Maarkɩ 3
3
Yesu wazɩ abalʋ weyi pɩcamɩ e-nesi yɔ
(Mat 12.9-14; Luk 6.6-11)
1Pʋwayɩ lɛ, Yesu ɖaɣnɩ Ɛsɔ ɖɩsɛyɛ taa pɩsʋʋ. Puwiye ńɖɩ́ lɛ, abalʋ nɔɔyʋ kɛwɛ peeɖe, e-nesi camaa. 2Ɛyáa mbá paawɛ peeɖe yɔ, pɔcɔŋnɩ Yesu pɩŋŋ se pana se ɛlakɩ nɛ ɛyʋ ɛnʋ ɛ-yɔɔ cɛ kɩyakʋ kɩhɛzʋʋ wiye yaa ɛɛlakɩ? Mbʋ́ pʋyɔɔ yɔ, pañɩnaɣ tɔm ndʋ́ paawana nɛ pehiɣ-i se ɛlabɩ tʋmɩyɛ kɩyakʋ kɩhɛzʋʋ wiye yɔ. 3Peeɖe Yesu heyi ɛyʋ ɛnʋ se: «Kʋyɩ ŋsɩŋ ɛyáa hɛkʋ taa cɩnɛ!» 4Ɛlɛ́, ɛpɔzɩ mbá pɔcɔŋaɣnɩ-ɩ yɔ se: «Đa-paɣtʋ taa lɛ, ɛbɛ pʋmʋnaa se pala kɩyakʋ kɩhɛzʋʋ wiye? Kɩbandʋ naa ɛzaɣ́tʋ? Paya ɛyáa ñʋŋ naa pakʋ-wɛ?» Ɛlɛ́, pɔtɔsɔɔlɩ se pocosi-i. 5Peeɖe Yesu pana kpawa nɛ ɛcɔnɩ pɛ-ɛsɩndaa kpɛɛɛ nɛ ɛ-hɔyɛ pɩsɩnɩ pa-laŋkpɩzɩyɛ nɛ eheyi ɛyʋ weyi e-nesi camaa yɔ se: «Losi ñe-nesi.» Ɛ́lɛ́ losi-sɩ nɛ sɩ-yɔɔ cɛ. 6Peeɖe Farɩsɩ ñɩma lɩwa payaa Eroodi ŋgbɛyɛ taa ñɩma nɛ patɩlabʋ lɩmaɣza se pana ɛzɩma mbʋ́ paala nɛ pakʋ Yesu yɔ.
Ɛyáa sakɩyɛ woba Yesu cɔlɔ
7Pʋwayɩ lɛ, Yesu nɛ ɛ-tɔmkpɛlɩkɩyaa pakʋyɩ se powoki Galilee teŋgu nɔɔ, ɛlɛ́ ɛyáa sakɩyɛ tɩŋ-wɛ. Paalɩnɩ ageeta ndɩ ndɩ taa: Galilee nɛ Yudee nɛ 8Iduumee nɛ egeetiye nɖɩ́ ɖɩwɛ Yɔɔrdaŋ pɔɔ wayɩ yɔ nɛ lɛɛɖɛ nɖɩ́ ɖɩwɛ Sidɔɔ tɛtʋ nɛ Tiiri ñɩndʋ pɔ-cɔlɔ yɔ a-taa ɛyáa nɛ Yeruusalɛm ñɩma. Mbʋ́ pʋyɔɔ yɔ, panɩ mbʋ́ ɛlakaɣ yɔ pʋ-tɔm tɩŋa. 9Peeɖe Yesu heyi ɛ-tɔmkpɛlɩkɩyaa se pɔñɔɔzɩ-ɩ kpɩyʋʋ nakʋyʋ. Pɩtɛkɛ ḿbʋ́ yɔ, ɛyáa samaɣ ñɩkɩɣ-ɩ. 10Toovenim lɛ, ɛyáa nawa se ɛlakaɣ nɛ kʋdɔndɩnaa yɔɔ cɛkɩ. Pʋ-yɔɔ kʋdɔndɩnaa tɩŋa kpedesaɣ se potukuni-i nɛ pɔ-yɔɔ cɛ. 11Đɔɖɔ lɛ, ɛyáa mbá pa-wayɩ wɛ aleewaa yɔ, polosuu Yesu lɛ, aleewaa tuyuu-wɛ nɛ powoki poluŋuu ɛ-tɛɛ nɛ pamakɩ kubusi se: «Ña lɛ Ɛsɔ Pɩyalʋ.» 12Ɛlɛ́, Yesu paɣ́-wɛ siŋŋ se pataaheyi nɔɔyʋ weyi ɛkɛnaa yɔ.
Yesu lɩzɩ e-tiyiyaa hiu nɛ naalɛ
(Mat 10.1-4; Luk 6.12-16)
13Pʋwayɩ lɛ, Yesu kpa pʋʋ yɔɔ. Peeɖe ɛya mbá ɛsɔɔlaa se powolo ɛ-cɔlɔ yɔ nɛ paba wolo ɖɔɖɔ. 14Powoba lɛ, ɛlɩzɩ pa-taa ɛyáa hiu nɛ naalɛ se pɛkɛ e-tiyiyaa. Ɛlɛ́, eheyi-wɛ se: «Me-liu wɛɛ se ɩwɛɛ mɔn-cɔlɔ nɛ mentiyiɣ-mɩ nɛ isusuu Ɛsɔtɔm. 15Mahaɣ-mɩ ɖoŋ se ɩɖɔɔnɩ aleewaa ɖɔɖɔ.» 16Ɛyáa mbá ɛlɩzɩ-wɛ yɔ, pa-hɩla yɔ: Siimɔɔ weyi ɛkʋm-ɩ hɩɖɛ se Pɩyɛ yɔ nɛ 17Yakubu nɛ e-neu Yohanɛɛsɩ mbá pɛkɛ Zebedee pɩyalaa nɛ ɛkʋm-wɛ hɩɖɛ se Boanɛrjɛsɩ yɔ. Pʋ-tɔbʋʋ se tɛʋ tiluu piya 18nɛ Andree nɛ Filiipu nɛ Bartelemii nɛ Maatiyee nɛ Tomaa nɛ Alfee pɩyalʋ Yakubu nɛ Taadee nɛ Siimɔɔ weyi payaɣ se Yɔɔ Kandɩyʋ yɔ 19nɛ Yudaasɩ Iskarɩyɔɔtɩ. Ɛnʋ kitini ɛkpa Yesu nɛ ɛ́ɖʋzɩ koyindinaa nesi taa.
Yesu ñɩma caɣ se ɛwɛɛ poliŋ nɛ ɛyáa samaɣ
(Mat 12.22-32; Luk 11.15-23; 12.10)
20Yesu nɛ e-tiyiyaa petibini pʋʋ yɔɔ lɛ, ewolo ɖɩɣa nɛ ɛyáa samaɣ tasɩ ɛ-wayɩ tɩŋʋʋ. Ɛlɛ́, ɛ nɛ ɛ-tɔmkpɛlɩkɩyaa petehiɣ alɩwaatʋ se pɔtɔɔ tɔɔnaɣ. 21Ɛ-ñɩma nɩ ḿbʋ́ lɛ, pakʋyɩ powolo se pakpaɣ-ɩ. Mbʋ́ pʋyɔɔ yɔ, pamaɣzaɣ se: «Ɛsʋ kpaaŋ.»
Yesu cosi mba pɛcɛtɩna ɛ-taa yɔ
22Yuda ñɩma paɣtʋ wɩlɩyaa mbá palɩnɩ Yeruusalɛm nɛ powolo Yesu cɔlɔ yɔ, pɔyɔɔdaɣnɩ ɖama se: «Aleewaa caa Belzeebuuli wɛ ɛ-wayɩ.» Lɛlaa se: «Aleewaa ḿbá pa-caa ɖoŋ ɛɖɔɔnʋʋnɩ aleewaa.» 23Peeɖe Yesu ya-wɛ nɛ etuu-wɛ aduwa se: «Ɛzɩma Satanɩ pɩzɩɣ ɛɖɔɔnɩ ɛ-maɣmaɣ ɛ-tɩ? 24Yee kewiyaɣ nakɛyɛ ɛwɛɛ nɛ ka-taa ñɩma youni ɖama yɔ, kaalaɣzɩɣ yɔkʋʋ. 25Yaa ɛyáa ɛwɛ ɖɩɣa nakɛyɛ taa nɛ poyouni ɖama yɔ, ɖɩɣa ŋ́gá kaalaɣzɩɣ yɔkʋʋ. 26Ḿbʋ́ ɖɔɖɔ yee Satanɩ eyouni ɛ-taabalaa yɔ, e-kewiyaɣ ɛɛlaɣzɩɣ yɔkʋʋ. 27Pʋcɔ nɔɔyʋ wolo ɛmɩlɩ weyi ɛwɛ ɖoŋ yɔ ɛ-tɛ lɛ, pʋwɛɛ se ɛpɩzɩ ɛhɔkɩ-ɩ camɩyɛ nɛ pʋcɔ ɛpɩzɩ ɛkpaɣ e-wondu. 28Iwelesi camɩyɛ, toovenim lɛ, meheyiɣ-mɩ se kɩwɛɛkɩm mbʋ́ ɛyáa laba yɔ, paa pɩɩɖɔ ɛzɩma yaa pɛwɛɛkɩ Ɛsɔ hɩɖɛ ɛzɩma yɔ, Ɛsɔ pɩzɩɣ ekpeɣ-wɛ-pʋ. 29Ɛlɛ́, yee ɛyʋ ɛwɛɛkɩ Fezuu Kiɖeɖeu hɩɖɛ yɔ, Ɛsɔ eekpeɣiɣ-i kaʋ: ɛ-kɩwɛɛkɩm wɛɣ ɛ-yɔɔ tam.» 30Yesu yɔɔdaɣ ḿbʋ́, mbʋ́ pʋyɔɔ yɔ, ɛyáa tɔŋaɣ se eleeu wɛ ɛ-wayɩ.
Yesu cejewiye keekee tɔm
(Mat 12.46-50; Luk 8.19-21)
31Yesu yɔɔdaɣ ḿbʋ́ lɛ, e-ɖoo nɛ e-newaa patalɩ pasɩŋ awayɩ nɛ petiyi se payaa-ɩ. 32Ŋgʋ́, ɛyáa samaɣ kɛwɛ Yesu ɛnʋ ɛ-cɔlɔ. Peeɖe peheyi-i se: «Na, Ño-ɖoo nɛ ñe-newaa pɛwɛ awayɩ nɛ pañɩnɩɣ-ŋ.» 33Ɛlɛ́, Yesu pɩsɩna se: «Toovenim taa lɛ, anɩ lɛ mon-ɖoo nɛ mbá lɛ me-newaa?» 34Peeɖe ɛkʋsɩ ɛ-ɛsɛ nɛ ɛcɔnɩ ɛyáa mbá pacaɣ ɛ-cɔlɔ kpɛɛɛ yɔ nɛ ɛtɔ se: «Na! Mon-ɖoo nɛ me-newaa pɛwɛnɩ cɩnɛ! 35Mbʋ́ pʋyɔɔ yɔ, weyi ɛlakɩ mbʋ́ Ɛsɔ liu wɛɛ yɔ, ɛnʋ lɛ me-neu yaa mon-ɖoo.»
Currently Selected:
Maarkɩ 3: KABI
Highlight
Share
Copy
Want to have your highlights saved across all your devices? Sign up or sign in
