Maatiyee 23

Yesu kizi cɔjɔnaa sɔsaa tɔm

(Mrk 12.38-40; Luk 11.43,46; 20.45-46)

1Yesu tɛma lɛ, ɛkɛzɩ ɛ-tɩ nɛ ɛyáa samaɣ nɛ ɛ-tɔmkpɛlɩkɩyaa pɔ-yɔɔ nɛ eheyi-wɛ se: 2«Paɣtʋ wɩlɩyaa nɛ Farɩsɩ ñɩma paɖʋwa se palɩzɩ-mɩ Mooyiizi paɣtʋ tɔbʋʋ. 3Pʋ-yɔɔ lɛ, ɩɖɔkɩ ndʋ́ tɩtɩŋa payɩ peheyiɣ-mɩ yɔ nɛ ɩɖɔ tɩ-yɔɔ. Ɛlɛ́, ɩtaala mbʋ́ palakɩ yɔ. Mbʋ́ pʋyɔɔ yɔ, paalakɩ mbʋ́ pa-maɣmaɣ pɛkpɛlɩkɩɣ ɛyáa se pala yɔ. 4Pasʋkɩ ɛyáa sʋʋtʋ yuŋ ñɩndʋ nɛ paatɩɩɖʋʋ-wɛ nesi paa ñɩɩɩ. 5Palakɩ pɩtɩŋa payɩ se ɛyáa ɛna-wɛ. Pʋ-yɔɔ pamaɣ Ɛsɔtɔm tɔnzɩ nzɩ́ sɩkɩlɩ walʋʋ yɔ sɩ-yɔɔ nɛ pataŋ pe-nesi nɛ pe-kila pa-taa. Pataŋ ɖɔɖɔ po-tokonaa nesi taa toma nɛ akɩlɩɣ lɛlaa tɛ. 6Pañɩnɩɣ ɖɩjaɣyɛ sɔsɔɖɛ kazandʋ ndɩ ndɩ nɛ Ɛsɔ ɖɩsɛyɛ pa-taa. 7Pɔsɔɔlaa se pɛsɛɣ-wɛ nɛ ñamtʋ ɛyáa ɖikpeɣliye taa. Pɔsɔɔlaa ɖɔɖɔ se payaɣ-wɛ se: ‹Wɩlɩyaa.› 8Mɩ lɛ, mɩ-taa nɔɔyʋ ɛtaayele nɛ payaa-ɩ se: ‹Wɩlɩyʋ.› Mbʋ́ pʋyɔɔ yɔ, mɩtɩŋa payɩ ɩkɛ ɛyáa kʋɖʋmaa, men-ɖeke koŋ lɛ mɩ-Wɩlɩyʋ. 9Ɩtaayaa nɔɔyʋ kedeŋa yɔɔ cɩnɛ se: ‹Caa.› Mbʋ́ pʋyɔɔ yɔ, Caa kʋɖʋm koŋ ɩwɛna, ɛnʋ wɛnɩ ɛsɔdaa. 10Mɩ-taa nɔɔyʋ ɛtaayele ɖɔɖɔ nɛ payaa-ɩ se: ‹Wiyaʋ.› Mbʋ́ pʋyɔɔ yɔ, Wiyaʋ kʋɖʋm koŋ ɩwɛna, ɛnʋ lɛ Krɩstʋ. 11Mɩ-taa sɔsɔ ɛpɩsɩ mɩ-tʋmlaɖʋ. 12Weyi ɛkpazɩɣ ɛ-tɩ yɔ, petisiɣ-i. Weyi ɛ́lɛ́ tisiɣ ɛ-tɩ yɔ, pakpazɩ-ɩ.»

«Pʋtɔɔ-mɩ kʋtɔʋ!»

(Mrk 12.40; Luk 11.39-42,44,47,52; 20.47)

13Pʋwayɩ lɛ, Yesu kɛzɩ ɛ-tɩ nɛ paɣtʋ wɩlɩyaa nɛ Farɩsɩ ñɩma pɔ-yɔɔ nɛ eheyi-wɛ se: «Tɛɛ nɛ pʋ-yɔɔ ñɩma mɩ, pʋtɔɔ-mɩ! Mbʋ́ pʋyɔɔ yɔ, ɩɖɩkɩ ɛyáa nʋmɔʋ se pataasʋʋ Ɛsɔ Kewiyaɣ taa. Ŋgʋ́, mɩ-maɣmaɣ ɩɩsʋʋ, ɛlɛ́, iiyeki ɖɔɖɔ mbá pe-liu wɛ sʋʋ yɔ se paba ɛsʋʋ.

[ 14«Paɣtʋ wɩlɩyaa nɛ Farɩsɩ ñɩma mɩ, ɩkɛ tɛɛ nɛ pʋ-yɔɔ ñɩma, pʋtɔɔ-mɩ! Mbʋ́ pʋyɔɔ yɔ, mɩhɔɔzʋʋnɩ lelaa nesi taa mbʋ́ pɩtɩŋa payɩ pɛwɛna yɔ. Ɩsɛɣ Ɛsɔ nɛ pɩɖaɣlɩɣ se pɩwɩlɩ se mɩkɛnɩnɩ ɛyáa kɩbama. Pʋ-yɔɔ Ɛsɔ kɔŋ-mɩ ɖʋʋ kʋñɔŋ ŋgʋ́ kɩfɛyɩ ɖaɣʋ yɔ.]

15«Paɣtʋ wɩlɩyaa nɛ Farɩsɩ ñɩma mbá mɩ ɩkɛ tɛɛ pʋ-yɔɔ ñɩma yɔ, pʋtɔɔ-mɩ! Mbʋ́ pʋyɔɔ yɔ, ɩwɛɛ ɩcɔʋ kedeŋa tɩŋa payɩ se ɩñɩnɩ nɔɔyʋ nɛ ɩpɩsɩ-ɩ mɩ-tɔmkpɛlɩkɩyʋ. Ihikiɣ-i lɛ, ɩlabɩ-ɩ nɛ ɛpɩsɩ weyi pʋwɛɛ se paɖʋ-ɩ kʋñɔŋ tam naalɛ nɛ pɩkɩlɩ-mɩ, ɖenɖe kʋñɔŋ maatɛŋ wɛɛ yɔ.

16«Mbá mɩ ɩwɛ ɛzɩ yʋlʋmaa nɛ ɩwɩlɩɣ ɛyáa nʋmɔŋ yɔ, pʋtɔɔ-mɩ! Mbʋ́ pʋyɔɔ yɔ, ɩtɔŋ se: ‹Yee nɔɔyʋ eɖuuni Ɛsɔ ɖɩɣa se ɛlakɩ pʋyʋ yɔ, pɩtɛkɛnɩ-ɩ kɩcɛyʋʋ se ɛlabɩ-pʋ. Ɛlɛ́, yee pʋdʋ eɖuuni ñɩɣlɩ́m mbʋ́ pacanɩnɩ-kɛ yɔ yɔ, pʋwɛɛ se ɛlabɩ-pʋ kpem.› 17Kɩmɛlɛmɩŋ nɛ yʋlʋmaa mɩ! Ñɩɣlɩ́m nɛ Ɛsɔ ɖɩɣa ŋgá kapɩsɩ-pʋ ɛ-ñɩm yɔ, pa-taa akɩlɩ wazaɣ? 18Ɩtɔŋ ɖɔɖɔ se: ‹Yee nɔɔyʋ eɖuuni Ɛsɔ ɖɩɣa taa kɩlaŋ ɖɩlayɛ yɔ, pɩɩlakɩ pʋyʋ. Ɛlɛ́, yee eɖuuni kɩlaʋ ŋgʋ́ pala lone ńɖɩ́ ɖɩ-taa yɔ yɔ, pʋwɛɛ se ɛla mbʋ́ eɖuwaa se ɛlakɩ yɔ kpem.› 19Yʋlʋmaa mɩ! Kpɩnɛ nɖɩ́ palawa yɔ nɛ kɩlaŋ ɖɩlayɛ nɖɩ́ ɖɩpɩsɩ-ɖɩ Ɛsɔ ñɩm yɔ, pa-taa lɛ, akɩlɩ wazaɣ? 20Toovenim lɛ, meheyiɣ-mɩ se: yee nɔɔyʋ eɖuuni kɩlaŋ ɖɩlayɛ yɔ, eɖuuni lone ńɖɩ́ nɛ mbʋ́ pɩtɩŋa payɩ pʋwɛ ɖɩ-taa yɔ. 21Weyi eɖuuni Ɛsɔ ɖɩɣa yɔ, eɖuuni ɖɩɣa ŋ́gá nɛ weyi ɛwɛ ka-taa yɔ. 22Weyi ɛ́lɛ́ ɖukuni ɛsɔdaa yɔ, eɖuuni Ɛsɔ Kewiyaɣ kpelaɣ nɛ weyi ɛcaɣ kɔ-yɔɔ yɔ.

23«Paɣtʋ wɩlɩyaa nɛ Farɩsɩ ñɩma mɩ, ɩkɛ tɛɛ nɛ pʋ-yɔɔ ñɩma, pʋtɔɔ-mɩ! Mbʋ́ pʋyɔɔ yɔ, ɩtayɩɣ nɛ ɩkpɛndɩɣnɩ ɖozi hatʋ maɣmaɣ tam hiu nɛ ɩhaɣ Ɛsɔ pɩtɛ kʋɖʋmam. Ɛlɛ́, ɩɩɖɔŋ paɣtʋ ndʋ́ tɩkɩlɩ wazaɣ yɔ tɩ-yɔɔ. Ńdʋ́ lɛ: Ɛsɔ ɛsɩndaa tʋʋzʋʋ nɛ ɖama pʋtɔdɩyɛ naʋ nɛ mbʋ́ ɛyʋ ɖʋwa se ɛlakɩ yɔ pɩ-labʋ. Ŋgʋ́, tɩ-yɔɔ pɩɩwɛɛ se ɩɖɔ nɛ pɩtasɩnɩ lɛɛtʋ ɖɔɖɔ. 24Mbá mɩ ɩwɛ ɛzɩ yʋlʋmaa nɛ ɩwɩlɩɣ ɛyáa nʋmɔʋ yɔ, ɩwɛ ɖɔɖɔ ɛzɩ mbá pacatɩɣ sʋlʋm nɛ palɩzɩɣ sʋŋñɔɔyɩŋ nɛ piyele pelikini kpaŋnaŋ siɣá naalɛ tɩnaa yɔ.

25«Paɣtʋ wɩlɩyaa nɛ Farɩsɩ ñɩma mɩ, ɩkɛ tɛɛ nɛ pʋ-yɔɔ ñɩma, pʋtɔɔ-mɩ! Mbʋ́ pʋyɔɔ yɔ, ɩwɛ ɛzɩ mbá pañalɩɣ pa-ñanzɩ nɛ pe-eyisi sɩ-wayɩ ɖeke nɛ paañalɩɣ sɩ-taa yɔ. Ɩcaɣ se mɩ-yɔɔ ɛwɛɛ ɖeu, ŋgʋ́, mɩlɩm nɛ pɩtɩŋa pɩ-taa niye ɖɛlɛsʋʋ pa-lɩmaɣza suni mɩ-taa ɖo. 26Farɩsɩ ñɩma, yʋlʋmaa mɩ! Ɩcalɩnɩ mɩ-ñanzɩ nɛ mi-eyisi pa-taa ñalʋʋ, pʋbʋ pa-wayɩ wɛɣ cɩɖɩcɩɖɩ ɖɔɖɔ.

27«Paɣtʋ wɩlɩyaa nɛ Farɩsɩ ñɩma mɩ, ɩkɛ tɛɛ nɛ pʋ-yɔɔ ñɩma, pʋtɔɔ-mɩ! Ɩwɛ ɛzɩ pɩlaŋ weyi pahʋlʋsɩ-ɩ nɛ ɩwɛɛ ɖeu ñɩlɩ ñɩlɩ yɔ. Ŋgʋ́ ɩ-taa lɛ, sɩɖaa mɔɔ nɛ mbʋ́ pɩɖazaa yɔ, posuni ɖo. 28Ḿbʋ́ ɩwɛɛ: ɩwɛ ɛzɩ mbá pɔɖɔŋ paɣtʋ yɔɔ siŋŋ yɔ ɛyáa ɛsɩndaa. Naze lɛ, ɛzaɣ́tʋ nɛ tɛɛ nɛ pʋ-yɔɔ lakasɩ posuni mɩ-taa ɖo.

29«Paɣtʋ wɩlɩyaa nɛ Farɩsɩ ñɩma mɩ, ɩkɛ tɛɛ nɛ pʋ-yɔɔ ñɩma, pʋtɔɔ-mɩ! Mbʋ́ pʋyɔɔ yɔ, ɩmaɣ náyaa pɩlaŋ nɛ ɩcanɩɣ mbá palabɩ mbʋ́ pʋtʋʋzaa yɔ pa-ñɩŋ 30nɛ ɩtɔŋ se: ‹Yee ɖɩɩwɛ ɖɔ-cɔzɔnaa alɩwaatʋ taa yɔ, ɖitaatisi ɖɩtɩnɩ pɔ-yɔɔ nɛ ɖa nɛ wɛ ɖɩkʋ náyaa.› 31Ḿbʋ́ ɩwɩlɩnɩ mɩ-tɩ se mɩ lɛ náyaa kʋyaa pɩyalaa. 32Tɔɔ! Mbá mɩ ɩtɩŋɩɣ mɩ-cɔzɔnaa nʋmɔʋ yɔ, ɩtɛzɩ-kʋ tɩŋʋʋ! 33Đʋmaa mɩ! Ɛzɩma ɩlakɩ nɛ Ɛsɔ ɛtaakʋ mɩ-tɔm nɛ ɛɖʋ-mɩ kʋñɔŋ maatɛŋ taa? 34Pʋ-yɔɔ meheyiɣ-mɩ se: mentiyiɣni-mɩ náyaa nɛ lɔŋsɩnɖaa nɛ paɣtʋ wɩlɩyaa. Ɩkɔŋ kʋʋ lɛlaa nɛ ɩka lɛlaa kaamaŋkasɩ yɔɔ nɛ ilu lɛlaa agbazɛɛ mɩ-Ɛsɔ ɖɩsɛyɛ ndɩ ndɩ taa nɛ ɩwɛɛ lɛlaa wayɩ kaŋ kaŋ tɛtʋ ndɩ ndɩ taa. 35Pʋ-yɔɔ mbá patɩŋa payɩ ɩkʋ-wɛ ɖulum yɔ, pa-sʋʋtʋ tɩŋa pɩsɩɣ mɩ-yɔɔ. Pɩpazɩɣnɩ kʋtʋʋzʋ Aabɛɛlɩ nɛ puwolo pɩsɩɩnɩ Baraacii pɩyalʋ Zakaarii weyi ɩkʋ Ɛsɔ ɖɩɣa kadaɣ taa lone kaɖɛ ñɩnɖɛ nɛ kɩlaŋ ɖɩlayɛ pɛ-hɛkʋ taa yɔ. 36Toovenim lɛ, meheyiɣ-mɩ se: mbá patɩŋa payɩ pakʋ-wɛ ḿbʋ́ yɔ, pa-sʋʋtʋ pɩsɩɣ lɛɛlɛɛyɔ ɛyáa yɔɔ!»

Yesu nɛ Yeruusalɛm ñɩma pɔ-tɔm

(Luk 13.34-35)

37Pʋwayɩ lɛ, Yesu heyi Yeruusalɛm ñɩma se: «Hei! Yeruusalɛm ñɩma mɩ, ɩkʋʋ náyaa nɛ ɩyakɩ mbá Ɛsɔ tiyini-mɩ yɔ pɛɛ nɛ pasɩkɩ. Tam ɛzɩma mɔntɔsɔɔlɩ se menkpeɣli-mɩ mɔn-cɔlɔ nɛ mohuuzi mɩ-yɔɔ nɛ pʋyʋ ɛtaalabɩ-mɩ ɛzɩ ɖoyuu papʋʋ kɩ-kalɩmasɩ yɔɔ yɔ nɛ ikizi? 38Pʋ-yɔɔ lɛ, meyeki-mɩ nɛ mɩ-tɛtʋ. 39Meheyiɣ-mɩ se: ɩɩtasɩɣ-m naʋ nɛ pʋkɔɔ pɩsɩɩnɩ alɩwaatʋ ndʋ́ ɩyɔɔdʋʋ se: ‹Kɩpaɣlʋ Ɛsɔ ɛ́wazɩ weyi ɛkɔŋ e-lone taa yɔ ɛ-yɔɔ› yɔ.»

Currently Selected:

Maatiyee 23: KABI

Highlight

Copy