Maarkɩ 10

Yesu yɔɔdʋʋ halɩkpaɣyɛ nɛ halʋ kizuu tɔm

(Mat 19.1-12; Luk 16.18)

1Yesu tɛm-wɛ wɩlʋʋ ḿbʋ́ lɛ, ɛkʋyɩ ewolo Yudee egeetiye taa nɛ ɛtɛzɩ Yɔɔrdaŋ pɔɔ wayɩ. Ɛtɛzaa lɛ, ɛyáa samaɣ tasɩ kpeɣluu ɛ-cɔlɔ nɛ ɛpazɩ-wɛ wɩlʋʋ ɛzɩ ɛtɩɩlakʋʋ yɔ. 2Peeɖe Farɩsɩ ñɩma nabɛyɛ woba pañɩ ɛ-nɔɔ cɔlɔ tɔm se: «Đa-paɣtʋ taa lɛ, pɩha nʋmɔʋ se ɛyʋ pɩzɩɣ ɛɖɔɔnɩ ɛ-halʋ naa we?» 3Yesu pɔzɩ-wɛ se: «Paɣtʋ ndʋ́ Mooyiizi ɖʋ-mɩ?» 4Pocosi-i se: «Mooyiizi ha nʋmɔʋ se ɛyʋ pɩzɩɣ ɛma kizuu takayaɣ nɛ ɛcɛlɩ ɛ-halʋ nɛ ɛɖɔɔnɩ-ɩ.» 5Peeɖe Yesu cosi-wɛ se: «Mɩ-laŋa kpɩzɩŋ yɔɔ Mooyiizi ɖʋ-mɩ paɣtʋ ḿbʋ́. 6Đooo kajalaɣ lɛ, Ɛsɔ labɩ pɩtɩŋa nɛ ɛla halʋ nɛ abalʋ ɖɔɖɔ. 7Pʋ-yɔɔ abalʋ yeki ɛ-caa nɛ e-ɖoo nɛ ɛnɩɩnɩ ɛ-halʋ 8nɛ pa-naalɛ papɩsɩ ɛyʋ kʋɖʋm. Patatasɩ kɛʋ ɛyáa naalɛ. Ɛlɛ́, papɩsɩ ɛyʋ kʋɖʋm. 9Yee ḿbʋ́ pɩtamʋnɩ se ɛyʋ ɛyasɩ mbʋ́ Ɛsɔ kpɛndaa yɔ.»

10Yesu nɛ ɛ-tɔmkpɛlɩkɩyaa pasʋ ɖɩɣa lɛ, paɖaɣnɩ-ɩ pɔzʋʋ tɔm ńdʋ́. 11Ɛlɛ́, ecosi-wɛ se: «Yee ɛyʋ ɛɖɔɔnɩ ɛ-halʋ nɛ ɛkpaɣ lɛlʋ yɔ, ɛyʋsɩnɩ kajalaɣ ñɩnʋ, ɛlabɩ acɛyɛ. 12Ḿbʋ́ ɖɔɖɔ yee halʋ nɔɔyʋ ekizi ɛ-walʋ nɛ ɛɖɛɛ ɛwalɩ kɩfalʋ yɔ, ɛlabɩ acɛyɛ.»

Yesu wazɩɣ piya cikpesi yɔɔ

(Mat 19.13-15; Luk 18.15-17)

13Pɩkɛdaa lɛ, ɛyáa wokini piya Yesu cɔlɔ se ɛtɩnɩ sɩ-yɔɔ nesi nɛ ɛwazɩ sɩ-yɔɔ. Peeɖe ɛ-tɔmkpɛlɩkɩyaa ɖaŋ-wɛ. 14Yesu na ḿbʋ́ lɛ, pɩtɛkɛdɩnɩ-ɩ, ɛlɛ́ ɛkalɩ ɛ-tɔmkpɛlɩkɩyaa se: «Iyele piya nɛ sɩkɔɔ mɔn-cɔlɔ, ɩtaaɖaŋ-sɩ. Mbʋ́ pʋyɔɔ yɔ, mbá pɛwɛ ɛzɩ piya ńzɩ́ yɔ lɛ Ɛsɔ Kewiyaɣ taa ñɩma. 15Toovenim lɛ, meheyiɣ-mɩ se yee nɔɔyʋ etetisi ɛzɩ piya cikpesi tisuu se Ɛsɔ tɔkɩnɩ kewiyaɣ yɔ yɔ, ɛɛsʋʋ Ɛsɔ Kewiyaɣ taa.» 16Peeɖe Yesu kpaɣ piya ńzɩ́ ɛ-yɔɔ nɛ ɛtɩnɩ sɩ-yɔɔ nesi nɛ ɛwazɩ sɩ-yɔɔ.

Ñɩm tʋ nɔɔyʋ nɛ Yesu pɔ-tɔm

(Mat 19.16-30; Luk 18.18-30)

17Yesu tɛm piya yɔɔ wazʋʋ nɛ ɛkpaɣ nʋmɔʋ lɛ, abalʋ nɔɔyʋ kpaɣ seya nɛ ewolo eluŋ ɛ-tɛɛ nɛ ɛpɔzɩ-ɩ se: «Wɩlɩyʋ kɩbanʋ! Ɛbɛ pʋwɛɛ kpem se mala nɛ mehiɣ wezuu maatɛŋ?» 18Peeɖe ɛpɔzɩ-ɩ se: «Pɩlabɩ ɛzɩma nɛ ŋyaɣ-m se kɩbanʋ? Nɔɔyʋ tɛkɛ kɩbanʋ nɛ pɩtasɩnɩ Ɛsɔ. 19Paa pɩɩla ɛzɩma, ŋsɩm Ɛsɔ paɣtʋ ndʋ́ paɖʋwa se: taakʋ ɛyʋ, taala acɛyɛ, taamɩlɩ, taacɛtɩnɩ lɛlʋ taa, taacɛzɩ lɛlaa nɛ ŋtɔɔ pa-ñɩm nɛ ŋña ña-caa nɛ ño-ɖoo yɔ.» 20Peeɖe abalʋ ɛnʋ eheyi-i se: «Wɩlɩyʋ! Mɔnɖɔm paɣtʋ ńdʋ́ tɩtɩŋa payɩ tɩ-yɔɔ ɖooo me-evebutu taa.» 21Yesu cɔnɩ-ɩ pɩŋŋ lɛ, ɛ-tɔm kɛdɩnɩ-ɩ nɛ eheyi-i se: «Pʋyʋ kʋɖʋm koŋ pɩkazaa se ŋtɛzɩ labʋ. Wolo ŋpɛdɩ mbʋ́ ŋwɛna yɔ pɩtɩŋa payɩ nɛ ŋtayɩ kʋñɔndɩnaa pi-liidiye nɛ ŋwɛnɩ ñɩm ɛsɔdaa. Yee ŋlabɩ ḿbʋ́ lɛ, ŋkɔɔ ŋtɩŋ-m.» 22Eheyi abalʋ ɛnʋ ḿbʋ́ lɛ, ɛ́lɛ́ laŋɩyɛ wɛɛkɩ nɛ ɛñɩŋ ɛsɩndaa nɛ ɛcaŋ ɛɖɛɛ hɛɛɛ. Mbʋ́ pʋyɔɔ yɔ, ɛwɛnɩ ñɩm pɩtɩɩfɛyɩ.

23Ɛɖɛwa lɛ, Yesu cɔnɩ ɛ-tɔmkpɛlɩkɩyaa mbá pɛwɛ ɛ-cɔlɔ yɔ pɛ-ɛsɩndaa kpɛɛɛ nɛ eheyi-wɛ se: «Pʋwɛ kaɖɛ pɩtɩɩfɛyɩ se ñɩm tɩnaa ɛsʋʋ Ɛsɔ Kewiyaɣ taa.» 24Ɛyɔɔdɩ ḿbʋ́ lɛ, pɩlabɩ-wɛ piti. Peeɖe Yesu tasɩ-wɛ heyuu se: «Men-piya, ɩcɔnɩ ɩna ɛzɩma mbʋ́ pʋwɛ kaɖɛ kpem mbá pataɣ pa-ñɩm yɔ se pasʋʋ Ɛsɔ Kewiyaɣ taa yɔ. 25Pʋcɔ ñɩm tʋ nɔɔyʋ sʋʋ ka-taa lɛ, pʋwɛ kaɖɛ nɛ pɩkɩlɩ ɛzɩ kpaŋnɔ siɣá naalɛ tʋ sʋʋnɩ ɛjɔʋ pɔʋ taa yɔ.» 26Peeɖe pɩtɛzɩ-wɛ ɖɩɣzʋʋ nɛ pɔpɔzʋʋ ɖama se: «Yee ḿbʋ́ apɩzɩɣ ehiɣ ñʋʋ yabʋ yɔ?» 27Yesu cɔnɩ-wɛ pɩŋŋ lɛ, eheyi-wɛ se: «Ɛyáa ɛɛpɩzɩɣna, ɛlɛ́, Ɛsɔ ñapɩzɩɣ, mbʋ́ pʋyɔɔ yɔ, ɛpɩzɩɣ ɛla pɩtɩŋa payɩ.»

28Peeɖe Pɩyɛ pɔzɩ-ɩ se: «Cɔnɩ ŋna, ɖa yɔ, ɖiyebi pɩtɩŋa payɩ nɛ ɖɩtɩŋ ña-wayɩ, ɛbɛ ɖihikiɣ yɔ?» 29Yesu cosi-i se: «Toovenim lɛ, meheyiɣ-mɩ se yee nɔɔyʋ eyebi ɛ-caa yaa e-ɖoo yaa e-piya yaa ɛ-ɖalaa yaa ɛ-kɔɔnaa yaa e-newaa yaa ɛ-hayɩm yaa ɛ-ɖɩɣa yaa mbʋ́ pɩtɩŋa payɩ ɛwɛna yɔ ma nɛ Laŋhɛzɩyɛ Tɔm ɖɔ-yɔɔ yɔ, 30ɛkɔŋ wɛnaʋ mbʋ́ mbʋ́ ɛɛwɛna yɔ pɩ-tam mɩnʋʋ kpaɣnɩ nɔɔnɔɔ ɛjaɖɛ yɔɔ cɩnɛ. Ɛkɔŋ wɛnaʋ ɖɩsɩ, ɖalaa, kɔɔnaa, ɖoonaa, piya nɛ hayɩm sakɩyɛ. Đɔɖɔ lɛ, ɛyáa wɛɣ ɛ-wayɩ kaŋ kaŋ kedeŋa yɔɔ cɩnɛ. Piyele alɩwaatʋ ndʋ́ tɩkɔŋ yɔ tɩ-taa lɛ, ɛkɔŋ hiɣu wezuu maatɛŋ.» 31Peeɖe Yesu tasɩ-wɛ heyuu se: «Mbá pɛkɛ sɔsaa lɛɛlɛɛyɔ yɔ, pa-taa sakɩyɛ kɔŋ pɩsʋʋ cikpema nɛ mbá paba kɛ cikpema lɛɛlɛɛyɔ yɔ, pa-taa sakɩyɛ ñapɩsɩ sɔsaa.»

Yesu yɔɔdʋʋ tozo ñɩm ɛ-sɩm nɛ e-fem pɔ-tɔm

(Mat 20.17-19; Luk 18.31-34)

32Yeruusalɛm Yesu nɛ ɛ-tɔmkpɛlɩkɩyaa pakpaɣaɣ nɛ ɛyɔɔdʋʋ ḿbʋ́. Ɛɛɖɛ-wɛ nɔɔ nɛ ɛyáa sakɩyɛ tɩŋɩɣ-wɛ. Pakpaɣaɣ ḿbʋ́ lɛ, ɛ-tɔmkpɛlɩkɩyaa laŋɩyɛ lɩɣ nɛ sɔɔndʋ kpaɣ ɛyáa mbá patɩŋaɣ-wɛ yɔ. Peeɖe ɛya ɛ-tɔmkpɛlɩkɩyaa hiu nɛ naalɛ ḿbá nɛ ɛkɛzɩ-wɛ hɔɔlʋʋ nɛ eheyi-wɛ mbʋ́ pʋkɔŋ-ɩ tɛmnaʋ alɩwaatʋ pazɩ taa yɔ. 33Eheyi-wɛ se: «Đɩkpaɣʋ Yeruusalɛm yɔ, pakpaɣ Ɛyʋ Pɩyalʋ nɛ paɖʋzɩ-ɩ cɔjɔnaa sɔsaa nɛ paɣtʋ wɩlɩyaa pe-nesi taa. Paba kʋʋ ɛ-tɔm nɛ paɖʋ se pakʋ-ɩ nɛ pakpaɣ-ɩ paɖʋzɩ mbá pɛtɛkɛ Yuda ñɩma yɔ pe-nesi taa 34nɛ paba woŋ-i nɛ pɔtɔ ɛ-yɔɔ ndaatʋ nɛ polu-i agbazɛɛ nɛ pakʋ-ɩ nɛ ɛsɩ. Kɩyakɩŋ naadozo wayɩ lɛ, Ɛsɔ fezi-i.»

Mbʋ́ Yakubu nɛ Yohanɛɛsɩ pɔpɔzɩ Yesu yɔ

(Mat 20.20-28)

35Yesu tɛm yɔɔdʋʋ lɛ, Zebedee pɩyalaa Yakubu nɛ Yohanɛɛsɩ powolo ɛ-cɔlɔ nɛ peheyi-i se: «Wɩlɩyʋ, ɖɩcaɣ se ŋlabɩ-ɖʋ mbʋ́ ɖɩsʋlʋmʋʋ-ŋ yɔ.» 36Peeɖe ɛpɔzɩ-wɛ se: «Ɛbɛ ɩcaɣ se malabɩ-mɩ?» 37Pocosi-i se: «Đe-liu wɛɛ se ŋkɔm ŋcaɣ ñe-kewiyaɣ kpelaɣ yɔɔ lɛ, ŋyele nɛ ɖɩcaɣ ñɔ-cɔlɔ: lɛlʋ ña-nɩwaŋ yɔɔ nɛ lɛlʋ ña-nɩmɩyɛ yɔɔ.» 38Peeɖe Yesu heyi-wɛ se: «Ɩɩsɩŋ mbʋ́ ɩsʋlʋmʋʋ yɔ. Ɩpɩzɩɣ ɩtɔɔ kʋñɔŋ sɔsɔʋ ŋgʋ́ mɔnkɔŋ tɔɔʋ yɔ? Ɩpɩzɩɣ ɩnɩɩ siziŋ weyi mɔnkɔŋ nɩʋ yɔ?» 39Pocosi-i se: «Ɛɛɛ! Đɩpɩzɩɣ ɖɩtɔɔ-kʋ.» Yesu pɩsɩnɩ-wɛ se: «Toovenim ɩkɔŋ tɔɔʋ kʋñɔŋ sɔsɔʋ ŋgʋ́ mɔntɔkɩ yɔ nɛ ɩnɩɩ siziŋ weyi manɩɣ yɔ. 40Ɛlɛ́, ma-nɩwaŋ yɔɔ nɛ ma-nɩmɩyɛ yɔɔ caɣʋ ñɩndʋ lɛ, pɩtɛkɛ mahaɣnɩ nʋmɔʋ. Mbá Ɛsɔ liu wɛɛ se pacaɣ lona ana a-taa yɔ, ḿbá cakɩna.»

41Yesu tɔmkpɛlɩkɩyaa hiu mbá pɩkazaa yɔ, paba nɩ ḿbʋ́ lɛ, pa-taa wɩɩnɩ Yakubu nɛ Yohanɛɛsɩ. 42Peeɖe Yesu ya patɩŋa nɛ eheyi-wɛ se: «Ɩtɛm sɩm se mbá pɔcɔŋnɩ-wɛ se pɛkɛ awiya sɔsɔna yɔ, ḿbá nuutuuni pa-ajɛya taa ñɩma nɛ sɔsaa ñawɩlɩɣ-wɛ po-ɖoŋ ɖɔɖɔ. 43Mɩ lɛ, wɛtʋ ńdʋ́ tɩtaawɛɛ mɩ-hɛkʋ taa. Yee mɩ-taa nɔɔyʋ ɛcaɣ se ɛkɛ sɔsɔ yɔ, pʋdʋ ɛpɩsɩ mɩ-tʋmlaɖʋ. 44Yee nɔɔyʋ ɛcaɣ se ɛkɛ mɩ-ñʋʋdʋ yɔ, pʋdʋ ɛpɩsɩ mɩtɩŋa mi-yom. 45Mbʋ́ pʋyɔɔ yɔ, Ɛyʋ Pɩyalʋ tɔkɔɔ se ɛyáa ɛlabɩ-ɩ tʋmɩyɛ. Ɛlɛ́, ɛkɔm se ɛla ɛyáa tʋmɩyɛ nɛ ɛkpaɣ ɛ-maɣmaɣ ɛ-tɩ ɛhɛyɩ pɔ-yɔɔ nɛ puholi pa-taa sakɩyɛ.»

Yesu laba nɛ yʋlʋm Bartiimee ɛsɛ kuli

(Mat 20.29-34; Luk 18.35-43)

46Pʋwayɩ lɛ, Yesu nɛ ɛ-tɔmkpɛlɩkɩyaa patalɩ Yeriikoo tɛtʋ taa. Palɩ tɩ-taa se pɛɖɛɣ nɛ ɛyáa samaɣ tɩŋɩɣ pa-wayɩ lɛ, pamaɣnɩ Tiimee pɩyalʋ yʋlʋm weyi payaɣ se Bartiimee yɔ. Ɛcaɣ nʋmɔʋ nɔɔ nɛ ɛsʋlʋmʋʋ. 47Ɛnɩ Nazarɛɛtɩ tʋ Yesu taŋ lɛ, ɛma kubuka se: «Wiyaʋ Daaviidi Sayɩ Yesu! Na man-pʋtɔdɩyɛ.» 48Peeɖe ɛyáa sakɩyɛ ñazɩ-ɩ se: «Su peeɖe.» Ɛlɛ́, ɛtɛzɩ kubuka mabʋ ɖoŋ se: «Wiyaʋ Daaviidi Sayɩ! Na man-pʋtɔdɩyɛ.» 49Ɛlɛ́, Yesu sɩŋ nɛ ɛtɔ se payaa-ɩ, nɛ peheyi yʋlʋm ɛnʋ se: «Ñaɣ pana ŋkʋyɩ, Yesu yaɣ-ŋ.» 50Peeɖe ɛlɔ e-toko sɔsɔʋ nɛ ɛkʋyɩ kpaka nɛ ewolo Yesu cɔlɔ. 51Ɛtalaa lɛ, Yesu pɔzɩ-ɩ se: «Ŋcaɣ se malabɩ-ŋ we?» Yʋlʋm ɛnʋ ecosi-i se: «Wɩlɩyʋ, mancaɣ se ŋla nɛ mɛ-ɛsɛ kuli.» 52Peeɖe Yesu heyi-i se: «Wolo, lidaʋ ŋgʋ́ ŋwɛnɩ mɔ-yɔɔ yɔ, kɩyabɩ ña-ñʋʋ.» Ɛlɛ́, ɛpazɩ naʋ kpaagbaa nɛ ɛtɩŋɩɣ Yesu wayɩ.

Currently Selected:

Maarkɩ 10: KABI

Highlight

Copy