Maatiyee 25

Pɛlaa hiu eduuye

1Yesu tasɩ ɛ-tɔmkpɛlɩkɩyaa heyuu se: «Alɩwaatʋ ńdʋ́ lɛ, ɛzʋnɔ Ɛsɔ Kewiyaɣ kɔŋ wɛʋ: pɛlaa nabɛyɛ wɛnɩ ḿbʋ́, pɛwɛ hiu. Halɩkpaɣyɛ naɖɩyɛ wiye lɛ, pakpaɣ kanɖʋnaa nɛ powolo paɖaŋ halɩkpaɣyʋ. 2Pa-taa lɛ, pɛlaa kagbaanzɩ kɛ kɩmɛlɛmɩŋ nɛ kagbaanzɩ ñɛkɛ lɔŋsɩnɖaa. 3Kɩmɛlɛmɩŋ ɩnʋ, ɩkpaɣ ɩ-kanɖʋnaa lɛ, ɩtɛcɛ kaɖɩsɩm se pɩtɛm ɩ-kanɖʋnaa taa lɛ, ɩɩɖʋ. 4Piyele lɔŋsɩnɖaa ñakpaɣ pa-kanɖʋnaa nɛ pɛkpɛndɩnɩ kaɖɩsɩm nɛ powolo. 5Ŋgʋ́, halɩkpaɣyʋ tɔkɔɔ lɔŋ nɛ pɛlaa ḿbá patɩŋa payɩ peliisi nɛ poɖoo.

6«Pʋkɔma ɛzɩ ɖoó hɛkʋ lɛ, panɩɩ kubuka nakɛyɛ se: ‹Ɩɩnaɣ pɛlɛ walʋ! Ɩkʋyɩ nɛ ɩkatɩ-ɩ!› 7Peeɖe pɛlaa ḿbá pakʋyɩ patɩŋa se pɔñɔɔzʋʋ pa-kanɖʋnaa 8nɛ kɩmɛlɛmɩŋ ɩnʋ, ɩpɔzʋʋ lɔŋsɩnɖaa se: ‹Ɩha-ɖʋ mɩ-kaɖɩsɩm pazɩ nɛ ɖɩɖʋ ɖa-kanɖʋnaa taa: pacaɣ ɖem.› 9Paba ñocosi-wɛ se: ‹Aayɩ! Đa-kaɖɩsɩm makɩnɩ-ɖʋ, pɩɩkazɩɣ se ɖɩha-mɩ. Iwolo pɛdɩyaa cɔlɔ nɛ ɩcɛ.› 10Pɛɖɛ cɛbʋ lɛ, pɛlɛ walʋ talɩ. Peeɖe ɛ nɛ mbá pɔñɔɔzɩ pa-tɩ nɛ paɖaŋ-ɩ yɔ, pasʋ halɩkpaɣyɛ kuduyuu tɛɛ nɛ paɖɩɣ pakaɖɩ. 11Pɩkɛdaa lɛ, kɩmɛlɛmɩŋ ɩnʋ ɩtalaa nɛ ɩmakɩ kubusi se: ‹Kɩpaɣlʋ! Kɩpaɣlʋ! Tʋlɩ-ɖʋ!› 12Peeɖe pɛlɛ walʋ cosi-wɛ se: ‹Toovenim lɛ, meheyiɣ-mɩ se mantasɩm-mɩ ɖoli.› »

13Ɛlɛ́, Yesu tasɩ-wɛ heyuu se: «Pʋ-yɔɔ lɛ, ɩcaɣnɩ mɩ-ɛsɛ nɛ ɩɖaŋ kpam, mbʋ́ pʋyɔɔ yɔ, ɩtatɩlɩ kɩyakʋ ŋgʋ́ yaa ñɩ́ɣ́yʋ́ʋ ŋgʋ́ kʋ-yɔɔ mɔnkɔŋ yɔ.»

Tʋmlaɖaa naadozo eduuye

(Luk 19.11-27)

14Yesu tasɩ ɛ-tɔmkpɛlɩkɩyaa heyuu se: «Ɛzʋnɔ Ɛsɔ Kewiyaɣ kɔŋ wɛʋ ɖɔɖɔ: abalʋ nɔɔyʋ wɛnɩ ḿbʋ́ nɛ ɛɖʋ se ewoki nʋmɔʋ. Ɛɖɛɣaɣ lɛ, ɛ́yáa ɛ-tʋmlaɖaa nɛ ɛtayɩ-wɛ ɛ-ñɩm. 15Ɛcɛlɩ kajalaɣ tʋ sika pɔɔyɩsɩ kapʋsɩ kagbaanzɩ nɛ naalɛ tʋ kapʋsɩ naalɛ nɛ tozo tʋ kʋɖʋmaɣ. Ɛcɛlɩ-wɛ ḿbʋ́ nɛ ɛmaɣzɩnɩ paa weyi e-ɖoŋ nɛ piyele ɛcaŋ ɛɖɛɛ. 16Ɛɖɛwa lɛ, tʋmlaɖʋ weyi ɛmʋ kapʋsɩ kagbaanzɩ yɔ, ɛtɩwobu nɛ ɛlabɩnɩ-sɩ tadɩyɛ nɛ pɩsɛɛ-ɩ kapʋsɩ kagbaanzɩ ɖɔɖɔ. 17Weyi ɛ́lɛ́ ñamʋ kapʋsɩ naalɛ yɔ, ɛ́lɛ́ la ɖɔɖɔ ḿbʋ́ nɛ pɩsɛɛ-ɩ kapʋsɩ naalɛ ɖɔɖɔ. 18Weyi ɛ́lɛ́ ñamʋ ɛ-caa sika pɔɔyɩsɩ kapʋwa kʋɖʋmaɣ yɔ, ewolo ehuyi pɔʋ nɛ epim-kɛ.

19«Pileɖaa lɛ, abalʋ ɛnʋ ɛpɩsɩ ɛkɔɔ nɛ ɛ́yáa ɛ-tʋmlaɖaa ḿbá se powolo peheyi-i mbʋ́ palabɩnɩ sika pɔɔyɩsɩ kapʋsɩ nzɩ́ ɛɛcɛlɩ-wɛ yɔ. 20Pʋ-yɔɔ tʋmlaɖʋ weyi ɛmʋ sika pɔɔyɩsɩ kapʋsɩ kagbaanzɩ yɔ, ewobi ɛ-caa ɛnʋ ɛ-cɔlɔ nɛ ɛwɩlɩ-ɩ kapʋsɩ kagbaanzɩ lɛɛsɩ nɛ eheyi-i se: ‹Kɩpaɣlʋ! Ŋŋcɛlɩ-m sika pɔɔyɩsɩ kapʋsɩ kagbaanzɩ. Na! Pɩsɛ-m kagbaanzɩ ɖɔɖɔ.› 21Peeɖe ɛ-caa yɩɣyɩ-ɩ nɛ eheyi-i se: ‹Pʋwɛ ɖeu. Ŋkɛ tʋmlaɖʋ kɩbanʋ. Mɛncɛlɩ-ŋ mbʋ́ pʋwɛɛ ñɩɩɩ yɔ nɛ ŋɖɔkɩ-pʋ camɩyɛ nɛ ŋlabɩnɩ-pʋ mbʋ́ pʋpɔzʋʋ yɔ. Pʋ-yɔɔ lɛ, meyekini-ŋ mbʋ́ pʋɖɔwa pɩtɩɩfɛyɩ yɔ. Kɔɔ nɛ ma nɛ ŋ ɖɩwɛɛ laŋhʋlʋmɩyɛ taa.› 22Weyi ɛ́lɛ́ ñaamʋ kapʋsɩ naalɛ yɔ, ewolo ɖɔɖɔ ɛ-cɔlɔ nɛ eheyi-i se: ‹Kɩpaɣlʋ! Ŋŋcɛlɩ-m sika pɔɔyɩsɩ kapʋsɩ naalɛ. Na! Pɩsɛ-m ɖɔɖɔ naalɛ.› 23Peeɖe ɛ-caa yɩɣyɩ-ɩ nɛ eheyi-i se: ‹Pʋwɛ ɖeu. Ŋkɛ tʋmlaɖʋ kɩbanʋ. Mɛncɛlɩ-ŋ mbʋ́ pʋwɛɛ ñɩɩɩ yɔ nɛ ŋɖɔkɩ-pʋ camɩyɛ nɛ ŋlabɩnɩ-pʋ mbʋ́ pʋpɔzʋʋ yɔ. Pʋ-yɔɔ lɛ, mɛncɛlɩɣ-ŋ mbʋ́ pʋɖɔwa yɔ. Kɔɔ nɛ ma nɛ ŋ ɖɩwɛɛ laŋhʋlʋmɩyɛ taa.› 24Pɩɖɩɣnɩ weyi ɛ́lɛ́ mʋ kʋɖʋmaɣ yɔ lɛ, ewolo ɛ-cɔlɔ nɛ eheyi-i se: ‹Kɩpaɣlʋ! Manawa se ñɔ-tɔm wɛ kaɖɛ pɩtɩɩfɛyɩ. Đenɖe ŋtoɖuu yaa ŋtamɩzɩ yɔ, peeɖe ŋkʋŋ. 25Pʋ-yɔɔ sɔɔndʋ kpa-m nɛ mowoni ñe-sika pɔɔyɩsɩ kapʋwa ŋgá ŋcɛlɩ-m yɔ nɛ mɛmɛsɩ tɛtɛɛ. Ŋ́gá yɔ, mʋ!› 26Peeɖe ɛ-caa cosi-i se: ‹Tʋmlaɖʋ ɛzaɣ́ʋ, fendu tʋ ña! Ŋsɩm ḿbʋ́ se ɖenɖe montoɖúú yaa mantamɩzɩ yɔ, peeɖe mankʋŋ nɛ ɖenɖe mantamɩzɩ yɔ, peeɖe monkuu. 27Yee ḿbʋ́, pɩɩwɛɛ se ŋwoni men-sika pɔɔyɩsɩ kapʋwa nɛ ŋɖʋ liidiye koozaɣ taa. Yee ŋŋlabɩ ḿbʋ́ yɔ, mɔnkɔm ɛzʋnɔ yɔ, maawobi mamʋ-kɛ nɛ kɛ-kɛzɛɣa.› 28Peeɖe eheyi tʋmlaɖaa lɛlaa se: ‹Ɩmʋ kapʋwa ŋ́gá lɔŋ e-nesi taa nɛ ɩsɔzɩ weyi ɛwɛnɩ kapʋsɩ hiu yɔ. 29Mbʋ́ pʋyɔɔ yɔ, weyi ɛwɛna pʋɖɔɔ yɔ, pɔsɔzʋʋ-ɩ nɛ puhuuni-i. Ɛlɛ́, weyi ɛ́lɛ́ fɛyɩnɩ pʋyʋ yɔ, halɩ pɛtɛzɩɣ lɛɣʋ mbʋ́ ɛmaɣzɩɣ se ɛwɛna yɔ. 30Piyele tʋmlaɖʋ wazaɣ fɛyɩ tʋ ɛnɛ lɛ, ɩkpaɣ-ɩ nɛ ɩlɔ-ɩ awayɩ cɩkpɛndʋʋ taa. Peeɖe ewiliɣ nɛ ɛsalɩ e-kela.› »

Ɛyʋ Pɩyalʋ kaɣ kɔm nɛ ɛhʋʋ ɛyáa tɔm ɛjaɖɛ yɔɔ

31Yesu tasɩ-wɛ heyuu se: «Puwiye nɖɩ́ Ɛyʋ Pɩyalʋ nɛ Ɛsɔ tiyiyaa tɩŋa pɛkpɛndɩɣnɩ e-koboyaɣ nɛ pɔkɔɔ yɔ, ɛcakɩ e-kewiyaɣ kpelaɣ yɔɔ. 32Pɔkɔŋ ajɛya kpeekpe taa ɛyáa kpeɣluu ɛ-ɛsɩndaa nɛ ɛkɛzɩ lɛlaa hɔɔlʋʋ nɛ piyele lɛlaa hɔɔlʋʋ lɛɛkʋ ɛzɩ ninɖiɣyu kpeɣluu heŋ nɛ pʋŋ nɖeke nɖeke yɔ. 33Ɛkɛzɩɣ lɛlaa ɛ-nɩwaŋ yɔɔ nɛ piyele lɛlaa ɛ-nɩmɩyɛ yɔɔ. 34Peeɖe eheyiɣ ɛ-nɩwaŋ yɔɔ ñɩma se: ‹Mbá mɩ man-Caa Ɛsɔ wazɩ mɩ-yɔɔ yɔ, ɩkɔɔ ɩtɔɔ Kewiyaɣ ŋgá ɛñɔɔzɩ-mɩ ɖooo alɩwaatʋ ndʋ́ ɛlabɩ kedeŋa yɔ. 35Mbʋ́ pʋyɔɔ yɔ, ñɔɔsɩ wɩɣaɣ-m nɛ ɩha-m tɔɔnaɣ mɔntɔɔ. Lɔkɔtʋ kɛɖɛ-m, ɩha-m lɩm mɔñɔɔ. Maakɛ ɛgɔm nɛ ɩmʋ-m mɩ-tɛ. 36Mɔnɖɔŋaɣ ndaakpeɖe nɛ ɩha-m wondu monsuu. Pɩwɩɣaɣ-m nɛ ɩcɔnɩ mɔ-yɔɔ. Maawɛ salaka taa nɛ ɩkɔɔ ɩna-m peeɖe.› 37Peeɖe mbá patʋʋzaa yɔ, pocosuu-i se: ‹Kɩpaɣlʋ! Đooye ɖɩna-ŋ ñɔɔsɩ wɩɣaɣ-ŋ nɛ ɖɩha-ŋ tɔɔnaɣ yaa ɖooye lɔkɔtʋ ɖɛ-ŋ nɛ ɖɩha-ŋ lɩm? 38Đooye ɖɩmʋ-ŋ ɛgɔndʋ ɖɛ-tɛ? Đooye ɖɩna-ŋ ndaakpeɖe nɛ ɖisu-ŋ wondu? 39Đooye ɖɩna pɩwɩɣaɣ-ŋ yaa ŋwɛ salaka taa nɛ ɖɩkɔɔ ɖɩna-ŋ?› 40Wiyaʋ kaɣ-wɛ cosuu se: ‹Toovenim lɛ, mankaɖɩɣ-mɩ se: alɩwaatʋ ndʋ́ ɩlabɩ-pʋ mɛ-ɛyáa mbá patakpaɣ-wɛ payaa pʋyʋ yɔ pa-taa nɔɔyʋ yɔ, man-tɩ tɩŋa ɩlaba.›

41«Ɛkaɣ heyuu ɖɔɖɔ ɛ-nɩmɩyɛ yɔɔ ñɩma se: ‹Ɩkʋyɩ mɔn-cɔlɔ cɩnɛ nɛ ɩɖɛɛ poliŋ, Ɛsɔ wɩlɩ-mɩ kpalʋʋ! Iwolo miŋ weyi eeɖeŋ kaʋ yɔ ɛ-taa. Peeɖe Ɛsɔ ñɔɔzaa nɛ ɛɖaŋnɩ Satanɩ nɛ e-tiyiyaa! 42Mbʋ́ pʋyɔɔ yɔ, ñɔɔsɩ wɩɣaɣ-m, ɩtaha-m tɔɔnaɣ se mɔntɔɔ. Lɔkɔtʋ ɖɛ-m, ɩtaha-m lɩm se mɔñɔɔ. 43Mɔnkɔm ɛgɔndʋ, ɩtamʋ-m mɩ-tɛ. Maawɛ ndaakpeɖe, ɩtaha-m wondu se monsuu, pɩwɩɣaɣ-m, ɩtɔcɔnɩ mɔ-yɔɔ. Maawɛ salaka taa, ɩtɔkɔɔ se ɩna-m.› 44Ɛlɛ́, pakaɣ-ɩ cosuu se: ‹Kɩpaɣlʋ! Đooye ɖɩna-ŋ ñɔɔsɩ wɩɣaɣ-ŋ yaa lɔkɔtʋ ɖɛ-ŋ yaa ŋkɔm ɛgɔndʋ yaa ŋɖɔŋaɣ ndaakpeɖe yaa pɩwɩɣaɣ-ŋ yaa ŋwɛ salaka taa nɛ ɖɩtasɩnɩ-ŋ?› 45Wiyaʋ kaɣ-wɛ cosuu se: ‹Toovenim lɛ, mankaɖɩɣ-mɩ se: yee ɩtalabɩ-pʋ mɛ-ɛyáa mbá patakpaɣ-wɛ payaa pʋyʋ yɔ, pa-taa nɔɔyʋ yɔ, ma ɖɔɖɔ ɩtalabɩ-pʋ.› 46Powokini-wɛ ɖenɖe kʋñɔŋ maatɛŋ wɛɛ yɔ nɛ piyele mbá patʋʋzaa yɔ, paba ñowolo ɖenɖe wezuu maatɛŋ wɛɛ yɔ.»

Currently Selected:

Maatiyee 25: KABI

Highlight

Copy