1 Kɔrɛntɩ 8

Kɩlaʋ nandʋ tɔm

1Lɛɛlɛɛyɔ, pʋcɔ ɖɩyɔɔdɩ kɩlaʋ nandʋ tɔm lɛ, meheyiɣ-mɩ se pɩkɛ toovenim se: «Đatɩŋa payɩ ɖɩsɩm lɛɣtʋ.» Ɛlɛ́, lɛɣtʋ ńdʋ́ tiyeki nɛ ɛyʋ kpazɩ ɛ-tɩ. Ŋgʋ́, sɔɔlɩm ñeyeki nɛ ɛyʋ tɛzɩ pɩʋ e-lidaʋ wɛnaʋ taa. 2Weyi ɛmaɣzɩɣ se ɛsɩm nabʋyʋ yɔ, ɛtasɩmda nɛ pɩtalɩ ɛzɩ pʋpɔzʋʋ se ɛtɩlɩ yɔ. 3Ŋgʋ́, yee nɔɔyʋ ɛsɔɔlɩ Ɛsɔ yɔ, Ɛsɔ sɩm-ɩ.

4Lɛɛlɛɛyɔ, mancaɣ se mɔyɔɔdɩ kɩlaʋ nandʋ tɔɔʋ tɔm. Đɩnawa se agɔlɩma fɛyɩnɩ wazaɣ nakɛyɛ kedeŋa yɔɔ cɩnɛ. Đɩnawa ɖɔɖɔ se Ɛsɔ kʋɖʋm koŋ wɛna. 5Toovenim lɛ, nabɛyɛ kpakɩɣ ɛsɔdaa nɛ tataa wondu natʋyʋ se tɩkɛ pɛ-ɛsɔnaa. Nɛ ɛyáa ḿbá, pamaɣzɩɣ toovenim taa se ɛsɔnaa ɖɔwa nɛ kɩpaɣlaa wɛɛ ndɩ ndɩ. 6Paa ḿbʋ́ yɔ, ɖa ɖanawa se Ɛsɔ kʋɖʋm koŋ wɛna. Ɛnʋ lɛ ɖa-Caa. Ɛnʋ labɩnɩ pɩtɩŋa payɩ, ɛnʋ tɩnɩ-ɖʋ ɖe-wezuu caɣʋ taa. Kɩpaɣlʋ kʋɖʋm koŋ ɖɔɖɔ ɖɩwɛna. Ɛnʋ lɛ Yesu Krɩstʋ weyi Ɛsɔ tɩŋnɩ ɛ-yɔɔ nɛ ɛla mbʋ́ pɩtɩŋa payɩ pʋwɛ kedeŋa yɔɔ cɩnɛ yɔ. Ɛnʋ hanɩ-ɖʋ wezuu.

7Ɛlɛ́, ɛyáa tɩŋa tatɩlɩ ḿbʋ́. Mbʋ́ pʋyɔɔ yɔ, agɔlɩma tɔm sʋnɩ mɩ-taa nabɛyɛ siŋŋ nɛ pɔtɔkɩ kɩlaʋ nandʋ nɛ pamaɣzɩɣ se agɔlɩma ana awɛnɩ ɖoŋ pɔ-yɔɔ. Ɛzɩma mbʋ́ patapɩɩ Ɛsɔ nʋmɔʋ taa nɛ pa-lɩmaɣza fɛyɩ a-ɖeɖe yɔ pʋ-yɔɔ lɛ, pamaɣzɩɣ se papɩsɩɣ azaɣ́a tɔɔnaɣ ŋgá kɔ-yɔɔ. 8Ŋgʋ́, pɩtɛkɛ tɔɔnaɣ nakɛyɛ tɔɔʋ yekina nɛ ɖɩpɩsɩ ɛyáa kɩbama Ɛsɔ ɛsɩndaa. Paa ɖɩtɔɔ-kɛ yaa ɖɩtɔtɔɔ-kɛ yɔ, pɩɩsɔzʋʋ-ɖʋ pʋyʋ.

9Paa ḿbʋ́ yɔ, ɩkpa mɩ-tɩ se waɖɛ nɖɩ́ pɩha-mɩ se ɩtɔɔ kɩlaʋ nandʋ yɔ, ɖitaayele nɛ mbá patapɩɩ Ɛsɔ nʋmɔʋ taa yɔ, pa-taa nɔɔyʋ tɔlɩ. 10Mbʋ́ pʋyɔɔ yɔ, weyi ña ŋsɩm ḿbʋ́ yɔ, yee ŋcaɣ agɔlɩma naŋ nakʋyʋ tɛɛ nɛ ŋtɔkɩ kɩlaʋ nandʋ nɛ weyi ɛtapɩɩ Ɛsɔ nʋmɔʋ taa yɔ ɛna-ŋ yɔ, pɩɩlakɩ ɛ́lɛ́ ɖɔɖɔ se ɛtɔɔ-tʋ yaa we? 11Peeɖe mbʋ́ ŋsɩma yɔ, pilesiɣ weyi ɛtapɩɩ Ɛsɔ nʋmɔʋ taa yɔ. Ŋgʋ́, ɛkɛ ña-taabalʋ weyi Krɩstʋ sɩbɩ ɛ-yɔɔ yɔ. 12Yee ɩyʋsʋʋnɩ mɩ-taabalaa mbá patapɩɩ Ɛsɔ nʋmɔʋ taa yɔ ḿbʋ́ nɛ piliɣtiɣ pa-lɩmaɣza yɔ, Krɩstʋ maɣmaɣ ɩyʋsɩnaa. 13Pʋ-yɔɔ lɛ, yee tɔɔnaɣ ŋgá ka-taa wɛ kɩlaʋ nandʋ yɔ kɔ-tɔɔʋ eyekina se man-taabalʋ ɛtɔlɩ Ɛsɔ nʋmɔʋ taa yɔ, maatasɩɣ nandʋ tɔɔʋ kaʋ.

Currently Selected:

1 Kɔrɛntɩ 8: KABI

Highlight

Copy