Maarkɩ 4
4
Đuyu eduuye
(Mat 13.1-9; Luk 8.4-8)
1Yesu tasaɣ Ɛsɔtɔm susuu Galilee teŋgu nɔɔ lɛ, ɛyáa kpeɣli ɛ-cɔlɔ sakɩyɛ pɩŋŋ. Pʋ-yɔɔ ɛkʋyaa ɛkpa kpɩyʋʋ taa lɩm yɔɔ nɛ ɛcaɣ nɛ ɛyáa wɛɛ teŋgu nɔɔ 2nɛ ɛwɩlɩ-wɛ tɔm sakɩyɛ nɛ aduwa taa nɛ eheyi-wɛ se: 3«Iwelesi camɩyɛ nɛ ɩnɩɩ: abalʋ nɔɔyʋ wɛnɩ ḿbʋ́ nɛ ewolo tɔɔnaɣ pee mɩzʋʋ ɛ-hayɩm taa. 4Ɛmɩzaɣ lɛ, lɛɛna tɔlɩ nʋmɔʋ nɔɔ nɛ sumasɩ tii sɩtɔɔ-yɛ. 5Pee lɛɛna ñɔtɔlɩ ɛwaɣ yɔɔ nɛ ɛzɩma mbʋ́ tɛtʋ telim lɛ, atɩñɔʋ. 6Wɩsɩ kɔm sɩñaɣ lɛ, awɩlɩ. Mbʋ́ pʋyɔɔ yɔ, hosi tetii tɛtɛɛ. 7Pee lɛɛna tɔlɩ kpaŋsɔɔ taa nɛ añɔ ɛzɩ pɩɩkpa camɩyɛ lɛ, kpaŋsɔɔ lɛɣtɩ nɛ pɩtapɩzɩ pɩlʋlɩ. 8Pee lɛɛna ñɔtɔlɩ tɛtʋ kɩbandʋ taa, alɛ ñɔ nɛ pɩpaɣlɩ tɩŋ nɛ ɩlʋlɩ pee. Tɩʋ lɛɛkʋ yɔɔ niidozo, lɛɛkʋ yɔɔ nɩɩnʋwa nɛ hiu nɛ lɛɛkʋ yɔɔ mɩnʋʋ.» 9Yesu tɛm-wɛ tuuu eduuye lɛ, eheyi-wɛ se: «Weyi ɛwɛnɩ nɩŋgbaaŋ lɛ, ɛnɩɩ.»
Ɛbɛ laba nɛ Yesu tuki aduwa
(Mat 13.10-17; Luk 8.9-10)
10Yesu nɛ ɛ-tɔmkpɛlɩkɩyaa hiu nɛ naalɛ nɛ mbá paawɛ ɛ-cɔlɔ yɔ, palɩ ɛyáa samaɣ taa nɛ potuzi pa-tɩ lɛ, pɔpɔzɩ-ɩ se ɛlɩzɩ-wɛ aduwa ana a-tɔbʋʋ. 11Peeɖe ecosi-wɛ se: «Ɛsɔ Kewiyaɣ tɔm wɛ mɛsaɣ tɛɛ. Ɛlɛ́, mɩ lɛ, ɛha-mɩ lɛɣtʋ se ɩnɩɩ tɩ-tɔbʋʋ. Piyele lɛlaa yɔ, pɛfɛyɩ Ɛsɔ Kewiyaɣ taa. Panɩɣ tɔm ńdʋ́ lɛ, tɩkɛnɩ-wɛ aduwa. 12Pɩlakɩ ḿbʋ́ se:
Pɔcɔnɩ camɩyɛ, ɛlɛ́, pataana.
‹Pewelesi nɛ panɩɩ camɩyɛ, ɛlɛ́ pataanɩɩ pʋ-tɔbʋʋ.
Mbʋ́ pʋyɔɔ yɔ, yee panɩ pʋ-tɔbʋʋ yɔ, pɛlɛɣzɩ wɛtʋ nɛ powolo Ɛsɔ cɔlɔ,
nɛ Ɛsɔ kpeɣ-wɛ pa-kɩwɛɛkɩm.› »
Yesu lɩzɩ ɖuyu eduuye tɔbʋʋ
(Mat 13.18-23; Luk 8.11-15)
13Pʋwayɩ lɛ, Yesu pɔzɩ ɛ-tɔmkpɛlɩkɩyaa se: «Yee ɩtanɩɩ eduuye ɖɩnɛ ɖɩ-tɔbʋʋ lɛ, ɛzɩma ɩlakɩ nɛ ɩnɩɩ lɛɛna tɔbʋʋ yɔ?» 14Peeɖe ɛlɩzɩ-wɛ eduuye ńɖɩ́ ɖɩ-tɔbʋʋ se: «Abalʋ ɛnʋ, pʋwɛ ɛzɩ Ɛsɔtɔm ɛmɩzaa yɔ. 15Ɛyáa nabɛyɛ wɛɛ, panɩɣ Ɛsɔtɔm ńdʋ́ lɛ, Satanɩ tɩŋ ɛhɔɔzɩ-tʋ pa-taa. Ḿbá wɛna ɛzɩ nʋmɔʋ nɔɔ ɖenɖe pee tɔlaa yɔ. 16Mbá paba wɛ ɛzɩ ɛwaɣ ŋgá kɔ-yɔɔ pee tɔlaa yɔ, panɩɣ-tʋ lɛ, petisi kpaagbaa nɛ laŋhʋlʋmɩyɛ. 17Ɛlɛ́, paayeki se tɩlabɩ-wɛ tʋmɩyɛ camɩyɛ. Pɔɖɔkʋʋ-tʋ nɛ kʋñɔŋ nakʋyʋ talɩ-wɛ yaa pɛwɛɛ pa-wayɩ kaŋ kaŋ tɩ-yɔɔ lɛ, pɔtɔlɩ Ɛsɔ nʋmɔʋ taa. 18Lɛlaa wɛ ɛzɩ kpaŋsɔɔ taa ɖenɖe pee tɔlaa yɔ. Pɛtɛŋ Ɛsɔtɔm nɩʋ lɛ, 19kedeŋa yɔɔ cɩnɛ lɩmaɣza wena akʋʋ ɛyáa yɔ nɛ ñɩm mbʋ́ pɩcɛtɩɣ ɛyáa yɔ pɩ-lɩmaɣza nɛ mbʋ́ mbʋ́ ɛyáa liu wɛɛ se pɛwɛna kpem yɔ pɩ-lɩmaɣza sʋʋ pa-taa nɛ pɩɖɩɣ-tʋ nʋmɔʋ nɛ paawɛɣnɩ kɛzɛɣa. 20Lɛlaa ñɛwɛ ɛzɩ tɛtʋ kɩbandʋ ndʋ́ tɩ-taa pee tɔlaa nɛ añɔ nɛ pɩpaɣlɩ tɩŋ nɛ ɩlʋlɩ pee yɔ: lɛɛkʋ lʋlɩ pee niidozo, lɛɛkʋ nɩɩnʋwa nɛ hiu nɛ lɛɛkʋ mɩnʋʋ. Panɩ Ɛsɔtɔm nɛ pɔ́ɖɔ́kɩ-tʋ camɩyɛ nɛ pʋwazɩ ɛyáa.»
Iwelesi camɩyɛ
21Pʋwayɩ lɛ, Yesu pɔzɩ ɛ-tɔmkpɛlɩkɩyaa se: «Pɔsɔkɩ kanɖʋ lɛ, le pasɩɣ-kʋ? Paapaŋ-kʋ ɖaakuɖe tɛɛ. Paasʋzʋʋ-kʋ kaɖʋ tɛɛ. Ɛlɛ́, pasɩɣ-kʋ ɖenɖe pʋkʋyɩ camɩyɛ ñaba yɔ nɛ pɩna paa le ñammm. 22Ḿbʋ́ ɖɔɖɔ mbʋ́ pɩtɩŋa payɩ pʋwɛ ɛyáa mɛsaɣ tɛɛ lɛɛlɛɛyɔ yɔ, pʋkɔŋ pʋ-yɔɔ kuluu nɛ paa weyi ɛna. 23Weyi ɛwɛnɩ nɩŋgbaaŋ lɛ, ɛnɩɩ.»
24Yesu tasɩ-wɛ heyuu se: «Iwelesi tɔm ndʋ́ meheyiɣ-mɩ yɔ camɩyɛ nɛ ɩɖɔkɩ-tʋ. Mbʋ́ mɩ-maɣmaɣ ɩmaɣzɩɣna nɛ ɩɖʋʋ lɛlaa yɔ, ḿbʋ́ ɖɔɖɔ Ɛsɔ kɔŋ-mɩ maɣzɩnaʋ nɛ halɩ ɛsɔzɩ-mɩ. 25Mbʋ́ pʋyɔɔ yɔ, pʋwɛ ɛzɩ pɔtɔŋʋʋ se: ‹Weyi ɛwɛna, pɔsɔzɩ-ɩ nɛ weyi ɛ́lɛ́ fɛyɩna yɔ, halɩ pɛtɛzɩɣ lɛɣʋ mbʋ́ ɛmaɣzɩɣ se ɛwɛna yɔ› yɔ.»
Pee wena añɔʋ a-ɖeke yɔ
(Luk 8.16-18)
26Pʋwayɩ lɛ, Yesu tasɩ yɔɔdʋʋ se: «Ɛsɔ Kewiyaɣ kɔm wɛ ɛzɩ ɛyʋ ɖúu ɖomaɣ ɛ-hayɩm taa yɔ. 27Ɛtɛŋ-kɛ ɖúú lɛ, ɛwɛɛ yem nɛ kɔñɔ nɛ kapaɣlɩɣ. Eeɖiɣziɣni ɛzɩma pɩlakɩ ḿbʋ́ yɔ. 28Tɛtʋ maɣmaɣ lakɩna nɛ pɩpaɣlɩ. Pɩcalɩɣnɩ hɔʋ nɛ pʋkɔɔ pʋñɔ. Pʋwayɩ lɛ, pɩlɩɩ hatʋ nɛ pɩpaɣlɩ nɛ pʋtʋlɩ ñʋŋ nɛ pɩpazɩ pee ɖʋʋ. 29Pee ana apɩɣ lɛ, pakpaɣ loozonaa. Mbʋ́ pʋyɔɔ yɔ, kʋmtʋ talaa.»
Piye cikpeɖe eduuye
(Mat 13.31-32,34; Luk 13.18-19)
30Yesu tasɩ yɔɔdʋʋ ɖɔɖɔ se: «Ɛbɛ mɛnkɛdɩɣnɩ Ɛsɔ Kewiyaɣ lee, yaa eduuye nɖɩ́ mɛnkɛdɩɣnɩ-kɛ? 31Kɛwɛ ɛzɩ piye nɖɩ́ ɖɩkɩlɩ kɔzʋʋ kedeŋa yɔɔ cɩnɛ pee tɩŋa payɩ taa yɔ. 32Poɖuu-ɖɩ lɛ, ɖɩñɔ nɛ ɖɩpaɣlɩ nɛ pɩkɩlɩ kaɖaɣ taa ɖozi tɩŋ tɩŋa. Ɖɩyɛzɩɣ pilinzi sɔsɔsɩ nɛ sumasɩ woki sɩɖʋʋ ɖandʋ hɔtʋ taa.» 33Ḿbʋ́ Yesu heyaɣ-wɛ tɔm tɩŋa nɛ aduwa taa. Ɛwɩlaɣ ɛyáa mbá pekpeɣli ɛ-cɔlɔ yɔ ndʋ́ papɩzaɣ se panɩɩ yɔ. 34Eteheyiɣ-wɛ natʋyʋ yem nɛ pɩtasɩnɩ aduwa tuuu. Ɛ nɛ ɛ-tɔmkpɛlɩkɩyaa pɛwɛɣ pe-ɖeke lɛ, ɛlɩzɩɣ-wɛ atɩŋa a-tɔbʋʋ.
Yesu hɛzɩ heɣlim sɔsɔm nabʋyʋ
(Mat 8.23-27; Luk 8.22-25)
35Kɩyakʋ ŋgʋ́ Yesu tukaɣ aduwa yɔ, kɩ-ɖanaɣ yɔɔ eheyi ɛ-tɔmkpɛlɩkɩyaa se: «Đɩtɛzɩ teŋgu#4.35 Teŋgu: ŋgʋ lɛ Galilee teŋgu. Tɛtʋ cɔ-kʋ kondiko. Ɩcɔnɩ Izrɛɛlɩ ɛjaɖɛ anjaʋ takayaɣ tɩnaɣ yɔɔ nɛ ɩna. kidiiliŋ lɛɛkʋ yɔɔ.» 36Peeɖe pakʋyɩ ɛyáa samaɣ cɔlɔ nɛ powolo pasʋʋ kpɩyʋʋ ŋgʋ́ kɩ-taa ɛɛwɛɛ yɔ se pɛɖɛɣ. Kpɩyɩŋ lɛɛŋ kɛwɛ kʋ-cɔlɔ peeɖe. 37Patalɩ lɩm hɛkʋ taa lɛ, heɣlim sɔsɔm nabʋyʋ pazɩ mabʋ yem nɛ lɩm húú nɛ pʋsʋʋ pa-kpɩyʋʋ taa nɛ kɩcaɣ se kʋsʋʋ lɩm tɛɛ. 38Yesu hɛnɩ wayɩ nɛ ɛɖʋ ɛ-ñʋʋ ñʋʋ kʋɖʋɖʋʋ yɔɔ nɛ eɖou yem fɛɛɛ. Peeɖe ɛ-tɔmkpɛlɩkɩyaa woba pefezi-i nɛ pɔpɔzɩ-ɩ se: «Wɩlɩyʋ! Ŋyeki-ɖʋ se ɖɩtɛŋɛlɩ cɩnɛ yaa we?»
39Peeɖe ɛkʋyaa nɛ ɛkalɩ heɣlim nɛ piyele mabʋ. Ɛlɛ́, eheyi lɩm se: «Hɛɛ! Caɣ ñe-ɖeɖe.» Peeɖe pʋbʋ ñɛhɛwa ɖɔɖɔ. 40Pʋwayɩ lɛ, ɛpɔzɩ ɛ-tɔmkpɛlɩkɩyaa se: «Pɩlabɩ ɛzɩma ɩwɛɛ sɔɔndʋ ḿbʋ́? Ɩfɛyɩnɩ lidaʋ mɔ-yɔɔ yaa we?» 41Ɛlɛ́, sɔɔndʋ tɛzɩ-wɛ kpaʋ nɛ pɔpɔzʋʋ pa-tɩ se: «Ɛbɛ ɛnɛ ɛkɛnaa kpem nɛ pɩkpɛndɩnɩ heɣlim nɛ lɩm nɛ pañaŋ-ɩ?»
Currently Selected:
Maarkɩ 4: KABI
Highlight
Share
Copy
Want to have your highlights saved across all your devices? Sign up or sign in
