Maatiyee 21
21
Yesu talɩ Yeruusalɛm tɛtʋ taa
(Mrk 11.1-11; Luk 19.28-40; Yoh 12.12-19)
1Yesu nɛ ɛyáa mbá patɩŋaɣ-ɩ yɔ, pɔñɔtɩnɩ Yeruusalɛm Bɛtfaajee hɔɔlʋʋ taa Somiŋ Pʋʋ liu tɛɛ lɛ, etiyi ɛ-tɔmkpɛlɩkɩyaa naalɛ se: 2«Iwolo tɛtʋ cikpetu ndʋ́ tɩwɛ ɛsɩndaa yɔ tɩ-taa. Ɩtalɩɣ lɛ, ɩmakɩnɩ paɖɩ kpaŋaɣ nakɛyɛ nɛ ke-piye. Ɩyɛɖɩ-wɛ nɛ ɩkɔna. 3Yee nɔɔyʋ ɛpɔzɩ-mɩ natʋyʋ lɛ, iheyi-i se: ‹Kɩpaɣlʋ liu wɛ-wɛ.› Pʋbʋ, pʋdʋ yeki-mɩ nɛ ɩɖɛɛ.»
4Pʋnɛ pɩlabɩ se tɔm ndʋ́ náyʋ yɔɔdaa yɔ, tɩla. Ńdʋ́ lɛ se:
5«Iheyi Siiyɔɔ ñɩma se:
ɩcɔnɩ ɩna, mi-wiyaʋ sɔsɔ kɔŋ!
Ɛwɛ hɛɛɛ.
Ɛcaɣ kpaŋaɣ
nɛ ke-piye,
kpaŋaɣ ŋgá kasɩɣlɩ sʋʋtʋ sakɩyɛ yɔ ke-piye.»
6Peeɖe ɛ-tɔmkpɛlɩkɩyaa ḿbá pɛɖɛwa nɛ pala ɛzɩ eheyuu-wɛ yɔ. 7Pɔkɔnɩ kpaŋaɣ nɛ ke-piye lɛ, pɔhɔzɩ po-wondu lɛɛtʋ nɛ pɔpɔ pɔ-yɔɔ nɛ Yesu kpa ɛcaɣ. 8Peeɖe samaɣ taa ɛyáa sakɩyɛ hɔzɩ po-wondu lɛɛtʋ nɛ pɔpɔ nʋmɔʋ taa. Lɛlaa sɛtɩ hatʋ nɛ pɔpɔ ɖɔɖɔ se paɖʋ-ɩ hɩɖɛ. 9Mbá paawɛ Yesu ɛsɩndaa nɛ mbá patɩŋaɣ ɛ-wayɩ yɔ, pokou se: «Ozaana! Wiyaʋ Daaviidi Sayɩ! Ɛsɔ ɛ́wazɩ weyi ɛkɔŋ Kɩpaɣlʋ lone taa yɔ ɛ-yɔɔ. Ozaana! Đooo ɛsɔdaa!»
10Yesu talɩ Yeruusalɛm lɛ, piseɣti ɛyáa tɩŋa nɛ pɔpɔzʋʋ se: «Anɩ yɔ ɛnɛ?» 11Ɛyáa samaɣ ŋgá katɩŋaɣ-ɩ yɔ, kocosi-wɛ se: «Ɛnʋ lɛ náyʋ Yesu, ɛ-tɛ Nazarɛɛtɩ Galilee egeetiye taa.»
Yesu sʋ Ɛsɔ ɖɩɣa taa
(Mrk 11.15-19; Luk 19.45-48; Yoh 2.13-22)
12Yesu talɩ ḿbʋ́ lɛ, ɛsʋʋ Ɛsɔ ɖɩɣa kadaɣ taa nɛ ɛɖɔɔnɩ pɛdɩyaa nɛ yaɖaa patɩŋa payɩ. Etuzi liidiye yɔkɩyaa taabɩlɩnaa nɛ halikukunaa pɛdɩyaa kpelisi nɛ ɛpɛɖɩ. 13Ɛlɛ́, eheyi mbá pɛwɛ peeɖe yɔ se: «Ɛsɔ yɔɔdaa nɛ pama ɛ-Tɔm Takayaɣ taa se: ‹Man-ɖɩɣa kɛɣnɩ Ɛsɔ ɖɩsɛyɛ.› Ŋgʋ́, mɩ mɩpɩsɩ-kɛ mɩ́láa ñɩŋga.»
14Ɛwɛ peeɖe ḿbʋ́ lɛ, yʋlʋmaa nɛ kalɩkalasɩ powolo ɛ-cɔlɔ nɛ ɛla nɛ pɔ-yɔɔ cɛ. 15Cɔjɔnaa sɔsaa nɛ paɣtʋ wɩlɩyaa paawɛ peeɖe ɖɔɖɔ. Pana hama lakasɩ nzɩ́ Yesu lakaɣ yɔ nɛ panɩɩ piya kou se: «Ozaana! Wiyaʋ Daaviidi Sayɩ» lɛ, pɩwɩzɩ-wɛ. 16Peeɖe pɔpɔzɩ-ɩ se: «Ŋnɩɣ ndʋ́ piya ńzɩ́ sɩyɔɔdʋʋ yɔ?» Ecosi-wɛ se: «Ɛɛɛ! Yee ḿbʋ́, ɩtakalɩdɩ tɔm ndʋ́ pama Ɛsɔtɔm Takayaɣ taa yɔ kaʋ yaa we? Ńdʋ́ lɛ se: ‹Ña Ɛsɔ, halɩ ŋyeba nɛ piya sɔsɔsɩ nɛ cikpesi pasam-ŋ.› »
17Pʋwayɩ lɛ, Yesu yebi-wɛ peeɖe nɛ ewolo Betaanii nɛ ɛsʋʋ.
Hiyuú ŋgʋ́ kɩɩlʋlʋʋ yɔ kʋ-tɔm
(Mrk 11.12-14,20-24)
18Tɛʋ fema lɛ, Yesu kʋyɩ se ɛpɩsɩɣ Yeruusalɛm nɛ ñɔɔsɩ kpa-ɩ. 19Peeɖe elosi hiyuú nakʋyʋ nɛ ewolo kʋ-cɔlɔ, ɛlɛ́, ɛmaɣnɩ hatʋ ɖeke kʋ-yɔɔ kpemm. Pʋ-yɔɔ ɛtɔm se: «Ña! Ŋtasɩ lʋlʋʋ lɛ, maana!» Kpaagbaa ḿbʋ́ lɛ, hiyuú ŋ́gʋ́ kɩwɩlɩ. 20Ɛ-tɔmkpɛlɩkɩyaa na ḿbʋ́ lɛ, pɩɖɩɣzɩ-wɛ nɛ pɔpɔzɩ-ɩ se: «Ɛzɩma hiyuú ŋ́gʋ́ kɩwɩlɩ kpaagbaa ḿbʋ́?» 21Peeɖe ecosi-wɛ se: «Toovenim lɛ, mankaɖɩɣ-mɩ se yee ɩwɛnɩ lidaʋ Ɛsɔ yɔɔ nɛ ɩɩpʋtʋʋ yɔ, ɩpɩzɩɣ ɩla mbʋ́ malabɩ hiyuú ŋ́gʋ́ yɔ. Ɛlɛ́, pɩɩsɩɣnɩ pi-ɖeke, halɩ ɩpɩzaɣ se iheyi pʋʋ kʋnɛ se: ‹Kpɛzɩ peeɖe nɛ ŋwolo ŋtɔlɩ teŋgu taa› nɛ pɩla ḿbʋ́ ɖɔɖɔ. 22Yee ɩwɛnɩ lidaʋ Ɛsɔ yɔɔ yɔ, ɛhaɣ-mɩ mbʋ́ pɩtɩŋa payɩ ɩpɔzʋʋ-ɩ mɩ-Ɛsɔ sɛʋ taa yɔ.»
Aha Yesu waɖɛ se ɛla mbʋ́ ɛlakɩ yɔ?
(Mrk 11.27-33; Luk 20.1-8)
23Pʋwayɩ lɛ, Yesu pɩsɩ Ɛsɔ ɖɩɣa kadaɣ taa nɛ ɛwɩlɩɣ ɛyáa Ɛsɔtɔm. Peeɖe Yuda ñɩma sɔsaa nɛ pɔ-cɔjɔnaa sɔsaa powobi ɛ-cɔlɔ nɛ pɔpɔzɩ-ɩ se: «Aha-ŋ nɔɔ se ŋɖɔɔnɩ ɛyáa? Aha-ŋ waɖɛ se ŋla ḿbʋ́?» 24Yesu heyi-wɛ se: «Ma mɔnpɔzʋʋ-mɩ tɔm kʋɖʋmtʋ koŋ, yee icosi-m lɛ, meheyi-mɩ weyi ɛha-m nɔɔ se mala ḿbʋ́ yɔ. 25Mɔnpɔzʋʋ-mɩ se: atiyi Yohanɛɛsɩ se ɛla ɛyáa lɩm sɔʋ sɔnzɩ? Ɛsɔ yaa ɛyáa tiyini-i?» Ɛlɛ́, pɔyɔɔdɩnɩ ɖama se: «Yee ɖicosaa se: ‹Ɛsɔ tiyini-i› yɔ, ɛpɔzʋʋ-ɖʋ se: ‹Nɛ pɩla ɛzɩma ɖɩtamʋ ɛ-tɔm yɔ?› 26Ŋgʋ́, sɔɔndʋ kpaɣ-ɖʋ se ɖɩtɔ se: ‹Ɛyáa tiyini-i,› mbʋ́ pʋyɔɔ yɔ, ɛyáa tɩŋa maɣzɩɣ se Yohanɛɛsɩ kɛ náyʋ.» 27Ɛlɛ́, pocosi-i se: «Đɩɩsɩŋ.» Peeɖe ɛ́lɛ́ pɩsɩnɩ-wɛ se: «Yee ḿbʋ́ ma ɖɔɖɔ maaheyiɣ-mɩ weyi ɛha-m nɔɔ ŋ́gá yɔ.»
Abalɩbiya naalɛ eduuye
28Yesu tasɩ-wɛ pɔzʋʋ se: «Se we ɩmaɣzɩɣ eduuye ɖɩnɛ ɖɩ-tɔm? Ńɖɩ́ lɛ se: abalʋ nɔɔyʋ wɛnɩ ḿbʋ́, ɛwɛnɩ abalɩbiya naalɛ. Nakʋyʋ wiye lɛ, eheyi sɩ-taa sɔsɔɔ se: ‹Man-pɩyalʋ! Sɔnɔ wolo ŋla tʋmɩyɛ man-tɩŋ weyi popuu i-pee sʋlʋm yɔ ɩ-hayɩm taa.› 29Ɛlɛ́, kocosi-i se: ‹Maawoki.› Pɩkɛdaa lɛ, kɛlɛɣzɩ lɩmaɣza nɛ kakʋyɩ kɛɖɛɛ pɩ-taa. 30Abalʋ ɛnʋ, eheyi lɛɛka ɖɔɖɔ ḿbʋ́. Kaka cosi-i se: ‹Caa, mowoki.› Ɛlɛ́, kotowolo.» 31Peeɖe Yesu pɔzɩ-wɛ se: «Sɩ-naalɛ sɩ-taa lɛ, ŋgá kalabɩ mbʋ́ ka-caa liu wɛɛ yɔ?» Pocosi-i se: «Kajalaɣ ñɩŋga.»
Ɛlɛ́, eheyi-wɛ se: «Toovenim lɛ, mankaɖɩɣ-mɩ se tikee mʋyaa nɛ halaa mbá pɛpɛdɩɣ pa-tɩ yɔ, pɛlɛyɩɣ-mɩ sʋʋ Ɛsɔ Kewiyaɣ taa. 32Mbʋ́ pʋyɔɔ yɔ, Lɩm Sɔʋ Sɔnzɩ Laɖʋ Yohanɛɛsɩ kɔm mɩ-cɔlɔ nɛ ɛwɩlɩ-mɩ mbʋ́ pʋtʋʋzaa yɔ pʋ-nʋmɔʋ nɛ ikizi. Ɛlɛ́, tikee mʋyaa nɛ halaa mbá pɛpɛdɩɣ pa-tɩ yɔ, paba ñetisi ɛ-tɔm. Halɩ ɩna ḿbʋ́, ɛlɛ́ ɩtɛlɛɣzɩ wɛtʋ se itisi ɛ-tɔm.»
Tɩŋ weyi popuu i-pee sʋlʋm yɔ, ɩ-hayɩm taa tʋmlaɖaa kañadɩnaa nabɛyɛ tɔm
(Mrk 12.1-12; Luk 20.9-19)
33Yesu tasɩ yɔɔdʋʋ se: «Iwelesi eduuye lɛɛɖɛ: ñɩm tʋ nɔɔyʋ wɛnɩ ḿbʋ́ nɛ ɛsɔ tɩŋ weyi popuu i-pee sʋlʋm yɔ. Pʋwayɩ lɛ, ɛma koloŋa nɛ ɛcɔzɩ nɛ ɛla ɖenɖe ɛɛñazɩɣ a-lɩm yɔ. Ɛma ɖɔɖɔ tilimiye nɖɩ́ ɖɩ-yɔɔ pasɩŋɩɣ nɛ pefeŋiɣ yɔ. Ɛtɛma lɛ, ɛkpaɣ ɛyáa se pɔcɔŋnɩ tɩŋ ɩnʋ ɩ-yɔɔ nɛ ɛɖɛɛ nʋmɔʋ. 34Pɩkɛdaa lɛ, pɩtalɩ tɩŋ ɩnʋ i-pee koyuu. Peeɖe ɛkʋsɩ e-tiyiyaa nabɛyɛ se powolo ɛ-tʋmlaɖaa ḿbá pɔ-cɔlɔ nɛ pamʋ e-ɖeɖe nɛ powona. 35Patalaa lɛ, tʋmlaɖaa ḿbá pakpa-wɛ nɛ pama lɛlʋ nɛ pakʋ lɛlʋ nɛ payaɣ lɛlʋ pɛɛ nɛ ɛsɩ. 36Hayɩm tʋ ɛnʋ ɛnɩ ḿbʋ́ lɛ, ɛtasɩ kʋsʋʋ tiyiyaa lɛlaa nɛ pakɩlɩ mbá eetiyaa yɔ ɖɔʋ nɛ etiyi-wɛ. Patalaa lɛ, tʋmlaɖaa ḿbá pakpa-wɛ nɛ palabɩ-wɛ ɖɔɖɔ ɛzɩ paalabʋ kajalaɣ ñɩma yɔ. 37Ɛɛnaɣ se ɛla ɛzɩma lɛ, ɛtɛzɩ tiyuu ɛ-pɩyalʋ pɔ-cɔlɔ nɛ ɛhʋʋ ɛ-taa se: ‹Paa pɩɩla ɛzɩma, pañaŋ-ɩ.› 38Tʋmlaɖaa ḿbá pana-ɩ ḿbʋ́ lɛ, pɔyɔɔdɩnɩ ɖama se: ‹Ɩnaɣ weyi ɛkɔŋ yɔ, ɛnʋ kaɣnɩ tɩɣyʋʋ ɛ-caa ñɩm. Ɛkɔma lɛ, ɖɩkʋ-ɩ nɛ ɖɩtɩɣyɩ-pʋ!› 39Ɛtalaa lɛ, pakpa-ɩ nɛ palɩzɩ-ɩ nɛ hayɩm ḿbʋ́ pʋ-wayɩ nɛ pakʋ-ɩ.» 40Yesu tɛm tuuu eduuye ńɖɩ́ lɛ, ɛpɔzɩ-wɛ se: «Tɔɔ! Hayɩm tʋ ɛnʋ ɛkɔŋ lɛ, ɛbɛ ɛlakɩ tʋmlaɖaa ḿbá?» 41Pocosi-i se: «Ɛkɔŋ ɛkʋ azaɣ́a ḿbá, pɩɩlakɩ-ɩ pʋtɔdɩyɛ kaʋ nɛ piyele ɛcaa ɛyáa kɩfama se pɔcɔnɩ-ɩ ɛ-tɩŋ yɔɔ camɩyɛ nɛ pokoyuu i-pee nɛ powokini-i alɩwaatʋ ndʋ́ pʋpɔzʋʋ yɔ.»
42Peeɖe ɛpɔzɩ-wɛ se: «Ɩtakalɩ tɔm ndʋ́ pama Ɛsɔtɔm Takayaɣ taa yɔ kaʋ yaa we? Ńdʋ́ lɛ se:
‹Pɩyɛ nɖɩ́ kuduyiŋ mayaa kpaɣaɣ pɔlɔ yɔ,
ńɖɩ́ pɩsɩnɩ ɖɩkɩlɩ wazaɣ atɩŋa payɩ lɛɛlɛɛyɔ.
Kɩpaɣlʋ labɩna ḿbʋ́.
Asaaa! Pʋwɛ ɖeu kpem!›
43-44[Yee pɩcɩbɩ nɔɔyʋ nɛ ɛtɔlɩ pɩyɛ ńɖɩ́ ɖɩ-yɔɔ yɔ, ɛmɩzɩɣ kpɛdɛɛɛ. Yee pɩcɩbɩ nɔɔyʋ nɛ ɖɩtɔlɩ ɛ-yɔɔ yɔ, ɖɩnaŋɩɣ-ɩ naŋa naŋa.]» Pʋ-yɔɔ meheyiɣ-mɩ se: mbá mɩ pɩɩwɛɛ se ɩkɛ Ɛsɔ Kewiyaɣ taa ñɩma yɔ, ɩɩtasɩɣ kɛʋ. Ɛlɛ́, mbá palakɩ mbʋ́ Ɛsɔ liu wɛɛ yɔ, ḿbá kɛɣnɩnɩ ka-taa ñɩma.
45Cɔjɔnaa sɔsaa nɛ Farɩsɩ ñɩma panɩ Yesu aduwa ana ḿbʋ́ lɛ, pana se ḿbá etuuni-yɛ. 46Peeɖe pañɩnaɣ nʋmɔŋ tɩŋa se pakpa-ɩ. Ɛlɛ́, peseɣaɣ ɛyáa samaɣ, mbʋ́ pʋyɔɔ yɔ, kamaɣzaɣ se ɛkɛ náyʋ.
Currently Selected:
Maatiyee 21: KABI
Highlight
Share
Copy
Want to have your highlights saved across all your devices? Sign up or sign in
