Síorach 33
33
1Má bhíonn eagla ar dhuine roimh an Tiarna,
ní thiocfaidh aon olc ina bhóthar,
ach déanfaidh seisean é a fhuascailt arís agus arís eile.
2Ní fuath leis an saoi an dlí;
is cuma nó long i stoirm an té a bhíonn ag fimínteacht faoi.
3Cuirfidh an t‑eagnaí a mhuinín sa dlí,
mar tá an dlí chomh hiontaofa le horacal dar leis.
4Bíodh do chuid cainte ullamh agat agus gheobhaidh tú éisteacht;
cruinnigh d'fhoghlaim agus tabhair do fhreagra.
5Is cuma nó roth trucaile croí an amadáin,
agus is cuma a smaointe nó mol ag casadh.
6Is cuma stail thnúthach nó cara searbhasach;
bíonn sé ag seitreach cibé a bhíonn ag marcaíocht air.
Éagothroime
7Cén fáth ar fearr lá ná lá eile
ós rud é gurb ón ngrian solas gach lae sa bhliain?
8In aigne Dé a rinneadh an difir eatarthu;
agus eisean a dheighil séasúir agus féilte ó chéile.
9Rinne sé cuid díobh a mhóradh agus a naomhú,
agus d'áirigh sé a thuilleadh díobh ina ndálaigh.
10As an talamh a d'eascair gach duine,
agus as an deannach a cruthaíodh Ádhamh.
11Dhifrigh an Tiarna óna chéile iad in iomláine a eolais,
agus cheap sé a mbealaí ar leith dóibh.
12Bheannaigh agus mhóraigh sé cuid díobh;
naomhaigh agus dhruid ina chóngar féin a thuilleadh díobh.
Chuir sé mallacht ar chuid eile acu agus d'ísligh iad,
agus thiomáin sé as a láithreacha iad.
13Dála na cré i láimh an chriadóra,
[le múnlú] mar is mian leis,
mar sin atá an duine i láimh an té a chum é,
le tabhairt dó de réir mar a bheartaíonn sé.
14Seasann an mhaith in aghaidh an oilc,
agus an bheatha in aghaidh an bháis;
a dhálasan leis an bpeacach in aghaidh an fhíréin.
15Caith súil mar sin ar oibreacha uile an Té is Airde;
táid ina gcúplaí ceann in aghaidh an chinn eile. 16Ba mise ba dhéanaí a bhí ag faire
mar a bheadh gráinseoir i ndiaidh na meithile.
17 De dheonú Dé bhain mé an tosach de chách;
agus líon mé mo chantaoir mar a dhéanfadh fear den mheitheal.
18 Meabhraigh nach ar mo shon féin amháin a rinne mé saothar,
ach ar son gach duine atá ag lorg teagaisc.
19 Éistigí liom, a thaoiseacha an phobail,
agus sibhse, a cheannairí an chomhthionóil, tugaigí aird orm.
20 Ná tabhair ceannasaíocht ort féin do do mhac, do do bhean,
do do bhráthair ná do do chara, fad is beo duit.
Ná tabhair do chuid do dhuine eile,
le heagla go dtiocfá ar mhalairt aigne agus é a lorg ar ais.
Neamhspleáchas agus Daoirse
21 Fad a mhaireann tú agus go mbíonn an dé ionat,
ná lig d'aon duine d'áit a ghlacadh.
22 Óir is fearr do chlann a bheith ag lorg ort
ná go mbeadh do shúilse le láimh do mhac.
23 Bí i gceannas i do ghnóthaí go léir;
agus ná cuir smál ar do cháil.
24 An lá a thagann do shaol chun críche,
ar uair an bháis, ansin roinn d'oidhreacht.
25 Foráiste, bataí agus ualaí don asal;
arán, smacht, agus saothar don daor.
26 Fág an obair faoin daorán agus tóg féin go bog é;
má fhágann tú a lámha gan ghnó, rachaidh sé ar lorg na saoirse.
27 Déanfaidh cuing agus gad an muineál a chromadh;
don daor urchóideach tá ceapa agus pianta.
28 Cuir ag obair é chun nach n‑eireodh sé díomhaoin;
múineann an díomhaointeas a lán urchóide.
29 Cuir chun saothair é mar is dual;
mura ngéilleann sé, cuir meáchan lena gheimhle.
30 Ná héiligh an iomad ó aon duine,
agus ná déan aon bheart éaganta.
31 Mura bhfuil agat ach aon daor amháin, caith leis mar a dhéanfá leat féin,
óir beidh gá agat leis ó chroí.
32 Mura bhfuil agat ach aon daor amháin, caith leis mar a dhéanfá le bráthair,
mar beidh tú ag brath air, mar a bheifeá ort féin.
33 Má chaitheann tú go holc leis agus go n‑imíonn sé ar shiúl,
cén bealach a rachaidh tú á chuardach?
Currently Selected:
Síorach 33: ABN
Highlight
Share
Copy
Want to have your highlights saved across all your devices? Sign up or sign in
An Bíobla Naofa copyright © 1981 An Sagart. Úsáidtear le cead. Used by permission.