Maatiyee 20

Tɩŋ weyi popuu i-pee sʋlʋm yɔ, ɩ-hayɩm taa tʋmlaɖaa tɔm

1Yesu heyi-wɛ ɖɔɖɔ se: «Pʋ-yɔɔ lɛ, ɩɩnaɣ mbʋ́ Ɛsɔ Kewiyaɣ nɩɣzɩnaa yɔ: ñɩm tʋ nɔɔyʋ lɩnɩ tanaŋ nakʋyʋ cu nɛ ɛmʋ tʋmlaɖaa nabɛyɛ se palabɩ-ɩ tʋmɩyɛ ɛ-tɩŋ weyi popuu i-pee sʋlʋm yɔ ɩ-hayɩm taa. 2Peeɖe ɛ nɛ wɛ panɩnɩ ɖama se ɛhɛyɩɣ-wɛ liidiye pɔɔyaɣ evemiye taa nɛ ewoni-wɛ pɩ-taa. 3Pʋkɔma ɛzɩ ñɩɣtʋ nakʋ yɔ lɛ, ɛlɩɩ samaɣ ɖikpeɣliye nɛ ɛtasɩ nabɛyɛ naʋ, paba sɩŋ yem, paalakɩ pʋyʋ. 4Ɛlɛ́, eheyi-wɛ se: ‹Mɩ ɖɔɖɔ iwolo ɩla tʋmɩyɛ ma-hayɩm taa nɛ mɛhɛyɩ-mɩ mbʋ́ pʋmʋnaa yɔ.› 5Peeɖe ɛ nɛ wɛ patɩŋ kajalaɣ ñɩma wayɩ. Ɛlɛ́, ɛtasɩ lɩʋ wɩsɩ siɣu taa nɛ ɖanaɣ ñɩɣtʋ naadozo yɔɔ nɛ ɛmaɣnɩ lɛlaa ɖɔɖɔ nɛ eheyi-wɛ ḿbʋ́. 6Pʋkɔma ɛzɩ ɖanaɣ ñɩɣtʋ kagbaanzɩ yɔ lɛ, ɛtasɩ lɩʋ peeɖe nɛ ɛmaɣnɩ nabɛyɛ sɩŋ ɖɔɖɔ yem. Ɛpɔzɩ-wɛ se: ‹Pɩlabɩ ɛzɩma nɛ ɩsɩŋ cɩnɛ kɩyakʋ nɛ kɩ-tɛɛ pilim nɛ ɩɩlakɩ pʋyʋ?› 7Peeɖe paba cosi-i se: ‹Nɔɔyʋ takpaɣ-ɖʋ se ɖɩlabɩ-ɩ tʋmɩyɛ.› Ɛlɛ́, eheyi-wɛ se: ‹Yee ḿbʋ́ ɩtɩŋ lɛlaa wayɩ ma-hayɩm taa.›

8«Wɩsɩ tɛma lɛ, ñɩm tʋ ɛnʋ eheyi weyi ɛcɔŋnɩ tʋmlaɖaa yɔɔ yɔ se: ‹Yaa-wɛ nɛ ŋhɛyɩ-wɛ pe-liidiye. Ɛlɛ́, pazɩnɩ wayɩ wayɩ ñɩma nɛ pɩɖɩɣnɩ kajalaɣ ñɩma.› 9Mbá powobi hayɩm taa ɖanaɣ ñɩɣtʋ kagbaanzɩ yɔɔ yɔ, ɛhɛyɩ paa pa-taa weyi liidiye pɔɔyaɣ. 10Pɩtalɩnɩ kajalaɣ ñɩma lɛ, ɛhɛyɩ-wɛ ɖɔɖɔ pɔɔyaɣ pɔɔyaɣ. Ŋgʋ́, pamaɣzaɣ se pɛhɛyɩɣ-wɛ nɛ pɩkɩlɩ mbá potowolo lɔŋ yɔ. 11Peeɖe papazɩ pɩɣyɩnaʋ ñɩm tʋ ɛnʋ 12nɛ pɔpɔzɩ-ɩ se: ‹Pɩlabɩ ɛzɩma nɛ ŋhɛyɩ ɖa nɛ mbá palabɩ tʋmɩyɛ ñɩ́ɣ́yʋ́ʋ kʋɖʋmʋʋ ɖeke yɔ liidiye ɖeyi ɖeyi? Ŋgʋ́, ɖɛwɛnɩ tʋmɩyɛ taa ɖooo tanaŋ tɛɛ nɛ ɖɩla tʋmɩyɛ siŋŋ nɛ wɩsɩ ñaɣ-ɖʋ!› 13Ɛlɛ́, ecosi pa-taa lɛlʋ se: ‹Taŋ! Montomuli-ŋ. Ma nɛ ŋ ɖɩtanɩɩnɩ ɖama se mɛhɛyɩɣ-ŋ liidiye pɔɔyaɣ evemiye taa yaa we? 14Pʋ-yɔɔ lɛ, mʋ ñe-ɖeɖe hɛɛɛ nɛ ŋɖɛɛ. Manɖʋna se mɛhɛyɩɣ ña nɛ wayɩ wayɩ tʋ ɖeyi ɖeyi. 15Mɛnfɛyɩnɩ waɖɛ se malabɩnɩ me-liidiye mbʋ́ me-liu wɛɛ yɔ yaa we? Yaa man-camɩyɛ lakasɩ yɔɔ ŋlakɩ ɛsɩsɛmɩyɛ ḿbʋ́?› » 16Peeɖe Yesu tasɩ yɔɔdʋʋ se: «Ḿbʋ́ wayɩ ñɩma kɔŋ pɩsʋʋ kajalaɣ ñɩma nɛ kajalaɣ ñɩma ñapɩsɩ wayɩ ñɩma.»

Yesu yɔɔdɩ tozo ñɩm ɛ-sɩm nɛ e-fem pɔ-tɔm

(Mrk 10.32-34; Luk 18.31-34)

17Nakʋyʋ wiye Yesu nɛ ɛ-tɔmkpɛlɩkɩyaa pakpaɣaɣ Yeruusalɛm. Pɩkɛdaa lɛ, ɛkɛsɩ ɛ-tɔmkpɛlɩkɩyaa hiu nɛ naalɛ nɛ eheyi-wɛ se: 18«Ɩna, ɖɩkpaʋ Yeruusalɛm yɔ, pakpaɣ Ɛyʋ Pɩyalʋ nɛ paɖʋzɩ cɔjɔnaa sɔsaa nɛ paɣtʋ wɩlɩyaa pe-nesi taa. Pɔkɔŋ-ɩ hʋnaʋ nɛ pakʋ ɛ-tɔm nɛ paɖʋ se pakʋ-ɩ. 19Paɖʋzʋʋ-ɩ mbá paañaŋ Ɛsɔ yɔ pe-nesi taa nɛ paba woŋ-i nɛ polu-i agbazɛɛ nɛ pakam-ɩ kaamaŋkaɣ yɔɔ nɛ ɛsɩ. Kɩyakʋ naadozo ñɩŋgʋ wiye lɛ, Ɛsɔ fezi-i.»

Mbʋ́ Yakubu nɛ Yohanɛɛsɩ po-ɖoo pɔzɩ Yesu yɔ

(Mrk 10.35-45)

20Yesu tɛm ɛ-tɔmkpɛlɩkɩyaa heyuu ḿbʋ́ lɛ, Zebedee halʋ kpaɣ ɛ-pɩyalaa Yakubu nɛ Yohanɛɛsɩ nɛ powolo ɛ-cɔlɔ nɛ eluŋ ɛ-tɛɛ nɛ ewini-i. 21Peeɖe ɛ́lɛ́ pɔzɩ-ɩ se: «Ɛbɛ ŋcaɣ se malabɩ-ŋ?» Ecosi-i se: «Mancaɣ se ŋkɔm ŋcaɣ ñe-kewiyaɣ kpelaɣ yɔɔ lɛ, ŋyele nɛ man-pɩyalaa panɛ pacaɣ ñɔ-cɔlɔ: lɛlʋ ña-nɩwaŋ yɔɔ nɛ lɛlʋ ña-nɩmɩyɛ yɔɔ.» 22Ɛlɛ́, Yesu heyi-wɛ se: «Ɩɩsɩŋ mbʋ́ ɩsʋlʋmʋʋ yɔ. Ɩpɩzɩɣ ɩtɔɔ kʋñɔŋ sɔsɔʋ ŋgʋ́ mɔnkɔŋ tɔɔʋ yɔ?» Peeɖe Yakubu nɛ Yohanɛɛsɩ pocosi-i se: «Ɛɛɛ! Đɩpɩzɩɣ ɖɩtɔɔ-kʋ.» 23Yesu pɩsɩnɩ-wɛ se: «Toovenim ɩkɔŋ tɔɔʋ kʋñɔŋ ŋgʋ́ mɔntɔkɩ yɔ. Ɛlɛ́, ma-nɩwaŋ yɔɔ nɛ ma-nɩmɩyɛ yɔɔ caɣʋ ñɩndʋ lɛ, pɩtɛkɛ mahaɣnɩ nʋmɔʋ. Mbá man-Caa liu wɛɛ se pacaɣ lona ana a-taa yɔ, ḿbá cakɩna.» 24Tɔmkpɛlɩkɩyaa hiu mbá pɩkazaa yɔ, panɩ ḿbʋ́ lɛ, pa-taa wɩɩnɩ pa-naalɛ. 25Peeɖe Yesu ya patɩŋa nɛ eheyi-wɛ se: «Ɩtɛm sɩm se mbá pɛkɛ awiya sɔsɔna yɔ, ponuutuu pa-ajɛya taa ñɩma nɛ sɔsaa ñawɩlɩɣ-wɛ ɖɔɖɔ po-ɖoŋ. 26Mɩ lɛ, wɛtʋ ńdʋ́ tɩtaawɛɛ mɩ-hɛkʋ taa. Yee mɩ-taa nɔɔyʋ ɛcaɣ se ɛkɛ sɔsɔ yɔ, pʋdʋ ɛpɩsɩ mɩ-tʋmlaɖʋ. 27Yee nɔɔyʋ ɛcaɣ se ɛkɛ mɩ-ñʋʋdʋ yɔ, pʋdʋ ɛpɩsɩ mɩtɩŋa mi-yom. 28Halɩ Ɛyʋ Pɩyalʋ tɔkɔɔ se ɛyáa ɛlabɩ-ɩ tʋmɩyɛ. Ɛlɛ́, ɛkɔma se ɛlabɩ-wɛ tʋmɩyɛ nɛ ɛkpaɣ ɛ-maɣmaɣ ɛ-tɩ ɛhɛyɩ pɔ-yɔɔ nɛ puholi pa-taa sakɩyɛ.»

Yesu laba nɛ yʋlʋmaa naalɛ ɛsɛ kuli

(Mrk 10.46-52; Luk 18.35-43)

29Pʋwayɩ lɛ, Yesu nɛ ɛ-tɔmkpɛlɩkɩyaa patalɩ Yeriikoo tɛtʋ taa. Palɩ tɩ-taa se pɛɖɛɣ lɛ, ɛyáa samaɣ sɔsɔɔ nakɛyɛ tɩŋɩɣ-wɛ. 30Yʋlʋmaa naalɛ nabɛyɛ kacaɣ peeɖe nʋmɔʋ nɔɔ. Panɩ Yesu taŋ lɛ, pama kubusi se: «Kɩpaɣlʋ, wiyaʋ Daaviidi sayɩ! Na ɖa-pʋtɔdɩyɛ.» 31Peeɖe ɛyáa samaɣ ñazɩ-wɛ se: «Isu peeɖe!» Ɛlɛ́, pɛtɛzɩ kubusi mabʋ ɖoŋ se: «Kɩpaɣlʋ, wiyaʋ Daaviidi Sayɩ! Na ɖa-pʋtɔdɩyɛ.» 32Ɛlɛ́, Yesu sɩŋ nɛ ɛ́yáa-wɛ nɛ ɛpɔzɩ-wɛ se: «Ɛbɛ ɩcaɣ se malabɩ-mɩ?» 33Pocosi-i se: «Kɩpaɣlʋ! Đɩcaɣ se ŋla nɛ ɖɛ-ɛsɛ kuli.» 34Peeɖe Yesu na pa-pʋtɔdɩyɛ nɛ etukuni pɛ-ɛsɛ nɛ patɩpazɩ naʋ nɛ pa-naalɛ patɩŋɩɣ ɛ-wayɩ.

Currently Selected:

Maatiyee 20: KABI

Highlight

Copy