Maatiyee 18
18
Akɩlɩ wazaɣ Ɛsɔ kewiyaɣ ɖɩɣa taa?
(Mrk 9.33-37; Luk 9.46-48)
1Alɩwaatʋ ńdʋ́ʋ́ Yesu tɔmkpɛlɩkɩyaa woba ɛ-cɔlɔ nɛ pɔpɔzɩ-ɩ se: «Anɩ lɛ weyi ɛkɛ sɔsɔ Ɛsɔ Kewiyaɣ taa yɔ?» 2Peeɖe Yesu ya pɩɣa cikpelaɣ nakɛyɛ nɛ ɛsɩɩ-kɛ pɛ-hɛkʋ taa 3nɛ ɛtɔ se: «Toovenim lɛ, meheyiɣ-mɩ se: yee ɩtɛlɛɣzɩ nɛ ɩwɛɛ ɛzɩ piya cikpesi yɔ yɔ, ɩɩsʋʋ Ɛsɔ Kewiyaɣ taa kaʋ. 4Weyi etisiɣ ɛ-tɩ nɛ ɛwɛɛ ɛzɩ pɩɣa kanɛ yɔ, ɛnʋ kɩlɩnɩ Ɛsɔ kewiyaɣ taa. 5Yee nɔɔyʋ ɛmʋ pɩɣa nakɛyɛ ɛzɩ kanɛ yɔ mɔ-yɔɔ yɔ, man-tɩ tɩŋa pʋdʋ mʋwa.»
Ɖɩɖɔkɩ ɖa-tɩ nɛ ɖɩtaala kɩwɛɛkɩm
(Mrk 9.42-48; Luk 17.1-2)
6Yesu tasɩ ɛ-tɔmkpɛlɩkɩyaa heyuu se: «Yee nɔɔyʋ eyeba nɛ mbá pɛwɛnɩ lidaʋ mɔ-yɔɔ nɛ patakpaɣ-wɛ payaa pʋyʋ yɔ pa-taa nɔɔyʋ la kɩwɛɛkɩm yɔ, pɩkɩlɩ wee wee se pɛlɛɛ e-liu tɛɛ pɩyɛ sɔsɔɖɛ nɛ powoni-i pɛpɛɖɩ teŋgu taa nɛ pitisi-i lɩm tɛɛ. 7Pʋtɔɔ ɛyáa tɩŋa payɩ! Mbʋ́ pʋyɔɔ yɔ, mbʋ́ piyeki se ɛyáa ɛla kɩwɛɛkɩm yɔ, pʋwɛɣ kedeŋa yɔɔ tam. Ɛlɛ́, pʋtɔɔ weyi pɩtɩŋɩɣnɩ ɛ-yɔɔ yɔ kpem!
8«Yee ñe-nesi yaa ña-naŋgbaŋaɣ eyekini se ŋla kɩwɛɛkɩm yɔ, sɛtɩ nɛ ŋlɔ poliŋ. Pɩkɩlɩ ɖeu se ŋwɛnɩ nesi kʋɖʋmsɩ yaa naŋgbaŋaɣ kʋɖʋmaɣ nɛ ŋhiɣ wezuu ɛzɩ ŋŋwɛnɩ ñe-nesi naalɛ yaa ña-naŋgbanzɩ naalɛ nɛ Ɛsɔ pɛɖɩ-ŋ miŋ weyi eeɖeŋ kaʋ yɔ ɛ-taa yɔ. 9Yee ñɛ-ɛsɩyɛ eyekini se ŋla kɩwɛɛkɩm yɔ, hɔɔzɩ-ɖɩ nɛ ŋlɔ poliŋ. Pɩkɩlɩ ɖeu se ŋwɛnɩ ɛsɩyɛ kʋɖʋmɖɩyɛ nɛ ŋhiɣ wezuu ɛzɩ ŋŋwɛnɩ ɛsɛ naalɛ nɛ Ɛsɔ pɛɖɩ-ŋ kʋñɔŋ maatɛŋ taa ɖenɖe miŋ eeɖeŋ kaʋ yɔ.»
Heu kilebu eduuye
(Luk 15.3-7)
10Yesu tasɩ ɛ-tɔmkpɛlɩkɩyaa paɣ́ʋ se: «Ɩɖɔkɩ mɩ-tɩ nɛ ɩtaapɛŋ mbá pɛwɛnɩ lidaʋ mɔ-yɔɔ nɛ patakpaɣ-wɛ payaa pʋyʋ yɔ pa-taa nɔɔyʋ tɛtɛ. Toovenim lɛ, mankaɖɩɣ-mɩ se: man-Caa weyi ɛwɛ ɛsɔdaa yɔ, e-tiyiyaa mbá pɔcɔŋnɩ pɔ-yɔɔ yɔ, pɛwɛ ɛ-cɔlɔ tam. [ 11Meheyiɣ-mɩ se: Ɛyʋ Pɩyalʋ kɔm se ɛya mbá peleba yɔ pa-ñʋʋ.]
12«Ɩmaɣzɩɣ se yee nɔɔyʋ ɛwɛnɩ heŋ mɩnʋʋ nɛ ɩ-taa kʋɖʋm le, ɛlakɩ ɛzɩma? Eeyeki kʋɖʋm fɛyɩ mɩnʋʋ weyi ɩkazaa yɔ pʋʋ yɔɔ nɛ ɛɖɛɛ weyi eleba yɔ ɛ-ñɩnʋʋ naa we? 13Toovenim lɛ, meheyiɣ-mɩ se: yee ɛna-ɩ yɔ, ɛ-taa hʋlʋmʋʋnɩ-ɩ nɛ pɩkɩlɩ kʋɖʋm fɛyɩ mɩnʋʋ weyi ɩkazaa yɔ. 14Ḿbʋ́ ɖɔɖɔ mɩ-Caa Ɛsɔ weyi ɛwɛ ɛsɔdaa yɔ, ɛɛcaɣ se mbá pɛwɛnɩ lidaʋ ɛ-yɔɔ nɛ patakpaɣ-wɛ payaa pʋyʋ yɔ, pa-taa nɔɔyʋ ele.»
Mbʋ́ pʋwɛɛ se pala taabalʋ weyi ɛlakɩ kɩwɛɛkɩm yɔ
15Yesu tasɩ-wɛ heyuu se: «Yee ña-taabalʋ nɔɔyʋ ɛyʋsaa#18.15 Ɛyʋsaa: takayɩsɩ lɛɛsɩ taa lɛ, pɛɖɛzɩɣ-tʋ se: ɛyʋsɩnɩ-ŋ. yɔ, wolo ɛ-cɔlɔ nɛ ña nɛ ɩ ɩcaɣ mi-ɖeke nɛ ŋheyi-i mbʋ́ ɛyʋsaa yɔ. Yee etisaa yɔ, pʋbʋ ña nɛ ɩ ɩɖaɣnɩ pɩsʋʋ kʋɖʋm. 16Yee etetisi lɛ, ŋwolo ŋyaa ɛyʋ nɔɔyʋ yaa ɛyáa naalɛ nabɛyɛ nɛ ña nɛ wɛ iwolo nɛ panɩɩ ndʋ́ ɛyɔɔdʋʋ yɔ. Yee ŋlabɩ ḿbʋ́ yɔ, pɩlakɩ ɛzɩ paɖʋʋ paɣtʋ taa se: ‹Yee ña nɛ nɔɔyʋ ɛwɛ tɔm yɔ, pʋwɛɛ se ɛyáa naalɛ yaa naadozo ɛnɩɩ-tʋ nɛ pɛkɛ aseɣɖe tɩnaa› yɔ. 17Yee etetisi ɖɔɖɔ lɛ, ŋwolo ŋheyi ŋgbɛyɛ taa ñɩma nɛ pɔpɔzɩ-ɩ. Yee ɛtanɩɩnɩ paba lɛ, pʋbʋ, ŋkpaɣ-ɩ ɛzɩ weyi ɛɛñaŋ Ɛsɔ yɔ yaa kɩwɛɛkɩm laɖʋ nɔɔyʋ yɔ.
18«Toovenim lɛ, meheyiɣ-mɩ se: mbʋ́ ikiziɣ se pataala tataa cɩnɛ yɔ, Ɛsɔ kiziɣ se pataalabɩ-pʋ ɖɔɖɔ, nɛ mbʋ́ itisiɣ se pala tataa cɩnɛ yɔ, etisiɣ se palabɩ-pʋ ɖɔɖɔ.
19«Meheyiɣ-mɩ ɖɔɖɔ se: yee mɩ-taa ɛyáa naalɛ ɛnɩnɩ ɖama tataa cɩnɛ nɛ pasʋlʋmɩ man-Caa weyi ɛwɛ ɛsɔdaa yɔ paa ɛbɛ yɔ, ɛhaɣ-wɛ-pʋ. 20Mbʋ́ pʋyɔɔ yɔ, ɖenɖe ɛyáa naalɛ yaa naadozo kpeɣliɣ ma-hɩɖɛ yɔɔ se pɛsɛɣ Ɛsɔ yɔ, mɛwɛɣ pɔ-cɔlɔ.»
Tʋmlaɖʋ weyi eekpeɣiɣ lɛlaa yɔ
21Pʋwayɩ lɛ, Pɩyɛ wolo Yesu cɔlɔ nɛ ɛpɔzɩ-ɩ se: «Kɩpaɣlʋ! Tam ɛzɩma pʋwɛɛ se menkpeɣ man-taabalʋ alɩwaatʋ ndʋ́ ɛwɛɛ ɛyʋsʋʋnɩ-m yɔ? Pɩsɩɩnɩ tam lʋbɛ yaa we?» 22Peeɖe ecosi-i se: «Aayɩ! Maapɩzɩɣ meheyiɣ-ŋ se pɩsɩɩnɩ tam lʋbɛ, ɛlɛ́, wɛɛ-ɩ kpeɣu yɔɔ#18.22 Wɛɛ-ɩ kpeɣu yɔɔ: ye pɛɖɛɣzɩ-tʋ piye piye yɔ, pɛɖɛɣzɩɣ-tʋ se: tɔm nɩɩnʋwa nɛ nɩɩlɛ tɔm lʋbɛ taa.. 23Pʋ-yɔɔ lɛ, ɩna mbʋ́ Ɛsɔ Kewiyaɣ nɩɣzɩnaa yɔ: wiyaʋ sɔsɔ nɔɔyʋ kekpeɣlini ɛ-tʋmlaɖaa se pɛhɛyɩ-ɩ ɛ-kɩma.
24«Ɛkalaɣ e-liidiye lɛ, pakpa lɛlʋ nɛ powoni ɛ-cɔlɔ. Ɛ́lɛ́ tɔɔ-ɩ kɩmɩyɛ liidiye kutokiŋ ɛgbaŋ ɛgbaŋ. 25Ɛɛnaɣ se ɛla ɛzɩma nɛ ɛhɛyɩ-ɖɩ lɛ, ɛ-caa weyi ɛlakɩ-ɩ tʋmɩyɛ yɔ, ɛha nɔɔ se pokuu ɛ nɛ ɛ-halʋ nɛ e-piya nɛ mbʋ́ pɩtɩŋa payɩ ɛwɛna yɔ nɛ pɛpɛdɩ-wɛ ɛzɩ yomaa yɔ nɛ papɩzɩ pɛhɛyɩ kɩmɩyɛ ńɖɩ́. 26Ɛlɛ́, tʋmlaɖʋ ɛnʋ eluŋ ɛ-caa ɛsɩndaa nɛ etendi-i se: ‹Hayɩ man-caa! Na man-pʋtɔdɩyɛ nɛ ŋyebi-m. Mehiɣa lɛ, maahɛyɩ-ŋ!› 27Peeɖe pɩlabɩ ɛ-caa ɛnʋ pʋtɔdɩyɛ nɛ ekpeɣ-i ɛ-kɩmɩyɛ ńɖɩ́ nɛ eheyi-i se ɛɖɛɛ.
28«Tʋmlaɖʋ ɛnʋ ɛlɩ nʋmɔʋ taa lɛ, esuluni ɛ-taabalʋ tʋmlaɖʋ lɛlʋ. Ɛ́lɛ́ kɛwɛnɩ-ɩ kɩmɩyɛ liidiye pazɩ yem. Ɛlɛ́, ɛta e-liu tɛɛ nɛ eheyi-i se: ‹Hɛyɩ-m man-kɩmɩyɛ lɔŋ!› 29Peeɖe taabalʋ ɛnʋ eluŋ ɛ-tɛɛ nɛ etendi-i se: ‹Hayɩ man-caa! Na man-pʋtɔdɩyɛ nɛ ŋyebi-m. Mehiɣa lɛ, maahɛyɩ-ŋ!› 30Ɛlɛ́, ekizi e-tenduu ḿbʋ́ nɛ ɛkpa-ɩ nɛ ewona ɛɖʋ-ɩ salaka se ɛwɛɛ peeɖe nɛ pʋkɔɔ pɩsɩɩnɩ kɩyakʋ ŋgʋ́ ɛhɛyɩ ɛ-kɩmɩyɛ ńɖɩ́ yɔ.
31«Tʋmlaɖaa lɛlaa nɩ mbʋ́ pa-taabalʋ laba yɔ lɛ, pɔ-hɔ pɩsɩ pɩŋŋ nɛ powolo pɛkɛdɩ pa-caa pɩtɩŋa payɩ. 32Peeɖe ɛ́lɛ́ tiyaa se payaa-ɩ. Ewoba lɛ, eheyi-i se: ‹Tʋmlaɖʋ kañadʋ ña! Mankpaɣ ña-kɩmɩyɛ sɔsɔɖɛ nɛ menkpeɣ-ŋ, mbʋ́ pʋyɔɔ yɔ, ŋtendi-m se menkpeɣ-ŋ. 33Pɩtaamʋna se ŋna ña-taabalʋ pʋtɔdɩyɛ ɖɔɖɔ ɛzɩ manaʋ ña-ñɩnɖɛ yɔ yaa we?› 34Peeɖe pa-caa ɛnʋ, ɛ-pana kpa pɩŋŋ nɛ eyele nɛ pakpa-ɩ paɖʋzɩ salaka nɔnɔɔ ɖaŋɩyaa nesi taa se panazɩ-ɩ nɛ pʋkɔɔ pɩsɩɩnɩ kɩyakʋ ŋgʋ́ ɛhɛyɩ ɛ-kɩmɩyɛ tɩŋa payɩ ɖɔɖɔ yɔ.»
35Yesu tasɩ-wɛ heyuu se: «Ḿbʋ́ ɖɔɖɔ pʋwɛɛ. Yee mɩ-taa nɔɔyʋ etekpeɣ ɛ-taabalʋ nɛ ɛ-laŋɩyɛ tɩŋa yɔ, ḿbʋ́ man-Caa weyi ɛwɛ ɛsɔdaa yɔ, ɛkɔŋ-ɩ labʋ.»
Currently Selected:
Maatiyee 18: KABI
Highlight
Share
Copy
Want to have your highlights saved across all your devices? Sign up or sign in
