Maarkɩ 5

Yesu ɖɔɔnɩ aleewaa abalʋ nɔɔyʋ wayɩ

(Mat 8.28-34; Luk 8.26-39)

1Puwiye ńɖɩ́ patalɩ Geraazaa ɛjaɖɛ taa Galilee teŋgu kidiiliŋ lɛɛkʋ yɔɔ. 2Yesu lɩnɩ kpɩyʋʋ taa nɛ etii lɛ, abalʋ nɔɔyʋ tɩlɩʋnɩ pɩlaŋ taa nɛ ewolo ɛ-cɔlɔ. Abalʋ ɛnʋ, aleewaa kɛwɛ ɛ-wayɩ 3nɛ ɛwɛɛ pɩlaŋ taa, paa paahɔkɩ-ɩ ɛbɛ yɔ, ɛcɛkɩ-pʋ. 4Pɛwɛɛ pakaŋ-ɩ kpasɩ ɛ-naŋgbanzɩ taa nɛ paɖɩɣ yoŋgbasɩ e-nesi taa nɛ ɛpʋʋtɩ pɩtɩŋa. Nɔɔyʋ fɛyɩ se ɛpɩzɩɣ ɛ-tɔm. 5Ɛwɛɛ ɛcɔʋ pɩlaŋ nɛ pʋŋ pɔ-yɔɔ wɩsɩ nɛ ɖoó nɛ ɛmakɩ kubusi nɛ ɛhɛdɩɣ ɛ-tɩ nɛ pɛɛ.

6Elosi Yesu poliŋ taa lɛ, ɛkpaɣ seya nɛ ewolo eluŋ ɛ-tɛɛ. 7Nɛ ɛyɔɔdɩ ɖoŋ se: «Ɛsɔ Caabiyuu Pɩyalʋ Yesu, ma nɛ ŋ se we? Ɛsɔ ɖoŋ taa lɛ, mentendiɣ-ŋ se ŋtaaɖʋ-m kʋñɔŋ.» 8Ɛyɔɔdɩ tɔm ńdʋ́, mbʋ́ pʋyɔɔ yɔ, Yesu holini aleewaa ḿbá se: «Ise abalʋ ɛnʋ ɛ-wayɩ.» 9Peeɖe Yesu pɔzɩ abalʋ ɛnʋ se: «Payaɣ-ŋ se we?» Ecosi-i se: «Payaɣ-m se you laɖaa tikaɣ, mbʋ́ pʋyɔɔ yɔ, ɖɩɖɔwa.» 10Ɛlɛ́, ewiini Yesu cɔɔɔ se ɛtaaɖɔɔnɩ aleewaa ḿbá Geraazaa ɛjaɖɛ ńɖɩ́ ɖɩ-taa. 11Ŋgʋ́, afanaa tikaɣ nakɛyɛ kɛwɛ pɔ-cɔlɔ peeɖe pʋʋ yɔɔ nɛ kacazɩɣ tɔɔnaɣ. 12Peeɖe aleewaa ḿbá petendi Yesu se: «Ha-ɖʋ nʋmɔʋ nɛ ɖiwolo ɖɩsʋʋ afanaa taa.» 13Peeɖe Yesu tisaa nɛ aleewaa ḿbá pese abalʋ ɛnʋ ɛ-wayɩ nɛ powolo pasʋʋ pa-taa nɛ paba kpaɣ seya nɛ petii pafalɩ teŋgu taa nɛ pɔñɔɔ lɩm nɛ pasɩ. Afanaa ḿbá, patalɩ ɛzɩ kutokiŋ naalɛ yɔ.

14Peeɖe afanaa ḿbá pɔ-yɔɔ cɔnɩyaa sewa kpaagbaa nɛ powolo peheyi tɛtʋ taa ɛyáa nɛ tɛyɛ yɔɔ ñɩma nɛ patɩŋa powolo se pana mbʋ́ pɩlaba yɔ. 15Patalɩ Yesu cɔlɔ lɛ, pamaɣnɩ abalʋ weyi aleewaa tikaɣ kɛwɛ ɛ-wayɩ yɔ, esu wondu nɛ ɛcaɣ. Mbʋ́ pʋyɔɔ yɔ, ɛ-kpaaŋ cɛba. Peeɖe sɔɔndʋ kpa-wɛ 16nɛ mbá paawɛɛ nɛ pana yɔ, pɛkɛdɩ mbá patana yɔ mbʋ́ pɩlaba nɛ aleewaa se ɛ-wayɩ yɔ nɛ mbʋ́ pɩlabɩ afanaa ɖɔɖɔ yɔ. 17Peeɖe ɛyáa sʋ Yesu tenduu yɔɔ se ɛkʋyɩ pɛ-ɛjaɖɛ taa.

18Yesu woba se ɛkpaɣ kpɩyʋʋ taa lɛ, abalʋ ɛnʋ etendi-i se ɛtɩŋɩɣ-ɩ nɛ ɛwɛɛ ɛ-cɔlɔ. 19Ɛlɛ́, Yesu kizi nɛ eheyi-i se: «Pɩsɩ ñɛ-tɛ ña-ñɩma cɔlɔ nɛ ŋkɛdɩ-wɛ mbʋ́ Kɩpaɣlʋ na ña-pʋtɔdɩyɛ nɛ ɛlabɩ-ŋ yɔ.» 20Ɛɖɛwa lɛ, ɛpazɩ susuu mbʋ́ pɩtɩŋa Yesu labɩ-ɩ yɔ Tɛtʋ Hiu Egeetiye taa nɛ ɛyáa mbá patɩŋa payɩ panɩwa yɔ, pɩlabɩ-wɛ piti.

Yesu wazɩ halʋ nɔɔyʋ ɛ-kʋdɔŋ nɛ efezi halɩbɩɣa nakɛyɛ nɛ sɩm taa

(Mat 9.18-26; Luk 8.40-56)

21Yesu sʋ kpɩyʋʋ nɛ ɛpɩsɩ teŋgu kidiiliŋ lɛɛkʋ yɔɔ lɛ, ɛyáa samaɣ kpeɣli ɛ-cɔlɔ lɩm nɔɔ. 22Pɩkɛdaa lɛ, Ɛsɔ ɖɩsɛyɛ naɖɩyɛ taa ñʋʋdʋ sɔsɔ weyi payaɣ se Yayiruusi yɔ, ɛtalɩ Yesu cɔlɔ nɛ eluŋ ɛ-tɛɛ nɛ 23ewiini-i cɔɔɔ se ewolo ɛtɩnɩ ɛ-pɩɣa peliɣa yɔɔ nesi nɛ kɔ-yɔɔ cɛ. Mbʋ́ pʋyɔɔ yɔ, kacaɣ sɩbʋ. 24Peeɖe ɛ nɛ Yesu pakpaɣ nʋmɔʋ se powoki ɛ-tɛ. Pɛɖɛɣaɣ lɛ, ɛyáa sakɩyɛ tɩŋɩɣ pa-wayɩ nɛ pañɩkɩɣ ɖama nɛ pɛkpɛndɩɣnɩ Yesu.

25Halʋ nɔɔyʋ kɛwɛ ɛyáa taa peeɖe. Calɩm kɛwɛɛ pikpeŋni-i nɛ pɩcɛyɩɣ-ɩ pɩŋŋ pɩnzɩ hiu nɛ naalɛ yɔ. 26Ɛcɔ fɛɖaa ndɩ ndɩ tɛ nɛ pɩnɩ-ɩ nɛ ɛwɛɛkɩ e-liidiye tɩŋa. Ɛlɛ́, ɛ-kʋdɔŋ tapasɩ, kɩtɛzaɣ kpaʋ ɖoŋ kɩkpaʋ. 27Ɛyáa yɔɔdaɣ ɛzɩma mbʋ́ Yesu lakaɣ nɛ kʋdɔndɩnaa yɔɔ cɛkɩ yɔ lɛ, halʋ ɛnʋ ɛnɩɩ. Peeɖe ɛsʋ ɛyáa taa nɛ ewolo etukuni Yesu toko nɛ ɛ-wayɩ. 28Mbʋ́ pʋyɔɔ yɔ, ɛmaɣzaɣ se: «Yee maatɩɩpɩzaɣ se mehiɣ e-toko nɛ montukuna yɔ, mɔ-yɔɔ kɛcɛba.» 29Calɩm mbʋ́ pikpeŋaɣnɩ-ɩ yɔ, pɩtɩŋ pɩsɩŋ nɛ ɛna se ɛ-yɔɔ cɛba. 30Ɛlɛ́, Yesu na kpaagbaa se ɖoŋ nɩɩyɩ lɩ ɛ-yɔɔ nɛ ɛkɛzɩ ɛ-tɩ nɛ ɛyáa samaɣ yɔɔ nɛ ɛpɔzɩ-wɛ se: «Atukuni mon-toko?» 31Ɛ-tɔmkpɛlɩkɩyaa cosi-i se: «Ŋnaɣ ɛyáa ñɩkɩɣ-ŋ ḿbʋ́ nɛ ŋɖaɣnɩɣ pɔzʋʋ se atukuni-ŋ?» 32Peeɖe Yesu cɔnɩ ɛ-cɔlɔ kpɛɛɛ se ɛna weyi etukuni-i yɔ. 33Halʋ ɛnʋ ɛna mbʋ́ pɩlabɩ-ɩ yɔ lɛ, ɛ-laŋɩyɛ maa nɛ ɛ-nandʋ pazɩ paʋ nɛ ewolo eluŋ Yesu tɛɛ nɛ ɛkɛdɩ-ɩ ɛ-tɔm tɩŋa. 34Ɛlɛ́, Yesu heyi-i se: «Mɛn-pɛlɛ! Lidaʋ ŋgʋ́ ŋwɛnɩ mɔ-yɔɔ yɔ, kɩyabɩ ña-ñʋʋ. Kpemni laŋhɛzɩyɛ, ña-kʋdɔŋ cɛba kɩtɩŋa.»

35Yesu yɔɔdaɣ ḿbʋ́ lɛ, petiyi nabɛyɛ nɛ Yayiruusi ɛnʋ ɛ-tɛ se powolo peheyi-i se: «Ña-pɩɣa peleɣa sɩba, taaɖʋ Wɩlɩyʋ kʋñɔŋ yem falaa.» 36Yesu nɩ ḿbʋ́ lɛ, eheyi Yayiruusi se: «Ña-laŋɩyɛ ɛtaamaa, ñɩtɩ ŋwɛnɩ lidaʋ.» 37Peeɖe ɛya Pɩyɛ nɛ Yakubu nɛ e-neu Yohanɛɛsɩ se pasɩɩ-ɩ. Ɛlɛ́, eteyele se lɛlaa ɛsɩɩ-ɩ. 38Patalɩ Yayiruusi ɛnʋ ɛ-tɛ lɛ, Yesu maɣnɩ ɛyáa makaɣ kubusi nɛ pependiɣ nɛ pewiliɣ. 39Ɛlɛ́, ɛsʋʋ ɖɩɣa nɛ ɛpɔzɩ-wɛ se: «Pɩlabɩ ɛzɩma nɛ ipeendiɣ nɛ iwiɣ ḿbʋ́? Pɩɣa kanɛ koɖou kuɖou, katasɩ kɩsɩbʋ.» 40Ɛlɛ́, powoŋ-i. Peeɖe ɛɖɔɔnɩ patɩŋa nɛ palɩɩnɩ awayɩ nɛ ɛ́yáa pɩɣa caa nɛ ko-ɖoo nɛ ɛ-tɔmkpɛlɩkɩyaa ḿbá pa-naadozo nɛ ɛ nɛ wɛ pasʋʋ ɖenɖe pɛhɛzɩ pɩɣa ŋ́gá yɔ. 41Peeɖe Yesu ɖɔkɩ ke-nesi taa nɛ ɛtɔ se: «Taliita kum#5.41 Taliita kum: Yuda ñɩma tɔm natʋyʋ..» Pʋ-tɔbʋʋ se: «Pɩɣa ña! Meheyiɣ-ŋ se ŋkʋyɩ.» 42Kpaagbaa ḿbʋ́ lɛ, pɩɣa peleɣa ŋ́gá kakʋyɩ kɔɖɔ nɛ kapazɩ ɖɔm. Kaawɛnɩ pɩnzɩ hiu nɛ naalɛ. Ɛyáa mbá paawɛ peeɖe yɔ, pɩɖɩɣzɩ-wɛ pɩŋŋ. 43Ɛlɛ́, Yesu paɣ́ ka-ñɩma se: «Itaala nɛ nɔɔyʋ nɩɩ tɔm tʋnɛ.» Pʋwayɩ lɛ, eheyi-wɛ se: «Iha-kɛ tɔɔnaɣ.»

Currently Selected:

Maarkɩ 5: KABI

Highlight

Copy