Maarkɩ 2
2
Yesu laba nɛ kalɩkalaɣ nakɛyɛ yɔɔ cɛ
(Mat 9.1-8; Luk 5.17-26)
1Pɩlabɩ kɩyakɩŋ cabɩ lɛ, Yesu pɩsɩ Kapɛrnayum. Ɛyáa nɩwa se ɛwɛ ɖɩɣa lɛ, 2pekpeɣli pɩtɩɩfɛyɩ nɛ posu nɛ pɩkpɛndɩnɩ awayɩ nɔnɔɔ taa nɛ ɛtasɩ-wɛ heyuu Ɛsɔtɔm. 3Ɛyáa nabɛyɛ wokaɣnɩ kalɩkalaɣ nakɛyɛ ɛ-cɔlɔ. Ɛyáa naanza kpaɣnɩ-kɛ. 4Ɛyáa samaɣ yɔɔ lɛ, patana ɛzɩma mbʋ́ pala nɛ patanɩ-kɛ yɔ. Peeɖe pakpa kuduyuu ŋgʋ́ ɛɛwɛ kɩ-tɛɛ yɔ kʋ-ñʋʋ taa nɛ patʋʋzɩnɩ ɖenɖe ɛɛwɛɛ yɔ nɛ patʋlɩ pɔʋ nɛ petisi-kɛ nɛ ka-ñalʋʋ. 5Yesu nawa se ɛyáa ḿbá pɛwɛnɩ lidaʋ ɛ-yɔɔ lɛ, eheyi kalɩkalaɣ ŋ́gá se: «Man-taabalʋ! Menkpeɣ-ŋ ña-kɩwɛɛkɩm.» 6Yuda ñɩma paɣtʋ wɩlɩyaa nabɛyɛ kacaɣ peeɖe nɛ pahʋʋ pa-taa Yesu tɔm se: 7«Ɛyʋ ɛnɛ ɛcalɩ ɛ-taa se we nɛ ɛyɔɔdʋʋ ḿbʋ́? Ɛwɛɛkɩɣ Ɛsɔ hɩɖɛ! Apɩzɩɣ ekpeɣ kɩwɛɛkɩm nɛ pɩtasɩnɩ Ɛsɔ?» 8Kpaagbaa ḿbʋ́ lɛ, Yesu tɩlɩ tɔm ndʋ́ pahʋwaɣ pa-taa ḿbʋ́ yɔ nɛ ɛpɔzɩ-wɛ se: «Pɩlabɩ ɛzɩma ɩhʋʋ mɩ-taa ḿbʋ́? 9Yee meheyi kalɩkalaɣ ŋ́gá se menkpeɣ-kɛ ka-kɩwɛɛkɩm yaa kakʋyɩ kakpaɣ ka-ñalʋʋ nɛ kɛɖɛɛ, tɩ-naalɛ tɩ-taa lɛ, ndʋ́ tɩfɛyɩ kaɖɛ? 10Mancaɣ mawɩlɩ-mɩ se Ɛyʋ Pɩyalʋ wɛnɩ ɖoŋ se ekpeɣ ɛyáa pa-kɩwɛɛkɩm kedeŋa yɔɔ cɩnɛ.»
Peeɖe eheyi kalɩkalaɣ ŋ́gá se: 11«Ña! Kʋyɩ ŋkpaɣ ña-ñalʋʋ nɛ ŋkpe» 12nɛ kakʋyɩ kpaagbaa nɛ kakpaɣ ka-ñalʋʋ ɛyáa tɩŋa ɛsɩndaa nɛ pɔcɔnɩ-kɛ pɩŋŋ nɛ kɛɖɛɛ. Pana-kɛ ḿbʋ́ lɛ, pɩla patɩŋa piti pɩŋŋ nɛ pasaŋ Ɛsɔ nɛ pɔtɔŋ se: «Đooo yɔ, ɖɩtanata mbʋ́ Yesu labɩ ɛzʋnɔ yɔ pɩ-ɖaɣʋ.»
Yesu ya Leevi se ɛtɩŋ ɛ-wayɩ
(Mat 9.9-13; Luk 5.27-32)
13Pʋwayɩ lɛ, Yesu lɩɩ nɛ ɛpɩsɩ Galilee teŋgu nɔɔ nɛ ɛyáa sakɩyɛ wolo ɛ-cɔlɔ nɛ ɛwɩlɩɣ-wɛ Ɛsɔtɔm. 14Ɛtɛma nɛ ɛɖɛɣ lɛ, ɛna Alfee pɩyalʋ Leevi, ɛcaɣ ɛ-tʋmɩyɛ taa tikee ɖɩmʋyɛ. Peeɖe eheyi-i se: «Kʋyɩ ŋtɩŋ-m!» Ɛ́lɛ́ kʋyɩ nɛ ɛtɩŋ-ɩ.
15Pʋwayɩ lɛ, Yesu nɛ ɛ-tɔmkpɛlɩkɩyaa nɛ tikee mʋyaa sakɩyɛ nɛ lɛlaa mbá ɛyáa kpakaɣ-wɛ se pɛkɛ kɩwɛɛkɩm laɖaa yɔ, powolo Leevi tɛ nɛ pacaɣ tɔɔnaɣ ɖɩtɔɔyɛ. Pɩtɛ ɛyáa mbá patɩŋaɣ-ɩ yɔ, paaɖɔwa. 16Alɩwaatʋ ńdʋ́ lɛ, Yuda ñɩma paɣtʋ wɩlɩyaa mbá pɛkɛ Farɩsɩ ŋgbɛyɛ taa ñɩma yɔ paawɛɛ. Pɛ-ɛsɩndaa Yesu nɛ kɩwɛɛkɩm laɖaa nɛ tikee mʋyaa pɔtɔkaɣ tɔɔnaɣ. Peeɖe pɔpɔzɩ Yesu tɔmkpɛlɩkɩyaa se: «Pɩlabɩ ɛzɩma ɛ nɛ tikee mʋyaa nɛ kɩwɛɛkɩm laɖaa pɛkpɛndɩ pɔtɔkɩ?»
17Yesu nɩ ḿbʋ́ lɛ, ecosi-wɛ se: «Pɩtɛkɛ alaafɩya tɩnaa pʋpɔzʋʋ se powolo fɛɖaa tɛ, kʋdɔndɩnaa pʋpɔzʋʋ se powolo. Pɩtɛkɛ mbá pamaɣzɩɣ se pɛkɛ kʋtʋʋzaa yɔ, pa-wayɩ mɔnkɔma. Ɛlɛ́, mbá pasɩm pa-tɩ se pɛkɛ kɩwɛɛkɩm laɖaa yɔ, pa-wayɩ mɔnkɔm se pɛlɛɣzɩ wɛtʋ.»
Yesu yɔɔdʋʋ nɔɔ hɔkʋʋ tɔm
(Mat 9.14-17; Luk 5.33-39)
18Kɩyakʋ nakʋyʋ Lɩm Sɔʋ Sɔnzɩ Laɖʋ Yohanɛɛsɩ tɔmkpɛlɩkɩyaa nɛ Farɩsɩ ñɩma pɔhɔkaɣ nɔɔ. Peeɖe ɛyáa woba nɛ pɔpɔzɩ Yesu se: «Pɩlabɩ ɛzɩma Farɩsɩ ñɩma tɔmkpɛlɩkɩyaa nɛ Yohanɛɛsɩ ñɩma pɔhɔkʋʋ nɔɔ nɛ ña-ñɩma ñaahɔkʋʋ?» 19Peeɖe Yesu cosi-wɛ se: «Ɩmaɣzɩɣ se mbá payaɣ-wɛ halɩkpaɣyɛ kazandʋ ɖeɖe yɔ, powoki pacaɣ ñɔɔsɩ halʋ kɩfalʋ walʋ ɛsɩndaa yaa we? Pɩɩlakɩ ḿbʋ́. 20Ɛlɛ́, pɔkɔŋ lɩzʋʋ walʋ ɛnʋ pɛ-hɛkʋ taa alɩwaatʋ natʋyʋ. Tɩ-taa pɔkɔŋ nɔɔ hɔkʋʋ.»
21Yesu tasɩ-wɛ heyuu se: «Paakpakɩɣ pɩsaʋ kɩfalʋʋ hɔɔlaɣ nɛ pɔtɔnɩ wonuu kɩbɩnʋʋ. Pɩtɛkɛ ḿbʋ́, pɔcɔtʋʋ-kʋ lɛ, hɔɔlaɣ ŋ́gá kasʋʋ nɛ kɔhɔm-kʋ nɛ kɩtɛzɩ cɩyʋʋ.» 22Ɛtasɩ-wɛ heyuu ɖɔɖɔ se: «Paasuu sʋlʋm pɛŋ#2.22 Pɛŋ: Yuda ñɩma tɛ lɛ, tɔnɛ palabɩnɩ-ɩ, paɖʋʋ ɩ-taa num yaa lɩm yaa sʋlʋm. weyi ɩtɔwaa yɔ ɩ-taa. Pɩtɛkɛ ḿbʋ́, pʋkɔŋ se pɩpɩɣ lɛ, pɩyasɩɣ-ɩ nɛ sʋlʋm wɛɛkɩ pikpe tataa yem nɛ pɛŋ ñala asayʋʋ ɖɔɖɔ. Ɛlɛ́, pɛŋ weyi ɩtɔtɔɔ yɔ, ɩ-taa posuu.»
Ɛyʋ pɩyalʋ kɩlɩ kɩyakʋ kɩhɛzʋʋ
(Mat 12.1-8; Luk 6.1-5)
23Kɩyakʋ kɩhɛzʋʋ nakʋyʋ wiye Yesu nɛ ɛ-tɔmkpɛlɩkɩyaa pɔɖɔŋaɣ hayɩm nabʋyʋ taa. Pahayɩ tɔɔnaɣ nakɛyɛ pɩ-taa nɛ ɛ-tɔmkpɛlɩkɩyaa pɛlɩɣ nɛ nʋmɔʋ nɛ ponuutuu nɛ pasalɩɣ. Tɔɔnaɣ ŋ́gá, kɛwɛ ɛzɩ amala yɔ. 24Palakaɣ ḿbʋ́ lɛ, Farɩsɩ ñɩma na-wɛ nɛ powolo peheyi Yesu se: «Cɔnɩ ŋna ñɔ-tɔmkpɛlɩkɩyaa lakʋʋ mbʋ́ paɖʋ Mooyiizi paɣtʋ taa se pataala kɩyakʋ kɩhɛzʋʋ wiye yɔ.» 25Peeɖe Yesu pɔzɩ-wɛ se: «Yee ḿbʋ́ ɩtakalɩdɩ mbʋ́ Daaviidi labɩ kɩyakʋ ŋgʋ́ ñɔɔsɩ cɛyɩ ɛ nɛ ɛ-taabalaa yɔ yaa we? 26Ɛsʋ Ɛsɔ ɖɩɣa taa nɛ ɛtɔɔ tindine nɖɩ́ paaha Ɛsɔ yɔ. Ŋgʋ́, pɩfɛyɩ se nabɛyɛ ɛtɔɔ-ɖɩ yem nɛ pɛtɛkɛ cɔjɔnaa. Ɛlɛ́, Daaviidi kpaɣ-yɛ nɛ ɛ nɛ ɛ-taabalaa pɔtɔɔ. Alɩwaatʋ ńdʋ́ lɛ, Abiyaataarɩ kɛkɛnɩ cɔjɔnaa ñʋʋdʋ.» 27Pʋwayɩ lɛ, Yesu tasɩ-wɛ heyuu se: «Paɖʋ kɩyakʋ kɩhɛzʋʋ se pʋwazɩ ɛyʋ. Ɛlɛ́, patala ɛyʋ kʋ-yɔɔ. 28Pʋ-yɔɔ lɛ, Ɛyʋ Pɩyalʋ sɩmnɩ mbʋ́ pʋwɛɛ se pala kɩyakʋ kɩhɛzʋʋ wiye yɔ.»
Currently Selected:
Maarkɩ 2: KABI
Highlight
Share
Copy
Want to have your highlights saved across all your devices? Sign up or sign in
