Efɛɛzɩ 5
5
Ñalɩmɩyɛ taa wezuu caɣʋ tɔm
1Pʋ-yɔɔ lɛ, ɩtɩɣzɩnɩ Ɛsɔ, mbʋ́ pʋyɔɔ yɔ, ɩkɛ piya nzɩ́ ɛsɔɔlɩ-sɩ yɔ. 2Ɩsɔɔlɩ ɖama ɛzɩ Krɩstʋ sɔɔlʋʋ-ɖʋ nɛ ɛkpaɣ ɛ-maɣmaɣ ɛ-tɩ ɛha nɛ palaa-ɩ ɖɔ-yɔɔ ɛzɩ kpɩnɛ nɖɩ́ pɔhɔba nɛ ɖɩlɩɣ sɔzɩŋ camɩyɛ Ɛsɔ ɛsɩndaa yɔ.
3Pataatɩɩnɩʋ acɛyɛ yaa azuluma lakasɩ tɩŋa yaa liidiye laɣzaɣ pa-taŋ kpem mɩ-hɛkʋ taa ɛzɩ pʋmʋnaʋ Ɛsɔ ñɩma yɔ. 4Tʋtʋ nɛ tɔm ɛzaɣ́tʋ nɛ niɣzuu tɔm, pataatɩɩlɩʋ ɖɔɖɔ mɩ-nɔɔ taa: pɩfɛyɩ ɖeu. Ɛlɛ́, Ɛsɔ sam ɖeke ɛlɩɩna. 5Mbʋ́ pʋyɔɔ yɔ, ɩtɩlɩ camɩyɛ se paatayɩɣnɩ acɛyɛ laɖʋ nɛ azuluma tʋ yaa liidiye laɣzaɣ tʋ ñɩm mbʋ́ Ɛsɔ ñɔɔzaa nɛ ɛsɩɩ ɛ nɛ Krɩstʋ pe-Kewiyaɣ taa yɔ. Liidiye laɣzaɣ tʋ ñɛwɛ ɛzɩ agɔlɩma kpɛyɩyʋ yɔ.
6Itaayele nɔɔyʋ yili-mɩ nɛ ɛ-tɔm ndʋ́ tɩfɛyɩ wazaɣ nakɛyɛ yɔ: pʋ-yɔɔ Ɛsɔ pana kpaɣnɩ mbá paañaŋ-ɩ yɔ. 7Yee ḿbʋ́, mɩ nɛ wɛ ɩtaakaa pʋyʋ. 8Toovenim lɛ, ɖooo lɛ ɩɩkɛ cɩkpɛndʋʋ tɛɛ ñɩma. Ɛlɛ́, lɛɛlɛɛyɔ ɩkɛ ñalɩmɩyɛ taa ñɩma mɩ nɛ Kɩpaɣlʋ mɩ-kpɛndʋʋ yɔɔ. Pʋ-yɔɔ lɛ, ɩɖɔ ɛzɩ ñalɩmɩyɛ taa ñɩma yɔ. 9Mbʋ́ pɩlɩɣnɩ ñalɩmɩyɛ taa yɔ lɛ: camɩyɛ lakasɩ tɩŋa nɛ tʋʋzʋʋ nɛ toovenim. 10Pʋ-yɔɔ lɛ, ɩñaɣ pana nɛ ɩtɩlɩ mbʋ́ pɩkɛdɩnɩ Kɩpaɣlʋ yɔ. 11Ɩtaaɖʋ mi-nesi mbá palakɩ wazaɣ fɛyɩ tʋmɩyɛ cɩkpɛndʋʋ tɛɛ yɔ pa-tʋma taa. Ɛlɛ́, ikuli a-yɔɔ ñammm. 12Toovenim lɛ, mbʋ́ pɩtɛ ɛyáa lakɩ mɛsaɣ tɛɛ yɔ, halɩ pʋwɛ fɛyɛ se pɔyɔɔdɩ pʋ-tɔm. 13Ɛlɛ́, ñalɩmɩyɛ ɛñalɩ pʋ-yɔɔ yɔ, panaɣ-pʋ keɣlee, panaɣ mbʋ́ pɩkɛnaa kpem yɔ. 14Pʋ-yɔɔ pɔtɔŋ se:
«Weyi ña ŋɖou yɔ,
fe, kʋyɩ nɛ sɩɖaa taa,
Krɩstʋ ñalɩmɩyɛ ñalɩɣ ñɔ-yɔɔ.»
15Yee ḿbʋ́, ɩɖɔkɩ mɩ-tɩ camɩyɛ mɩ-ɖɔnɛ taa. Ɩtaaɖɔ ɛzɩ kɩmɛlɛmɩŋ yɔ, ɛlɛ́, ɩɖɔ ɛzɩ lɔŋsɩnɖaa yɔ. 16Ɩtaayele alɩwaatʋ nɛ tɩɖɛɛ yem, mbʋ́ pʋyɔɔ yɔ, kɩyakɩŋ weyi ɖɩwɛ ɩ-taa yɔ, ɩfɛyɩ ɖeu. 17Pʋ-yɔɔ lɛ, ɩtaawɛɛ kaatɩlɩtʋ taa, ɛlɛ́, ɩñaɣ pana nɛ ɩtɩlɩ mbʋ́ Kɩpaɣlʋ liu wɛɛ yɔ.
18Ɩtaañɔɔ sʋlʋm nɛ pʋkʋ-mɩ: pɩkɛ yem yem lakasɩ. Ɛlɛ́, iyele nɛ Fezuu Kiɖeɖeu wɛɛ mɩ-cɔlɔ kpaagbaa kpem. 19Ɩkpɛndɩ ɖama nɛ ɩma keɣsi nɛ itee hendu ndʋ́ Fezuu Kiɖeɖeu wɩlɩɣ-mɩ yɔ. Itee hendu nɛ ɩyɩɣyɩ Kɩpaɣlʋ nɛ mɩ-laŋɩyɛ tɩŋa pilim. 20Ɩsa Caa Ɛsɔ alɩwaatʋ kpeekpe pɩtɩŋa pɩ-taa ɖa-Kɩpaɣlʋ Yesu Krɩstʋ hɩɖɛ taa.
Halaa nɛ pa-walaa pɔ-tɔm
21Mbá mɩ ɩñaŋ Krɩstʋ yɔ, iluzi mɩ-tɩ ɖama tɛɛ. 22Mɩ halaa lɛ, paa weyi eluzi ɛ-tɩ ɛ-walʋ tɛɛ ɛzɩ eluzuu ɛ-tɩ Kɩpaɣlʋ tɛɛ yɔ. 23Mbʋ́ pʋyɔɔ yɔ, halʋ ñʋʋdʋ lɛ ɛ-walʋ ɛzɩ Krɩstʋ kɛʋ ɛ-ŋgbɛyɛ taa ñɩma ñʋʋdʋ yɔ. Ḿbá lɛ e-tomnaɣ nɛ ɛnʋ lɛ ka-ñʋʋ yaɖʋ. 24Yee ḿbʋ́, paa halʋ weyi eluzi ɛ-tɩ ɛ-walʋ tɛɛ pɩtɩŋa pɩ-taa ɛzɩ Krɩstʋ ŋgbɛyɛ taa ñɩma luzuu pa-tɩ ɛ́lɛ́ tɛɛ yɔ.
25Mɩ walaa lɛ, paa weyi ɛsɔɔlɩ ɛ-halʋ ɛzɩ Krɩstʋ sɔɔlʋʋ ɛ-ŋgbɛyɛ nɛ ɛkpaɣ ɛ-maɣmaɣ ɛ-tɩ nɛ ɛha ɖɩ-taa ñɩma yɔɔ yɔ. 26Ɛlabɩ ḿbʋ́ se ɛtɩŋnɩ lɩm nɛ tɔm pɔ-yɔɔ nɛ eyele pɛwɛɛ cɩɖɩcɩɖɩ nɛ papɩsɩ Ɛsɔ ñɩma. 27Ɛlabɩ ḿbʋ́ ɖɔɖɔ se Krɩstʋ ŋgbɛyɛ ɛwɛɛ koboyaɣ taa nɛ ewoni-ɖɩ ɛ-ɛsɩndaa, azuluma yaa mɩndʋ yaa mbʋ́ pɩnɩɣzɩnɩ ḿbʋ́ yɔ, pataawɛɛ ɖɩ-yɔɔ, ɛlɛ́, ɖɩwɛɛ cɩɖɩcɩɖɩ, ɛzaɣ́tʋ natʋyʋ ɛtaawɛɛ ɖɩ-yɔɔ. 28Ḿbʋ́ ɖɔɖɔ pʋwɛɛ se walaa ɛsɔɔlɩ pa-halaa ɛzɩ pɔsɔɔlʋʋ pa-maɣmaɣ pa-tɩ yɔ: weyi ɛsɔɔlɩ ɛ-halʋ yɔ, ɛsɔɔlɩ ɛ-maɣmaɣ ɛ-tɩ. 29Toovenim lɛ, nɔɔyʋ fɛyɩ se ɛpaɖɩɣ ɛ-maɣmaɣ e-tomnaɣ. Ɛlɛ́, ɛcalɩɣ-kɛ nɛ ɛcɔŋnɩ kɔ-yɔɔ camɩyɛ ɛzɩ Krɩstʋ cɔŋʋʋnɩ ɛ-ŋgbɛyɛ taa ñɩma yɔɔ yɔ. 30Mbʋ́ pʋyɔɔ yɔ, ḿbá lɛ mbá ɖa ɖɩkɛ e-tomnaɣ pilinzi yɔ. 31Pʋwɛ ɛzɩ pamaʋ se: «Abalʋ yeki ɛ-caa nɛ e-ɖoo nɛ ɛkpaɣ halʋ nɛ pa-naalɛ papɩsɩ ɛyʋ kʋɖʋm» yɔ. 32Tɔm tʋnɛ, tɩkɛ mɛsaɣ tɛɛ tɔm, tɩ-taa wɛ cukaŋ. Krɩstʋ nɛ ɛ-ŋgbɛyɛ taa ñɩma mamaɣzɩnaa nɛ mɔyɔɔdɩ ḿbʋ́. 33Ḿbʋ́ ɖɔɖɔ pʋwɛnɩ-mɩ: paa mɩ-taa weyi ɛsɔɔlɩ ɛ-halʋ ɛzɩ ɛsɔɔlʋʋ ɛ-maɣmaɣ ɛ-tɩ yɔ nɛ paa halʋ weyi ɛ́lɛ́ ña ɛ-walʋ.
Currently Selected:
Efɛɛzɩ 5: KABI
Highlight
Share
Copy
Want to have your highlights saved across all your devices? Sign up or sign in