Maarkɩ 9
9
1Pʋwayɩ lɛ, Yesu tasɩ-wɛ heyuu se: «Toovenim lɛ, meheyiɣ-mɩ se mbá pɛwɛ cɩnɛ yɔ, pa-taa lɛlaa naɣ ɛzɩma mbʋ́ Ɛsɔ Kewiyaɣ kɔŋnɩ ɖoŋ yɔ nɛ pʋcɔ pasɩ.»
Pɩyɛ, Yakubu nɛ Yohanɛɛsɩ pana Yesu Ɛsɔ koboyaɣ taa
(Mat 17.1-13; Luk 9.28-36)
2Kɩyakɩŋ loɖo ɖɛwa lɛ, Yesu yaa Pɩyɛ nɛ Yakubu nɛ Yohanɛɛsɩ nɛ ɛ nɛ wɛ pakpa pʋʋ sɔsɔʋ nakʋyʋ yɔɔ pe-ɖeke. Peeɖe ɛlɛɣzɩ pɛ-ɛsɩndaa yem kpaagbaa kpɛlɩ nɛ 3e-wondu hʋlʋmɩ layɩ layɩ nɛ tɩñɩlɩzɩɣ. Nɔɔyʋ fɛyɩ kedeŋa yɔɔ cɩnɛ se ɛpɩzɩɣ ɛhʋlɩsɩ-tʋ ḿbʋ́. 4Alɩwaatʋ ńdʋ́ʋ́ Elii nɛ Mooyiizi palɩ pɔ-yɔɔ nɛ pa nɛ Yesu pɔyɔɔdʋʋ. 5Ɛlɛ́, Pɩyɛ heyi Yesu se: «Wɩlɩyʋ! Đɩwɛʋ cɩnɛ yɔ, pʋwɛ ɖeu pɩŋŋ. Pʋmʋnaa se ɖisiɣ kɩɖanɖɩŋ naadozo: ña lɛɛkʋ, Mooyiizi lɛɛkʋ nɛ Elii lɛɛkʋ.»
6Toovenim lɛ se Pɩyɛ ɛɛnaɣ se ɛyɔɔdɩ se we. Sɔɔndʋ kpa ɛ nɛ ɛ-taabalaa lɛlaa. 7Ɛyɔɔdaɣ ḿbʋ́ lɛ, ɛsɔmɩnʋʋ nakʋyʋ kɔɔ kuhuuzi pɔ-yɔɔ nɛ panɩɩ pʋyɔɔdʋʋnɩ-wɛ nɛ kɩ-tɛɛ se: «Ɛnɛ lɛ man-Pɩyalʋ kʋsɔɔlʋ, maahʋʋ ɛ-yɔɔ kaʋ. Ɩnɩɩnɩ-ɩ.» 8Tɔmkpɛlɩkɩyaa ḿbá patɩcɔnɩ pɔ-cɔlɔ kpɛɛɛ lɛ, patatasɩ nɔɔyʋ naʋ nɛ pɩtasɩnɩ Yesu.
9Pakʋyɩ pʋʋ yɔɔ nɛ petiki lɛ, Yesu paɣ́-wɛ se: «Ɩtaaheyi nɔɔyʋ mbʋ́ ɩnawa yɔ nɛ pʋkɔɔ pɩsɩɩnɩ kɩyakʋ ŋgʋ́ Ɛyʋ Pɩyalʋ fema nɛ ɛlɩɩnɩ sɩɖaa taa yɔ.» 10Ɛlɛ́, pɔ́ɖɔ́kɩ tɔm ńdʋ́ nɛ pɔpɔzʋʋ ɖama se: «Ɛyɔɔdʋʋ se efeŋ nɛ ɛlɩɩnɩ sɩɖaa taa yɔ, pʋ-tɔbʋʋ se we?» 11Pʋwayɩ lɛ, pɔpɔzɩ-ɩ se: «Pɩlabɩ ɛzɩma nɛ paɣtʋ wɩlɩyaa tɔŋ se pʋwɛɛ se náyʋ Elii ɛlayɩ Weyi Ɛsɔ Lɩzaa Yɔ kɔm?» 12Yesu cosi-wɛ se: «Toovenim, pʋwɛɛ se Elii ɛlayɩ kɔm nɛ ɛɖaɣnɩ pɩtɩŋa camɩyɛ. Meheyiɣ-mɩ ɖɔɖɔ se Ɛyʋ Pɩyalʋ tɔm pamawa se ɛkɔŋ tɔɔʋ kʋñɔŋ siŋŋ nɛ peniɣzi-i. 13Ɛlɛ́, mankaɖɩɣ-mɩ se Elii tɛm kɔm nɛ palabɩ-ɩ mbʋ́ pɔsɔɔlaa yɔ ɛzɩ paamaʋ ɛ-tɔm Ɛsɔtɔm Takayaɣ taa yɔ.»
Yesu ɖɔɔnɩ eleeu nɔɔyʋ pɩɣa nakɛyɛ wayɩ
(Mat 17.14-21; Luk 9.37-43a)
14Petibini pʋʋ yɔɔ nɛ patalɩ tɔmkpɛlɩkɩyaa lɛlaa cɔlɔ lɛ, pamaɣnɩ ɛyáa samaɣ kpeɣli peeɖe nɛ pa nɛ Yuda ñɩma paɣtʋ wɩlɩyaa pɔhɔŋnɩ ɖama tɔm. 15Ɛyáa samaɣ tɩna Yesu lɛ, pɩɖɩɣzɩ patɩŋa nɛ pese powolo se pɛsɛɛ-ɩ. 16Ɛlɛ́, ɛpɔzɩ ɛ-tɔmkpɛlɩkɩyaa se: «Ɛbɛ yɔɔ mɩ nɛ wɛ ɩhɔŋaɣnɩ ɖama tɔm ḿbʋ́?» 17Peeɖe ɛyáa samaɣ taa nɔɔyʋ kʋyaa nɛ ɛpazɩ yɔɔdʋʋ se: «Wɩlɩyʋ, mɔnkɔnɩ man-pɩyalʋ ñɔ-cɔlɔ, eleeu nɔɔyʋ wɛ ɛ-wayɩ nɛ ɛpɩsɩ-ɩ kaayɔɔdaɣ. 18Paa le, eleeu ɛnʋ ɛkpaɣ-ɩ nɛ ɛyakɩnɩ tɛtʋ nɛ ɛ-nɔɔ ñɛyɩɣ huluu nɛ ɛsalɩɣ e-kela nɛ ɛwɛɛ caŋjanaa. Mewini ñɔ-tɔmkpɛlɩkɩyaa se pɔɖɔɔnɩ eleeu ɛnʋ ɛ-wayɩ, ɛlɛ́, patapɩzɩ.» 19Peeɖe Yesu holini-wɛ se: «Ɛyáa lidaʋ fɛyɩ tɩnaa mɩ! Alɩwaatʋ ɛzɩma mantasɩɣ mɩ-cɔlɔ caɣʋ nɛ pʋwɛɛ se mɔnɖɔkɩ mɔ-hɔyɛ ɖɔɖɔ? Ɩkɔnɩ-m pɩɣa ŋ́gá cɩnɛ!» 20Ɛlɛ́, powoni-kɛ. Eleeu ɛnʋ ɛtɩlosi Yesu lɛ, ɛpazɩ pɩɣa ŋ́gá pɩsʋʋ kpɛndɛɣlɩsɩ nɛ kɔtɔlɩ tataa nɛ kepilimi nɛ huluu ñɛyɩ kɔ-nɔɔ. 21Yesu pɔzɩ ka-caa se: «Alɩwaatʋ ndʋ́ʋ́ eleeu pazɩ-kɛ labʋ ḿbʋ́?» Ɛ́lɛ́ cosi-i se: «Đooo ka-pɩjatʋ taa 22eleeu pazɩ-kɛ tuzuu nɛ ɛpɛɖɩɣ miŋ nɛ lɩm pa-taa se kasɩ. Ḿbʋ́ labɩna nɛ mentendiɣ-ŋ se yee ŋpɩzɩɣ yɔ, ŋna ɖa-pʋtɔdɩyɛ nɛ ŋsɩnɩ-ɖʋ.» 23Peeɖe Yesu pɔzɩ-ɩ se: «Pɩlabɩ ɛzɩma nɛ ŋtɔŋ se yee manpɩzɩɣ? Weyi ɛwɛnɩ lidaʋ Ɛsɔ yɔɔ yɔ, pʋyʋ nɔɔyʋ fɛyɩ se Ɛsɔ ɛɛpɩzɩɣ ɛlabɩ-ɩ-pʋ.» 24Ɛlɛ́, pɩɣa ŋ́gá ka-caa tɩmabʋ kubuka se: «Man-caa mɛwɛnɩ lidaʋ, ɛlɛ́ sɩnɩ-m nɛ mɛntɛzɩ wɛnaʋ lidaʋ Ɛsɔ yɔɔ pɩŋŋ.»
25Yesu na ɛyáa samaɣ seɣaɣ powoki ɛ-cɔlɔ lɛ, eholini eleeu ɛnʋ se: «Weyi ña ŋwɛ pɩɣa ŋ́gá ka-wayɩ nɛ ŋpɩsɩ-kɛ kaayɔɔdaɣ nɛ ŋtɔ ka-nɩŋgbaaŋ taa yɔ, se! Wiɖiyi mantaatasɩ-ŋ naʋ ka-wayɩ.» 26Peeɖe eleeu ɛnʋ ɛmabɩ kubusi nɛ ɛñamsɩ-kɛ siŋŋ nɛ ese ka-wayɩ. Ɛlɛ́, kefiɣni nɛ halɩ pʋwɛɛ ɛzɩ kasɩba yɔ nɛ ɛyáa tɔŋ se: «Kasɩba kpem.» 27Ɛlɛ́, Yesu ɖɔkɩ ke-nesi taa nɛ ɛkʋsɩ-kɛ nɛ kasɩŋ.
28Yesu woba ɛsʋʋ ɖɩɣa nɛ ɛ nɛ ɛ-tɔmkpɛlɩkɩyaa pacaɣ pe-ɖeke lɛ, pɔpɔzɩ-ɩ se: «Pɩlabɩ ɛzɩma nɛ ɖɩtapɩzɩ ɖɩɖɔɔnɩ eleeu ɛnʋ pɩɣa ŋ́gá ka-wayɩ?» 29Peeɖe ecosi-wɛ se: «Ɛsɔ sɛʋ ɖeke pɩzɩɣnɩ pɩha ɛyʋ ɖoŋ nɛ ɛɖɔɔnɩnɩ pɩtɛ eleeu ɛnʋ.»
Yesu yɔɔdɩ nabʋlɛ ñɩm ɛ-sɩm nɛ e-fem pɔ-tɔm
(Mat 17.22-23; Luk 9.43b-45)
30Yesu nɛ ɛ-tɔmkpɛlɩkɩyaa pakʋyɩ ɖɩɣa lɛ, patɩŋnɩ Galilee egeetiye taa. Ɛlɛ́, ɛtaasɔɔlɩ se panɩɩ ɛ-taŋ. 31Mbʋ́ pʋyɔɔ yɔ, ɛwɩlaɣ ɛ-tɔmkpɛlɩkɩyaa. Eheyaɣ-wɛ se: «Pɔkɔŋ kpaʋ Ɛyʋ Pɩyalʋ nɛ paɖʋzɩ-ɩ ɛyáa nesi taa nɛ pakʋ-ɩ nɛ ɛsɩ. Kɩyakɩŋ naadozo wiye lɛ, Ɛsɔ fezi-i.» 32Ɛyɔɔdɩ ḿbʋ́ lɛ, ɛ-tɔmkpɛlɩkɩyaa tanɩɩ pʋ-tɔbʋʋ. Ŋgʋ́, patakatɩɣ se pɔpɔzɩ-ɩ natʋyʋ.
Anɩ lɛ sɔsɔ tɔmkpɛlɩkɩyaa taa?
(Mat 18.1-5; Luk 9.46-48)
33Yesu nɛ ɛ-tɔmkpɛlɩkɩyaa patalɩ Kapɛrnayum lɛ, pasʋʋ ɖɩɣa. Peeɖe ɛpɔzɩ-wɛ se: «Tɔm ndʋ́ ɩhɔŋaɣnɩ ɖama nʋmɔʋ taa?» 34Ɛlɛ́, posuma, mbʋ́ pʋyɔɔ yɔ, sɔsɔtʋ yɔɔ poyowaɣ. 35Peeɖe Yesu caɣaɣ nɛ ɛ́yáa pe-hiu nɛ naalɛ nɛ eheyi-wɛ se: «Weyi ɛcaɣ se ɛkɛ sɔsɔ yɔ, pʋdʋ ɛpɩsɩ ɛ-tɩ lɛlaa taa pɩɣa nɛ ɛla patɩŋa payɩ tʋmɩyɛ.» 36Ɛtɛm-wɛ heyuu ḿbʋ́ lɛ, ɛkpaɣ pɩɣa cikpelaɣ nakɛyɛ nɛ ewoni-kɛ pɛ-hɛkʋ taa nɛ ɛkpazɩ-kɛ ɛ-yɔɔ nɛ eheyi-wɛ se: 37«Yee nɔɔyʋ ɛmʋ piya cikpesi sɩnɛ sɩ-taa nakɛyɛ mɔ-yɔɔ yɔ, man-tɩ tɩŋa ɛmʋwa. Weyi ɛmʋ-m yɔ, pɩtɛkɛ man-tɩ tɩŋa ɛmʋwa, ɛlɛ́, weyi etiyi-m yɔ ɛmʋwa.»
Weyi ɛɛkʋyʋʋ Yesu yɔɔ yɔ, ɛkɛ ɛ-ñɩnʋ
(Luk 9.49-50)
38Pʋwayɩ lɛ, Yohanɛɛsɩ heyi Yesu se: «Wɩlɩyʋ, ɖɩna nɔɔyʋ ɖɔɔnaɣ aleewaa nɛ ño-ɖoŋ nɛ ɖɩkʋyɩ se ɖikiziɣni-i se ɛtɛkɛ ɖa-ñɩnʋ.» 39Peeɖe Yesu cosi-wɛ se: «Ɩtaaɖaŋ-ɩ, mbʋ́ pʋyɔɔ yɔ, nɔɔyʋ fɛyɩ se ɛpɩzɩɣ ɛla hama lakasɩ nɛ mon-ɖoŋ nɛ ɛtɛ ɛyɔɔdɩ-m tɔm ɛzaɣ́tʋ ɖɔɖɔ. 40Toovenim lɛ, weyi ɛɛkʋyʋʋ ɖɔ-yɔɔ yɔ, ɛkɛ ɖa-ñɩnʋ. 41Mɩ lɛ, ɩkɛ ma-ñɩma. Ɛlɛ́, meheyiɣ-mɩ se yee nɔɔyʋ ɛha mɩ-taa nɔɔyʋ lɩm lɩkpadaɣ maɣmaɣ ma Krɩstʋ mɔ-yɔɔ yɔ, paa pɩɩla ɛzɩma, Ɛsɔ kɔŋ-ɩ hɛyʋʋ pu-lone taa.»
Ɖɩɖɔkɩ ɖa-tɩ nɛ ɖɩtaala kɩwɛɛkɩm
(Mat 18.6-9; Luk 17.1-2)
42Yesu tasɩ yɔɔdʋʋ se: «Yee nɔɔyʋ eyeba nɛ mbá pɛwɛnɩ lidaʋ mɔ-yɔɔ nɛ patakpaɣ-wɛ payaa pʋyʋ yɔ pa-taa nɔɔyʋ la kɩwɛɛkɩm yɔ, pɩkɩlɩ weewee se pɛlɛɛ e-liu tɛɛ pɩyɛ sɔsɔɖɛ nɛ powoni pɛpɛɖɩ teŋgu taa. 43Yee ñe-nesi eyekini se ŋla kɩwɛɛkɩm yɔ, sɛtɩ-sɩ nɛ ŋlɔ. Pɩkɩlɩ ɖeu se ŋwɛnɩ nesi kʋɖʋmsɩ nɛ ŋhiɣ wezuu ɛzɩ ŋŋwɛnɩ ñe-nesi naalɛ nɛ Ɛsɔ pɛɖɩ-ŋ kʋñɔŋ maatɛŋ taa ɖenɖe miŋ eeɖeŋ kaʋ yɔ. [ 44Peeɖe ‹sonzoowe wena atɔkɩ ɛyáa nɛ aasɩkɩ kaʋ yɔ nɛ miŋ weyi eeɖeŋ kaʋ yɔ pɛwɛɛ.›] 45Yee ña-naŋgbaŋaɣ eyekini se ŋla kɩwɛɛkɩm yɔ, sɛtɩ-kɛ nɛ ŋlɔ. Pɩkɩlɩ ɖeu se ŋwɛnɩ naŋgbaŋaɣ kʋɖʋmaɣ nɛ ŋhiɣ wezuu ɛzɩ ŋŋwɛnɩ ña-naŋgbanzɩ naalɛ nɛ Ɛsɔ pɛɖɩ-ŋ ɖenɖe kʋñɔŋ maatɛŋ wɛɛ yɔ. [ 46Peeɖe ‹sonzoowe wena atɔkɩ ɛyáa nɛ aasɩkɩ kaʋ yɔ nɛ miŋ weyi eeɖeŋ kaʋ yɔ pɛwɛɛ.›] 47Yee ñɛ-ɛsɩyɛ eyekini se ŋla kɩwɛɛkɩm yɔ, hɔɔzɩ-ɖɩ nɛ ŋpɛɖɩ. Pɩkɩlɩ ɖeu se ŋsʋʋ Ɛsɔ Kewiyaɣ taa nɛ ɛsɩyɛ kʋɖʋmɖɩyɛ ɛzɩ ŋŋwɛnɩ ɛsɛ naalɛ nɛ Ɛsɔ pɛɖɩ-ŋ kʋñɔŋ maatɛŋ taa ɖenɖe miŋ eeɖeŋ kaʋ yɔ. 48Peeɖe ‹sonzoowe wena atɔkɩ ɛyáa nɛ aasɩkɩ kaʋ yɔ nɛ miŋ weyi eeɖeŋ kaʋ yɔ pɛwɛɛ.› 49«Ɛzɩma mbʋ́ paɖʋʋ ɖɔm tɔɔnaɣ taa nɛ kɛwɛɣ leleŋ yɔ, ḿbʋ́ ɖɔɖɔ Ɛsɔ tɩŋɩɣnɩ kʋñɔŋ yɔɔ nɛ ɛñɔɔzɩ paa weyi. 50«Đɔm kɛ pʋyʋ kɩbanʋ. Ɛlɛ́, yee pilesi pi-leleŋ lɛ, ɛzɩma palakɩ-pʋ nɛ pɩɖaɣnɩ kpaʋ leleŋ yɔ? Mɩ lɛ, pʋwɛɛ se mɩ-taa ɛwɛnɩ ɖama leleŋ pɩŋŋ ɛzɩ ɖɔm wɛʋ leleŋ yɔ nɛ mɩtɩŋa payɩ ɩwɛɛ laŋhɛzɩyɛ taa.»
Currently Selected:
Maarkɩ 9: KABI
Highlight
Share
Copy
Want to have your highlights saved across all your devices? Sign up or sign in
