Efɛɛzɩ 4
4
Pɩtɩŋɩɣnɩ Krɩstʋ yɔɔ nɛ ŋgbɛyɛ taa ñɩma wɛnɩ nɔɔ kʋɖʋmaɣ
1Ɛsɔ ya-mɩ se ɩɖɔ ɛzɩ pɩkɛdɩnaʋ-ɩ yɔ. Pʋ-yɔɔ weyi ma paɖʋ salaka se malakɩ Kɩpaɣlʋ tʋmɩyɛ yɔ, meheyiɣ-mɩ se ɩñaɣ pana nɛ ɩɖɔ pʋ-yɔɔ ḿbʋ́: 2iluzi mɩ-tɩ kpem nɛ ɩwɛɛ leleŋ nɛ ɩɖɔkɩ mɩ-hɔ. Ɩɖɔkɩ ɖama camɩyɛ nɛ sɔɔlɩm. 3Ɩñaɣ pana nɛ ɩtɩŋnɩ laŋhɛzɩyɛ nɖɩ́ ɖɩwɛ mɩ-hɛkʋ taa yɔ ɖɩ-yɔɔ nɛ ɩɖɔkɩ nɔɔ kʋɖʋmaɣ ŋgá Fezuu Kiɖeɖeu yeba nɛ ɩla yɔ ḿbʋ́. 4Mbʋ́ pʋyɔɔ yɔ, tomnaɣ kʋɖʋmaɣ koŋ nɛ Fezuu Kiɖeɖeu kʋɖʋmʋʋ koŋ nɛ ɖaŋʋʋ kʋɖʋmʋm koŋ pɛwɛna. Đaŋʋʋ ḿbʋ́, pʋ-yɔɔ ɛya-mɩ. 5Kɩpaɣlʋ kʋɖʋm koŋ nɛ lidaʋ kʋɖʋmʋʋ koŋ nɛ lɩm sɔʋ sɔnzɩ kʋɖʋmsɩ koŋ pɛwɛna. 6Ɛsɔ kʋɖʋm koŋ wɛna: ɛnʋ lɛ Krɩstʋ ñɩma tɩŋa payɩ Caa. Ɛnʋ cɔŋnɩnɩ patɩŋa pɔ-yɔɔ nɛ ɛwɛɛ patɩŋa pa-taa nɛ ɛlakɩ tʋmɩyɛ patɩŋa pa-taa. 7Paa ḿbʋ́, Krɩstʋ labɩ paa ɖa-taa weyi kʋjɔʋ ɛzɩ ɛɖʋʋ se ɛhaɣ-ɩ yɔ nɛ kɩwɛnɩ ndɩ. 8Ḿbʋ́ pama Ɛsɔtɔm Takayaɣ taa se:
«Ɛkpa ɖooo ɛsɔdaa,
ɛkpɛndɩnɩ yomaa,
ɛlabɩ ɛyáa kʋjɔŋ.»
9Pɔtɔm se ɛkpawa yɔ, pʋ-tɔbʋʋ se we? Pʋ-tɔbʋʋ se eetiba ɖooo tɛtɛɛ nɛ pʋcɔ. 10Weyi eetiba yɔ, kʋɖʋm ɛnʋ ɛkpanɩ ɖooo ɛsɔdaa se ɛwɛɛ pɩtɩŋa payɩ pʋ-cɔlɔ. 11Krɩstʋ ɛnʋ ɛhanɩ nabɛyɛ se pɛkɛ e-tiyiyaa nɛ lɛlaa náyaa nɛ lɛlaa Laŋhɛzɩyɛ Tɔm susiyaa nɛ lɛlaa ɖiyiyaa nɛ lɛlaa Ɛsɔtɔm wɩlɩyaa. 12Ɛlabɩ ḿbʋ́ se ɛñɔɔzɩ Ɛsɔ ñɩma nɛ pala ɛ-tʋmɩyɛ nɛ ŋgbɛyɛ taa ñɩma tɛzɩ kpaʋ ɖoŋ pe-lidaʋ wɛnaʋ taa 13nɛ pʋkɔɔ pɩsɩɩnɩ alɩwaatʋ ndʋ́ ɖatɩŋa payɩ ɖɩlabɩ nɔɔ kʋɖʋmaɣ ɖe-lidaʋ wɛnaʋ taa nɛ ɖɩtɩlɩ Ɛsɔ Pɩyalʋ siŋŋ nɛ ɖɩpɩsɩ ɛyáa sʋtʋyaa nɛ ɖɩwɛɛ ɛzɩ Krɩstʋ wɛʋ kpem yɔ. 14Ḿbʋ́ yekina nɛ ɖɩɩtasɩɣ kɛʋ piya nzɩ́ pawɩlɩɣ-sɩ nɛ sɩɩsɩŋ mbʋ́ sɩla nɛ peyiliɣ-sɩ nɛ pʋcɔzʋʋ-sɩ yem yem yɔ. 15Ɛlɛ́, ɖɩyɔɔdʋʋ toovenim nɛ ɖɩsɔɔlʋʋ ɖama nɛ ɖɩpaɣlɩɣ pɩtɩŋa pɩ-taa nɛ ɖɩñɔtʋʋnɩ weyi ɛkɛ ñʋʋdʋ yɔ, ɛnʋ lɛ Krɩstʋ. 16Ɛ-yɔɔ pɩtɩŋɩɣna nɛ e-tomnaɣ hɔɔlɩŋ tɩŋa kpɛndɩ camɩyɛ nɛ paa hɔɔlʋʋ ŋgʋ́ kɩpaɣlɩɣ ɛzɩ pʋpɔzʋʋ yɔ. Nɛ yee tomnaɣ ŋ́gá, kɔ-hɔɔlɩŋ tɩŋa ɩlakɩ a-tʋmɩyɛ ɛzɩ pʋpɔzʋʋ yɔ yɔ, kɛwɛɣ kɛtɛzɩɣ kpaʋ ɖoŋ sɔɔlɩm taa.
Wezuu caɣʋ kɩfam ɖa nɛ Krɩstʋ ɖɛ-kpɛndʋʋ taa
17Iwelesi tɔm ndʋ́ mankaɖɩɣ-mɩ nɛ Kɩpaɣlʋ nɔɔ yɔ. Ńdʋ́ lɛ se: pɩfɛyɩ se ɩtasɩ caɣʋ wezuu ɛzɩ mbá pɛtɛkɛ Yuda ñɩma yɔ. Palakɩ mbʋ́ pamaɣzɩɣ nɛ pɩɩtalɩɣnɩ-wɛ ɖoli yɔ. 18Pɛwɛ cɩkpɛndʋʋ tɛɛ, paasɩŋ wezuu ŋgʋ́ Ɛsɔ haɣ yɔ, pa-laŋkpɩzɩyɛ yɔɔ lɛ, pɛwɛ kaatɩlɩtʋ taa. 19Fɛyɛ ɛɛtasɩɣ-wɛ kpaʋ nɛ pʋyʋ, palakɩ yem yem nɛ azuluma lakasɩ tɩŋa payɩ nɛ pɛwɛnɩ liidiye laɣzaɣ ɖɔɖɔ.
20Piyele mɩ lɛ, pɩtɛkɛ ḿbʋ́ pɛkpɛlɩkɩ-mɩ Krɩstʋ tɔm taa. 21Paa pɩlabɩ ɛzɩma, pɔyɔɔdɩ ɛ-tɔm nɛ ɩnɩɩ nɛ pɛkpɛlɩkɩ Yesu ñɩma mɩ toovenim mbʋ́ pʋwɛ ɛ-cɔlɔ yɔ. 22Yee ḿbʋ́, pʋwɛɛ se iyele mɩ-wɛtʋ kɩbɩndʋ nɛ mi-wezuu caɣʋ kɩbɩm, mbʋ́ pʋyɔɔ yɔ, ḿbá cɛtɩɣnɩ-mɩ nɛ paɖʋzʋʋ-mɩ. 23Pʋwɛɛ se paa mɩ-taa weyi eyele nɛ Fezuu Kiɖeɖeu lɛɣzɩ ɛ-lɩmaɣza 24nɛ ɛkɛ ɛyʋ kɩfalʋ. Ɛsɔ ma-ɩ ɛzɩ ɛ-maɣmaɣ yɔ nɛ ɛtʋʋzɩ nɛ ɛwɛɛ cɩɖɩcɩɖɩ ɛzɩ pɩwɛʋ toovenim taa yɔ.
25Pʋ-yɔɔ lɛ, pʋwɛɛ se iyele cɛtʋʋ: paa mɩ-taa weyi eheyi lɛlʋ toovenim. Mbʋ́ pʋyɔɔ yɔ, ɖatɩŋa payɩ ɖɩkɛ Krɩstʋ tomnaɣ pilinzi. 26Yee mɩ-pana ɛkpawa lɛ, ɩɖɔkɩ mɩ-tɩ nɛ ɩtaala kɩwɛɛkɩm, wɩsɩ ɛtaakpem-yɛ. 27Ɩtaaha eleeu waɖɛ naɖɩyɛ kaʋ. 28Weyi ɛmɩlaɣ yɔ, ɛtaatasɩ mɩlʋ́ʋ. Ɛlɛ́, ɛñaɣ pana nɛ ɛla tʋmɩyɛ nɛ toovenim nɛ ɛ-maɣmaɣ e-nesi nɛ ehiɣ nɛ ɛha weyi ɛwɛ kʋñɔŋ taa yɔ. 29Ɛzaɣ́tʋ tɔm natʋyʋ ɛtaalɩɩ mɩ-nɔɔ taa. Ɛlɛ́, yee pʋwɛɛ se natʋyʋ ɛlɩɩ yɔ, tɩkɛnɩ kɩbandʋ ndʋ́ tiyeki se mbá panɩɣ-tʋ yɔ, pɛtɛzɩ pɩʋ nɛ patɩlɩ mbʋ́ lootiye kɛnaa yɔ. 30Ɩtaapɩsɩ Fezuu Kiɖeɖeu hɔyɛ, ŋ́gʋ́ lɛ mayaɣ ŋgá ɛñɩɣ mɩ-yɔɔ se ɛɛlɩzɩ-mɩ pɩ-taa puwiye nɖɩ́ ɛkɔŋ yɔ. 31Iyele ɛsɛñɩŋɩyɛ nɛ tɔm ñasʋʋ nɛ pana nɛ holuu nɛ ɛyáa hɩla wɛɛkʋʋ nɛ pɩkpɛndɩnɩ kañatʋ tɩŋa payɩ. 32Ɛlɛ́, ɩla ɖama hɛɛɛ nɛ ɩna ɖama pʋtɔdɩyɛ. Ikpeɣ ɖama ɛzɩ Ɛsɔ kpeɣu-mɩ yɔ, mɩ nɛ Krɩstʋ mɩ-kpɛndʋʋ taa.
Currently Selected:
Efɛɛzɩ 4: KABI
Highlight
Share
Copy
Want to have your highlights saved across all your devices? Sign up or sign in