1 Kɔrɛntɩ 5
5
Krɩstʋ ñɩma nabɛyɛ lakɩ ɛzaɣ́tʋ Kɔrɛntɩ
1Pɔyɔɔdʋʋ paa le se mɩ-taa nabɛyɛ lakɩ acɛyɛ. Halɩ paanaɣ wɛtʋ ńdʋ́ mbá paañaŋ Krɩstʋ yɔ pɛ-hɛkʋ taa. Pɔyɔɔdʋʋ se mɩ-taa lɛlʋ wɛɛ ɛsʋʋnɩ ɛ-caa halʋ. 2Pɩtasɩ ɖɔɖɔ lɛ, ɩwɛɛ ɩkpazɩɣ mɩ-tɩ. Ŋgʋ́, pɩɩwɛɛ se mɩ-ɛsɛ ɛñɩŋ nɛ ɩɖɔɔnɩ weyi ɛlabɩ lakasɩ ńzɩ́ yɔ mɩ-ŋgbɛyɛ taa. 3Ma lɛ, mɛnfɛyɩ mɩ-cɔlɔ, ɛlɛ́, mɛwɛ mɩ-cɔlɔ ma-lɩmaɣza taa. Pʋ-yɔɔ mɛntɛm weyi ɛlabɩ ɛzaɣ́tʋ ńdʋ́ yɔ ɛ-tɔm kʋʋ ɛzɩ maawɛɛ mɩ-cɔlɔ peeɖe yɔ. 4Alɩwaatʋ ndʋ́ ikpeɣliɣ tɔm ńdʋ́ tɩ-yɔɔ nɛ mɛwɛ mɩ-cɔlɔ ma-lɩmaɣza taa yɔ, Kɩpaɣlʋ Yesu ɖoŋ wɛɣ ɖɔ-cɔlɔ. 5Peeɖe ɖɩɖʋzʋʋ pʋdʋ Satanɩ nesi taa nɛ ɛ́lɛ́ nuuti e-tomnaɣ nɛ Ɛsɔ ya ɛ-kalɩzaɣ ñʋʋ kɩyakʋ ŋgʋ́ Kɩpaɣlʋ hʋʋnɩ ɛyáa tɔm yɔ.
6Pɩfɛyɩ ɖeu se ɩkpazɩ mɩ-tɩ. Ɩtatɩlɩ se potuu eduuye se: «Sɔsɔɔna pazɩ yekina nɛ somtu huúú yaa we?» 7Pʋwɛɛ se ɩlɩzɩ kɩwɛɛkɩm mbʋ́ pʋwɛ mɩ-hɛkʋ taa yɔ, mbʋ́ pʋyɔɔ yɔ, pʋwɛ ɛzɩ sɔsɔɔna yɔ. Peeɖe ɩwɛɣ cɩɖɩcɩɖɩ ɛzɩ somtu ndʋ́ tɩ-taa fɛyɩ sɔsɔɔna yɔ. Toovenim lɛ, ɩtɛm wɛʋ ḿbʋ́. Mbʋ́ pʋyɔɔ yɔ, pala Krɩstʋ ɖɔ-yɔɔ ɛzɩ ɖe-heɣa ŋgá ɖʋkʋʋ se ɖɩtɔɔnɩ Paska Kazandʋ yɔ. 8Pʋ-yɔɔ lɛ, ɖɩtɔɔ ɖa-kazandʋ ńdʋ́. Ɛlɛ́, pʋwɛɛ se ɖɩtɔɔ-tʋ nɛ tindine nɖɩ́ ɖɩ-taa fɛyɩ sɔsɔɔna yɔ. Pʋ-tɔbʋʋ se ɖɩwɛɛ cɩɖɩcɩɖɩ nɛ ɖɩkɛ toovenim tɩnaa. Điyele kɩwɛɛkɩm nɛ acɛyɛ mbá ɖɩlakaɣ yɔ, mbʋ́ pʋyɔɔ yɔ, pɛwɛ ɛzɩ sɔsɔɔna yɔ.
9Takayaɣ ŋgá maama-mɩ yɔ, maaheyi-mɩ ka-taa se mɩ nɛ acɛyɛ laɖaa ɩtaaɖɔ. 10Mɔyɔɔdʋʋ ḿbʋ́ yɔ, pɩtatɩɩkɛʋ mbá pɛfɛyɩ mɩ-ŋgbɛyɛ taa yɔ, pɔ-tɔm mɔyɔɔdʋʋ. Mbʋ́ pʋyɔɔ yɔ, yee nɔɔyʋ ɛɛcaɣ se ɛ nɛ acɛyɛ laɖaa yaa kujoŋjoŋ tɩnaa yaa mɩ́láa yaa sɩɩnaa layaa mbá pɛwɛ kedeŋa yɔɔ cɩnɛ yɔ pɛwɛɛ yɔ, pʋwɛɛ se ɛkʋyɩ kedeŋa yɔɔ cɩnɛ kpem. 11Mbá pɛwɛ mɩ-ŋgbɛyɛ taa yɔ, ḿbá mɔyɔɔdʋʋ. Yee nɔɔyʋ ɛtɔm se ɛkɛ Krɩstʋ ŋgbɛyɛ taa tʋ nɛ ɛlakɩ acɛyɛ yaa kujoŋjoŋ yaa ɛlaɣ sɩɩnaa yaa ɛtʋʋ ɛyáa yaa ɛkpaŋɩɣ sʋlʋm yaa ɛmɩlɩɣ yɔ, mɩ nɛ pɩtɛ ɛyʋ ɩtaaɖɔ, paa tɔɔnaɣ yɔ, ɩtaakpɛndɩ. 12-13Pɩtɛkɛ ma pʋmʋnaa se mahʋʋnɩ mbá pɛtɛkɛ Yesu ŋgbɛyɛ taa ñɩma yɔ. Ɛsɔ kɔŋna hʋʋ mbá pɛtɛkɛ ɖɩ-taa ñɩma yɔ pɔ-tɔm. Ɛlɛ́, mbá pɛkɛ ŋgbɛyɛ taa ñɩma yɔ, ḿbá pʋwɛɛ se ɖɩhʋʋna. Pʋ-yɔɔ lɛ, ɩla ɛzɩ pamaʋ Ɛsɔtɔm Takayaɣ taa yɔ. Pamawa se: «Ɩɖɔɔnɩ ɛzaɣ́ʋ mɩ-hɛkʋ taa yɔ.»
Currently Selected:
1 Kɔrɛntɩ 5: KABI
Highlight
Share
Copy
Want to have your highlights saved across all your devices? Sign up or sign in
