Maatiyee 17
17
Pɩyɛ, Yakubu nɛ Yohanɛɛsɩ pana Yesu Ɛsɔ kobooyaɣ taa
(Mrk 9.2-13; Luk 9.28-36)
1Kɩyakɩŋ loɖo ɖɛwa lɛ, Yesu yaa Pɩyɛ nɛ Yakubu nɛ e-neu Yohanɛɛsɩ nɛ ɛkpanɩ-wɛ pʋʋ sɔsɔʋ nakʋyʋ yɔɔ pe-ɖeke. 2Peeɖe ɛlɛɣzɩ pɛ-ɛsɩndaa nɛ ɛ-ɛsɩndaa ñɩlɩsɩɣ ɛzɩ wɩsɩ yɔ nɛ e-wondu hʋlʋmɩ layɩ layɩ ɛzɩ fenaɣ yɔ. 3Alɩwaatʋ ńdʋ́ʋ́ Mooyiizi nɛ Elii palɩ pɔ-yɔɔ nɛ pa nɛ Yesu pɔyɔɔdʋʋ. 4Peeɖe Pɩyɛ heyi Yesu se: «Kɩpaɣlʋ! Đɩwɛʋ cɩnɛ yɔ, pʋwɛ ɖeu pɩŋŋ. Yee ŋtisiɣ yɔ, mensiɣ kɩɖanɖɩŋ naadozo cɩnɛ: ña lɛɛkʋ, Mooyiizi lɛɛkʋ nɛ Elii lɛɛkʋ.»
5Ɛyɔɔdaɣ ḿbʋ́ lɛ, ɛsɔmɩnʋʋ kɩñɩlɩsʋʋ nakʋyʋ kɔɔ kuhuuzi pɔ-yɔɔ nɛ panɩɣ pʋyɔɔdʋʋnɩ-wɛ nɛ kɩ-tɛɛ se: «Ɛnɛ lɛ man-Pɩyalʋ kʋsɔɔlʋ, maahʋʋ ɛ-yɔɔ kaʋ. Ɩnɩɩnɩ-ɩ!»
6Tɔmkpɛlɩkɩyaa nɩ nɔɔ ŋ́gá lɛ, sɔɔndʋ kpa-wɛ pɩŋŋ nɛ pɔtɔlɩ tataa nɛ papa pɛ-ɛsɛ nɛ tɛtʋ. 7Peeɖe ewobi pɔ-cɔlɔ nɛ ɛma pɔ-yɔɔ se: «Ɩkʋyɩ, sɔɔndʋ ɛtaakpa-mɩ!» 8Pakʋsɩ pɛ-ɛsɛ lɛ, panaɣ Yesu ɖeke.
9Pakʋyɩ pʋʋ yɔɔ nɛ petiki lɛ, ɛpaɣ-wɛ se: «Ɩtaaheyi nɔɔyʋ mbʋ́ ɩnawa yɔ nɛ pʋkɔɔ pɩsɩɩnɩ alɩwaatʋ ndʋ́ Ɛyʋ Pɩyalʋ fema nɛ ɛlɩɩnɩ sɩɖaa taa yɔ.»
10Pʋwayɩ lɛ, pɔpɔzɩ-ɩ se: «Pɩlabɩ ɛzɩma paɣtʋ wɩlɩyaa tɔŋ se pʋwɛɛ se náyʋ Elii ɛlɛyɩ Weyi Ɛsɔ Lɩzaa Yɔ kɔm?» 11Yesu cosi-wɛ se: «Toovenim lɛ, pʋwɛɛ se Elii ɛlɛyɩnɩ kɔm nɛ ɛɖaɣnɩ pɩtɩŋa payɩ. 12Ɛlɛ́, mankaɖɩɣ-mɩ se: Elii tɛm kɔm, ɛlɛ́, ɛyáa tasɩm-ɩ, palabɩ-ɩ mbʋ́ pɔsɔɔlaa yɔ. Ḿbʋ́ ɖɔɖɔ pɔkɔŋ ɖʋʋ Ɛyʋ Pɩyalʋ maɣmaɣ kʋñɔŋ.»
13Peeɖe ɛ-tɔmkpɛlɩkɩyaa ɖiɣzinaa se Lɩm Sɔʋ Sɔnzɩ Laɖʋ Yohanɛɛsɩ tɔm eheyaɣ-wɛ.
Yesu wazɩ pɩɣa ŋgá eleeu nɔɔyʋ wɛ ka-wayɩ yɔ
(Mrk 9.14-29; Luk 9.37-43a)
14Yesu nɛ ɛ-tɔmkpɛlɩkɩyaa petibini pʋʋ yɔɔ lɛ, pamaɣnɩ ɛyáa samaɣ. Peeɖe abalʋ nɔɔyʋ woba ɛ-cɔlɔ nɛ eluŋ ɛ-tɛɛ 15nɛ etendi-i se: «Kɩpaɣlʋ! Na man-pɩyalʋ pʋtɔdɩyɛ. Abom kpa-ɩ nɛ pɩcɛyɩɣ-ɩ alɩwaatʋ tɩŋa. Ɛɛlaɣzɩɣ tɔlʋʋ lɩm nɛ miŋ pa-taa. 16Mowoni-i ñɔ-tɔmkpɛlɩkɩyaa cɔlɔ nɛ patapɩzɩ pala nɛ ɛ-yɔɔ cɛ.» 17Peeɖe Yesu pɩsɩnɩ-wɛ se: «Ɛyáa azaɣ́a lidaʋ fɛyɩ tɩnaa mɩ! Alɩwaatʋ ɛzɩma mantasɩɣ mɩ-cɔlɔ caɣʋ nɛ pʋwɛɛ se mɔnɖɔkɩ mɔ-hɔyɛ ɖɔɖɔ? Ɩkɔnɩ-m pɩɣa ŋ́gá cɩnɛ!»
18Powoni-kɛ lɛ, ɛna se eleeu nɔɔyʋ wɛ ka-wayɩ. Peeɖe eholini ɛ́lɛ́ nɛ ese ka-wayɩ nɛ kɔ-yɔɔ tɩcɛbʋ.
19Pɩkɛdaa lɛ, ɛ-tɔmkpɛlɩkɩyaa wolo ɛ-cɔlɔ pe-ɖeke nɛ pɔpɔzɩ-ɩ se: «Pɩlabɩ ɛzɩma nɛ ɖɩtapɩzɩ ɖɩɖɔɔnɩ eleeu ɛnʋ pɩɣa ŋ́gá ka-wayɩ?» 20Yesu cosi-wɛ se: «Mi-lidaʋ tatalɩ pʋyʋ yɔɔ ɩtapɩzɩ. Toovenim lɛ, mankaɖɩɣ-mɩ se: yee ɩɩwɛnɩ lidaʋ ɛzɩ piye nɖɩ́ ɖɩkɩlɩ kɔzʋʋ yɔ yɔ, ɩpɩzaɣ se iheyi pʋʋ kʋnɛ se: ‹Kpɛzɩ cɩnɛ nɛ ŋwolo ŋsɩŋ peeɖe yɔ!› Nɛ kɩla ḿbʋ́ ɖɔɖɔ. Halɩ nabʋyʋ fɛyɩ se ɩɩpɩzɩɣ ɩlabɩ-pʋ. [ 21Ɛlɛ́, Ɛsɔ sɛʋ nɛ nɔɔ hɔkʋʋ pe-ɖeke papɩzɩɣna paha ɛyʋ ɖoŋ nɛ ɛɖɔɔnɩnɩ pɩtɛ eleeu ɛnʋ.]»
Yesu yɔɔdʋʋ nabʋlɛ ñɩm se ɛsɩkɩ nɛ efemni sɩm taa
(Mrk 9.30-32; Luk 9.43b-45)
22Nakʋyʋ wiye Yesu tɔmkpɛlɩkɩyaa kpeɣli patɩŋa Galilee egeetiye taa. Peeɖe eheyi-wɛ se: «Pɔkɔŋ Ɛyʋ Pɩyalʋ kpaʋ nɛ paɖʋzɩ ɛyáa nesi taa 23nɛ pakʋ-ɩ nɛ kɩyakɩŋ naadozo wiye lɛ, Ɛsɔ fezi-i nɛ sɩm taa.»
Ɛyɔɔdɩ ḿbʋ́ lɛ, ɛ-tɔmkpɛlɩkɩyaa laŋa wɛɛkɩ pɩtɩɩfɛyɩ.
Yesu nɛ Pɩyɛ pɛhɛyɩ Ɛsɔ ɖɩɣa yɔɔ lambuu
24Yesu nɛ ɛ-tɔmkpɛlɩkɩyaa patalɩ Kapɛrnayum lɛ, Ɛsɔ ɖɩɣa taa lambuu mʋyaa wolo Pɩyɛ cɔlɔ nɛ pɔpɔzɩ-ɩ se: «Mɩ-caa hɛyɩɣ Ɛsɔ ɖɩɣa lambuu yaa ɛɛhɛyɩɣ?» 25Pɩyɛ cosi-wɛ se: «Ɛhɛyɩɣ.»
Ɛpɩsɩ Yesu cɔlɔ ɖɩɣa lɛ, ɛ́lɛ́ lɛyɩ-ɩ pɔzʋʋ se: «Siimɔɔ! Ŋmaɣzɩɣ se we? Tɛtʋ ñɩma naa agɔmaa pʋwɛɛ se pɛhɛyɩ kedeŋa yɔɔ cɩnɛ awiya sɔsɔna lambuu?» 26Pɩyɛ cosi-i se: «Agɔmaa.» Peeɖe Yesu tɔm se: «Yee ḿbʋ́, pʋtɔpɔzɩ se tɛtʋ ñɩma ɛhɛyɩ-kʋ. 27Paa ḿbʋ́ yɔ, ɖɩtaakpazɩ pa-pana. Kpaɣ ño-kolaɣ nɛ ŋwolo teŋgu taa nɛ ŋlɔ-kɛ. Kpakpayaɣ ŋgá ŋcalɩɣ kpaʋ yɔ, haa kɔ-nɔɔ, ŋmakɩnɩ liidiye nɖɩ́ pʋpɔzʋʋ yɔ. Lɩzɩ-ɖɩ nɛ ŋkɔnɩ ŋhɛyɩ-wɛ ɖa-naalɛ ɖɔ-yɔɔ.»
Currently Selected:
Maatiyee 17: KABI
Highlight
Share
Copy
Want to have your highlights saved across all your devices? Sign up or sign in
