1 Kɔrɛntɩ 6
6
Đama tɔm hʋnaʋ Krɩstʋ ñɩma taa
1Yee tɔm ɛwɛ mɩ-taa nɔɔyʋ nɛ ɛ-taabalʋ pɛ-hɛkʋ taa lɛ, pɩlabɩ ɛzɩma nɛ pʋdʋ woki mbá Ɛsɔ tapɩsɩ-wɛ kʋtʋʋzaa yɔ pɔ-cɔlɔ se pahʋʋ-wɛ-tʋ nɛ eewoki Ɛsɔ ñɩma cɔlɔ? 2Ɩtatɩlɩ se Ɛsɔ ñɩma kɔŋnɩ hʋnaʋ kedeŋa ñɩma tɔm naa we? Yee mɩ pʋwɛɛ se ɩhʋʋnɩ kedeŋa ñɩma tɩŋa payɩ lɛ, pɩlabɩ ɛzɩma ɩɩpɩzɩɣ ɩhʋʋ tɔm cikpetu yɔ? 3Ɩtatɩlɩ se ɖɩkɔŋ Ɛsɔ tiyiyaa tɔm hʋnaʋ naa we? Yee ḿbʋ́ lɛ, ɛzɩma ɖɩɩpɩzɩɣ ɖɩhʋʋ kedeŋa yɔɔ cɩnɛ tɔm yɔ? 4Pɩlabɩ ɛzɩma nɛ yee tɔm natʋyʋ ɛwɛ mɩ-taa nɔɔyʋ nɛ ɛ-taabalʋ pɛ-hɛkʋ taa lɛ, ɛyáa mbá Yesu ŋgbɛyɛ taa ñɩma takpaɣ-wɛ payaa pʋyʋ yɔ, pɔ-cɔlɔ powoki se pahʋʋ-wɛ-tʋ? 5Fɛyɛ ɛɛkpaɣ-mɩ yaa we? Lɔŋsɩnɖʋ kʋɖʋm nɔɔyʋ fɛyɩ mɩ-hɛkʋ taa se ɛpɩzɩɣ ɛhʋʋ ɛ-taabalaa mɩ mɩ-tɔm naa we? 6Đenɖe ɛzɩ pɩɩla ḿbʋ́ lɛ, powokini pɔ-tɔm mbá pɛfɛyɩnɩ lidaʋ Krɩstʋ yɔɔ yɔ pɔ-cɔlɔ se pahʋʋ-wɛ-tʋ.
7Yee tɔm natʋyʋ ɛtɩɩwɛ mɩ-hɛkʋ taa se pahʋʋ-tʋ yɔ, pɩwɩlɩɣ se ɩtɛm tɔlʋʋ kpem. Pɩlabɩ ɛzɩma ɩɩpɩzɩɣ se ɩɖɔkɩ mɩ-tɩ alɩwaatʋ ndʋ́ nɔɔyʋ lakɩ-mɩ kɩdɛkɛdɩm yaa ɛmɩlɩ mɩ-pʋyʋ yɔ? 8Halɩ mɩlakɩnɩ lɛlaa kɩdɛkɛdɩm nɛ ɩmɩlɩɣ-wɛ. Ŋgʋ́, pɛkɛ mɩ-taabalaa! 9Ɩtatɩlɩ se kɩdɛkɛdɩm laɖaa ɛɛkaɣ sʋʋ Ɛsɔ Kewiyaɣ taa yaa we? Ɩtaacɛtɩ mɩ-tɩ: acɛyɛ laɖaa yaa sɩɩnaa layaa yaa acɛyɛ laɖaa yaa abalaa mbá pacaɣ ɖama yɔ 10yaa mɩ́láa yaa kujoŋjoŋ tɩnaa yaa sʋlʋm kpaŋɩyaa yaa mbá patʋʋ ɛyáa yɔ yaa mɔntɔkɩnɩ mon-ɖoŋwaa paakaɣ sʋʋ Ɛsɔ Kewiyaɣ taa. 11Ḿbʋ́ mɩ-taa lɛlaa lakaɣ. Ɛlɛ́ lɛɛlɛɛyɔ, Ɛsɔ ñalɩ mɩ-kɩwɛɛkɩm nɛ ɛpɩsɩ-mɩ ɛ-ñɩma nɛ pɩtɩŋnɩ e-Fezuu Kiɖeɖeu yɔɔ nɛ ɩkɛ kʋtʋʋzaa ɛ-ɛsɩndaa Kɩpaɣlʋ Yesu Krɩstʋ yɔɔ.
Ɛyʋ tomnaɣ kɛ Fezuu Kiɖeɖeu ɖɩɣa
12Toovenim lɛ: «Pɩha-ɖʋ waɖɛ se ɖɩla pɩtɩŋa,» ɛlɛ́, pɩtɛkɛ pɩtɩŋa pʋwɛnɩ wazaɣ. «Pɩha-ɖʋ waɖɛ se ɖɩla pɩtɩŋa,» ɛlɛ́, ɖiiyeki se nabʋyʋ ɛpɩsɩ-ɖʋ pu-yomaa. 13Meheyiɣ-mɩ se: «Tɔɔnasɩ yɔɔ lotu wɛɛ nɛ lotu ñɛwɛɛ tɔɔnasɩ yɔɔ.» Paa ḿbʋ́ yɔ, Ɛsɔ kɔŋ pa-naalɛ yɔkʋʋ. Pɩtɛkɛ acɛyɛ yɔɔ palabɩ tomnaɣ: palabɩ-kɛ se kawazɩ Kɩpaɣlʋ nɛ ɛcɔnɩ kɔ-yɔɔ. 14Đɔɖɔ lɛ, Ɛsɔ weyi efezi Kɩpaɣlʋ nɛ sɩm taa yɔ, ɛkɔŋ-ɖʋ fezuu ɖɔɖɔ nɛ e-ɖoŋ.
15Ɩtatɩlɩ se mi-tomnasɩ kɛ Krɩstʋ tomnaɣ pilinzi naa we? Pʋwɛ ɖeu se pakpaɣ Krɩstʋ tomnaɣ piliŋa nɛ pɛcɛlɩ halʋ weyi ɛlakɩ acɛyɛ yɔ yaa we? Aayɩ! Pɩfɛyɩ ɖeu ḿbʋ́ kpem. 16Ɩtatɩlɩ ɖɔɖɔ se weyi ɛca halʋ weyi ɛlakɩ acɛyɛ yɔ, ɛ nɛ ɩ po-tomnasɩ pɩsɩ kʋɖʋmaɣ naa we? Mbʋ́ pʋyɔɔ yɔ, pama Ɛsɔtɔm Takayaɣ taa se: «Pa-naalɛ papɩsɩɣ tomnaɣ kʋɖʋmaɣ.» 17Ɛlɛ́, weyi ɛ nɛ Kɩpaɣlʋ pɛkpɛndɩɣ yɔ, ɛ nɛ ɩ pa-kalɩzasɩ pɩsɩ kʋɖʋmaɣ. 18Pʋ-yɔɔ lɛ, ɩtaatɩɩlabʋ acɛyɛ kpem. Kɩwɛɛkɩm lɛɛbʋ mbʋ́ ɛyáa lakɩ yɔ, piitukuuni po-tomnasɩ. Ɛlɛ́, weyi ɛlakɩ acɛyɛ yɔ, ɛwɛɛkɩɣ ɛ-maɣmaɣ e-tomnaɣ. 19Ɩtatɩlɩ se mi-tomnaɣ lɛ Fezuu ŋgʋ́ Ɛsɔ ha-mɩ nɛ kɩwɛɛ mɩ-taa yɔ kɩ-ɖɩɣa naa we? Pɩtɛkɛ mɩtɩnɩ mɩ-tɩ. 20Mbʋ́ pʋyɔɔ yɔ, ɩkɛ ɛyáa mbá Ɛsɔ yabɩ-wɛ yɔ. Pʋ-yɔɔ lɛ, ɩkpaɣ mi-tomnasɩ nɛ ɩɖʋnɩ Ɛsɔ hɩɖɛ.
Currently Selected:
1 Kɔrɛntɩ 6: KABI
Highlight
Share
Copy
Want to have your highlights saved across all your devices? Sign up or sign in
