Maatiyee 22
22
Halɩkpaɣyɛ kazandʋ eduuye
(Luk 14.15-24)
1Pʋwayɩ lɛ, Yesu tasɩ-wɛ tuuu aduwa se: 2«Ɛsɔ Kewiyaɣ wɛ ɛzɩ eduuye ɖɩnɛ yɔ: wiyaʋ nɔɔyʋ labɩnɩ ɛ-pɩyalʋ halɩkpaɣyɛ kazandʋ. 3Pɩkɛdaa lɛ, etiyi ɛ-tʋmlaɖaa se powolo payaa mbá paaya-wɛ ti-ɖeɖe yɔ. Paya-wɛ lɛ, paba kizi se paawoki. 4Peeɖe wiyaʋ ɛnʋ ɛtasɩ kʋsʋʋ e-tiyiyaa lɛlaa se powolo peheyi-wɛ se ɛtɛm ɛ-naŋ sɔsɔŋ nɛ ɛ-kpɩna wena awɛ num yɔ kʋʋ nɛ ɛla tɔɔnaɣ nɛ ɛɖaŋnɩ-wɛ se powolo pɔtɔɔ halɩkpaɣyɛ kazandʋ! 5Ɛlɛ́, piteheyi mbá paaya-wɛ yɔ natʋyʋ nɛ pɛɖɛɛ pe-ɖeɖe pe-ɖeɖe: lɛlʋ ɛ-hayɩm taa nɛ lɛlʋ ɛ-tadɩyɛ ɖeɖe. 6Pɩsɛɣ mbá yɔ, paba ñakpa tʋmlaɖaa ḿbá nɛ paɖʋ-wɛ kʋñɔŋ nɛ pakʋ-wɛ. 7Wiyaʋ nɩ ḿbʋ́ lɛ, ɛ-pana kpa pɩŋŋ nɛ etiyi ɛ-sɔɔjanaa nɛ powolo pakʋ ɛ-tʋmlaɖaa kʋyaa ḿbá nɛ piyele pɔsɔ pɛ-tɛtʋ miŋ. 8«Pʋwayɩ lɛ, eheyi ɛ-tʋmlaɖaa mbá pɩsɛɣa yɔ se: ‹Halɩkpaɣyɛ tɔɔnaɣ pɩwa, ɛlɛ́, mbá paaya-wɛ yɔ, pataamʋna. 9Yee ḿbʋ́, iwolo habɛɛ yɔɔ nɛ ɩyaa mbá patɩŋa payɩ ɩkatɩɣ-wɛ yɔ se pɔkɔɔ pɔtɔɔ halɩkpaɣyɛ kazandʋ.› 10Pɛɖɛwa lɛ, pɔcɔɔ nʋmɔŋ tɩŋa taa payɩ nɛ pekpeɣli ɛyáa mbá patɩŋa panawa yɔ: kɩbama nɛ azaɣ́a nɛ powoni-wɛ nɛ posu kuduyuu ŋgʋ́ kɩ-taa pɔtɔkɩ kazandʋ ńdʋ́ yɔ pam.
11«Pɩkɛdaa lɛ, wiyaʋ ɛnʋ ɛsʋ pɔ-cɔlɔ se ɛna ɛzɩma mbʋ́ pacaɣ tɔɔnaɣ ɖɩtɔɔyɛ yɔ nɛ ɛmaɣnɩ abalʋ nɔɔyʋ peeɖe, etosuu halɩkpaɣyɛ kazandʋ toko. 12Ɛlɛ́, ɛpɔzɩ-ɩ se: ‹Taŋ! Ŋgʋ́ ŋtɩŋaa ŋsʋʋ cɩnɛ nɛ ŋtosuu halɩkpaɣyɛ kazandʋ toko?› Ɛlɛ́, abalʋ ɛnʋ esuma. 13Peeɖe eheyi ɛ-tʋmlaɖaa se: ‹Ɩhɔkɩ e-nesi nɛ ɛ-naŋgbanzɩ nɛ ɩlɔ-ɩ nɛ awayɩ cɩkpɛndʋʋ taa. Peeɖe ewiliɣ nɛ ɛsalɩ e-kela.› »
14Yesu tasɩ yɔɔdʋʋ ɖɔɖɔ se: «Paya ɛyáa sakɩyɛ, ɛlɛ́, pazɩ palɩzɩɣ pa-taa.»
Pʋwɛɛ se pɛhɛyɩ wiyaʋ sɔsɔ lambuu yaa we?
(Mrk 12.13-17; Luk 20.20-26)
15Pʋwayɩ lɛ, Farɩsɩ ŋgbɛyɛ taa ñɩma wolo pala kediɣzaɣ se pana ɛzɩma mbʋ́ paala nɛ pañɩ Yesu nɔɔ cɔlɔ tɔm nɛ pakpa-ɩ yɔ. 16Peeɖe petiyi pɔ-tɔmkpɛlɩkɩyaa taa lɛlaa nɛ Eroodi hɔɔlʋʋ taa ñɩma nabɛyɛ se powolo peheyi-i se: «Wɩlɩyʋ! Đɩnawa se ŋyɔɔdʋʋ toovenim nɛ ŋkpɛlɩkɩɣ ɛyáa mbʋ́ Ɛsɔ liu wɛɛ se pala yɔ pu-toovenim. Sɔɔndʋ ɛɛkpaɣ-ŋ nɛ nɔɔyʋ, mbʋ́ pʋyɔɔ yɔ, ŋtakpaɣ ɛyáa wɛtʋ nɛ ŋyaa pʋyʋ. 17Đɩcaɣ se ŋheyi-ɖʋ ña-lɩmaɣza nɛ ɖɩna se: ɖa-paɣtʋ haɣ waɖɛ se pɛhɛyɩ Room wiyaʋ sɔsɔ lambuu yaa pataahɛyɩ-ɩ?»
18Ɛlɛ́, Yesu ñɛtɛm sɩm pa-kañatʋ. Pʋ-yɔɔ ɛpɔzɩ-wɛ se: «Tɛɛ nɛ pʋ-yɔɔ ñɩma mɩ! Pɩlabɩ ɛzɩma ɩñɩkɩ-m tɔm? 19Ɩkɔnɩ-m lambuu liidiye nɛ mana.» Peeɖe powoni liidiye pɔɔyaɣ nɛ pawɩlɩ-ɩ. 20Ɛlɛ́, ɛpɔzɩ-wɛ se: «A-kɩlɛmʋʋ nɛ a-hɩɖɛ pɛwɛ kɔ-yɔɔ cɩnɛ?» 21Pocosi-i se: «Room wiyaʋ sɔsɔ.» Peeɖe Yesu heyi-wɛ se: «Yee ḿbʋ́, ɩcɛlɩ wiyaʋ sɔsɔ mbʋ́ pɩkɛ ɛ-ñɩm yɔ nɛ piyele ɩcɛlɩ Ɛsɔ mbʋ́ pɩkɛ ɛ́lɛ́ ñɩm yɔ.» 22Eheyi-wɛ ḿbʋ́ lɛ, pɩɖɩɣzɩ-wɛ yem nɛ peyebi-i nɛ pacaŋ pɛɖɛɛ.
Sɩɖaa kaɣ fem naa we?
(Mrk 12.18-27; Luk 20.27-40)
23Puwiye ńɖɩ́ ɖɔɖɔ Saduki ŋgbɛyɛ taa ñɩma woba Yesu cɔlɔ. Ḿbá tɔŋna se sɩɖaa eefeŋ. Powoba lɛ, peheyi-i se: 24«Wɩlɩyʋ! Đɔ-cɔzɔ Mooyiizi ɖʋ ɛ-paɣtʋ taa se: ‹Yee ɛyʋ ɛkpaɣ halʋ nɛ ɛsɩ, ɛfɛyɩnɩ pɩɣa yɔ, pʋwɛɛ se e-neu ɛhɔ lelu ɛnʋ nɛ ehiɣni-i pɩɣa ɛ-ɖalʋ ɛnʋ e-lone taa.› 25Tɔɔ! Abalʋ nɔɔyʋ nɛ e-newaa paawɛ ɖɛ-hɛkʋ taa, pɛwɛ lʋbɛ, ɛkpaɣ halʋ. Ɛlɛ́, ɛkɔɔ ɛsɩ, ɛfɛyɩnɩ pɩɣa. Peeɖe e-neu hɔm lelu ɛnʋ se ehiɣ pɩɣa e-lone taa. 26Pɩtalabɩdɩ pʋyʋ lɛ, ɛ́lɛ́ caŋ ɛsɩ ɖɔɖɔ. Ɛ́lɛ́ wayɩ lɛ, tozo tʋ ñɔhɔm-ɩ nɛ ɛ́lɛ́ sɩ ɖɔɖɔ. Pɩla ḿbʋ́ nɛ pɔkɔɔ pasɩ pa-lʋbɛ. 27Pʋwayɩ lɛ, halʋ ɛnʋ ɛsɩ ɖɔɖɔ. 28Lɛɛlɛɛyɔ, ɖɩpɔzʋʋ-ŋ se: sɩɖaa fem wiye lɛ, pa-lʋbɛ pa-taa weyi ɛtɩnɩ halʋ ɛnʋ? Ŋgʋ́, patɩŋa pakpaɣ-ɩ.»
29Peeɖe Yesu cosi-wɛ se: «Ɩcɛtɩɣ mɩ-tɩ yem, mbʋ́ pʋyɔɔ yɔ, ɩtanɩɩ Ɛsɔtɔm tɔbʋʋ, ɩtasɩ ɖɔɖɔ e-ɖoŋ. 30Alɩwaatʋ ndʋ́ sɩɖaa feŋ yɔ, abalaa ɛɛkpakɩɣ halaa, halaa ñaawalɩɣ ɖɔɖɔ. Ɛlɛ́, pɛwɛɣ ɛzɩ Ɛsɔ tiyiyaa wɛʋ ɛsɔdaa yɔ. 31Sɩɖaa fem tɔm yɔɔ lɛ, ɩtakalɩdɩ tɔm ndʋ́ Ɛsɔ yɔɔdɩnɩ-mɩ nɛ pama ɛ-Tɔm Takayaɣ taa yɔ yaa we? Ɛyɔɔdaa se: 32‹Ma lɛ Abraham nɛ Izaakɩ nɛ Yakɔɔbʋ pɛ-Ɛsɔ.› Pʋ-yɔɔ lɛ, Ɛsɔ tɛkɛ sɩɖaa Ɛsɔ, ɛlɛ́, wezuu tɩnaa ñɩnʋ ɛkɛnaa.»
33Ɛyáa samaɣ ŋgá kewelesaɣ Yesu tɔm yɔ, kanɩ ndʋ́ ɛyɔɔdaa yɔ lɛ, pɩɖɩɣzɩ-kɛ yem ɖɩɣ ɖɩɣ.
Ɛsɔ paɣtʋ tɩŋa taa lɛ, ndʋ́ tɩkɩlaa lee?
(Mrk 12.28-34; Luk 10.25-28)
34Pɩkɛdaa lɛ, Farɩsɩ ñɩma nɩɩ se Yesu yɔɔdaa nɛ Saduki ñɩma tapɩzɩ pocosi-i natʋyʋ, ɛlɛ́ pekpeɣli ɖama. 35Peeɖe pa-taa paɣtʋ wɩlɩyʋ nɔɔyʋ woba ɛñɩ Yesu nɔɔ cɔlɔ tɔm se ɛna. Ɛpɔzɩ-ɩ se: 36«Wɩlɩyʋ! Ɛsɔ paɣtʋ tɩŋa taa lɛ, ndʋ́ tɩkɩlaa?» 37Ɛ́lɛ́ cosi-i se: « ‹Sɔɔlɩ ña-Kɩpaɣlʋ Ɛsɔ nɛ ña-laŋɩyɛ tɩŋa nɛ ñe-liu tɩŋa nɛ ña-lɩmaɣza tɩŋa pilim ñe-wezuu caɣʋ taa.› 38Ńdʋ́ lɛ kajalaɣ paɣtʋ, ńdʋ́ kɩlɩnɩ lɛɛtʋ tɩŋa payɩ. 39Naalɛ ñɩndʋ ndʋ́ tɩwɛ wazaɣ ɖɔɖɔ ɛzɩ kajalaɣ ñɩndʋ yɔ, ńdʋ́ lɛ se: ‹Sɔɔlɩ ña-taabalʋ ɛzɩ ŋsɔɔlʋʋ ña-maɣmaɣ ña-tɩ yɔ.› 40Paɣtʋ tʋnɛ tɩ-naalɛ tɩkɛnɩ Mooyiizi paɣtʋ nɛ tɔm ndʋ́ náyaa susuu yɔ ti-kiɖe.»
Weyi Ɛsɔ Lɩzaa yɔ nɛ Daaviidi pɔ-tɔm
(Mrk 12.35-37; Luk 20.41-44)
41Farɩsɩ ñɩma kpeɣli ɖama lɛ, Yesu pɔzɩ-wɛ se: 42«Se we ɩmaɣzɩɣ Weyi Ɛsɔ Lɩzaa Yɔ ɛ-tɔm? A-liɖe taa palʋlʋʋ-ɩ?» Pocosi-i se: «Wiyaʋ Daaviidi liɖe taa.» 43Peeɖe ɛpɔzɩ-wɛ se: «Yee ḿbʋ́, pɩlabɩ ɛzɩma nɛ Fezuu Kiɖeɖeu tii Daaviidi yɔɔ nɛ ɛpɩzɩ ɛ́yáa-ɩ se: ‹Kɩpaɣlʋ?›
44Daaviidi tɔm se:
‹Kɩpaɣlʋ Ɛsɔ heyi man-Kɩpaɣlʋ se:
caɣ mɔn-cɔlɔ lone kɩbanɖɛ taa nɛ
pʋkɔɔ pɩsɩɩnɩ alɩwaatʋ ndʋ́ moluzi ño-koyindinaa ñɛ-tɛɛ kpem yɔ.›
45Yee Daaviidi ɛyaɣ Weyi Ɛsɔ Lɩzaa Yɔ se: ‹Kɩpaɣlʋ› lɛ, ɛzɩma ɛtasɩɣ kɛʋ Daaviidi ɛnʋ ɛ-sayɩ ɖɔɖɔ yɔ?»
46Ɛlɛ́, Farɩsɩ ñɩma taa nɔɔyʋ tapɩzɩ ecosi-i natʋyʋ. Pɩkpaɣʋnɩ alɩwaatʋ ńdʋ́ yɔ, nɔɔyʋ tatasɩ katʋʋ se ɛpɔzɩ-ɩ tɔm.
Currently Selected:
Maatiyee 22: KABI
Highlight
Share
Copy
Want to have your highlights saved across all your devices? Sign up or sign in
