Maatiyee 24

Yesu yɔɔdaa se Ɛsɔ ɖɩɣa kɔŋ yɔkʋʋ

(Mrk 13.1-13; Luk 21.5-19)

1Yesu tɛm yɔɔdʋʋ lɛ, ɛlɩɩ Ɛsɔ ɖɩɣa taa se ɛɖɛɣ. Peeɖe ɛ-tɔmkpɛlɩkɩyaa woba ɛ-cɔlɔ nɛ payɩɣyɩɣ ɛzɩma mbʋ́ pama Ɛsɔ ɖɩɣa ŋ́gá yɔ. 2Ɛlɛ́, eheyi-wɛ se: «Ɩnaʋ pɩtɩŋa payɩ ɛzʋnɔ yɔ, toovenim lɛ, meheyiɣ-mɩ se pɩɩkɔŋ pɩyɛ naɖɩyɛ kazʋʋ lɛɛɖɛ yɔɔ, pɔkɔŋ tuzuu atɩŋa payɩ nɛ pɛpɛɖɩ.»

Mbʋ́ pɩkaɣ labʋ nɛ pʋcɔ ɛjaɖɛ tɛ yɔ

3Pɩkɛdaa lɛ, Yesu wolo Somiŋ Pʋʋ yɔɔ nɛ ɛcaɣ nɛ ɛ-tɔmkpɛlɩkɩyaa wolo ɛ-cɔlɔ pe-ɖeke nɛ pɔpɔzɩ-ɩ se: «Heyi-ɖʋ alɩwaatʋ ndʋ́ pɩkaɣ labʋ ḿbʋ́ yɔ nɛ mbʋ́ pʋkɔŋ wɩlʋʋ se ñɔ-kɔm nɛ kedeŋa tɛm pawɩzaa yɔ.»

4Peeɖe eheyi-wɛ se: «Ɩɖɔkɩ mɩ-tɩ camɩyɛ, ɩtaayele nɛ nɔɔyʋ yili-mɩ. 5Mbʋ́ pʋyɔɔ yɔ, ɛyáa sakɩyɛ kɔŋ kʋɖʋm kʋɖʋm mo-lone taa nɛ peyili ɛyáa sakɩyɛ nɛ peheyi-mɩ se: ‹Ma lɛ Weyi Ɛsɔ Lɩzaa nɛ etiyini-mɩ› yɔ. 6Ɩkɔŋ nɩʋ you ŋgʋ́ kʋñɔtɩnɩ-mɩ kpam yɔ kɩ-taŋ nɛ ŋgʋ́ kʋwɛ poliŋ yɔ kʋ-tɔm. Ɛlɛ́, sɔɔndʋ ɛtaakpa-mɩ, mbʋ́ pʋyɔɔ yɔ, pʋwɛɛ se pɩla ḿbʋ́. Ɛlɛ́, alɩwaatʋ tatalɩda. 7Ɛjaɖɛ lɛɛɖɛ kʋyʋʋ lɛɛɖɛ yɔɔ nɛ kewiyaɣ lɛɛka ñakʋyɩ lɛɛka yɔɔ. Ñɔɔsɩ kɔŋ lɩʋ nɛ tɛtʋ ñamsɩ hɔɔlɩŋ ndɩ ndɩ taa. 8Lakasɩ sɩnɛ sɩtɩŋa payɩ sɩwɛɣ ɛzɩ halʋ wɩzʋʋ lʋlʋʋ nɛ pɩɣa wɩɣ-ɩ yɔ.

Mbʋ́ pɩkaɣ talʋʋ Yesu tiyiyaa yɔ

9«Alɩwaatʋ ńdʋ́ʋ́ paɖʋzʋʋ-mɩ mi-koyindinaa nesi taa nɛ paɖʋ-mɩ kʋñɔŋ nɛ pakʋ-mɩ. Ajɛya kpeekpe taa ɛyáa kɔŋ-mɩ paɖʋʋ mɔ-yɔɔ. 10Pʋ-yɔɔ ɛyáa sakɩyɛ kɔŋ lesuu pe-lidaʋ nɛ palɩɩ ɖama wayɩ nɛ papaɖɩ ɖama. 11Ɛyáa sakɩyɛ kɔŋ lɩʋ se pɛkɛ náyaa nɛ peyili ɛyáa sakɩyɛ. 12Ɛzaɣ́tʋ tɛzɩɣ ɖɔʋ nɛ halɩ ɛyáa sakɩyɛ lesi pɔ-sɔɔlɩm. 13Ɛlɛ́, weyi ɛɖɔkʋʋ ɛ-tɩ nɛ pʋkɔɔ pɩtalɩ kɛtɛzaɣ kɩyakʋ wiye yɔ, Ɛsɔ yakɩ ɛ-ñʋʋ. 14Pɔkɔŋ susuu Ɛsɔ Kewiyaɣ Laŋhɛzɩyɛ Tɔm kedeŋa kpeekpe nɛ pɩkɛnɩ aseɣɖe ajɛya tɩŋa payɩ. Pʋwayɩ lɛ, kedeŋa tɛ.»

Ɛyáa kɔŋ kʋñɔŋ labʋ siŋŋ

(Mrk 13.14-23; Luk 21.20-24)

15Yesu tasɩ-wɛ heyuu se: «Alɩwaatʋ natʋyʋ ɩkɔŋ naʋ tɛyɔkɩyʋ weyi ɛtatʋʋzɩ Ɛsɔ ɛsɩndaa kpem yɔ, ɛsɩŋ lone kaɖɛ ñɩnɖɛ taa. Ɛ-tɔm náyʋ Daanɩyɛɛlɩ yɔɔdaa. Weyi ɛkalɩɣ tɔm ńdʋ́ yɔ, pʋwɛɛ se ɛnɩɩ tɩ-tɔbʋʋ. 16Alɩwaatʋ ńdʋ́ tɩtalaa lɛ, mbá pɛwɛ Yudee egeetiye taa yɔ, pese pakpanɩ pʋŋ taa. 17Yee nɔɔyʋ ɛwɛ e-kuduyuu ñʋʋ taa lɛ, ese kpaagbaa. Pɩtaacɩbɩ-ɩ se etiki ɛsʋʋ kɩ-tɛɛ nɛ ɛkpaɣ pʋyʋ nɛ ɛkpɛndɩna. 18Weyi ɛwɛ hayɩm taa lɛ, ese kpaagbaa. Pɩtaacɩbɩ-ɩ se ekpeŋ ɛ-tɛ nɛ ɛkpaɣ e-toko maɣmaɣ. 19Pʋkɔŋ tɔɔʋ halaa hosi tɩnaa nɛ asɔŋ alɩwaatʋ ńdʋ́! 20Itendi Ɛsɔ camɩyɛ se ɛtaayele se ise ninkaɣ alɩwaatʋ yaa kɩyakʋ kɩhɛzʋʋ wiye. 21Mbʋ́ pʋyɔɔ yɔ, kʋñɔŋ ŋgʋ́ kʋkɔŋ alɩwaatʋ ńdʋ́ tɩ-taa yɔ, kɩkɩlɩɣ kʋñɔmɩŋ weyi ɛyáa laba ɖooo ɛzɩ Ɛsɔ labʋ kedeŋa nɛ pʋkɔɔ pɩsɩɩnɩ sɔnɔ yɔ ɩtɩŋa payɩ. Nakʋyʋ ɛɛtasɩɣ kɔm nɛ kɩkɩlɩ-kʋ. 22Yee Ɛsɔ ɛtaamaɣzɩ nɛ ɛpasɩ kʋñɔŋ kɩyakɩŋ ɩnʋ ɩ-yɔɔ ɛyáa mbá ɛlɩzɩ-wɛ se pɛkɛ ɛ-ñɩma yɔ pɔ-yɔɔ yɔ, nɔɔyʋ taawɛnɩ ɛ-ɛsɛ.

23«Pʋ-yɔɔ lɛ, yee nɔɔyʋ eheyi-mɩ se Weyi Ɛsɔ Lɩzaa nɛ etiyini-mɩ yɔ, ɛwɛ cɩnɛ yaa peeɖe yɔ yɔ, ɩtaatisi. 24Mbʋ́ pʋyɔɔ yɔ, mbá pɛcɛtɩɣ se ḿbá lɛ Mbá Ɛsɔ Lɩzaa Yɔ nɛ mbá paba ñɛcɛtɩɣ se pɛkɛ náyaa yɔ, pɔkɔŋ lɩʋ nɛ pawɩlɩ kawɩlɩsɩ sɔsɔsɩ nɛ pala hama lakasɩ sɔsɔsɩ nɛ halɩ yee papɩzɩɣ yɔ, pɛcɛtɩ mbá Ɛsɔ lɩzaa se pɛkɛ ɛ-ñɩma yɔ. 25Iwelesi camɩyɛ nɛ ɩnɩɩ, meheyi-mɩ se ɩñɔɔzɩ mɩ-tɩ pʋcɔ pʋkɔɔ pɩla ḿbʋ́.

Ɛyʋ pɩyalʋ pɩsɩɣ kɔm

26«Pʋ-yɔɔ lɛ, yee peheyi-mɩ se: ‹Ɩcɔnɩ ɩna, ɛwɛ lakʋ taa› yɔ, ɩtaawolo. Yaa peheyi-mɩ se: ‹Ɩcɔnɩ ɩna, ɛwɛ kuduyuu tɛɛ› yɔ, ɩtaatisi. 27Ɛyʋ Pɩyalʋ kɔŋ nɛ ɛyáa tɩŋa payɩ na-ɩ ɛzɩ tɛʋ ñɩlɩsʋʋ tam kʋɖʋm peleu wɩsɩ ɖɩlɩyɛ nɛ pɩnaɣ paa le yɔ. 28Pʋwɛ ɛzɩ potuu eduuye se: ‹Namɖazʋʋ wayɩ kpeliŋ fɛtɩɣ› yɔ.»

29Yesu tasɩ-wɛ heyuu se: «Kʋñɔŋ kɩyakɩŋ ɩnʋ ɩtɩɖɛɣ lɛ, wɩsɩ ɛɛtasɩɣ ñaɣʋ, fenaɣ ɛɛtasɩɣ ñaɣʋ ɖɔɖɔ. Tɩɩnzɩ kpɛzɩɣnɩ ɛsɔdaa nɛ sɩtɔlɩ nɛ mbʋ́ pʋwɛ ɛsɔdaa yɔ, pɩñamsɩ. 30Peeɖe pɩwɩlɩɣ Ɛyʋ Pɩyalʋ kawɩlɩsɩ ɛsɔdaa nɛ ajɛya kpeekpe ɛyáa pazɩ tɩmʋʋ nɛ pana Ɛyʋ Pɩyalʋ nɛ e-ɖoŋ sɔsɔŋ nɛ e-koboyaɣ ɛsɔmɩndʋ yɔɔ, ɛɖɔŋ kɔm. 31Pɔkɔŋ yaʋ ɛgandɩyɛ sɔsɔɖɛ nɛ etiyi e-tiyiyaa kedeŋa kpeekpe yɔɔ nɛ pekpeɣli mbá patɩŋa payɩ Ɛsɔ lɩzaa se pɛkɛ ɛ-ñɩma yɔ.»

Hiyuú eduuye

(Mrk 13.28-31; Luk 21.29-33)

32Yesu tasɩ-wɛ heyuu se: «Iwelesi camɩyɛ nɛ ɩnɩɩ mbʋ́ hiyuú wɩlɩɣ-mɩ yɔ: alɩwaatʋ ndʋ́ kɩnɛɣdɩɣ yɔ, ɩsɩm kpaagbaa se tɛsoŋiye wɩzaa. 33Ḿbʋ́ ɖɔɖɔ pʋwɛɛ. Yee ɩkɔm ɩnaɣ pɩtɩŋa payɩ ḿbʋ́ lɛ, ɩtɩlɩ kpaagbaa se Ɛyʋ Pɩyalʋ talɩ mɩ-cɔlɔ kpam. 34Toovenim lɛ, meheyiɣ-mɩ se: ɛyáa mbá pɛwɛnɩ pɛ-ɛsɛ ɛzʋnɔ yɔ, paasɩkɩ patɩŋa nɛ pʋcɔ pɩtɩŋa payɩ pɩla ḿbʋ́. 35Ɛsɔdaa nɛ tɛtʋ pamʋkɩ, ɛlɛ́, mɔn-tɔm ñaamʋkɩ kaʋ.»

Nɔɔyʋ ɛɛsɩŋ alɩwaatʋ ndʋ́ Kɩpaɣlʋ pɩsɩɣ kɔm yɔ

(Mrk 13.32-35; Luk 17.26-30,34-36)

36Yesu tasɩ-wɛ heyuu se: «Nɔɔyʋ ɛɛsɩŋ kɩyakʋ ŋ́gʋ́ yaa alɩwaatʋ ńdʋ́. Paa Ɛsɔ tiyiyaa yaa ɛ-Pɩyalʋ maɣmaɣ. Ɛlɛ́, Caa Ɛsɔ ɖeke sɩmna. 37Alɩwaatʋ ndʋ́ Ɛyʋ Pɩyalʋ kɔŋ yɔ, pɩlakɩ ɖɔɖɔ ɛzɩ pɩɩlabʋ Nowee alɩwaatʋ taa yɔ. 38Mbʋ́ pʋyɔɔ yɔ, pʋcɔ kɩyakʋ ŋgʋ́ tɛʋ sɔsɔʋ nɩwa nɛ lɩm su yɔ kɩtalɩ lɛ, ɛyáa tɔkaɣ nɛ pɔñɔʋ nɛ abalaa kpakɩɣ halaa nɛ halaa ñawalɩɣ nɛ pʋkɔɔ pɩsɩɩnɩ kɩyakʋ ŋgʋ́ Nowee sʋ kpɩyʋʋ sɔsɔʋ taa yɔ. 39Pataatɩlɩ se tɛʋ kɔŋ nɩʋ pʋɖɔɔ ḿbʋ́ nɛ pʋkɔɔ pɩsɩɩnɩ alɩwaatʋ ndʋ́ lɩm suwa nɛ pasɩ patɩŋa payɩ yɔ. Ḿbʋ́ ɖɔɖɔ pʋkɔŋ-wɛ tuduu alɩwaatʋ ndʋ́ Ɛyʋ Pɩyalʋ pɩsɩɣ ɛkɔɔ yɔ. 40Alɩwaatʋ ńdʋ́ lɛ, abalaa naalɛ pɩzɩɣ pɛwɛɛ hayɩm taa nɛ pɩkpaɣ kʋɖʋm nɛ piyele lɛlʋ. 41Halaa naalɛ pɩzɩɣ pɛwɛɛ ɖɔɖɔ namɩyɛ yɔɔ nɛ pɩkpaɣ kʋɖʋm nɛ piyele lɛlʋ. 42Pʋ-yɔɔ lɛ, ɩcaɣnɩ mɩ-ɛsɛ, mbʋ́ pʋyɔɔ yɔ, ɩtatɩlɩ kɩyakʋ ŋgʋ́ mɩ-Kɩpaɣlʋ pɩsɩɣ ɛkɔɔ yɔ. 43Ɩtɩlɩ ɖɔɖɔ se yee ɖɩɣa tʋ ɛɛsɩm alɩwaatʋ ndʋ́ mɩ́lʋ́ woki-i mɩlʋ́ʋ ɖoó taa yɔ yɔ, eeyeba ɖou nɛ ɛɖaŋ-ɩ kpam se ɛtaasʋʋ ɛ-ɖɩɣa taa. 44Pʋ-yɔɔ lɛ, mɩ ɖɔɖɔ ɩñɔɔzɩ mɩ-tɩ, mbʋ́ pʋyɔɔ yɔ, Ɛyʋ Pɩyalʋ pɩsɩɣ ɛkɔɔ alɩwaatʋ ndʋ́ ɩtamaɣzɩ yɔ tɩ-yɔɔ.»

Tʋmlaɖʋ kɩbanʋ weyi ɛsɩm lɔŋ yɔ

(Luk 12.41-48)

45Yesu tɛm yɔɔdʋʋ ḿbʋ́ lɛ, ɛpɔzɩ ɛ-tɔmkpɛlɩkɩyaa se: «Akɛ tʋmlaɖʋ kɩbanʋ weyi ɛwɛ lɛɣtʋ yɔ? Ɛnʋ lɛ weyi ɛ-caa yekini-i ɖɩɣa se ɛcɔŋnɩ kɔ-yɔɔ nɛ ɛcɛlɩɣ tʋmlaɖaa lɛlaa tɔɔnaɣ alɩwaatʋ ndʋ́ pʋmʋnaa yɔ. 46Tʋmlaɖʋ weyi ɛ-caa pɩsɩɣ nɛ ɛmaɣnɩ ɛɖɔŋ ɛ-tʋmɩyɛ labʋ yɔ, ehiɣ ɛ-tɩ! 47Toovenim lɛ, mankaɖɩɣ-mɩ se: ɖɩɣa tʋ ɛnʋ, eyekini-i ɛ-ñɩm tɩŋa se ɛcɔnɩ pʋ-yɔɔ. 48Ɛlɛ́, yee tʋmlaɖʋ ɛnʋ ɛkɛ ɛzaɣ́ʋ nɛ pɩcɩbɩ-ɩ nɛ ɛɖʋ ɛ-taa se ɛ-caa ɛɛkaɣ kɔm lɔŋ 49nɛ ɛ nɛ sʋlʋm kpaŋɩyaa pɔtɔkɩ nɛ pɔñɔʋ nɛ ɛsʋʋ ɛ-taabalaa tʋmlaɖaa lɛlaa mabʋ yɔɔ yɔ, 50ɖɩɣa tʋ ɛnʋ, ɛkɔŋ kɩyakʋ nakʋyʋ ñɩ́ɣ́yʋ́ʋ ŋgʋ́ ɛtatɩlɩ yɔ kʋ-yɔɔ nɛ etudi-i 51nɛ ɛɖʋ-ɩ kʋñɔŋ siŋŋ ɛzɩ palakʋʋ tɛɛ nɛ pʋ-yɔɔ ñɩma yɔ. Peeɖe ewiliɣ nɛ ɛsalɩ e-kela.»

Currently Selected:

Maatiyee 24: KABI

Highlight

Copy