Maatiyee 19
19
Pɩfɛyɩ se abalʋ ekizi ɛ-halʋ
(Mrk 10.1-12)
1Yesu tɛm yɔɔdʋʋ lɛ, ɛkʋyɩ Galilee egeetiye taa nɛ ewolo Yudee hɔɔlʋʋ ŋgʋ́ kʋwɛ Yɔɔrdaŋ pɔɔ wayɩ yɔ kɩ-taa. 2Ɛyáa samaɣ tɩŋ-ɩ peeɖe nɛ ɛla nɛ pa-taa kʋdɔndɩnaa yɔɔ cɛ.
3Peeɖe Farɩsɩ ñɩma nabɛyɛ woba pañɩ ɛ-nɔɔ cɔlɔ tɔm. Pɔpɔzɩ-ɩ se: «Đa-paɣtʋ taa lɛ, pɩha nʋmɔʋ se ɛyʋ pɩzɩɣ ɛɖɔɔnɩ ɛ-halʋ paa mbʋ́ pʋ-yɔɔ yaa we?» 4Ɛlɛ́, Yesu pɔzɩ-wɛ se: «Ɩtakalɩ tɔm ndʋ́ pama Ɛsɔtɔm Takayaɣ taa yɔ yaa we? Ńdʋ́ lɛ se: ‹Alɩwaatʋ ndʋ́ Ɛsɔ lakaɣ kedeŋa yɔ ɛlabɩ abalʋ nɛ halʋ 5nɛ ɛtɔ se: pʋ-yɔɔ abalʋ yeki ɛ-caa nɛ e-ɖoo nɛ ɛnɩɩnɩ ɛ-halʋ nɛ pa-naalɛ papɩsɩ ɛyʋ kʋɖʋm.› 6Pʋ-yɔɔ lɛ, patatasɩ kɛʋ ɛyáa naalɛ. Ɛlɛ́, papɩsɩ ɛyʋ kʋɖʋm. Yee ḿbʋ́, pɩtamʋna se ɛyʋ ɛyasɩ mbʋ́ Ɛsɔ kpɛndaa yɔ.»
7Peeɖe Farɩsɩ ñɩma ḿbá pɔpɔzɩ-ɩ se: «Yee pɩkɛ ḿbʋ́ lɛ, pɩlabɩ ɛzɩma nɛ Mooyiizi ñaɖʋ se abalʋ ɛcɛlɩ ɛ-halʋ kizuu takayaɣ nɛ pʋcɔ ɛɖɔɔnɩ-ɩ yɔ?» 8Yesu cosi-wɛ se: «Mɩ-laŋa kpɩzɩŋ yɔɔ Mooyiizi ha-mɩ nʋmɔʋ se ɩɖɔɔnɩ mɩ-halaa. Piyele pɩtaawɛɛ ḿbʋ́ ɖooo kiɖe tɛɛ. 9Mankaɖɩɣ-mɩ se: yee nɔɔyʋ halʋ ɛtala acɛyɛ nɛ ɛɖɔɔnɩ-ɩ nɛ ewolo ɛkpaɣ lɛlʋ yɔ, ɛlabɩ acɛyɛ.»
10Peeɖe ɛ-tɔmkpɛlɩkɩyaa heyi-i se: «Yee ḿbʋ́ pʋwɛɛ yɔ, pɩkɩlɩ wee wee se abalʋ ɛtaacazɩ kpaɣʋ halʋ.» 11Ecosi-wɛ se: «Pɩtɛkɛ ɛyáa tɩŋa pɩzɩɣna petisi tɔm tʋnɛ. Ɛlɛ́, mbá Ɛsɔ yeba se petisi yɔ, pe-ɖeke petisiɣni-tʋ. 12Nabɛyɛ wɛɛ, paapɩzɩɣ se palʋlɩ piya: pa-taa lɛ, palʋlɩ nabɛyɛ ḿbʋ́. Lɛlaa lɛ, ɛyáa yebina nɛ papɩsɩ kaalʋlɩsɩ, pɩsɛɣ lɛlaa lɛ, Ɛsɔ Kewiyaɣ yɔɔ patakpaɣ halaa. Weyi etisiɣ tɔm ńdʋ́ lɛ, etisi.»
Yesu mʋ́ʋ piya cikpesi ɛ-cɔlɔ
(Mrk 10.13-16; Luk 18.15-17)
13Pʋwayɩ lɛ, ɛyáa wokini piya Yesu cɔlɔ se ɛtɩnɩ sɩ-yɔɔ nesi nɛ ɛsɛɛ Ɛsɔ sɩ-yɔɔ. Peeɖe ɛ-tɔmkpɛlɩkɩyaa ɖaŋ-wɛ. 14Ɛlɛ́, eheyi-wɛ se: «Iyele piya nɛ sɩkɔɔ mɔn-cɔlɔ, ɩtaaɖaŋ-sɩ. Mbʋ́ pʋyɔɔ yɔ, mbá pɛwɛ ɛzɩ piya ńzɩ́ yɔ, ḿbá lɛ Ɛsɔ Kewiyaɣ taa ñɩma.» 15Peeɖe Yesu tɩnɩ e-nesi piya ńzɩ́ sɩ-yɔɔ. Pʋwayɩ lɛ, ɛkʋyɩ peeɖe nɛ ɛɖɛɛ.
Evebu ñɩm tʋ nɔɔyʋ tɔm
(Mrk 10.17-31; Luk 18.18-30)
16Pɩkɛdaa lɛ, evebu nɔɔyʋ wolo Yesu cɔlɔ nɛ ɛpɔzɩ-ɩ se: «Wɩlɩyʋ! Pʋyʋ kɩbanʋ weyi pʋwɛɛ se mala nɛ mehiɣ wezuu maatɛŋ?» 17Peeɖe ɛpɔzɩ-ɩ se: «Pɩlabɩ ɛzɩma nɛ ŋpɔzʋʋ-m pʋyʋ kɩbanʋ tɔm? Ɛsɔ ɖeke kɛnɩ kɩbanʋ. Yee ŋcaɣ se ŋsʋʋ ɛsɔdaa koboyaɣ taa yɔ, pʋwɛɛ se ŋɖɔ paɣtʋ ndɩ ndɩ ndʋ́ Ɛsɔ ɖʋwa yɔ tɩ-yɔɔ.» 18Evebu ɛnʋ ɛpɔzɩ-ɩ se: «Tʋtʋ lɛ ndʋ́?» Yesu cosi-i se: «Taakʋ ɛyʋ, taala acɛyɛ, taamɩlɩ, taacɛtɩnɩ lɛlʋ taa, 19ña ña-caa nɛ ño-ɖoo nɛ ŋsɔɔlɩ ña-taabalʋ ɛzɩ ŋsɔɔlʋʋ ña-maɣmaɣ ña-tɩ yɔ.» 20Peeɖe evebu ɛnʋ eheyi-i se: «Mɔnɖɔm paɣtʋ ńdʋ́ tɩtɩŋa payɩ tɩ-yɔɔ. Ɛbɛ pʋwɛɛ se mantasɩ labʋ yɔ?» 21Ɛlɛ́, Yesu heyi-i se: «Yee ŋcaɣ se ŋtɛzɩ labʋ mbʋ́ Ɛsɔ liu wɛɛ yɔ yɔ, wolo ŋpɛdɩ mbʋ́ pɩtɩŋa payɩ ŋwɛna yɔ nɛ ŋtayɩ kʋñɔndɩnaa pi-liidiye nɛ ŋwɛnɩ ñɩm ɛsɔdaa. Yee ŋlabɩ ḿbʋ́ lɛ, ŋkɔɔ ŋtɩŋ-m.» 22Evebu ɛnʋ ɛnɩ ḿbʋ́ lɛ, ɛ-laŋɩyɛ wɛɛkɩ, mbʋ́ pʋyɔɔ yɔ, ɛwɛnɩ ñɩm pɩtɩɩfɛyɩ.
23Peeɖe Yesu heyi ɛ-tɔmkpɛlɩkɩyaa se: «Toovenim lɛ, mankaɖɩɣ-mɩ se: pʋwɛ kaɖɛ kpem se ñɩm tʋ ɛsʋʋ Ɛsɔ Kewiyaɣ taa. 24Pʋcɔ ñɩm tʋ nɔɔyʋ sʋʋ ka-taa lɛ, pʋwɛ kaɖɛ nɛ pɩkɩlɩ ɛzɩ kpaŋnɔ siɣá naalɛ tʋ sʋʋnɩ ɛjɔʋ pɔʋ taa yɔ.» 25Panɩ ḿbʋ́ lɛ, pɩɖɩɣzɩ-wɛ pɩŋŋ nɛ pɔtɔŋ se: «Yee ḿbʋ́ apɩzɩɣ ehiɣ ñʋʋ yabʋ yɔ?» 26Peeɖe ɛcɔnɩ-wɛ pɩŋŋ nɛ eheyi-wɛ se: «Ɛyáa ɩɩpɩzɩɣna, ɛlɛ́, Ɛsɔ ñapɩzɩɣ ɛla pɩtɩŋa payɩ.»
27Ɛlɛ́, Pɩyɛ heyi-i se: «Cɔnɩ ŋna ɖiyebi mbʋ́ pɩtɩŋa payɩ ɖɩwɛna yɔ nɛ ɖɩtɩŋ ña-wayɩ. Ɛbɛ pɩlɩɣ-ɖʋ pɩ-taa?» 28Peeɖe ecosi-wɛ se: «Toovenim lɛ, mankaɖɩɣ-mɩ se alɩwaatʋ ndʋ́ Ɛyʋ Pɩyalʋ ma mɔnkɔŋ mancaɣ men-kewiyaɣ kpelaɣ yɔɔ koboyaɣ taa yɔ, mbá mɩ ɩtɩŋaɣ ma-wayɩ yɔ, ɩkɔŋ caɣʋ awiya kpelisi hiu nɛ naalɛ yɔɔ nɛ ɩhʋʋnɩ Izrɛɛlɩ ñɩma cejewee hiu nɛ naalɛ. 29Mbá peyebi pa-ɖɩsɩ yaa pa-ɖalaa yaa pɔ-kɔɔnaa yaa pa-caanaa yaa po-ɖoonaa yaa pe-piya yaa pa-hayɩm mɔ-yɔɔ yɔ, pɔkɔŋ wɛnaʋ mbʋ́ mbʋ́ paawɛna yɔ tam mɩnʋʋ nɛ pɛtɛ pehiɣ wezuu maatɛŋ. 30«Ɛlɛ́, ɛyáa mbá pɛkɛ sɔsaa lɛɛlɛɛyɔ yɔ, pa-taa sakɩyɛ kɔŋ pɩsʋʋ cikpema nɛ mbá paba kɛ cikpema lɛɛlɛɛyɔ yɔ, pa-taa sakɩyɛ ñapɩsɩ sɔsaa.»
Currently Selected:
Maatiyee 19: KABI
Highlight
Share
Copy
Want to have your highlights saved across all your devices? Sign up or sign in
