1 Kɔrɛntɩ 7

Pɔɔlɩ cosuu tɔm halɩkpaɣyɛ yɔɔ

1Lɛɛlɛɛyɔ, moncosuu-mɩ tɔm ndʋ́ ɩma-m takayaɣ nɛ ɩpɔzɩ-m yɔ. Meheyiɣ-mɩ se: pʋwɛ ɖeu se abalʋ ɛcaɣ ḿbʋ́, ɛtaakpaɣ halʋ. 2Paa ḿbʋ́ yɔ, acɛyɛ yɔɔ lɛ, pʋwɛ ɖeu se paa abalʋ weyi ɛkpaɣ halʋ nɛ paa halʋ weyi lɛ, ɛ́lɛ́ walɩ. 3Pʋwɛɛ se abalʋ ɛla ɛ-halʋ mbʋ́ pʋpɔzʋʋ-ɩ yɔ nɛ halʋ ñala ɖɔɖɔ ɛ-walʋ mbʋ́ pʋpɔzʋʋ ɛ́lɛ́ yɔ. 4Pɩtɛkɛ halʋ tɩnɩ ɛ-tɩ, ɛlɛ́, ɛ-walʋ tɩnɩ-ɩ. Ḿbʋ́ ɖɔɖɔ pʋwɛnɩ abalʋ. Pɩtɛkɛ ɛnʋ tɩnɩ ɛ-tɩ, ɛlɛ́, ɛ-halʋ tɩnɩ-ɩ. 5Halʋ nɛ ɛ-walʋ pataapɛ pa-tɩ ɖama. Yee panɩnɩ ɖama se papɩzɩ pehiɣ alɩwaatʋ nɛ pɛsɛɛ Ɛsɔ yɔ, kalɩ pi-ɖeke. Paa ḿbʋ́ yɔ, pataacaɣ nɛ puwolo poliŋ. Pɩtɛkɛ ḿbʋ́, paapɩzɩɣ pɔ́ɖɔ́kɩ pa-tɩ alɩwaatʋ ndʋ́ Satanɩ takɩɣ-wɛ yɔ.

6Ndʋ́ mɔyɔɔdaa yɔ, tɩtɛkɛnɩ-mɩ paɣtʋ. Ɛlɛ́, mamaɣzɩɣ se ɩpɩzaɣ se ɩla ḿbʋ́. 7Ma me-liu kɛwɛɛ se ɛyáa tɩŋa payɩ ɛcaɣ ḿbʋ́ ɛzɩ ma yɔ. Ɛlɛ́, Ɛsɔ labɩ ɛyáa kʋjɔŋ ndɩ ndɩ. Paa weyi ɛ nɛ ɛ-ñɩŋgʋ.

8Lɛɛlɛɛyɔ, meheyiɣ mbá patakpaɣ halaa nɛ mbá patawalɩ nɛ lelaa se pʋwɛ ɖeu se pacaɣ ḿbʋ́ ɛzɩ ma yɔ. 9Ɛlɛ́, yee paapɩzɩɣ pa-tɩ ɖɔkʋʋ yɔ, pʋwɛɛ se pakpaɣ halaa yaa pawalɩ. Mbʋ́ pʋyɔɔ yɔ, pɩkɩlɩ ɖeu se ɛyʋ ɛkpaɣ halʋ yaa ɛwalɩ ɖenɖe ɛzɩ pɩɩwɛɛ pɩlakɩ-ɩ liu nɛ pɩkɩlɩ kpem yɔ.

10-11Mbá pawalaa yaa pakpaɣ halaa yɔ, Kɩpaɣlʋ ɖʋna se halʋ ɛtaakʋyɩ ɛ-walʋ yɔɔ. Pɩtɛkɛ maɖʋna. Yee ɛtɛm kʋyʋʋ yɔ, pʋwɛɛ se ɛcaɣ ḿbʋ́. Ɛtaatasɩ walʋʋ yaa ɛ nɛ ɛ-walʋ pɔñɔɔzɩ pɛ-hɛkʋ taa. Pɩfɛyɩ se abalʋ ɛɖɔɔnɩ ɛ-halʋ ɖɔɖɔ.

12Piyele lɛlaa yɔ, pɩtɛkɛ Kɩpaɣlʋ heyiɣni-wɛ. Ma-maɣmaɣ meheyiɣnɩ-wɛ se: yee weyi ɛwɛnɩ lidaʋ Krɩstʋ yɔɔ yɔ ɛtɛm kpaɣʋ halʋ weyi ɛfɛyɩnɩ lidaʋ Krɩstʋ yɔɔ nɛ ɛ́lɛ́ tisi se ɛ nɛ ɩ pɛwɛɛ yɔ, pɩfɛyɩ se abalʋ ɛnʋ ɛɖɔɔnɩ-ɩ. 13Đɔɖɔ lɛ, yee halʋ weyi ɛwɛnɩ lidaʋ Krɩstʋ yɔɔ yɔ ɛtɛm walʋʋ weyi ɛfɛyɩnɩ lidaʋ Krɩstʋ yɔɔ nɛ ɛ́lɛ́ tisi se ɛɖɔkʋʋ-ɩ yɔ, pɩfɛyɩ se ɛkʋyɩ ɛ-yɔɔ. 14Mbʋ́ pʋyɔɔ yɔ, halʋ ɛnʋ ɛ-yɔɔ lɛ, Ɛsɔ sɩ abalʋ weyi ɛfɛyɩnɩ lidaʋ Krɩstʋ yɔɔ yɔ nɛ hɔɔlʋʋ se ɛkɛ ɛ-ñɩnʋ. Yaa abalʋ yɔɔ lɛ, Ɛsɔ sɩ halʋ weyi ɛ́lɛ́ fɛyɩnɩ lidaʋ Krɩstʋ yɔɔ yɔ nɛ hɔɔlʋʋ se ɛkɛ ɛ-ñɩnʋ ɖɔɖɔ. Pɩtɛkɛ ḿbʋ́, mi-piya ɛɛkɛɣ Ɛsɔ ñɩma, ŋgʋ́ sɩkɛ ɛ-ñɩma. 15Yee weyi ɛfɛyɩnɩ lidaʋ Krɩstʋ yɔɔ yɔ, ekiziɣni weyi ɛwɛnɩ lidaʋ Krɩstʋ yɔɔ yɔ, ɛpɩzɩɣ ɛla ḿbʋ́. Alɩwaatʋ ńdʋ́ lɛ, pɛfɛyɩ ɖama taa. Mbʋ́ pʋyɔɔ yɔ, Ɛsɔ ya-mɩ se mɩ nɛ lɛlaa ɩwɛɛ laŋhɛzɩyɛ taa. 16Pʋ-yɔɔ lɛ, halʋ weyi ña ŋwɛnɩ lidaʋ Krɩstʋ yɔɔ yɔ, ŋlabɩ ɛzɩma ŋtɩlɩ se ŋpɩzɩɣ ŋya ña-walʋ ñʋʋ? Piyele abalʋ weyi ña ŋwɛnɩ lidaʋ Krɩstʋ yɔɔ yɔ, ñalabɩ ɛzɩma ŋtɩlɩ se ŋpɩzɩɣ ŋya ña-halʋ ñʋʋ?

Pʋwɛɛ se paa weyi ɛwɛɛ ɛzɩ ɛɛwɛʋ nɛ pʋcɔ Ɛsɔ yaa-ɩ yɔ

17Piyele tɔm lɛɛtʋ tɩŋa payɩ taa lɛ, pʋwɛɛ se paa weyi ɛcaɣ wezuu ɛzɩ Kɩpaɣlʋ haʋ-ɩ yɔ nɛ ɛwɛɛ ɛzɩ ɛɛwɛʋ nɛ pʋcɔ Ɛsɔ yaa-ɩ yɔ. Paɣtʋ tʋnɛ manɖʋʋ Yesu aŋgba tɩŋa taa ñɩma. 18Ɛzɩ yee paapɛlɩ nɔɔyʋ nɛ pʋcɔ Ɛsɔ yaa-ɩ yɔ, pʋwɛɛ se ɛwɛɛ ḿbʋ́. Yee pataapɛlɩ nɔɔyʋ nɛ pʋcɔ Ɛsɔ yaa-ɩ yɔ, pɩfɛyɩ se ɛtɔ se pɛpɛlɩ-ɩ. 19Pɛpɛlɩ-ŋ yaa pɛtɛpɛlɩ-ŋ yɔ, pɩfɛyɩ wazaɣ nakɛyɛ. Ɛlɛ́, mbʋ́ pʋwɛ wazaɣ yɔ lɛ Ɛsɔ paɣtʋ yɔɔ ɖɔm. 20Pʋwɛɛ se paa weyi ɛwɛɛ ɛzɩ ɛɛwɛʋ nɛ pʋcɔ Ɛsɔ yaa-ɩ yɔ. 21Ɛzɩ yee yom ŋŋkɛwa nɛ pʋcɔ ɛya-ŋ yɔ, taahʋʋ natʋyʋ. Ɛlɛ́, yee pɩha-ŋ waɖɛ se ŋwɛɛ ña-tɩ yɔɔ yɔ, ñaɣ pana. 22Mbʋ́ pʋyɔɔ yɔ, weyi ɛɛkɛ yom nɛ pʋcɔ Kɩpaɣlʋ yaa-ɩ yɔ, ɛwɛ ɛ-tɩ yɔɔ ɛ nɛ Kɩpaɣlʋ ɛnʋ pɛ-kpɛndʋʋ taa. Đɔɖɔ lɛ, weyi ɛɛwɛ ɛ-tɩ yɔɔ nɛ pʋcɔ Krɩstʋ yaa-ɩ yɔ, ɛpɩsɩ Krɩstʋ ɛnʋ e-yom. 23Ɩkɛ ɛyáa mbá Ɛsɔ yabɩ-wɛ yɔ. Pʋ-yɔɔ lɛ, ɩtaapɩsɩ mɩ-tɩ ɛyáa yomaa. 24Taabalaa, pʋwɛɛ se paa weyi ɛwɛɛ Ɛsɔ ɛsɩndaa ɛzɩ ɛɛwɛʋ nɛ pʋcɔ ɛ́yáa-ɩ yɔ.

Aɖamɛɛ tɔm

25Aɖamɛɛ tɔm lɛ, Kɩpaɣlʋ taɖʋ-m se meheyi-mɩ natʋyʋ. Weyi ma ɛlabɩ lootiye nɛ pʋmʋna se ɛyʋ ɛta-m liu yɔ, ma-maɣmaɣ ma-lɩmaɣza meheyiɣ-mɩ. 26Ɩɩnaɣ mbʋ́ mamaɣzɩɣ se pʋwɛ ɖeu yɔ: alɩwaatʋ kaɖɛ ñɩndʋ ndʋ́ ɖɩwɛ tɩ-taa lɛɛlɛɛyɔ yɔ tɩ-yɔɔ lɛ, pɩkɩlɩ wee wee se ɛyʋ ɛcaɣ ɛɖanɛ ḿbʋ́. 27Yee ŋtɛm halʋ kpaɣʋ yɔ, taaɖɔɔnɩ-ɩ. Yee ŋtakpaɣda yɔ, taacazɩ kpaɣʋ. 28Ɛlɛ́, paa ŋɖʋwa se ŋkpakɩɣ halʋ yɔ, ŋtala kɩwɛɛkɩm. Paa pɛlɛ ɛɖʋwa se ɛwalɩɣ yɔ, ɛtala kɩwɛɛkɩm ɖɔɖɔ. Ɛlɛ́, mbá pakpakɩɣ halaa yaa pawalɩɣ yɔ, pɔkɔŋ tɔɔʋ kʋñɔŋ pe-wezuu caɣʋ taa. Kʋñɔŋ ŋ́gʋ́ kɩ-taa me-liu wɛɛ se malɩzɩ-mɩ.

29Taabalaa, ɩɩnaɣ ndʋ́ meheyiɣ-mɩ yɔ: alɩwaatʋ kazɩ pazɩ yem. Pʋ-yɔɔ lɛ, pɩkpaɣʋnɩ lɛɛlɛɛyɔ nɛ pɩɖɛɣ yɔ, pʋwɛɛ se mbá pakpaɣ halaa yɔ, pacaɣ wezuu ɛzɩ aɖamɛɛ yɔ. 30Mbá pewiliɣ yɔ, pacaɣ wezuu ɛzɩ paawiliɣ yɔ. Mbá pɛwɛ laŋhʋlʋmɩyɛ taa yɔ, pacaɣ wezuu ɛzɩ pɛfɛyɩ laŋhʋlʋmɩyɛ taa yɔ nɛ mbá payakɩ yɔ, paba ñacaɣ wezuu ɛzɩ pɩtɛkɛ ḿbá tɩnɩ mbʋ́ payaba yɔ. 31Mbá pakpaɣ kedeŋa yɔɔ cɩnɛ ñɩm nɛ palakɩnɩ tʋmɩyɛ yɔ, pataaɖʋ pa-lɩmaɣza pʋ-yɔɔ. Mbʋ́ pʋyɔɔ yɔ, alɩwaatʋ ndʋ́ pɩkazaa se kedeŋa ŋgá ɩnaɣ ɛzʋnɔ yɔ kɛtɛ yɔ, tɩtɔɖɔɔ.

32Ŋgʋ́, me-liu taawɛɛ se mɩ-lɩmaɣza ɛkʋ-mɩ. Ɛɖanɛ lɛ, Kɩpaɣlʋ tʋmɩyɛ lɩmaɣza kʋʋnɩ-ɖɩ. 33Ɛlɛ́, weyi ɛkpaɣ halʋ yɔ, kedeŋa yɔɔ cɩnɛ lɩmaɣza kʋʋnɩ-ɩ. Ɛñɩnɩɣ se ɛla mbʋ́ pɩkɛdɩnɩ ɛ-halʋ yɔ. 34Ɛwɛ cenje. Đɔɖɔ lɛ, pɛlɛ yaa halʋ weyi ɛfɛyɩnɩ walʋ yɔ, Kɩpaɣlʋ tʋmɩyɛ lɩmaɣza kʋʋnɩ-ɩ. Mbʋ́ pʋyɔɔ yɔ, ɛkpaɣ ɛ-tɩ pilim nɛ ɛha Ɛsɔ. Weyi ɛwalaa yɔ, kedeŋa yɔɔ cɩnɛ lɩmaɣza kʋʋnɩ-ɩ. Ɛñɩnɩɣ se ɛla mbʋ́ pɩkɛdɩnɩ ɛ-walʋ yɔ.

35Mancaɣ se piɖeni-mɩ yɔɔ mɔyɔɔdʋʋ ḿbʋ́. Pɩtɛkɛ nʋmɔʋ manɖɩkɩ-mɩ. Mancaɣ se ɩcaɣ wezuu ɛzɩ pʋmʋnaʋ yɔ nɛ ɩtɩŋ Kɩpaɣlʋ wayɩ nɛ mɩ-laŋɩyɛ tɩŋa pilim.

Ɖaŋnaa mbá pekiziɣ ɖama kpaɣʋ yɔ, pɔ-tɔm

36Yee evebu nɔɔyʋ ɛwɛnɩ ɖaŋ nɛ ɛɖʋ alɩwaatʋ ndʋ́ ɛkpakɩɣ-ɩ yɔ, nɛ pʋwayɩ ɛlabɩ-ɩ liu nɛ ɛɛpɩzɩɣ se ɛcaɣ nɛ pɩtalɩ ḿbʋ́ yɔ, ɛpɩzɩɣ ɛkpaɣ-ɩ ɛzɩ e-liu wɛʋ yɔ: ɛtala kɩwɛɛkɩm nabʋyʋ. 37Ɛlɛ́, yee pɩtalɩɩnɩ nɔɔyʋ cɔlɔ nɛ evebu maɣmaɣ ɛɖʋnɩ ɛ-taa kpem se ɛɛkpakɩɣ ɛ-ɖaŋ se ɛpɩzɩɣ ɛcaɣ ḿbʋ́ nɛ ɛ́ɖɔ́kɩ ɛ-tɩ yɔ, ɛlabɩ camɩyɛ. 38Pʋ-yɔɔ lɛ, weyi ɛkpakɩɣ ɛ-ɖaŋ yɔ, ɛlabɩ camɩyɛ. Ɛlɛ́, weyi ɛɛkpakɩɣ ɛ-ñɩnʋ yɔ, ɛlabɩ camɩyɛ nɛ pɩkɩlɩ.

Lelaa tɔm

39Halʋ ɛtɛm walʋʋ abalʋ yɔ, pʋwɛɛ se ɛwɛɛ ɛ-yɔɔ ḿbʋ́ alɩwaatʋ ndʋ́ abalʋ ɛnʋ ɛwɛnɩ ɛ-ɛsɛ yɔ. Yee abalʋ ɛnʋ ɛsɩba yɔ, ɛpɩzɩɣ ɛwalɩ weyi e-liu wɛɛ yɔ. Ɛlɛ́, pʋwɛɛ se pʋdʋ ɛkɛ weyi ɛ nɛ Kɩpaɣlʋ pɛkpɛndaa yɔ. 40Ma lɛ, mamaɣzɩɣ se yee ɛcaɣ ḿbʋ́ yɔ, ɛ-laŋɩyɛ hʋlʋmʋʋ nɛ pɩkɩlɩ ɛzɩ ɛɛɖaɣnɩ walʋʋ yɔ. Manawa ɖɔɖɔ se Fezuu Kiɖeɖeu heyini-m ndʋ́ mɔyɔɔdɩ ḿbʋ́ yɔ.

Currently Selected:

1 Kɔrɛntɩ 7: KABI

Highlight

Copy