, amayá mana pasaq rimaykunataqa chaskiychu nitaq iñisqanchikpa contranpi: “Ñoqaykuqa yachaywanmi rimaniku”, nispa rimaqkunatapas. 21Chayna yachachikuykunata qatispankum wakin iñiqkunapas Diosmanta karunchakurunku.
Diosninchikyá tukuy imapi kuyakuyninta qamkunaman chaqchurimuchun. Amén.
Currently Selected:
1 Timoteo 6: RCHQ2
Highlight
Share
Copy
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012