Efɛɛzɩ 3
3
Pɔɔlɩ yɔɔdʋʋ hama lakasɩ nzɩ́ Ɛsɔ tɩŋɩɣnɩ Krɩstʋ yɔɔ nɛ ɛlakɩ yɔ sɩ-tɔm
1Tɔm ndʋ́ tɩtɩŋa payɩ meheyi-mɩ yɔ, tɩ-yɔɔ paɖʋ ma Pɔɔlɩ salaka se malakɩ Krɩstʋ Yesu tʋmɩyɛ mbá mɩ ɩtɛkɛ Yuda ñɩma yɔ mɩ-hɛkʋ taa. 2Paa pɩɩla ɛzɩma, ɩnɩ lootiye nɖɩ́ Ɛsɔ labɩ-m nɛ ɛɖʋ-m se mala tʋmɩyɛ mɩ-hɛkʋ taa yɔ ɖɩ-tɔm. 3Ńdʋ́ lɛ se ɛwɩlɩ-m mbʋ́ pɩɩwɛ mɛsaɣ tɛɛ yɔ nɛ mansɩm-pʋ ɛzɩ mamaʋ tɔm pee ana lɛɛlɛɛyɔ yɔ. 4Ɩkalɩɣ mbʋ́ mamawa yɔ lɛ, ɩna mbʋ́ ɛwɩlɩ-m Krɩstʋ tɔm ndʋ́ tɩɩwɛ mɛsaɣ tɛɛ yɔ tɩ-taa yɔ. 5Mɛsaɣ tɛɛ tɔm ńdʋ́, kpaɖɩŋ weyi ɩɖɛwa yɔ, ɩ-taa ñɩma taasɩm-tʋ ɛzɩ Ɛsɔ tɩŋnaʋ e-Fezuu Kiɖeɖeu yɔɔ nɛ eyele nɛ náyaa nɛ ɛ-maɣmaɣ e-tiyiyaa pasɩm-tʋ lɛɛlɛɛyɔ yɔ. 6Ńdʋ́ lɛ se: mbá pɛtɛkɛ Yuda ñɩma yɔ nɛ Yuda ñɩma, pɛkɛ tomnaɣ kʋɖʋmaɣ pilinzi. Ñɩm kʋɖʋmʋm Ɛsɔ ñɔɔzaa nɛ ɛsɩɩ-wɛ. Ñɩm kʋɖʋmʋm ɖɔɖɔ ɛɖʋwa se ɛhaɣ-wɛ pa nɛ Krɩstʋ Yesu pɛ-kpɛndʋʋ taa. Laŋhɛzɩyɛ Tɔm yɔɔ ɛtɩŋnaa nɛ ɛla ḿbʋ́.
7Laŋhɛzɩyɛ Tɔm ńdʋ́, manpɩsɩ tɩ-tʋmlaɖʋ. Ɛsɔ tɩŋnɩnɩ e-ɖoŋ yɔɔ nɛ ɛlabɩ-m lootiye se manpɩzɩ malabɩ-ɖɩ. 8Weyi ma mɛnkɛ Ɛsɔ ñɩma tɩŋa taa tɔyaɣ yɔ, ɛlabɩ-m lootiye ńɖɩ́ se monsusi mbá pɛtɛkɛ Yuda ñɩma yɔ ñɩm mbʋ́ pɩfɛyɩ ɖaɣʋ yɔ pʋ-tɔm. 9Ɛɖʋ-m ɖɔɖɔ se meyele nɛ ɛyáa na ɛzɩma mbʋ́ pʋwɛɛ se mbʋ́ ɛɛɖʋwa nɛ pʋwɛɛ mɛsaɣ tɛɛ ɖooo lɔŋ yɔ, pɩla yɔ. Ɛnʋ labɩnɩ pɩtɩŋa payɩ. 10Yee ḿbʋ́, pɩkpaɣʋnɩ lɛɛlɛɛyɔ yɔ, pɩtɩŋɩɣnɩ Krɩstʋ ŋgbɛyɛ taa ñɩma yɔɔ nɛ ñʋndɩnaa nɛ ɛsɔdaa ɖoŋ tɩŋa patɩlɩ ɛzɩma mbʋ́ Ɛsɔ lɔŋsɩnɖɛ paɣlaa pɩtɩɩfɛyɩ yɔ. 11Ḿbʋ́ ɛɛɖʋ ɖooo lɔŋ se ɛlakɩ nɛ ɛtɩŋnɩ Krɩstʋ Yesu yɔɔ nɛ ɛlabɩ-pʋ. Ɛnʋ lɛ ɖa-Kɩpaɣlʋ. 12Ɛ-yɔɔ pɩtɩŋɩɣnɩ lidaʋ ŋgʋ́ ɖɩwɛnɩ ɛ-yɔɔ yɔ kʋ-yɔɔ nɛ pɩhaɣ-ɖʋ waɖɛ se ɖiwolo Ɛsɔ cɔlɔ kaalɛyɩtʋ. 13Pʋ-yɔɔ meheyiɣ-mɩ se pitaatisi mi-toma taa kʋñɔmɩŋ weyi mɔntɔkɩ mɩ-yɔɔ yɔ ɩ-yɔɔ. Ɛlɛ́, ɩkʋndɩnɩ-ɩ.
Krɩstʋ sɔɔlɩm tɔm
14Tɔm ńdʋ́, tɩ-yɔɔ moluŋuu ma-nɩmbɔla yɔɔ Caa Ɛsɔ tɛɛ. 15Ɛnʋ ɖɔkɩnɩ ɛsɔdaa ñɩma nɛ tataa ñɩma patɩŋa payɩ. 16Mentendiɣ-i ḿbʋ́ se eyele nɛ pɩtɩŋnɩ e-Fezuu Kiɖeɖeu yɔɔ nɛ ɩkpa ɖoŋ siŋŋ mɩ-lɩmaɣza taa ɛzɩ e-koboyaɣ wɛʋ nɛ kɛfɛyɩ tɩnaɣ yɔ. 17Ḿbʋ́ yekina nɛ pɩtɩŋnɩ lidaʋ ŋgʋ́ ɩwɛna yɔ kʋ-yɔɔ nɛ Krɩstʋ wɛɛ mɩ-laŋa taa nɛ ɩtɛzɩ pɩʋ sɔɔlɩm taa siŋŋ. 18Peeɖe mɩ nɛ Ɛsɔ ñɩma tɩŋa payɩ ɩpɩzɩɣ ɩna ɛzɩma mbʋ́ Krɩstʋ sɔɔlɩm paɣlaa pɩtɩɩfɛyɩ yɔ: pɩwalaa nɛ pɩɖaɣlɩ nɛ pʋkʋyɩ nɛ pilimi. 19Ḿbʋ́ yekina nɛ ɩtɩlɩ se sɔɔlɩm ḿbʋ́, pɩkɩlɩ lɔŋsɩnɖɛ tɩŋa payɩ. Ḿbʋ́ yekina ɖɔɖɔ nɛ Ɛsɔ tɛzɩ mɩ-taa wɛʋ pilim.
20Ɛnʋ weyi ɛlakɩ tʋmɩyɛ ɖa-taa nɛ e-ɖoŋ yɔ, ɛpɩzɩɣ ɛlabɩ-ɖʋ nɛ pɩkɩlɩ mbʋ́ ɖɩpɔzʋʋ-ɩ yɔ yaa mbʋ́ ɖɩmaɣzɩɣ yɔ kpem. 21Ɛ-hɩɖɛ ɛsɛɛ Krɩstʋ Yesu ŋgbɛyɛ taa ɛ nɛ ɩ pɛ-kpɛndʋʋ yɔɔ kpaɖɩŋ tɩŋa taa pɩnzɩ ɛgbaŋ ɛgbaŋ! Pɩla ḿbʋ́.
Currently Selected:
Efɛɛzɩ 3: KABI
Highlight
Share
Copy
Want to have your highlights saved across all your devices? Sign up or sign in